Ontopolwa omulongo nayimwe

‘Kaleni nokukonga tango uukwaniilwa’

1. (a) Omolwashike Jesus a ladhipike aapulakeni ye ya konge tango Uukwaniilwa? (b) Mbela epulo lini tu na okwiipula?

OOMVULA dhi vulithe 1 900 dha piti, moshipopiwa she muGalilea, Jesus okwa ladhipikile aapulakeni ye ta ti: “Kaleni ano nokukonga tango uukwaniilwa nuuyuuki [waKalunga].” Ihe omolwashike shoka she endelela? Mbela Kristus ka li ta ka pewa oonkondo dhUukwaniilwa monakuyiwa konima yomathelemimvo ogendji? Osho, ihe Uukwaniilwa wopaMessias owa li tau ka kala oshilongitho shoka Jehova a li ta ka longitha okuyukipalitha uunamapangelo we nokugwanitha po elalakano lye ewanawa li na ko nasha nevi. Kehe gumwe ngoka e uvite ko shili kutya iinima mbyoka oya simana, okwa li ta ka pititha komeho Uukwaniilwa monkalamwenyo ye. Ngele shoka osho sha li ngawo methelemumvo lyotango, kashi na mbela okukala unene ngawo nena sho Kristus a langekwa po e li Omukwaniilwa! Ano epulo olyo: Mbela onkalamwenyo yandje otayi ulike ngaa kutya otandi kongo tango Uukwaniilwa waKalunga?—Mateus 6:33, NW.

2. Iinima yini aantu oyendji taya lalakanene unene?

² Dhoshili, nena muuyuni auhe omu na aantu omamiliyona mboka taya kongo tango Uukwaniilwa. Otayu ulike kutya yo otaya yambidhidha epangelo lyUukwaniilwa mokuninga okulonga ehalo lyaJehova oshinima sha simana monkalamwenyo yawo, ye mu iyapulila. Mepingathano naashika, aantu oyendjiyendji oye na ohokwe yokukonga iinima yuuyuni. Aantu otaya lalakanene iimaliwa nosho wo omaliko nomainyanyudho ngoka taga vulu okumonika niimaliwa. Nenge taya longitha oonkondo dhawo adhihe mokuhumitha komeho omaithanolongo gawo. Omukalo gwawo gwonkalamwenyo otagu ulike kutya oye na ko owala nasha nayo yene, nomaliko nosho wo nomainyanyudho. Inaya pititha Kalunga komeho, nokuli ngele oye mu itaala.—Mateus 6:31, 32.

3. (a) Omaliko goludhi luni Jesus a ladhipike aalongwa ye ya konge, nomolwashike? (b) Omolwashike inaashi pumbiwa nando tu kale tatu ipula unene niinima yopamaliko?

³ Ihe Jesus okwa pe aalongwa ye omayele ngaka, taga ti: “Inamu ilikolela omaliko kombanda yevi,” oshoka omaliko ga tya ngaaka ihaga kalelele. Okwa ti: “Ihe ilikoleleni omaliko omegulu” mokulongela Jehova. Jesus okwa ladhipike aalanduli ye ya kaleke eho lyawo “lyu uka” mokugandja eitulomo nosho wo oonkondo dhawo kokulonga ehalo lyaKalunga. Okwe ya lombwele a ti: “Kamu vulu okulongela Kalunga [nomamona].” Ihe oshi li ngiini kombinga yoompumbwe dhopalutu—iikulya, iizalomwa nehala lyokukala? Jesus okwa gandja omayele a ti: “Inamu sila oomwenyo dheni oshimpwiyu.” Oku ukitha eitulomo lyawo kuudhila, kutya Kalunga oye he u palutha. Jesus okwa ladhipike aalanduli ye yi ilonge sha koongala, kutya Kalunga oye he dhi zaleke. Mbela aapiya yaJehova yopantu aanandunge kaye vule ayihe mbino? Jesus okwa ti: “[Kaleni ano nokukonga tango uukwaniilwa, NW] nuuyuuki we, nena oombino ayihe [mwa pumbwa] otamu yi gwedhelwa ko.” (Mateus 6:19-34) Mbela iilonga yoye ohayi ulike kutya owe shi itaala?

