साँचो परमेश्‍वरको ज्ञानले जीवनतर्फ डोऱ्‍याउँछ

^१ येशूले आफ्नो पितालाई प्रार्थना गर्नुहुँदा यसो भन्‍नुभयो, “अनन्त जीवन यही [हो] . . . तिनीहरूले तपाईं, एकमात्र सत्य परमेश्‍वरलाई . . . चिनून्‌ [परमेश्‍वरको ज्ञान लिऊन्‌, न्युव]।” (यूह. १७:३) कस्तो उदार इनाम! ज्ञान जसले अनन्त जीवनतर्फ डोऱ्‍याउँछ प्रकाशन प्रयोग गरेर अरू मानिसहरूलाई तिनीहरूले सधैंभरि बाँच्न के गर्नुपर्छ, त्यो सिक्न मदत गर्नसक्छौं। तिनीहरूको चासो जगाउन र तत्कालै ज्ञान पुस्तक पढ्‌ने इच्छा जगाउन हामी के भन्‍नसक्छौं?

^२ बाइबललाई निर्देशनको व्यवहारिक स्रोत हो भनेर कुशलतापूर्वक औंल्याउन यसो भने कसो होला:

▪“जीवनका समस्याहरू सामना गर्न व्यवहारिक निर्देशनको स्रोत कहाँ पाइन्छ भन्‍ने विषयमा हामी हाम्रो टोलछिमेकमा छलफल गर्दैछौं। मानिसहरूले परामर्शका लागि बाइबललगायत निकै धर्मग्रन्थहरू हेरेका छन्‌। तर मानिसहरूका मनोवृत्तिहरू परिवर्तन भइरहेका छन्‌। केही मानिसहरू आफ्नो धर्मग्रन्थप्रति शंका गर्छन्‌। र त्यसलाई मानिसहरूले लेखेको पुस्तक ठान्छन्‌। तपाईंको के विचार छ? [जवाफ दिने मौका दिनुहोस्‌।] बाइबल अहिले हाम्रोलागि व्यवहारिक छ भन्‍नुको एउटा खास कारण छ। [२ तिमोथी ३:१६, १७ पढ्‌नुहोस्‌।] परमेश्‍वरले मानिसहरूलाई बाइबल लेख्ने प्रेरणा दिनुभएको बेलामा जत्तिकै आज पनि यसका सिद्धान्तहरू उपयोगी छन्‌।” ज्ञान पुस्तकको पृष्ठ १६ पल्टाउनुहोस्‌ र येशूले दिनुभएको डाँडाको उपदेशमा पाइने व्यवहारिक निर्देशनबारे छोटकरीमा टिप्पणी गर्नुहोस्‌। अनुच्छेद ११ वा १३ बाट एउटा उद्धरण पढ्‌नुहोस्‌। पुस्तक दिनुहोस्‌ र बाइबलमा पाइने ज्ञानबाट हामीले व्यक्‍तिगत तवरमा कसरी फाइदा उठाउनसक्छौं भन्‍ने प्रश्‍नको जवाफ दिन फेरि आउने प्रबन्ध मिलाउनुहोस्‌।

^३ धेरैलाई मन पर्ने विषय प्रार्थना भएकोले तपाईं यो प्रश्‍न सोधेर छलफल गर्न सक्नुहुन्छ:

▪“आधुनिक जीवनमा कठिनभन्दा कठिन समस्याहरूसित जेल्नुपर्दा के तपाईंलाई प्रार्थनाले वास्तवमा हामीलाई मदत गर्नसक्छ जस्तो लाग्छ? [जवाफको प्रतीक्षा गर्नुहोस्‌।] परमेश्‍वरलाई प्रार्थना गरेर उहाँसित घनिष्ठ हुनसकेको र मनोबल प्राप्त गरेको धेरैले अनुभव गरेका छन्‌। अनि बाइबलले पनि त्यस्तै हुनेछ भन्‍ने प्रतिज्ञा गरेको छ। [ज्ञान पुस्तकको पृष्ठ १५६ पल्टाउनुहोस्‌ र फिलिप्पी ४:६, ७ पढ्‌नुहोस्‌।] तथापि, कहिलेकाहीं कसै कसैलाई आफ्नो प्रार्थनाको जवाफ नपाएजस्तो लाग्ला। यस अध्यायले ‘तपाईं कसरी परमेश्‍वरको नजीक हुन सक्नुहुन्छ’ भन्‍ने विषयमा छलफल गर्छ। [पुस्तक प्रस्तुत गर्नुहोस्‌।] परमेश्‍वरसितको हाम्रो वार्तालाप एकतर्फी नभएकोले उहाँको कुरा हामी कसरी सुन्‍नसक्छौं, त्यो पनि यस अध्यायले देखाउँछ। अर्को पटक आउँदा हामी त्यसबारे छलफल गर्नसक्छौं।”

