Ontopolwa ontihamano
Ompata ndjoka ye tu taalela atuheni
1, 2. (a) Ompata yini Satana a pendutha muEden? (b) Ongiini shoka a popi sha li tashi ulike kompata ndjoka?
OWA kwatelwa mompata ya simana noonkondo ndjoka inaayi tsakanekwa nando onale kaantu. Ombinga ndjoka wa gama shi na ko nasha nayo otayi ku utha kutya onakuyiwa yoye yaaluhe otayi ka kala ngiini. Ompata ndjoka oya penduthwa sho uunashipotha wa tameke muEden. Pethimbo ndyoka Satana okwa pulile Eva a ti: “Kalunga okwe mú lombwele shili, mwaa lye komiti adhihe dhomeyana?” Eva okwa yamukula kutya Kalunga okwa popi shi na ko nasha nomuti gumwe a ti: “Inamu [gu] lya . . . mwaa se.” Opo nduno Satana okwa popi shu ukilila kombinga yaJehova ta popi iifundja ta ti kutya okukala nomwenyo kwaEva nosho wo kwaAdam inaku ikolelela kokuvulika kuKalunga. Satana okwa ti kutya Kalunga oti indike iishitwa ye sha shoka oshiwanawa—okukala hayi vulu okutula po omithikampango dhayo yene monkalamwenyo. Satana okwa ti: “Kalunga oku na owino, shimpa tamu gu li, omeho geni taga tonata notamu fe Kalunga okudhimbulula—okutseya—uuwanawa nuuwinayi.”—Genesis 3:1-5, yelekanitha OB-1986.
2 Muushili wo wene, Satana okwa li ta ti kutya aantu otaya ka kala ye li nawa ngele taya ningi omatokolo gawo yene pehala lyokukala taya vulika koompango dhaKalunga. Kungeyi okwa li a shongo omukalo gwaKalunga gwokupangela. Shoka osha li sha pendutha ompata ya simana noonkondo yi na ko nasha nuunamapangelo weshito alihe waKalunga, sha hala okutya, uuthemba we wokupangela. Opwa li pwa holoka epulo tali ti: Oshike shi li nawa kaantu, mbela omukalo gwaJehova gwokupangela nenge okwiipangela ya manguluka ko kuye? Dhoshili, Jehova okwa li ta vulu okuhanagula po neso nziyanziya Adam naEva, ihe shoka kasha li tashi ka kandula po nando ompata yi na ko nasha nuunamapangelo komukalo gu li nawa. Mokweetha uulipamwe waantu u kale po uule wethimbo, Kalunga okwa li ta vulu okuulika thiluthilu shoka okumanguluka ko kuye nokoompango dhe taku ke eta.
3. Ompata ontiyali yini Satana a pendutha?
3 Okuponokela kwaSatana uuthemba waJehova wokupangela inaku hulila pwaashoka sha ningwa muEden. Okwa tula wo uudhiginini wayalwe kuJehova momalimbililo. Shoka osha ningi ompata ontiyali ya pambathana lelalela noyotango. Eshongo lye lwahugunina olya kwatele mo oluvalo lwaAdam naEva nosho wo oyanamati ayehe yopambepo yaKalunga, nokuli nOmwana gwaJehova omuholike gwosheeli. Pashiholelwa, pethimbo lyaJob, Satana okwa tile kutya mboka taya longele Jehova itaye shi ningi molwaashoka ye hole Kalunga nomukalo gwe gwokupangela, ihe omolwokwiihola mwene. Okwa ti wo kutya ayehe otaye ki igandja komahalo gokwiihola mwene, ngele taya mono iihuna.—Job 2:1-6; Ehololo 12:10.
Shoka shu ulikwa kondjokonona
4, 5. Ondjokonona oyu ulike shike kombinga yokuutha kwomuntu oonkatu dhe?