Ino etha oshili yUukwaniilwa yi thetekwe

4. Oshilanduliko otashi vulu okukala shike ngele omuntu oha gandja unene eitulomo olindji kiinima yopamaliko?

⁴ Oshi li shu uka okukala tatu ipula kombinga yokukala tu na sha gwana okusila oshimpwiyu oompumbwe dhopalutu dhetu yene nodhuukwanegumbo wetu. Ihe ngele omuntu oto ipula unene niinima yopamaliko, iilanduliko otayi vulu okukala ya nika oshiponga. Nokuli nonando otashi vulika to ti kutya owi itaala mUukwaniilwa, oshili yUukwaniilwa otayi ka thetekwa kiinima yilwe mbyoka oyo wa pititha komeho momutima gwoye. (Mateus 13:18-22) Pashiholelwa, pompito yimwe omupangeli omugundjuka omuyamba okwa pulile Jesus ta ti: “Ondi na okulonga shike, ndi mone omwenyo gwaaluhe?” Okwa li e na onkalamwenyo ya yogoka pamikalo nokwa li a ningi yalwe nawa, ihe okwa li unene e hole iiniwe ye yopamaliko. Ka li ta vulu oku yi etha po opo a ninge omulanduli gwaKristus. Onkee ano okwa kanitha ompito ndjoka ya li tayi vulu oku mu pitika opo a kale pamwe naKristus mUukwaniilwa womegulu. Jesus pompito ndjoka okwa ti: “Aayamba oya nyengwa ngiini okuya [muukwaniilwa, KB] waKalunga!”—Markus 10:17-23.

5. (a) Paulus okwa ladhipike Timoteus a kale a gwanenwa kushike, nomolwashike? (b) Satana oha longitha ngiini “ohole yeliko” yi li omwigo omuhanaguli?

⁵ Konima yoomvula dha piti, omuyapostoli Paulus okwa nyolelele Timoteus, ngoka a li ethimbo ndyoka muEfeso, shoka sha li ondingandinga yomalandithilo tage ende nawa. Paulus okwe mu dhimbulukitha ta ti: “Inatu eta mo sha muuyuni, katu vulu okuya nando nasha. Ano shimpa tuu tu na iipalutha nomizalo, nayi tu gwanene.” Okulonga opo omuntu u imonene mwene nosho wo uukwanegumbo woye “iipalutha nomizalo” oshu uka. Ihe Paulus okwa londodha ta ti: “Mboka ya hala uuyamba otaa [yulwa] kemakelo nokomwigo nokuuhalu owindji wuugoya nowiiponga, hau ninginitha aantu meyonuko nomekano.” Satana oku na omakoto. Oha heke omuntu tango niinima iishona. Shoka otashi vulu okulandulwa kethininiko enene, tashi vulika ompito yokuyelwa nenge yokupewa iilonga iiwanawa mbyoka hayi futu iimaliwa oyindji, ihe otayi kutha po ethimbo ndyoka wa li ho longitha nale miinima yopambepo. Ngele inatu kotoka, “ohole yeliko” otayi vulu okutheteka iinima mbyoka ya simana unene yi na ko nasha nUukwaniilwa. Paulus okwe shi popi ngaashi tashi landula ta ti: “[Moku] li hola oyendji ya puka mo meitaalo noyi iyululitha kuuwehame owindji.”—1 Timoteus 6:7-10.

6. (a) Opo tu yande okuyulwa komwigo gwokuhola omaliko otu na okuninga shike? (b) Einekelo lini tatu vulu okukala tu na nongele nokuli tatu dhiladhila onkalo yuuyuni yopamahupilo yonena?

⁶ Omolwokuhola kwe kwashili uumwayinathana wopaKriste, Paulus okwa ladhipike Timoteus ta ti: “Za ontuku yiinima ya tya ngeyi” na: “Kondja ekondjo ewanawa lyeitaalo.” (1 Timoteus 6:11, 12) Oonkambadhala dha mana mo odha pumbiwa ngele otwa hala okuyanda okufaalelwa konkalamwenyo yokuhola omaliko yuuyuni moka tu li. Ihe ngele otatu kondjo noonkondo metsokumwe neitaalo lyetu, Jehova ite ke tu etha nando. Kutya nduno oondando odhi londe shi thike peni nosho wo okwaahe na iilonga hoka ku li apuhe, ota ka sa oshimpwiyu opo tu kale tu na lela shoka twa pumbwa. Paulus okwa nyola ta ti: “Inamu kala aanalwiho moondjenda dheni, gwaneni naambyoka mu yi na, oshoka [Kalunga] okwa ti: Itandi ku etha noitandi ku thigi po nando. Onkee ano tatu ti neinekelo: Omuwa oye omukwathi gwandje, kandi na okutila; omuntu ota ningi ndje shike?” (Aaheberi 13:5, 6) Omukwaniilwa David okwa nyola wo ta ti: “Ongame nda li omugundjuka nonda koko, ngaye inandi mona omuyuuki kwe ethiwa owala, nenge oluvalo lwe talu hehela oshikwiila.”—Epsalmi 37:25.

