तपाईंको मसीही स्वतन्त्रताको प्रयोग बुद्धिमानीका साथ गर्नुहोस्
“स्वतन्त्र जस्तै भएर हिंड़, र तिमीहरूको स्वतन्त्रता [मा] . . . परमेश्वरको दासहरूझैं . . . चल।”—१ पत्रुस २:१६.
१. आदमले के स्वतन्त्रता गुमाए, र यहोवाले मानवजातिका लागि कुन स्वतन्त्रता पुनर्स्थापित गरी दिनु हुनेछ?
हाम्रा प्रथम माता-पिताले अदनको बगैंचामा पाप गर्दा तिनीहरूले आफ्ना छोरा-छोरीहरूका निम्ति एउटा उज्ज्वल पैतृक अधिकार—अर्थात् पाप र मृत्युबाट मुक्ति—गुमाइदिए। फलःस्वरूप, हामी सबै जन्मदेखि नै विनाश र मृत्युका दास भयौं। तथापि, खुशीको कुरा के हो भने, विश्वासी मानवहरूलाई एउटा अद्भुत स्वतन्त्रतामा पुनर्स्थापित गर्ने उद्देश्य यहोवाले रच्नु भएको छ। आज, असल हृदय भएकाहरू व्यग्रतासाथ त्यो समयको प्रतीक्षा गर्दछन् जब “परमेश्वरका छोराहरू प्रकट” हुनेछन् र तिनीहरू आफैले पनि “परमेश्वरको सन्तानको महिमाको स्वतन्त्रतामा विनाशको बन्धनबाट छुटकारा पाउनेछन्।”—रोमी ८:१९-२१.
‘प्रचार गर्नका लागि अभिषिक्त’
२, ३. (क) “परमेश्वरका छोराहरू” को हुन्? (ख) कुन अपूर्व सम्बन्धबाट तिनीहरूले आनन्द उठाउँछन्, र यसले गर्दा के जिम्मावारी तिनीहरूमाथि आउँछ?
२ “परमेश्वरका [यी] छोराहरू को हुन्?” तिनीहरू आत्माद्वारा अभिषिक्त येशूका भाइहरू हुन् जो स्वर्गीय राज्यमा उहाँसित शासकहरू हुनेछन्। यिनीहरू मध्येका प्रथम सदस्यहरू सा० यु० प्रथम शताब्दीका दौडानमा देखा परेका थिए। येशूले सिकाउनु भएका मुक्तिदायक सच्चाइलाई तिनीहरूले स्वीकार गरे, र सा० यु० ३३ को पेन्तिकोसदेखिन् तिनीहरूले ती महिमायुक्त विशेषाधिकारहरूमा हिस्सा लिए जसको वर्णन पत्रुसले यी शब्दहरूमा गरे: “तिमीहरू ता ‘चुनिएका वंश, राजकीय पूजाहारीगिरी, पवित्र जाति, परमेश्वरका निजी प्रजा हौ।’”—१ पत्रुस २:९क; यूहन्ना ८:३२.
३ परमेश्वरका निजी प्रजा हुन पाउनु—एउटा कस्तो अद्भुत आशिष हो! र परमेश्वरका यी अभिषिक्त पुत्रहरूमध्येबाट आजका आधुनिक समयमा बाँकी रहेका जनहरूले पनि परमेश्वरसित त्यस्तै पवित्र सम्बन्धको आनन्द उठाउँछन्। तर यस्ता उच्चतम विशेषाधिकारका साथसाथै जिम्मावारीहरू पनि आउँछन्। ती जिम्मावारीहरू मध्ये एउटाप्रति पत्रुसले यस प्रकार ध्यान आकर्षित गरेका छन्: “अन्धकारबाट उहाँको गजबको ज्योतिमा तिमीहरूलाई बोलाउनेको सर्वश्रेष्टता तिमीहरू देखाओ।”—१ पत्रुस २:९ख.
४. आफ्नो मसीही स्वतन्त्रतासित जोडिएको जिम्मावारीलाई अभिषिक्त मसीहीहरूले कसरी पूरा गरेका छन्?