^४ बाइबललाई आदर गर्ने मानिससित कुरा गर्नुहुँदा तपाईं सोझै अध्ययनको प्रस्ताव राख्न सक्नुहुन्छ। अनि यो तरिका सफल साबित हुनसक्छ:

▪“हामी निश्‍शुल्क गृह बाइबल अध्ययनको प्रस्ताव राख्दैछौं। के तपाईंले यसअघि कहिल्यै बाइबल अध्ययन गर्नुभएको थियो? [जवाफ दिने मौका दिनुहोस्‌।] बाइबल अध्ययन गर्न हामीले प्रयोग गर्ने पुस्तक तपाईंलाई देखाऊँ?” ज्ञान पुस्तक देखाउनुहोस्‌ अनि पृष्ठ ३ पल्टाउनुहोस्‌। यसो गर्दा घरधनीले विषयसूची हेर्नसक्छन्‌। त्यसपछि सोध्नुहोस्‌, “यी विषयहरूमा बाइबलले के भन्छ के तपाईंले कहिल्यै विचार गर्नुभएको छ?” घरधनीले निकै रुचि देखाएको अध्याय पल्टाउनुहोस्‌ र उपशीर्षकहरू पढ्‌नुहोस्‌। अध्ययन गर्दा यस जानकारी कसरी छलफल गर्छौं, त्यो छोटकरीमा देखाउन चाहन्छु भनेर बताउनुहोस्‌। अध्ययन सुरु होस्‌ या नहोस्‌, पुस्तक प्रस्तुत गर्नुहोस्‌ र घरधनीलाई त्यो पढ्‌ने प्रोत्साहन दिनुहोस्‌।

^५ आज लाखौं मानिसहरूले परमेश्‍वरको सही ज्ञान लिइरहेका छन्‌। (यशै. २:२-४) यथाशक्य धेरैभन्दा धेरै मानिसहरूलाई यहोवाबारे सिकाउन र जीवनतर्फ डोऱ्‍याउन मदत गर्न पाउनु हाम्रो विशेषाधिकार हो।—१ तिमो. २:४.

जीवनतर्फ डोऱ्‍याउने सही ज्ञान हासिल गर्न अरूलाई मदत गर्नुहोस्‌

^१ ‘सबै मानिसहरू सत्यको ज्ञानमा आऊन्‌ भन्‍ने इच्छा परमेश्‍वर गर्नुहुन्छ’ भनेर प्रेरित पावलले व्याख्या गरे। (१ तिमो. २:४) हामी अरूलाई कसरी त्यो ज्ञान लिन मदत गर्नसक्छौं? त्यसो गर्ने एउटा तरिका, ज्ञान जसले अनन्त जीवनतर्फ डोऱ्‍याउँछ पुस्तकप्रति चासो देखाएका मानिसहरूसित पुनःभेट गर्नु हो। यस प्रकाशनले बाइबल सच्चाइलाई स्पष्ट, सरल र मीठा शब्दहरूमा प्रस्तुत गरेको छ। यसलाई अध्ययन गर्ने सबै मानिसहरूलाई जीवनतर्फ डोऱ्‍याउन सकिन्छ। अरूलाई हामीसित यो पुस्तक अध्ययन गर्ने इच्छा जगाउन हामी के भन्‍नसक्छौं?

^२ बाइबललाई व्यवहारिक निर्देशनको रूपमा प्रस्तुत गर्नुभएको ठाउँमा फर्केर जाँदा यसो भन्दै अध्ययन गर्ने सुझाउ राख्न सक्नुहुन्छ:

▪“अघिल्लो पटक तपाईंकहाँ आउँदा बाइबललाई व्यवहारिक निर्देशनको स्रोत भनेर विश्‍वास गर्नसक्छौं भन्‍नेबारे छलफल गरेका थियौं। बाइबल आफैले यो परमेश्‍वरद्वारा प्रेरित भएको हो भन्‍ने दाबी गर्छ। त्यसैकारण यो सान्त्वना र आशाको पक्का स्रोत हो भनेर त्यसका लेखकहरूमध्ये एक जनाले स्वीकारे। [रोमी १५:४ पढ्‌नुहोस्‌।] हाम्रो वार्तालापको अन्तमा मैले एउटा प्रश्‍न राखेको थिएँ। त्यो थियो, बाइबलमा पाइने ज्ञानबाट हामीले व्यक्‍तिगत तवरमा कसरी फाइदा उठाउनसक्छौं?” ज्ञान पुस्तकको पृष्ठ ११ अनुच्छेद १८ पढ्‌नुहोस्‌। विश्‍वभरि यहोवाका साक्षीहरूले लगभग ५० लाख बाइबल अध्ययनहरू सञ्चालन गरेर चारैतिरका मानिसहरूलाई अनन्त जीवनतर्फ डोऱ्‍याउने ज्ञान लिन मदत गरिरहेका कुरा औंल्याउनुहोस्‌। अध्याय १ का प्रथम पाँच अनुच्छेदहरू प्रयोग गर्दै अध्ययन कसरी सञ्चालन गरिन्छ छोटकरीमा देखाउनुहोस्‌।