4 Oshitsa sha simanenena shi na ko nasha nompata yuunamapangelo osho shika: Kalunga ina shita aantu ya kale taye shi pondola ngele ya manguluka ko kepangelo lye. Omolwuuwanawa wawo, okwe ya shiti ya kale yi ikolelela koompango dhe dhuuyuuki. Omuprofeti Jeremia okwe shi zimine ta ti: “Eeno, Omuwa, ondi shi shi, oondjila dhomuntu ihadhi kala momapangelo ge mwene nenge moonkondo dhomulumentu te ende, ku uthe ando oonkatu dhe, e dhi fale kethikilo. Eeno, geyela ndje, Omuwa.” (Jeremia 10:23, 24) Onkee ano Oohapu dhaKalunga tadhi tu ladhipike tadhi ti: “Inekela Omuwa noku mu inekelitha omwenyo gwoye, ngoye ino inekela oondunge dhoye mwene.” (Omayeletumbulo 3:5) Ngaashi naanaa Kalunga a shiti aantu ya kale taya vulika koompango dhe dhopaunshitwe opo ya kale nomwenyo, okwa ningi wo oompango dhopamikalo, ndhoka ngele omuntu ta vulika kudho tadhi ke eta po uulipamwe wa hangana.
5 Osha yela kutya Kalunga okwa tseya kutya aantu itaya vulu nando okwiipangela yo yene nomupondo nokaapu na epangelo lye. Mokuninga oonkambadhala dhosima okukala ya manguluka ko kepangelo lyaKalunga, aantu oye eta po omilandu dhi ili nodhi ili dhopapolotika, dhopamahupilo nodhopalongelokalunga. Omayooloko ngoka oga fala aantu momaipumomumwe itaaga hulu ngoka ge etitha elongitho lyoonkondo, iita neso. “Omuntu ta pangele omukwawo noku mu pangelela oshiponga.” (Omuuvithi 8:9) Shoka osho naanaa sha ningwa mondjokonona ayihe yaantu. Ngaashi sha hunganekwa mOohapu dhaKalunga, aantu aawinayi naakotokeli otaya tsikile “okuza muuwanawa yu uka muuwinayi.” (2 Timoteus 3:13, OB-1986) Methelemimvo eti-20 moka aantu ya ningi omahumokomeho omanene paunongononi nomiikwafabulika, oya mono omaupyakadhi omanenenene inaaga monika nale. Oohapu dhaJeremia 10:23 odha kolekwa noonkondo—aantu kaya li ya shitwa yu uthe oonkatu dhawo.
6. Ongiini masiku Kalunga ta ka hulitha po okumanguluka ko kwaantu kuye?
6 Iilanduliko yethimbo ele yinikitha oluhodhi yokumanguluka ko kuKalunga oyu ulike thiluthilu kutya epangelo lyomuntu itali vulu nando oku shi pondola. Epangelo lyaKalunga olyo awike ondjila tayi eta enyanyu, uukumwe, uukolele nomwenyo. Niishewe Oohapu dhaKalunga otadhi ulike kutya Jehova ite ki idhidhimikila we ethimbo ele okumanguluka ko kwaantu kepangelo lye. (Mateus 24:3-14; 2 Timoteus 3:1-5) Masiku ota ka katukila onkatu iinima yaantu opo u ulike kutya ye omupangeli gwevi alihe. Ehunganeko lyOmbimbeli otali ti: “Pomasiku gaakwaniilwa mbeyaka [omapangelo gaantu ngoka ge li po mongashingeyi] Kalunga nguka komegulu ota ka dhika uukwaniilwa [megulu] itaau teka po sigo aluhe, nepangelo lyawo itali ka gandjwa koshigwana shilwe [aantu itaya ka pangela we evi nandonando]. Ihe owo tau ka nyanyagula po notau ka teyagula po omaukwaniilwa agehe [ngoka ge li po nena] noku ga hulitha po, ihe owo wene tau ka kala sigo aluhe.”—Daniel 2:44, KB.