Aalongwa yonale oya tula po oshiholelwa

7. Omalombwelo geni ge na ko nasha nokuuvitha Jesus a pe aalongwa ye, nomolwashike ga li ge eleka?

⁷ Konima sho Jesus a dheula nawa aayapostoli ye, okwe ya tumu kuIsrael ye ku uvithe onkundana ombwanawa taya ti: “Uukwaniilwa wegulu wa hedha popepi.” Kalya li tuu etumwalaka linyanyudha! Jesus Kristus, Omukwaniilwa gwopaMessias, okwa li e li mokati kawo. Molwashoka aayapostoli oya li yi igandja okulongela Kalunga, Jesus okwe ya ladhipike ya kale ye na einekelo kutya Kalunga ote ke ya sila oshimpwiyu. Onkee ano okwa ti: “Kondjila inamu ya ko nando nasha, nando nondhimbo nenge nompunda nenge nonguta nenge niimaliwa nenge noonguwo mbali. Nge tamu yi megumbo, kaleni moka sigo tamu humu komeho.” (Mateus 10:5-10, KB; Lukas 9:1-6) Jehova ota ka sa oshimpwiyu opo oompumbwe dhawo dhi gwanithwe po kAaisrael ooyakwawo, mboka ya li ye na omukalondjigilile okuyakula aayendanandjila.

8. (a) Omolwashike konima yokathimbo, manga Jesus inaa sa, a gandja omalombwelo omape gokuuvitha? (b) Oshike sha li shi na okukala osho oshinima shotango monkalamwenyo yaalanduli yaJesus?

⁸ Konima yethimbo, manga owala Jesus inaa sa, okwa londodha aayapostoli ye shi na ko nasha nuushili mboka kutya monakuyiwa otaya ka longa kohi yoonkalo dha lunduluka. Omolwokupatanekwa kwiilonga yawo kaakwanambelewa, otashi vulika ya li itaaya ka yakulwa we neyakulo ndyoka lyaayenda muIsrael. Niishewe, oya li taye ku uvitha nziya etumwalaka lyUukwaniilwa miilongo yaamboka kaaye shi Aajuda. Nopo nduno oya li ye na okufaalela “okampunda kiimaliwa” nosho wo “ompunda yiikulya.” Nonando ongaaka, oya li ye na okutsikila okukonga tango Uukwaniilwa waJehova nuuyuuki we, ye na einekelo kutya Kalunga ota ka yambeka oonkambadhala dhawo ya mone iipalutha niizalomwa mbyoka ya pumbiwa.—Lukas 22:35-37, yelekanitha NW.

9. Paulus okwa pititha ngiini tango komeho Uukwaniilwa monkalamwenyo ye manga a li ta sile oshimpwiyu oompumbwe dhe dhopalutu, nomayele geni a gandja ge na ko nasha noshinima shika?

⁹ Omuyapostoli Paulus okwa li oshiholelwa oshiwanawa shagumwe ngoka a tula miilonga omayelepukululo gaJesus. Paulus okwa li a ningi uukalele oshinima shotango monkalamwenyo ye. (Iilonga 20:24, 25) Sho a li a yi koshitopolwa e ku uvithe, okwa li a sile oshimpwiyu oompumbwe dhe dhopalutu, a longo nokuli mokutunga ootenda. Ka li a tegelela yalwe ye mu sile oshimpwiyu. (Iilonga 18:1-4; 1 Aatessalonika 2:9) Ihe okwa li a taamba ko nolupandu eyakulo lyaayenda nosho wo omagano sho yalwe ya li ye mu ulukile ohole momukalo ngoka. (Iilonga 16:15, 34; Aafilippi 4:15-17) Paulus ina ladhipika Aakriste ye ethe po iinakugwanithwa yawo yuukwanegumbo opo ya vule oku ku uvitha, ihe pehala lyaashono oya kale ye na ondjele miinakugwanithwa yawo yi ili noyi ili. Okwe ya ladhipike ya longe, ya kale ye hole omaukwanegumbo gawo nokugandja kuyalwe. (Aaefeso 4:28; 2 Aatessalonika 3:7-12) Okwe ya ladhipike ya kale yi inekela Kalunga, hainiwe yopamaliko, noya longithe onkalamwenyo yawo momukalo ngoka tagu ulike kutya oye uvite ko shili iinima mbyoka ya simanenena. Metsokumwe nomalongo gaJesus, shoka otashi ti kutya oye na okukonga tango Uukwaniilwa waKalunga nuuyuuki we.—Aafilippi 1:9-11.