^३ पहिलो भेटमा तपाईंले प्रार्थनाको विषयमा छलफल गर्नुभएको थियो भने अध्ययन सुरु गर्न तपाईंले यो प्रस्तुति प्रयोग गर्न सक्नुहुन्छ:

▪“ज्ञान जसले अनन्त जीवनतर्फ डोऱ्‍याउँछ पुस्तकमा हामीले प्रार्थनाबारे छलफल गरेको जानकारीबाट तपाईंले आनन्द उठाउनुभयो होला भन्‍ने आशा गरेको छु। परमेश्‍वरलाई प्रार्थना गर्नेहरूले उहाँको कुरा कसरी सुन्‍नसक्छन्‌, यस विषयमा तपाईंसित छलफल गर्नेछु भनेर मैले तपाईंलाई वचन पनि दिएको थिएँ। पृष्ठ १५८ मा के भनिएको छ, यसो ध्यान दिनुहोस्‌ त। [अनुच्छेद १८ पढ्‌नुहोस्‌।] यसरी व्यक्‍तिगत बाइबल अध्ययनद्वारा परमेश्‍वरले हामीलाई के भन्दै हुनुहुन्छ त्यो हामी सुनिरहेका हुन्छौं। यसो गर्नाले हामी उहाँसित घनिष्ठ हुन्छौं र दैनिक जीवनमा आइपर्ने समस्याहरू समाधान गर्ने मदत पाऊँ भनी उहाँलाई गरेको प्रार्थनाको जवाफ पाउँछौं। तपाईंसित बाइबल अध्ययन गर्न म खुशी हुनेछु।” त्यस व्यक्‍ति इच्छुक छन्‌ भने ज्ञान पुस्तकको पहिलो अध्यायबाट छलफल थाल्नुहोस्‌।

^४ तपाईंले सोझै अध्ययन सञ्चालन गर्ने प्रस्ताव राख्नुभएको थियो भने, प्रथम पटकको त्यस वार्तालापलाई कायम राख्न यस्तै केही भन्‍न सक्नुहुन्छ:

▪“तपाईंलाई फेरि भेट्‌न मैले विशेष यत्न गरेको छु। किनकि म तपाईंलाई हाम्रो निश्‍शुल्क गृह बाइबल अध्ययन कार्यक्रमबारे अझ धेरै कुरा बताउन चाहन्थें। ज्ञान जसले अनन्त जीवनतर्फ डोऱ्‍याउँछ शीर्षक भएको यस पुस्तकको एक प्रति मैले तपाईंसित छाडेको थिएँ। हामी यसै पुस्तकबाट बाइबल अध्ययन गर्छौं। यसले परमेश्‍वरको वचनमा मनन गर्न कसरी प्रोत्साहित गर्छ यहाँ हेर्नुहोस्‌ त। [पृष्ठ २२ को अनुच्छेद २३ पढ्‌नुहोस्‌।] कृपया तपाईंले लिनुभएको यस्तै पुस्तक ल्याउनुहोस्‌ न। अघिल्लो पटक हामीले जहाँसम्म पढेका थियौं त्यहींबाट अध्ययन थाले कसो होला?” पहिलो भेटमा अध्ययन थालिएको थिएन भने, तपाईं यसो भन्‍न सक्नुहुन्छ: “हामी कसरी बाइबल अध्ययन गर्छौं, तपाईंलाई त्यो देखाउने राम्रो मौका आजै हुनसक्छ।” केही अनुच्छेदहरू पढिसकेपछि फेरि आएर अर्को अध्ययन गर्न निश्‍चित समय मिलाउनुहोस्‌।

^५ अरूले पनि आशिष्‌ पाऊन्‌ भन्‍ने हेतुले प्रभावकारी रूपमा सही ज्ञान फैलाउन ज्ञान पुस्तकले हामीलाई बल दिनेछ। (हितो. १५:७) सही हृदय भएकाहरूलाई यस्तो ज्ञानले आनन्द दिनेछ र यहोवाको धार्मिक स्तरअनुरूप जीवन बिताउन तिनीहरूलाई उत्प्रेरणा दिनेछ अनि अन्तमा अनन्त जीवनतर्फ डोऱ्‍याउनेछ।