Okuhupa nokuya muuyuni uupe waKalunga
7. Sho epangelo lyaKalunga tali ka hulitha po omapangelo gopantu, oolye taya ka hupa po?
7 Sho epangelo lyaKalunga tali ka hulitha po omapangelo gopantu, oolye taya ka hupa po? Ombimbeli otayi yamukula tayi ti: “Aayuuki [mboka haya yambidhidha uuthemba waKalunga wokupangela] ohaa ka kala [mevi, NW], naakaanambudhi ohaa kalelele mo; ihe aakaanakonashanakalunga [mboka ihaaya yambidhidha uuthemba waKalunga wokupangela] taa tudhwa [mo mevi, NW].” (Omayeletumbulo 2:21, 22) Sha faathana, omupsalmi okwa ti: “Oku na okathimbo kowala, omukeenakonashanakalunga nokee po we . . . Aayuuki oyo otaa ka thigulula [evi, OB-1986] e taa kala mo aluhe.”—Epsalmi 37:10, 29.
8. Kalunga ota ka yukipalitha ngiini thiluthilu uunamapangelo we?
8 Konima sho onkalelo yaSatana ya hanagulwa po, Kalunga ote ke eta po uuyuni we uupe, mboka tau ka kutha po thiluthilu elongithonkondo ehanaguli, iita, oluhepo, okumona iihuna, omavu neso mbyoka ya kala ya pika aantu uule woomvula omayuvi. Ombimbeli otayi hokolola nawa omayambeko ngoka taga ka pewa aantu aadhiginini, tayi ti: “[Kalunga] nota theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hula po.” (Ehololo 21:3, 4) Mokupitila mUukwaniilwa we womegulu kohi yepangelo lyaKristus, Kalunga ota ka yukipalitha thiluthilu uuthemba we wokukala Omupangeli gwetu.—Aaroma 16:20; 2 Petrus 3:10-13; Ehololo 20:1-6.
Nkene aantu yi inyenge kompata
9. (a) Mboka ya kala ya dhiginina kuJehova oya li ya tala ko ngiini oohapu dhe? (b) Noa oku ulike ngiini uudhiginini we, nongiini tatu vulu okumona uuwanawa moshiholelwa she?
9 Mondjokonona ayihe omwa kala mu na aalumentu naakiintu aadhiginini mboka yu ulike uudhiginini wawo kuJehova e li Omupangeli. Oya li ya tseya kutya onkalamwenyo yawo oyi ikolelela kokupulakena nokokuvulika kuye. Noa okwa li omulumentu a tya ngaaka. Onkee ano Kalunga okwa li a lombwele Noa a ti: “Ongame ndi iyuvanenene ehulitho lyonyama ayihe . . . Ihongela [onguluwato, OB-1986].” Noa okwa li a vulika kelombwelo lyaJehova. Aantu yalwe yopethimbo ndyoka oya tsikile nonkalamwenyo yawo nonando ya li ya londodhwa, ya fa ye wete itaapu ka ningwa sha inaashi ningwa nale. Ihe Noa okwa tungu onguluwato onenenene nokwa kala i ipyakidhila nokuuvithila yalwe kombinga yoondjila dhaJehova dhuuyuuki. Ehokololo otali tsikile tali ti: “Noa okwa longo, Omuwa ngaashi kwe mu lombwele, eeno, osho a longo.”—Genesis 6:13-22; Aaheberi 11:7; 2 Petrus 2:5.
10. (a) Abraham naSara oya yambidhidha ngiini uunamapangelo waJehova? (b) Ongiini tatu vulu okumona uuwanawa moshiholelwa shaAbraham naSara?
10 Abraham naSara oya li wo iiholelwa iiwanawa yaantu mboka ya yambidhidha uunamapangelo waJehova noya ningi shaashoka e ya lombwele. Oya li ya kala muUr shaKaldea, oshilando oshiyamba. Ihe sho Jehova a lombwele Abraham a ye koshilongo shilwe, shimwe shoka a li kee shi, Abraham “okwa tembuka mo, Omuwa ngaashi kwe mu lombwele.” Kapu na omalimbililo kutya Sara okwa li e na onkalamwenyo ombwanawa—e na egumbo, ookuume nosho wo aapambele. Ihe okwa li a vulika kuJehova nokomusamane gwe nokwa tembukile koshilongo shaKanaan, nonando ka li a tseya kutya oonkalo dhako otadhi ka kala dha tya ngiini.—Genesis 11:31–12:4; Iilonga 7:2-4.
