Ontopolwa 30

Shono U Na Okuninga U Kale Sigo Aluhe

1. (a) Opokati koondjila mbali dhini po to vulu okuhogolola? (b) Ongiini to vulu okuhogolola ondjila yu uka?

JEHOVA KALUNGA ote ku pe sha oshikumithi—omwenyo gwaaluhe monkalelo ye ompe yuuyuki. (2 Petrus 3:13) Ihe ngele owa hala okukala nomwenyo pethimbo ndyono, ano ngashingeyi ou na okulonga ehalo lyaKalunga. Uuyuni wonena wuukolokoshi, naayehe mbono ye li ombinga yawo, masiku otaa ka hula po, “ihe oongoka ta gwanitha ehalo lyaKalunga, oye ha kala aluhe.” (1 Johannes 2:17) Ano ou na okuhogolola pokati koondjila mbali. Yimwe otayi fala keso nonkwawo okomwenyo gwaaluhe. (Deuteronomium 30:19, 20) Yini po to kutha?

2. (a) Omushike to ka kala u na uushili ngele u na eitaalo lyashili? (b) Ongiini tashi ke ku kwatha okulongela Kalunga uuna we mu inekela ngaashi okanona haka inekele he omunahole?

² Ongiini to holola kutya owa hogolola omwenyo? Tangotango, ou na okwiitaala muJehova nomomauvaneko ge. Owi itaala shili kutya Kalunga oko e li “naamboka taye mu kongo, ote ya pe ondjambi”? (Aaheberi 11:6) Ou na okwiinekela Kalunga ngaashi omumati nenge omukadhona hi inekele he omunahole nomunesilohenda. (Epsalmi 103:13, 14; Omayeletumbulo 3:11, 12) Ngele u na eitaalo ndyono, ito ka limbililwa kutya epukululo lye olyoondunge nenge kutya oondjila dhe odhu uka, nonando oolumwe ku uvite ko iinima thiluthilu.

3. (a) Kakele keitaalo, oshike ishewe sha pumbiwa? (b) Iilonga yini po ya pumbiwa okuholola kutya oto hogolola omwenyo?

³ Ihe opwa pumbiwa oshindji shi vulithe eitaalo. Opu na wo okukala iilonga mbyono tayi hokolola omaiyuvo goye gashili kuJehova. (Jakob 2:20, 26) Owa ninga ngaa iinima okuholola kutya ou uvite ohenda kokwaaheshininga kwomethimbo lyonale okulonga shono shu uka? Owi inyengithwa okuholola eitedhululo nenge okweeta po omalunduluko u ukithe ondjila yonkalamwenyo yoye yi tse kumwe nehalo lyaJehova? Owi igaluka, sha hala kutya, owa pa ko ombunda koondjila dhepuko nowa tameka okulonga iinima mbyono Kalunga ta tegelele? (Iilonga 3:19; 17:30) Iilonga ya tya ngawo otayi ka holola kutya owa hogolola omwenyo.

EIGANDJO NENINGINITHO

4. (a) Ou na okwiinyengithwa kushike okulonga ehalo lyaKalunga? (b) Oshike she eleka okuninga ngele wa tokola okulongela Kalunga?

⁴ Oshike shi na oku ku inyengitha u hogolole omwenyo mokulonga ehalo lyaKalunga? Olupandu. Dhiladhila owala kwaashono: Jehova okwe shi ku vulithila okumanguluka momikithi adhihe, meehamo nokuli nomeso! Mokupitila momagano gondilo gOmwana gwe, ye okwe ku egululila ondjila sigo omomwenyo gwaaluhe meviparadisa. (1 Aakorinto 6:19, 20; 7:23; Johannes 3:16) Ou na okuninga shike ngele ohole yaJehova ye ku inyengitha oku mu galulila ohole? (1 Johannes 4:9, 10; 5:2, 3) Ou na okuhedha kuKalunga medhina lyaJesus noku mu lombwela megalikano kutya owa hala okukala omupiya gwe, nonokutya owa hala okukala gwe. Momukalo ngono owi igandja kuKalunga. Shono oshinima shomuntu mwene, shopaumwene. Hagumwe gwi ili ta vulu oku shi ku ningila.

5. (a) Konima sho wi igandja kuKalunga, oshike ye ta tegelele kungoye? (b) Ekwatho lini po tali vulu okulongithwa kungoye u kale paigandjo lyoye?

⁵ Konima sho wi igandja kuKalunga, ye ota tegelele u kale paigandjo lyoye. Ano ulika kutya ongoye omugwanithi gwoohapu dhoye mokudhama metokolo nenge meigandjo ndino, ethimbo alihe ndyono u li po. (Epsalmi 50:14) Uuna to kala aluhe popepi nehangano lyaKalunga li wetike, oto vulu okumona ekwatho kAakriste ooyakweni mbono taa ka halelela oku ku kumika noku ku ambidhidha nohole.—1 Aatessalonika 5:11.

6. (a) Onkatu yini po ya pumbiwa konima sho wa gandjele Kalunga onkalamwenyo yoye? (b) Eninginitho otashi ti ngiini?