४ के अभिषिक्त मसीहीहरूले परमेश्वरको सर्वश्रेष्ठतालाई चारैतिर फैलाउने जिम्मावारी पूरा गरेका छन्? गरेका छन्। १९१९ देखिन्का अभिषिक्त जनहरूबारे भविष्यवाणी गर्दै यशैयाले भने: “परमप्रभु परमेश्वरको आत्मा ममाथि छ, किनकि नम्रहरूलाई सुसमाचार सुनाउनलाई परमप्रभुले मलाई अभिषेक गर्नुभएको छ। मन भाँचिएकाहरूको हृदयलाई निको पार्नलाई, कैदमा परेकाहरूलाई स्वतन्त्रता र बन्धनमा परेकाहरूलाई छुटकाराको घोषणा गर्नलाई पठाउनुभएको छ। परमप्रभुको ग्रहणयोग्य वर्ष र हाम्रा परमेश्वरको बदला दिने दिनको घोषणा गर्नलाई।” (यशैया ६१:१, २) यो शास्त्र पद्यको विशेष पूर्ति येशूमा भएको थियो र उहाँकै उदाहरण अनुसरण गर्दै शेष अभिषिक्त जनहरूले स्वतन्त्रताको सुसमाचार बडो जोशका साथ अरूहरूलाई सुनाउँछन्।—मत्ती ४:२३-२५; लूका ४:१४-२१.
५, ६. (क) अभिषिक्त मसीहीहरूद्वारा गरिएका जोशिला प्रचारको परिणाम के भएको छ? (ख) ठूलो भीडकाहरूले के विशेषाधिकारहरू र जिम्मावारीहरूको आनन्द उठाउँछन्?
५ तिनीहरूको उत्साहपूर्ण प्रचारको फलःस्वरूप, यी पछिल्ला दिनहरूमा अरू भेडाहरूको एउटा ठूलो भीड विश्वमा देखा परेको छ। यहोवाको सेवा गर्नका निम्ति तिनीहरू सबै जातिहरूबाट आएर अभिषिक्त जनहरूसँग मिलेका छन्, र सत्यले तिनीहरूलाई पनि स्वतन्त्र तुल्याइ दिएको छ। (जकरिया ८:२३; यूहन्ना १०:१६) अब्राहाम जस्तै तिनीहरू विश्वासको आधारमा धर्मी ठहरिएका छन् र यहोवा परमेश्वरसित एउटा घनिष्ठ सम्बन्धमा बाँधिएका छन्। र राहाबजस्तै तिनीहरू धर्मी ठहरिनुको अर्थ आरमागेडोनमा तिनीहरूको बचाउ हुनु हो। (याकूब २:२३-२५; प्रकाश १६:१४, १६) तर यस प्रकारको उत्कृष्ट विशेषाधिकारहरूसित परमेश्वरको महिमाबारे अरूहरूलाई भन्ने जिम्मावारी पनि जोडिएको छ। त्यसैकारण त यूहन्नाले तिनीहरूलाई खुला रूपमा “ठूलो सोरले” यसो भन्दै परमेश्वरको प्रशंसा गरेको देखे: “‘सिंहासनमा विराजमान हुनुहुने हाम्रा परमेश्वर र थुमामा मुक्ति छ।’”—प्रकाश ७:९, १०, १४.
६ गएको वर्षमा, ठूलो भीडका हाल चालीस लाखभन्दा बढी सदस्यहरूले अभिषिक्त मसीहीहरूका शेष जनहरूका सानो समूह सँगसँगै यहोवाको महिमाको घोषणा गर्नमा करीब एक अरब घण्टा बिताए। तिनीहरूको आध्यात्मिक स्वतन्त्रताको सम्भवतः यो सर्वश्रेष्ठ सदुपयोग थियो।
“राजाको आदर गर”
७, ८. सांसारिक अख्तियारवालाहरूप्रति निभाउनु पर्ने कुन जिम्मावारी मसीही स्वतन्त्रतामा समावेश छ, र यस सम्बन्धमा, कुन गलत मनोवृत्ति हामीले राख्नु हुँदैन?