11. (a) Omoonkalo dhini Moses a yambidhidha uunamapangelo waJehova? (b) Ongiini tatu vulu okumona uuwanawa moshiholelwa shaMoses?
11 Moses okwa li omuntu gulwe ishewe ngoka a yambidhidha uunamapangelo waJehova. Naashika okwa li e shi ningi e li moonkalo oondhigu noonkondo—mokutsakanena naFarao gwaEgipiti oshipala noshipala. Itashi ti kutya Moses okwa li i iyinekela mwene. Mepingathano naashoka, okwa li a limbililwa kombinga yokwaavula okupopya nawa kwe. Ihe okwa li a vulika kuJehova. Keyambidhidho lyaJehova nokekwatho lyomumwayinamati, Aaron, Moses okwa thikitha oohapu dhaJehova Farao omuthengalali iikando niikando. Nokuli Aaisrael yamwe oya li ya pe Moses uusama nayi noonkondo. Ihe Moses okwa longo nuudhiginini kehe shimwe shoka Jehova e mu lombwele, nomokupitila muye, Israel okwa li a mangululwa okuza muEgipti.—Eksodus 7:6; 12:50, 51; Aaheberi 11:24-27.
12. (a) Oshike tashi ulike kutya uudhiginini kuJehova owa kwatela mo oshindji kaashi shi owala okulonga shoka Kalunga a nyolitha kondandalunde? (b) Ongiini okuuva ko uudhiginini woludhi nduka taku vulu oku tu kwathela tu tule miilonga 1 Johannes 2:15?
12 Mboka ya li aadhiginini kuJehova inaya kala taya dhiladhila kutya shoka sha li tashi pulwa osho owala okuvulika kwaashoka Kalunga a nyolitha. Sho omukiintu gwaPotifar a li ta kambadhala okuheka Josef a yone ondjokana naye, kapwa li oshipango sha nyolwa kuKalunga shoka tashi indike okuyona ondjokana. Ihe Josef okwa li a tseya kombinga yelongekidho lyondjokana ndjoka ya dhikwa po kuJehova muEden. Okwa li a tseya kutya okulala nomukiintu gwomulumentu gulwe otashi ka yemateka Kalunga. Josef ka li a hala okumona kutya sigo opondondo yini Kalunga te ke mu pitika a kale a fa Aaegipiti. Okwa li a kala paondjila dhaJehova mokutedhatedha kokuungaunga kwaKalunga naantu nopo nduno okwa tula miilonga nuukeka shoka a mono kutya osho shi li ehalo lyaKalunga.—Genesis 39:7-12; Epsalmi 77:12, 13.
13. Oshu ulikwa ngiini kutya Ondiaboli oyo omufundja shi na ko nasha (a) naJob? (b) nAaheberi yatatu?
13 Nokuli nonando mboka ya tseya shili Jehova oya makelwe sha kwata miiti, ihaye mu pilamene. Satana okwa ti kutya nokuli ngele Job okwa kanitha iiniwe ye ayihe nenge a kala kee na uukolele, nokuli ota ka thiga po Jehova, nonando Jehova okwa ti kutya okwe mu hokwa. Ihe Job oku ulike kutya Ondiaboli oyo omufundja, nokuli nonando Job mwene ka li a tseya kutya omolwashike omaupyakadhi ge thike mpono ge mu gwililila po. (Job 2:9, 10) Omathelemimvo konima yaashoka, Satana ngoka a li natango ta kambadhala okukoleka oshitsa she, okwa ningitha omukwaniilwa omugeyentu gwaBabilon a tilithe aagundjuka yatatu Aaheberi neso meziko lyomulilo gwa hanya ngele itaya tsu oongolo nokugalikana oshiyelekela shoka sha dhikwa po komukwaniilwa. Oya li ye na okuhogolola pokati kokuvulika koshipango shomukwaniilwa nokuvulika kompango yaJehova tayi indike okulongela iikalunga noye shi popi ya tokola toko kutya yo otaya longele Jehova nonokutya ye oku li Omupangeli gwawo Omunenenene. Uudhiginini kuKalunga kawa li tuu oshinima shi na ongushu onene kuyo shi vulithe omwenyo gwawo!—Daniel 3:14-18.
