Tadalo Du Madaru Ha Thu Co Opodone Ri Mariage

Iehovaa Madaru hna aseri o re mariage me hna dan. Tusi Hmijoc ci ie du eje ko Nubonengo hna ilewane o re hmenewe me hna dane ne “hna lenge te bone jeu’ o re cahman.” Adamu ha nidi opodone ka ci ie: “Ome nubone durekaze wene ri so durekazego, ka iaile wene ri ta iaile inu.” (Genese 2:22, 23) Iehova hna iara alane ko co marie ko re ngome thu co opodon.

Ma marielo ke buhnij, buhnije ngei co uane ko co iara roi ko. Nianedi, kacen’ o re acehmenuene me ci nidi eala, bushengone ha co numu ko ta gua lor. (1 Korinito 7:28) Ri brochure om, buhnije co uni o re ta anetitini ni Tusi Hmijoc, ka ngei ma hue lewe, ile me co opodone kore mariage ne il’ o re fami.—Ta Salamo 19:8-11.

1 KEDILU O RE HNAPANE HNEI IEHOVA HNA KANON DU HMENGO

CI IE KO NGE KEI TUSI HMIJOC: Cahmane ko re hawo nore fami.—Efeso 5:23.

Ngei bua me cahmane, netiti du Madaru co musio bua co ran’ o re hmenue ni bua. (1 Peteru 3:7) Nubonengo hna puli bone bane konekatu bua ka ci alane te ko bua co ahmani bone ne co ra bon. (Genese 2:18) Netiti du bua co nidi ran’ o re hmenueni bua ne co ane o re alaieni bone ri dan’ o re alaieni bua.—Efeso 5:25-29.

Ngei bua me hmenew, netiti du Iehova co musio bua co hmegigion’ o re cahmanieni bua ne co konekatu bone co rue o re hnapani bon. (1 Korinito 11:3; Efeso 5:33) Kedilu o re ta uane ni bone ne ruace ekonekatulo ne bone ri ci opodon. (Kolose 3:18) Ka ngei bua ma rue inomelei, ile me kariroi ke bua ri parowo ni cahmanieni bua ne Iehova.—1 Peteru 3:1-6.

NGE KO RE HMENGO THUNI CO RUE:

• Eto hmengo lo ko co korione ke hmengo co acehmenuene me roi. Taedengi roionelu ne ruelo o re thuni ni hmengo ha thu roi

• Kunilu. Nuebut’ o re eziene ke hmengo sone thu dai eacidanolo thu co opodon

2 ULE TEDRENELU O RE TA UANE RI HNORE

CI IE KO NGE KEI TUSI HMIJOC: Hmengo co therelo o re nodei ace bane son’ o re roi ri mariage ni hmengo. (Filipi 2:3, 4) Hmengo co etha uane ri hnor ko nidi ace kore cahmane ca hmenew, co uane ko Iehova ci alane ko o re nodei sinemenenge ni Nubonengo “co nidra jeu’ o re nodei ngome ileoden.” (2 Timothi 2:24) “Numu ta ngome me thu nengoce menu inom’ o re hna wie hnei soad ; roi di thu aroini ko re gucada nengoce no re ngome me waetea.” Koiko, ule tedren’ o re ci nengoc. (Ta Onatre 12:18) Uiewaieni Iehova co konekatu hmengo co nengoce nidra ne ri ci ran.—Galatia 5:22, 23; Kolose 4:6.

NGE KO RE HMENGO THUNI CO RUE:

• Hmilu thu numu nekonekatu ha thu lata me nidra ne thu numu etaedrengio ri dan’ o re co enengoco ti o re ta ace me nidi ac

• Ua roionelu o re ace co ie ne korione ko re la ie

3 UANE KO HMENGO EKIP

CI IE KO NGE KEI TUSI HMIJOC: Ma marielo ke hmengo, ile me “hnengome sa” ke hmengo. (Mataio 19:5) Hmengo etha ngome ko, ka thuni ke hmengo co numu ta etha uan. Wen’omelei, rue yenonelo co hnore sa ne co uane lane sa. (Filipi 2:2) Nidi ace ko re co hnore sa ngei ma ci si o re ta ruac. Ci ie kei Tusi Hmijoc: “Hnen’ o re hna eman, ci ataceni o re nodei uane ileoden.” (Ta Onatre 20:18) Nuebut’ o re nodei ininata ni Tusi Hmijoc co anetitini o re ta uane hna si me nidi ac. —Ta Onatre 8:32, 33.

NGE KO RE HMENGO THUNI CO RUE:

• Co ethawan’ o re ta uane ri hnor, ke deko ma uane ni bua ca bone so

• Rue ethanatalo ri dan’ o re co ru’ o re ta ruac