७ हाम्रो मसीही स्वतन्त्रतासित अरू जिम्मावारीहरू पनि समावेश छन्। ती मध्येका केही जिम्मावारीहरूलाई औंलाउँदै पत्रुसले लेखे: “सबै मानिसहरूलाई आदर गर। भाइ-बन्धुहरूलाई प्रेम गर। परमेश्वरसँग डराओ। राजाको आदर गर।” (१ पत्रुस २:१७) “राजाको आदर गर” भन्ने अभिव्यक्तिबाट के बोध हुन्छ?
८ “राजा” भन्नाले सांसारिक शासकहरू बोध हुन्छ। आज, संसारमा अख्तियारको अनादर गर्ने प्रवृत्ति प्रचलित छ, र यसको असर मसीहीहरूमाथि पनि सजिलैसित पर्न सक्तछ। “सारा संसार त्यस दुष्टको अधीनमा परेको” हुनाले, “राजालाई” आदर किन गर्ने भनी एक जना मसीहीले सोध्न सक्तछ। (१ यूहन्ना ५:१९) तिनले नहिचकिचाइकन असुविधाजनक कानुनहरूको अवहेलना गर्नसक्छन् र मौका परेमा करहरू पनि छल्न सक्छन्। तर यसो गर्नु, “जे सिजरका हुन्, सिजरलाई देओ” भनेर येशूले व्यक्त गर्नु भएको स्पष्ट आज्ञाको विपरीत हुनेछ। यसो गर्नु ‘दुष्टताको ओढनेले स्वतन्त्रतालाई ढाकेको जस्तै” हुनेछ।—मत्ती २२:२१; १ पत्रुस २:१६.
९. सांसारिक अख्तियारवालाप्रति आज्ञाकारी हुने दुईवटा ठोस कारणहरू के हुन्?
९ मसीहीहरूले अख्तियारवालाहरूको आदर गर्नै पर्छ र सापेक्षिक रूपमा भए तापनि, तिनको अधीनमा बस्न अनिवार्य छ। (प्रेरित ५:२९) किन? १ पत्रुसले २:१४, १५ मा पत्रुसले “बड़ा-हाकीमहरूको, जो खराब काम गर्नेहरूलाई बदला लिन र असल काम गर्नेहरूलाई प्रशंसा गर्न उनीबाट [परमेश्वरबाट] पठाइएका हुन्छन्” भनेका छन् र यसै सन्दर्भमा तिनले तीनवटा कारणहरू पेस गर्दछन्। सजाय पाउने डर मात्र पनि अख्तियारवालाको डर मान्ने यथेष्ट कारण हो। कुटा-मारी, चोरी, वा अरू कुनै पनि अपराधका निम्ति दण्ड-जुर्माना तिर्नु वा जेल जानु यहोवाका एक जना साक्षीका लागि कस्तो बेइज्जतीको कुरा हो! यस प्रकारको कुराको प्रसार कुनै कुनै व्यक्तिले कति रमाइ रमाइ गर्ने छ! यसको विपरीत, हामी सभद्र आज्ञा पालन गर्ने मानिसहरू हौं भनेर जसै सबैलाई थाह हुँदै जान्छ, निष्पक्ष प्रशासकहरूले हाम्रो प्रशंसा गर्ने छन्। परिणाम स्वरूप, सुसमाचार प्रचार गर्ने काममा हामीले अझ बढी स्वतन्त्रता पाउन सक्छौं। यसका साथै, ‘असल गरेरनै तिमीहरूले मूर्ख मानिसहरूको अज्ञानतालाई चूप गराउँछौं।’ (१ पत्रुस २:१५ख) अख्तियारवालाको आज्ञा मान्नु पर्ने यो दोस्रो कारण हो।—रोमी १३:३.
१०. सांसारिक अख्तियारवालाप्रति आज्ञाकारी हुने सबैभन्दा ठूलो कारण के हो?