14. Oshi li ngiini tashi wapa kutse tu li aantu inaaya gwanenena tu ulike kutya otu li shili aadhiginini kuJehova?
14 Mokutala kiiholelwa mbyoka, mbela otu na okuthika pehulithodhiladhilo kutya okukala omudhiginini kuJehova, omuntu oku na okukala a gwanenena nenge kutya omuntu ngoka ta ningi omapuko okwa puka thiluthilu? Hasho nando! Ombimbeli otayi tu lombwele kutya omathimbo gamwe Moses okwa li a ningi omapuko. Nonando Jehova okwa li inee shi hokwa, ine ekelahi Moses. Aayapostoli yaJesus Kristus nayo wo oya li ye na omaunkundi gawo. Molwashoka Jehova okwa tseya kutya otwa thigulula okwaagwanenena, ote tu taamba ko ngele itatu ipwililike owina okulonga ehalo lye moshinima nando oshimwe. Ngele tatu ningi epuko molwuunkundi wetu, osha simana opo tu iyele ombedhi shili tashi zi komutima nokwaahe shi ninga ondjigilile okuninga aluhe epuko ndyoka. Komukalo ngoka otatu ulike kutya otu hole shili shoka Jehova ta ti kutya oshiwanawa notu tonde shoka tu ulike kutya oshiwinayi. Omolweitaalo lyetu moonkondo dhokudhiminwa po oondjo omolwongushu yeyambo lyaJesus, otatu vulu okukala tu na omuthika gwa yela koshipala shaKalunga.—Amos 5:15; Iilonga 3:19; Aaheberi 9:14.
15. (a) Olye mokati kaantu ayehe a kala a kakatela uudhiginini wa gwanenena kuKalunga, naashoka oshu ulike shike? (b) Otatu kwathelwa ngiini kwaashoka Jesus a ninga?
15 Ihe otaku vulu mbela okutiwa kutya okuvulika kuunamapangelo waJehova momukalo gwa gwanenena itaku wapa nando kaantu? Eyamukulo kwaashoka olya kala lya fa ‘oshiholekwa oshiyapuki’ uule woomvula 4 000 lwaampono. (1 Timoteus 3:16, NW) Nonando Adam okwa li a shitwa a gwanenena, ina tula po oshiholelwa sha gwanenena shometilokalunga. Olye ano a li ta vulu oku shi tula po? Dhoshili, kapu na nando gumwe gwomoluvalo lwe olulunde a li a vulu oku shi ninga. Omuntu awike ngoka a li ta vulu oku shi ninga oJesus Kristus. (Aaheberi 4:15) Shoka Jesus a ningi oshu ulike kutya Adam, ngoka a li e na oonkalo oombwanawa, okwa li ta vulu okukakatela uudhiginini wa gwanenena ando okwa li a hala. Epuko kalya li miilonga yaKalunga yokushita. Onkee ano Jesus Kristus oye oshiholelwa shoka twa hala okulandula, hamokuvulika owala kompango yaKalunga, ihe omokwiigandja wo paumwene kuJehova, Omunamapangelo gweshito alihe.—Deuteronomium 32:4, 5.
Otatu yamukula ngiini pauhandimwe?
16. Omolwashike tu na okukala aluhe twa kotoka shi na ko nasha niikala yetu kombinga yuunamapangelo waJehova?
16 Kehe gumwe gwomutse nena oku na okutaalelwa kompata yi na ko nasha nuunamapangelo weshito alihe. Ngele tatu popi montaneho kutya otwa gama kombinga yaJehova, Satana ote tu ningi oshoodhekwa she. Ote tu etele omathininiko okuza koombinga adhihe nota ka tsikila oku shi ninga sigo opehulilo lyonkalelo ye yiinima yuukolokoshi. Otu na okukala twa tonata aluhe. (1 Petrus 5:8) Eihumbato lyetu otali ulike kutya otu li kombinga yini mompata ya simana noonkondo yi na ko nasha nuunamapangelo waJehova nomompata ontiyali yi na ko nasha nuudhiginini kuye nuuna tatu makelwa. Itatu vulu okutala ko eihumbato lyokwaanuudhiginini li li oshinima inaashi simana molwashoka owala osho tashi ningwa apuhe muuyuni. Okukakatela uudhiginini otaku pula opo tu kambadhale okutula miilonga omithikampango dhaJehova dhuuyuuki moshinima kehe monkalamwenyo.