⁶ Ihe ou na okuninga oshindji shi vulithe owala okulombwela Jehova paumwene kutya owa hala okuninga gwe. Ou na okuholola montaneho yooyamwe kutya owi igandja okulongela Kalunga. Ongiini to shi ningi? Omokuninginithwa momeya. Eninginitho momeya lya tya ngawo olyo euliko lyomontaneho kutya omuntu okwa gandja kuJehova onkalamwenyo ye nokwiigandja ye mwene okulonga ehalo Lye.

7. (a) Oshiholelwa shini po Jesus a tulile po Aakriste? (b) Omolwashike eninginitho ndyono Jesus a lombwele kaali shi lyuuhanona?

⁷ Nokutya eninginitho olyo oshitegelelwa sha simana, osha hololwa koshiholelwa shaJesus Kristus. Jesus ina lombwela owala He kutya ye okwe ya okulonga ehalo Lye. (Aaheberi 10:7) Omanga Jesus inaa tameka iilonga ye e li omuuvithi gwUukwaniilwa waKalunga, ye okwi igandja kuJehova e ta ninginithwa momeya. (Mateus 3:13-17, NW) Molwashoka Jesus okwa tula po oshiholelwa, nena mbono tayi igandja kuJehova okulonga ehalo lye, oye na okuninginithwa. (1 Petrus 2:21; 3:21, NW) Paushili, Jesus okwa lombwele aalanduli ye okuninga aantu yiigwana ayihe aalongwa nopo nduno okuninginitha aalongwa mbano aape. Kali shi eninginitho lyuuhanona. Olyo eninginitho lyaantu mbono ya ninga ooitaali noya tokola okulongela Jehova.—Mateus 28:19; Iilonga 8:12.

8. Uuna wa hala okuninginithwa, olye megongalo u na okutseyithila, nomolwashike?

⁸ Ou na okuninga shike ngele wa tokola okukalela Jehova nowa hala okuninginithwa? Ou na okutseyithila ehalo lyoye omutonateli omuwiliki gwegongalo lyOonzapo dhaJehova mono ngoye u li. Opamwe naakuluntu yegongalo yamwe megongalo, ye ota ka halelela okweendulula pamwe nangoye eyelithilo lya simana ndyono tali ke ku kwatha okulongela Kalunga momukalo ngono ye a hokwa. Opo nduno tapu vulu okuningwa omalongekidho omolweninginitho lyoye.

SHONO SHI LI EHALO LYAKALUNGA KUNGOYE NENA

9. Oshike sha ningwa kuNoa komeho yeyelu shono Kalunga a hala ngashingeyi u shi ninge?

⁹ Komeho yeyelu, Jehova okwa longitha Noa, “omuuvithi guuyuuki,” a londodhe aantu kehanagulo ndyono lya li tali ya nokuulika kehala lyegameno alike, onguluwato. (Mateus 23:37-39; 2 Petrus 2:5; Aaheberi 11:7) Olyo ehalo lyaKalunga kutya u longe ngashingeyi oshilongauvitho sha faathana. Kombinga yethimbo lyetu, Jesus okwa hunganeke: “Nevaangeli ndika [lyuukwaniilwa] otali ku uvithilwa nuuyuni auhe, li ningile iigwana ayihe ehokololo, notaku ya ihe ehulilo.” (Mateus 24:14, faathanitha KB.) Okuhupa mehulilo lyonkalelo ndjika nokukala sigo aluhe, yalwe oye na okutseya iinima mbyono wi ilongo kombinga yoompangela dhaKalunga. (Johannes 17:3) Mbela omutima gwoye inagu inyengithwa nando okukala gu na ombinga metaandelitho lyontseyo ndjono tayi gandja omwenyo?

10. (a) Oshiholelwa shini po shaJesus ohole yokuhola aantu ooyakwetu yi na oku tu inyengitha oku shi landula? (b) Ongiini ombinga onene yoshilongauvitho tayi longwa?

¹⁰ Landula oshiholelwa shaJesus. Ye ina tegelela aantu ya ye kuye, ihe ye okwa ka konga mbono ya li ye na okupulakena ketumwalaka lyUukwaniilwa. Nokwa lombwele aalanduli ye—ayehe yomuyo—ye shi ninge wo. (Mateus 28:19; Iilonga 4:13; Aaroma 10:10-15) Mevuliko kelombwelo lyaKristus nomokulandula oshiholelwa she, Aakriste yotango oya talele po aantu momagumbo gawo. Yo oya yi “egumbo negumbo” netumwalaka lyUukwaniilwa. (Lukas 10:1-6; Iilonga 20:20, NW) Natango shino osho omukalo gwa simana muyo Aakriste yashili taa gwanitha uukalele wawo pethimbo lyetu.

11. (a) Omolwashike tashi pumbwa omukumo okuuvitha kombinga yUukwaniilwa waKalunga, ihe omolwashike twaa na okukala twa tila? (b) Ongiini Jehova ta tala ko iilonga mbyono hatu longo?