१० तर यो भन्दा पनि अझै एउटा जोडदार कारण छ। अख्तियारवालाहरूलाई तिनीहरूले गर्ने कामकुराको अनुमति यहोवाले नै दिनु भएको हो। पत्रुसले भने झैं, राजनैतिक शासकहरू यहोवाबाट नै “पठाइएका” हुन्, र मसीहीहरू तिनीहरूका अधीनमा रहनु “परमेश्वरकै इच्छा” हो। (१ पत्रुस २:१५क) त्यसै प्रकार, प्रेरित पावल भन्दछन्: “अख्तियारहरूचाहिं परमेश्वरबाट खटिएका हुन्छन्।” त्यसकारण, अख्तियारवालाहरूको आज्ञा मान्ने प्रेरणा हामीले आफ्नो बाइबलद्वारा प्रशिक्षित अन्तसकरणबाट पाउँद छौं। तिनीहरूको अधीनमा रहन इन्कार गऱ्यौं भने हामीले “परमेश्वरको धार्मिक-विधानको विरोध गरेको” हुनेछौं। (रोमी १३:१, २, ५) जानाजानी परमेश्वरको धार्मिक-विधानको विरोध गर्ने इच्छा हामीमध्ये कसले गर्ला र? यसो गर्नु मसीही स्वतन्त्रताको कस्तो दुरुपयोग गर्नु हो!
‘भाइ-बन्धुहरूलाई प्रेम गर’
११, १२. (क) हाम्रा सङ्गी विश्वासीहरूप्रति निभाउनु पर्ने कुन जिम्मावारी हाम्रो मसीही स्वतन्त्रतासित जोडिएको छ? (ख) हामीले विशेषगरी को प्रति आफ्नो मायालु चासो व्यक्त गर्नुपर्दछ र किन?
११ पत्रुसको भनाइअनुसार एक जना मसीहीले “भाई-बन्धुहरूलाई प्रेम” गर्नु पर्छ। (१ पत्रुस २:१७) मसीही स्वतन्त्रतासित जोडिएको यो एउटा अर्को जिम्मावारी हो। हामीमध्ये धेरैजसो कुनै नकुनै मण्डलीका सदस्य हौं। यथार्थमा, हामी सबै नै एउटा अन्तर्राष्ट्रिय बन्धुत्वमा समावेश छौं। यी भाइहरूका लागि प्रेम दर्शाउनु हाम्रो स्वतन्त्रताको सदुपयोग गर्नु हो।—यूहन्ना १५:१२, १३.
१२ हाम्रो प्रेमको योग्य हुने मसीहीहरूको एउटा खास समूहलाई पावलले औंलाएर देखाएका छन्। तिनले भने: “तिमीहरूमाथि शासन गर्नेहरूका आज्ञाकारी होओ, र तिनीहरूका अधीनमा बस। किनकि लेखा दिनुपर्ने जस्तैगरी, तिमीहरूका प्राणको तिनीहरूले हेरचाह गर्छन्, यो तिनीहरूले आनन्दसाथ गरून्। दुःख मानेर होइन, किनकि त्यसबाट तिमीहरूलाई लाभदायक हुँदैन।” (हिब्रू १३:१७) मण्डलीमा अगुवाइ लिनेहरू प्राचीनहरू हुन्। यो साँचो हो कि तिनीहरू सिद्ध छैनन्। त्यसो भए तापनि, तिनीहरू परिचालक निकायबाट नियुक्त भएका हुन्। तिनीहरू आफ्नो उदाहरण- द्वारा र विचारशीलताका साथ अगुवाइ गर्दछन्, र तिनीहरूले हाम्रो प्राणको हेरचाह गर्ने जिम्मावारी पाएका छन्। यो कस्तो भारी जिम्मावारी हो! (हिब्रू १३:७) यो खुशीको कुरा हो कि, धेरैजसो मण्डलीहरूमा हितकारी र सहयोगात्मक वातावरण पाइन्छ, र यस प्रकारका मण्डलीहरूसँग मिलेर काम गर्न पाउनु प्राचीनहरूका निम्ति एउटा हर्षमय अनुभव हो। तर व्यक्तिहरूले सहयोग नगर्दा चाहिं अप्ठ्यारो पर्दछ। त्यसो हुँदा पनि प्राचीनहरूले आफ्नो काम गर्न त गर्छन्। तर पावलले भने जस्तै, तिनीहरू “दुःख मानेर” गर्दछन्। प्राचीनहरूलाई हामी कदापि पनि दुःखित् पार्न चाँहदैनौं! तिनीहरूले आफ्नो काममा आनन्द लिएको हामी चाहन्छौं ताकि तिनीहरूले हामीलाई बलियो पार्न सकून्।
१३. कुन कुन तरीकाहरूबाट हामीले प्राचीनहरूलाई सहयोग पुर्याउन सक्तछौं?