17. Oshike she etitha iifundja nokuyaka, shoka shi na oku tu ningitha tu yi yande?
17 Pashiholelwa, itatu vulu okuholela Satana, ngoka e li ‘he yiifundja.’ (Johannes 8:44) Otu na okukala tu li aanashili miilonga yetu ayihe. Monkalelo yaSatana, aagundjuka olundji ihaya lombwele aavali yawo oshili. Ihe aagundjuka Aakriste shika ohaye shi yanda, nomokuninga ngawo otayu ulike kutya Satana okwa popya iifundja sho a ti kutya oshigwana shaKalunga otashi ke etha po uudhiginini washo ngele shi li momamakelo. (Job 1:9-11; Omayeletumbulo 6:16-19) Opu na wo omikalo dhokungeshefa ndhoka tadhi vulu okundhindhilikitha omuntu kutya oku li kombinga ‘yahe yiifundja’ pehala lyokukala kombinga yaKalunga koshili. Ohatu yanda omikalo dha tya ngaaka. (Mika 6:11, 12) Okuyaka oku li wo oshinima shaahe li nando pauyuuki, nokuli nonando omuntu ona kale e na ompumbwe nenge nando omuntu ngoka iinima ye tayi yakwa po ona kale omuyamba. (Omayeletumbulo 6:30, 31; 1 Petrus 4:15) Nokuli nando okuyaka ohaku yakwa shaampoka tu li nenge nonando shoka sha kuthwa po oshishona, okuyaka oku li natango taku kondjithathana noompango dhaKalunga.—Lukas 16:10; Aaroma 12:2; Aaefeso 4:28.
18. (a) Pehulilo lyElelo lyOomvula Eyuvi lyaKristus, emakelo lini tali ka adha aantu ayehe? (b) Iikala yini tu na okukala tu na ngashingeyi?
18 Pethimbo lyElelo lyOomvula Eyuvi lyaKristus, Satana noompwidhuli dhe otaya ka kala molumbogo, itaaya ka vula okunwetha mo aantu. Itashi ka kala tuu epepelelo! Ihe konima yoomvula eyuvi, otaye ke ethiwa uule wethimbo efupi. Satana naamboka taye mu landula otaya ka thininika aantu mboka taya ka kala ya gwanenena mboka taya kakatele uudhiginini wawo kuKalunga. (Ehololo 20:7-10) Ano ngele otwa mono uuthembahenda wokukala nomwenyo pethimbo ndyoka, mbela otatu ki inyenga ngiini shi na ko nasha nompata yuunamapangelo weshito alihe? Molwashoka pethimbo ndyoka aantu ayehe otaya ka kala ya gwanenena, kehe omuntu itaa kala omudhiginini ota ningile owina notashi ke mu fala mehanagulo lyaaluhe. Inashi simana tuu noonkondo opo tu kale tu na ngashingeyi iikala yokuvulika kelombwelo kehe Jehova te tu pe, kutya nduno okupitila mOohapu dhe nenge okupitila mehangano lye! Ngele tatu shi ningi, otatu ulike eigandjo lyetu lyashili kuye e li Omunamapangelo gweshito alihe.
Oonkundathana dhokweendulula
• Ompata onenenene yini atuheni tu na okukala twa taalela? Oshe ende ngiini opo tu kwatelwe mo?
• Oshike shi li sha tongomana shi na ko nasha nomikalo moka aalumentu naakiintu yomethimbo lyonale yu ulike uudhiginini wawo kuJehova?
• Omolwashike sha simana noonkondo opo tu simaneke Jehova neihumbato lyetu esiku kehe?