¹¹ Otashi pumbwa omukumo okulonga oshilonga shino. Satana nuuyuni we otaa ka kambadhala shili oku tu keelela, ngaashi naanaa ya kambadhala okukeelela aalanduli yaKristus yotango yaa uvithe. (Iilonga 4:17-21; 5:27-29, 40-42) Ihe ino pumbwa okukala wa tila. Ngaashi naanaa Jehova a ambidhidha nokwa koleke Aakriste mbeya yotango, ye ote ke ku ambidhidha wo. (2 Timoteus 4:17) Ano kala u na omukumo! Ulika kutya ou hole shili Jehova naantu ooyakweni mokukala u na ombinga paudho meuvitho tali hupitha oomwenyo nomoshilonga shelongo. (1 Aakorinto 9:16; 1 Timoteus 4:16) Jehova ita ka dhimbwa iilonga yoye, ihe ote ke ku pa ondjambi onene.—Aaheberi 6:10-12; Titus 1:2.

12. Oshike tatu vulu okwiilonga moshiholelwa shomukulukadhi gwaLot?

¹² Onkalelo ndjino onkulu itayi vulu oku tu pa sha shono shi na ongushu onene shili. Ano ino dhiladhila kutya owa palutha sha moku shi pilamena ombunda. “Dhimbulukweni omukiintu gwaLot,” Jesus osho a ti. (Lukas 17:32) Konima sho ye nuukwanegumbo we ya yi ondapo okuza muSodom, ye okwa keuka nondjuulukwe kiinima mbyono yo ya thigi po. Kalunga okwa mono mpono omutima gwe gwa li, oye nokwa shituka oshaanda shomongwa. (Genesis 19:26) Ino kala ngaashi omukulukadhi gwaLot! Kaleka omeho goye ga tala kiinima mbyono yi li komeho, ‘komwenyo gwashili’ monkalelo ompe yuuyuki yaKalunga.—1 Timoteus 6:19.

HOGOLOLA OMWENYO GWAALUHE MOPARADISA KOMBANDA YEVI

13. Onashike Jesus a yelekanitha ehogololo ndyono atuheni tu na okuninga?

¹³ Paushili, opu na owala omahogololo gaali. Kristus okwe shi yelekanitha nehogololo lyayimwe yomoondjila mbali. Ye okwa ti kutya ondjila yimwe oya “mbwalangandja.” Aaendi muyo otaa pitikwa ya longe shaa shoka ya hala. Ihe ondjila onkwawo oya “thinana.” Eeno, aaendi mondjila ndjono oye na okuvulika komalombwelo nokoompango dhaKalunga. Jesus okwa ti kutya oyendji otaye ende mondjila ya mbwalangandja, nokutya aashona yowala ye li mondjila ya thinana. Ondjila yini po to hogolola? Uuna to hogolola, tula momadhiladhilo shino tashi landula: Ondjila ya mbwalangandja, ohaluka otayi ka hulila—mehanagulo! Kombinga yimwe, ondjila ya thinana otayi ke ku fala wu ukilila sigo omonkalelo ompe yaKalunga. Mono to ka vula okukala u na ombinga okuninga evi oparadisa ombwanawa, nomo to vulu okukala sigo aluhe melago.—Mateus 7:13, 14.

14. Omushike u na okukala ombinga okuhupa sigo omonkalelo ompe yaKalunga?

¹⁴ Ino dhiladhila kutya oku na oondjila nenge omikalo dhi ili nodhi ili ndhono to vulu okweenda u mone omwenyo monkalelo ompe yaKalunga. Oku na owala yimwe. Okwa li owala onguluwato yimwe ndjono ya hupu mEyelu, haowato odhindji. Notaku ka kala owala ehangano limwe—ehangano lyaKalunga li wetike—ndyono tali ka hupa ‘muudhigu uunene’ mbono tau hedha popepi neendelelo. Edhiladhilo kutya omaitaalo agehe otaga fala kethikilo limwe, kali shi nando lyoshili. (Mateus 7:21-23; 24:21) Ou na okukala ombinga yehangano lyaJehova nokulonga ehalo lyaKalunga opo u taambe omwenyo gwaaluhe.—Epsalmi 133:1-3.

15. (a) Kehe esiku otu na okuninga shike? (b) Etegameno lini po olindji li vulithe owala ondjodhi?

¹⁵ Ano kaleka ethano lyonkalelo ompe ndjono yu uvanekwa kuKalunga lya yela moondunge nomomutima gwoye. Dhiladhila esiku kehe kondjambi onkumithi ndjono Jehova Kalunga e ku nine—omwenyo gwaaluhe mOparadisa kombanda yevi. Kashi shi ondjodhi. Osho lela! Oshoka euvaneko lyOmbimbeli tali landula otali ka gwanithwa shili: “Aayuuki otaa ka thigulula evi e taa kala mo sigo aluhe . . . noto ka mona okuyonukapo kwaakolokoshi.”—Epsalmi 37:29, 34, OB-1986.

[Picture on page 251]

Igandja kuJehova . . . e to ininginitha

[Picture on page 253]

“Dhimbulukweni omukiintu gwaLot”

[Pictures on page 254]

Kaleka ethano lyonkalelo ompe yaKalunga lya yela moondunge nomomutima gwoye