१३ प्राचीनहरूसित हामीले सहयोग गर्न सक्ने केही तरीकाहरू के हुन्? एउटा त राज्य सभा-गृहलाई सफा-सुघर राख्नमा मदत दिनु हो। अर्को चाहिं रोगी र अपाङ्गहरूलाई भेट गर्ने र मदत दिने काममा सहयोग गर्नु हो। यसबाहेक हामी एउटा बोझ हुनु नपरोस् भनेर आफै पनि आध्यात्मिक तौरमा बलियो रहने प्रयास गर्न सक्तछौं। हामी आफ्नै चालचलनद्वारा र अरूहरूले गरेका गम्भीर पापहरूबारे सूचना दिएर मण्डलीको नैतिक र आध्यात्मिक शुद्धता कायम राख्नमा सहयोग गर्नु पनि एउटा महत्त्वपूर्ण क्षेत्र हो।
१४. प्राचीनहरूले अनुशासनको कारबाई गर्दा हामीले कसरी सहयोग गर्नु पर्दछ?
१४ कहिलेकाहीं मण्डलीलाई शुद्ध राख्नका निम्ति पश्चाताप नगर्ने अधर्मीलाई प्राचीनहरूले बहिष्कार गर्नु पर्दछ। (१ कोरिन्थी ५:१-५) यसबाट मण्डलीको बचाव हुन्छ। यसले त्यो अधर्मीसमेतलाई मद्दत पुऱ्याउन सक्तछ। अक्सर यस प्रकारको अनुशासनले एक जना पापीलाई होशमा आउने मदत दिएको छ। तथापि, बहिष्कृत भएको व्यक्ति आफ्नो एउटा घनिष्ठ साथी वा सम्बन्धी हो भने नि? शायद त्यो बहिष्कृत व्यक्ति हाम्रो पिता वा माता वा छोरा वा छोरी नै होलान्। यस्तो हुँदा पनि के हामीले प्राचीनहरूले गरेका कारवाईको कदर गर्छौं? यसो गर्न गाह्रो हुन सक्छ। तर प्राचीनहरूको निर्णयलाई चुनौती दिंदै मण्डलीमा एउटा भ्रष्ट प्रभाव फैलाउने तत्त्व साबित भइ सकेको व्यक्तिसित आध्यात्मिक रूपमा सङ्गत गरी नै रहनु हाम्रो स्वतन्त्रताको कस्तो दुरुपयोग हो! (२ यूहन्ना १०, ११) यस्ता कुराहरूमा यहोवाका जनहरूले जुन प्रकारको सहयोग दिएका छन् त्यसका निम्ति तिनीहरू सामूहिक रूपमा प्रशंसनीय छन्। फलःस्वरूप, यस दूषित संसारमा पनि यहोवाको सङ्गठन विशुद्ध रहन्छ।—याकूब १:२७.
१५. कुनै एक जनाले गम्भीर पाप गर्दछ भने, उसले तुरुन्तै के गर्नु पर्छ?
१५ हामीले नै कुनै गम्भीर पाप गऱ्यौं भने नि? यहोवाले मन पराउनेहरूको वर्णन दाऊद राजाले यसरी गरे: “परमप्रभुको डाँड़ामा को उक्लनपाउला? र उहाँको पवित्र स्थानमा को उभिनपाउला? त्यहीनै, जसको हात निष्कलंक, र जसको हृदय शुद्ध छ। जसले आफ्नो मनलाई व्यर्थका कुरातिर लगाएको छैन, र छल-छामसँग किरिया हालेको छैन।” (भजनसंग्रह २४:३, ४) कुनै कारणवश अब हाम्रो ‘हात निष्कलंक र हृदय शुद्ध’ छैन भने हामीले तुरुन्तै कारबाई गर्नु पर्दछ। हाम्रो अनन्त जीवन खतरामा छ।
१६, १७. कुनै व्यक्ति गम्भीर पापहरूको दोषी छ भने मामिला आफै समाधान गर्ने प्रयास उसले किन गर्नु हुँदैन?
१६ कति जना त यस प्रकार तर्क गर्दै आफ्नो गम्भीर पापहरू लुकाउने प्रयास गर्दछन्: ‘मैले यहोवाको सामुन्ने दोष-स्वीकार गरेर पश्चाताप गरी सकेको छु। अतः प्राचीनहरूलाई किन विथोलित गर्ने?’ प्राचीनहरूले के कसो गर्लान् भनेर पाप गर्ने व्यक्तिले संकोच वा डर मान्नु सक्छ। तथापि, उसले यो एउटा कुरा याद राख्नु पर्दछ कि यहोवाले मात्र हाम्रो पाप धोइदिन सक्नु भए तापनि, मण्डली सफा राख्ने प्रथम जिम्मावारी उहाँले प्राचीनहरूलाई सुम्पिनु भएको छ। (भजनसंग्रह ५१:२) “पवित्र जनहरूको सिद्धता” र तिनीहरूलाई निको पार्नका निम्ति नै यहोवाले प्राचीनहरू नियुक्त गर्नु भएको हो। (एफिसी ४:१२) हामीलाई आध्यात्मिक मदतको आवश्यकता पर्दा तिनहरूकहाँ नजानुको अर्थ रोग लाग्दा डाक्टरकहाँ नगए सरह नै हुन्छ।
१७ मामिला आफै समाधान गर्न खोज्ने कुनै कुनै व्यक्तिहरूलाई महिनौं अथवा वर्षौं पछिसम्म पनि तिनीहरूको अन्तस्करणले पिरोल्दछ। यो भन्दा पनि अझ खराब के हुन्छ भने, एउटा गम्भीर गलती लुकाउन खोज्नेहरू दोस्रो पटक र फेरि तेस्रो पटक पनि पापमा फँस्तछन्। अन्तमा प्राचीनहरूका सामुन्ने कुरा आइपुग्दा त त्यो पाप बारम्बार दोहोरी सकेको हुन्छ। याकूबको सल्लाह मान्नु कति असल हो! तिनले लेखे: “के तिमीहरूमध्ये कोही बिरामी छ? त्यसले मण्डलीको धर्म-गुरुहरूलाई बोलाओस्, र तिनीहरूले प्रभुको नाउँमा त्यसलाई तेल घसेर त्यसको विषयमा प्रार्थना गरून्।” (याकूब ५:१४) निको हुने समय रहँदै प्राचीनहरूकहाँ जानुहोस्। धेरै बेरसम्म पर्खी रह्यौं भने, पाप गर्दा गर्दा हामी थेत्तर हुन सक्तछौं।—उपदेशक ३:३; यशैया ३२:१, २.
आफ्नो बाहिरी रूप र मनोरञ्जन
१८, १९. यहोवाका साक्षीहरूबारे एक जना पादरीले किन एउटा अनुकूल टिप्पणी गरे?
१८ पाँच वर्षअघि एउटा गिर्जाको पत्रिकामा, ईटालीका एक जना क्याथोलिक पादरीले यहोवाका साक्षीहरूबारे बडो राम्रो कुरा गरे।a तिनले भने: “व्यक्तिगत रूपमा म यहोवाका साक्षीहरूलाई मन पराउँछु। म खुला दिलले यो कुरा स्वीकार गर्दछु। . . . मैले चिनेका साक्षीहरू पूर्ण रूपमा शिष्ट, मधुर-भाषी . . . [र] अति नै अनुनयी छन्। सत्यलाई पनि स्वीकारयोग्य ढङ्गमा प्रस्तुत गर्नु पर्दछ र सत्यको घोषणा गर्नेहरू अर्ध-मन, गन्हाउने र हेर्दा अस्तव्यस्त हुनु पर्दैन भनेर हामीले कहिले बुझ्ने हो?”
१९ तिनका ती शब्दहरूअनुसार साक्षीहरूको अरू कुरा बाहेक, तिनीहरूको पहिरन र आफूलाई प्रस्तुत गर्ने ढङ्ग देखेर यी पादरी प्रभावित भएका थिए। स्पष्टतः, तिनले भेटेका साक्षीहरूले चाहिं “विश्वासी र बुद्धिमान दासले” वर्षौंदेखिन् दिंदै आएको सल्लाहलाई सुनेका रहेछन्। (मत्ती २४:४५) बाइबल भन्दछ आइमाईहरूको पोशाक ‘लज्जालु र सरल’ हुनु पर्छ। (१ तिमोथी २:९) यो भ्रष्ट समयमा त्यो सल्लाह लोग्ने मानिसहरूका निम्ति पनि आवश्यक छ। परमेश्वरको राज्यका प्रतिनिधिहरूले बाहिरका मानिसहरूका सामुन्ने आफूलाई सुसभ्य ढङ्गमा प्रस्तुत गर्नु, के तर्कसङ्गत होइन र?
२०. आफ्नो पोशाकबारे एक जना मसीही किन सधैं नै सतर्क रहनु पर्दछ?
२० सभाहरू र क्षेत्र सेवकाईमा जाँदा चाहिं आफ्नो पोशाकबारे होशियार हुनु पर्दछ तर अन्य बेलामा चाहिं बाइबलका सिद्धान्तहरू लागू हुँदैनन् भन्ने विचार कसै कसैमा हुन सक्तछ। तर हामी परमेश्वरको राज्यका प्रतिनिधि कुन बेला हुँदैनौं र? हो, बेग्ला-बेग्लै प्रकारका परिस्थितिहरू हुन्छन्। राज्य सभा-गृह निर्माण गर्ने काममा मदत पुर्याउँदा लगाउने हाम्रो पहिरन र त्यही सभा-गृहमा हुने सभामा उपस्थित हुँदा लगाइने पोशाक बेग्ला-बेग्लै हुन्छन्। आराम गरी रहेको बेलामा, सम्भवतः हामी अनौपचारिक किसिमको पोशाक लगाउने गर्छौं। तर अरूहरूका सामुन्ने देखा पर्दा चाहिं हाम्रो पोशाक सधैं नै राम्रोसँग मिलेको र उत्ताउलो न देखिने हुनु पर्दछ।
२१, २२. हानिकारक मनोरञ्जनबाट हामीलाई कसरी सुरक्षित राखेको छ र यस विषयमा आएको सल्लाहबारे हामीले कुन प्रकारको दृष्टिकोण राख्नु पर्दछ?
२१ धेरै पटक ध्यान आकर्षित गराइएको एउटा अर्को क्षेत्र मनोरञ्जन हो। मानिसहरूलाई—खासगरी नौजवानहरूलाई—मनोरञ्जनको आवश्यकता पर्दछ। परिवारका निम्ति मनोरञ्जनको प्रबन्ध मिलाउनु कुनै पाप गरेको वा समय खेर फालेको होइन। येशूले पनि आफ्ना चेलाहरूलाई “केही थकाई मार्न” बोलाउनु भयो। (मर्कूस ६:३१) तर मनोरञ्जनद्वारा आत्मिक प्रदूषणको ढोका चाहिं खोल्नु हुँदैन। यसबारे होसियार हुनु पर्दछ। वर्तमान संसारमा मनोरञ्जनद्वारा यौनिक अनैतिकता, भारी हिंसा, त्रास, र प्रेतवादलाई प्रमुखता दिइएको छ। (२ तिमोथी ३:३; प्रकाश २२:१५) विश्वासी र बुद्धिमान दास यस प्रकारका खतराहरूबारे सचेत छन् र बराबर हामीलाई यी कुराहरूको विरुद्धमा चेतावनी दिने गर्छन्। के तपाईंको विचारमा यस प्रकार सम्झाउनाले तपाईंको स्वतन्त्रतामा बाधा पुर्याउँछ? अथवा यस प्रकारका खतराहरूबारे तपाईंलाई बारम्बार सतर्क गराउँदै यहोवाको सङ्गठनले तपाईंमा चासो राखेकोमा के तपाईं कृतज्ञ हुनुहुन्छ?—भजनसंग्रह १९:७; ११९:९५.
२२ हाम्रो स्वतन्त्रता यहोवाबाट आएको भए तापनि त्यसलाई प्रयोग गर्ने जिम्मावारी हाम्रो हो। यो कुरा कहिले बिर्सनु भएन। असल सल्लाहहरूको अवहेलना गर्दै गलत निर्णयहरू लियौं भने हामीले अरूहरूलाई दोष लाउन सक्तैनौं। प्रेरित पावल भन्दछन्: “हामी हरेकले परमेश्वरलाई आफ्ना आफ्ना लेखा दिनुपर्नेछ।”—रोमी १४:१२; हिब्रू ४:१३.
परमेश्वरका सन्तानको स्वतंन्त्रताका निम्ति प्रतीक्षा गर्नु होस्
२३. (क) स्वतन्त्रतासित सम्बन्धित के आशिषहरूको हामीले अहिले आनन्द उठाइ रहेका छौं? (ख) कुन आशिषहरूका लागि हामी उत्सुकतापूर्वक पर्खिन्छौं?
२३ हामीहरू साँच्चै नै आशिष पाएका मानिसहरू हौं। झूटा धर्म र अन्धविश्वासबाट हामी मुक्त छौं। छुटकाराको बलिदानका लागि हामी कति कृतज्ञ हुनु पर्छ किनकि त्यसले गर्दा हामी पाप र मृत्युको दासत्वबाट आत्मिक तवरमा मुक्त भएको अन्तस्करणका साथ यहोवासित सम्पर्क राख्न सक्तछौं। र चाँडै नै “परमेश्वरका छोराहरू प्रकट” हुने बेला आउँनेछ। आर-मागेडोनमा यहोवाका शत्रुहरूका विध्वंसकको रूपमा येशूका भाइहरू आफ्ना स्वर्गीय महिमामा प्रकट हुनेछन्। (रोमी ८:१९; २ थिस्सोलोनिकी १:६-८; प्रकाश २:२६, २७) त्यसपछि, परमेश्वरको सिंहासनबाट मानिसजातिका निम्ति बगेर आउने आशिषहरूको माध्यमको हैसियतमा परमेश्वरका ती छोराहरू प्रकट हुनेछन्। (प्रकाश २२:१-५) परमेश्वरका छोराहरू यस प्रकार प्रकट भएपछि, अन्ततोगत्वा विश्वासी मानवहरूले परमेश्वरको सन्तानको महिमावान स्वतन्त्रताको आशिष पाउने छन्। के तपाईं सो समयको प्रतीक्षामा हुनुहुन्छ? हुनुहुन्छ भने, तपाईंको मसीही स्वतन्त्रतालाई बुद्धिमानीका साथ प्रयोग गर्नुहोस्। अहिलेदेखि नै परमेश्वरको दास बन्नुहोस् र अनन्तसम्म त्यो अद्भुत स्वतन्त्रताको आनन्द तपाईंले उठाउनु हुनेछ। (w92 6/1)
[फुटनोट]
a सम्भवतः दबावमा परेर, पछि यी पादरीले यो प्रशंसा वापस लिए।
पुनरावलोकन बाकस
◻ अभिषिक्त जनहरू र अरू भेडाले यहोवालाई कसरी महिमित पारेका छन्?
◻ मसीहीहरूले सांसारिक अख्तियारवालाहरूलाई किन आदर गर्नु पर्दछ?
◻ एक जना मसीहीले प्राचीनहरूसित कुन कुन ढङ्गमा सहयोग पुर्याउन सक्तछ?
◻ पोशाकका सम्बन्धमा, यहोवाका साक्षीहरू संसारका धेरै व्यक्तिहरू भन्दा फरक किन देखिन्छन्?
◻ मनोरञ्जनसम्बन्धी कुन कुन कुराबाट हामीहरू बच्नु पर्दछ?
[पृष्ठ १०-मा भएको चित्र]
प्राचीनहरू खासगरी हाम्रो माया र सहयोगका योग्य छन्
[पृष्ठ ११-मा भएको चित्र]
एक जना मसीहीको पोशाक जुनसुकै बेलामा पनि राम्रोसित मिलेको, उत्ताउलो नदेखिने र उपयुक्त हुनु पर्दछ