Pititha komeho Uukwaniilwa monkalamwenyo yoye

10. Otashi ti shike okukonga tango Uukwaniilwa?

¹⁰ Ohatu tseyithile yalwe onkundana ombwanawa yUukwaniilwa shi thike peni? Shoka oshi ikolelela unene koonkalo dhetu nokuuwindji wolupandu lwetu. Dhimbulukwa kutya Jesus ina tya: ‘Kongeni Uukwaniilwa ngele kaamu na we sho tamu ningi.’ Molwashoka okwa tseya nkene Uukwaniilwa wa simana, okwa popi shoka He a hala shi ningwe, sho a ti: “Kongeni aluhe uukwaniilwa we.” (Lukas 12:31, NW) Nonando oyendji yomutse otu na okulonga opo tu sile oshimpwiyu oompumbwe dhetu nosho wo dhomaukwanegumbo getu, iilonga yUukwaniilwa mbyoka twa pewa kuKalunga otayi ka kala yi li ondingandinga yonkalamwenyo yetu ngele otu na eitaalo. Ethimbo olyo tuu ndyoka, otatu ka sila oshimpwiyu iinakugwanithwa yuukwanegumbo wetu.—1 Timoteus 5:8.

11. (a) Jesus okwa thaneke ngiini kutya haayehe ya li taya ka vula okulonga shi thike pamwe mokutaandeleka etumwalaka lyUukwaniilwa? (b) Iinima yini tayi ku utha kutya otatu vulu okulonga shi thike peni?

¹¹ Yamwe yomutse otatu vulu okulongitha ethimbo olindji mokuuvitha onkundana ombwanawa yUukwaniilwa tu vule yalwe. Ihe Jesus meyele lye li na ko nasha nomavi gi ili nogi ili, Jesus oku ulike kutya ayehe mboka ye na omitima dha fa evi ewanawa otaye ki ima iiyimati. Otaye ki ima shi thike peni? Oonkalo dhaantu odha yoolokathana. Oomvula, uukolele niinakugwanithwa yuukwanegumbo oyi li iinima mbyoka yi na okutalika. Ihe ngele opu na olupandu lwashili, otapu vulu okulongwa oshindji.—Mateus 13:23.

12. Aagundjuka otaya ladhipikwa unene ya tedhatedhe elalakano ewanawa lyopambepo lini?

¹² Oshi li nawa okukala tu na omalalakano ngoka tage ke tu kwathela okutamununa mo okukutha ombinga kwetu muukalele wUukwaniilwa. Aagundjuka oye na okudhiladhila nawa lela kombinga yoshiholelwa sha dhenga mbanda shOmukriste omugundjuka nguka omulaadhi Timoteus. (Aafilippi 2:19-22) Mbela oshike tashi vulu okukala shi li nawa kuyo kaashi shi okuya miilonga yethimbo lyu udha ngele ya mana osikola? Aakuluntu otaya ka mona wo uuwanawa ngele taya tula po omalalakano gopambepo omawanawa.

13. (a) Olye tu utha shoka tatu vulu okuninga pauhandimwe miilonga yUukwaniilwa? (b) Otatu ulike shike ngele otatu kongo shili tango Uukwaniilwa?

¹³ Pehala lyokupa uusama mboka tashi vulika tatu dhiladhila kutya otaya vulu okuninga oshindji, otu na okwiinyengithwa keitaalo tu hwepopale tse yene opo tu vule okulongela Kalunga twa mana mo ngaashi oonkalo dhetu tadhi shi pitika. (Aaroma 14:10-12; Aagalati 6:4, 5) Ngaashi shu ulikwa moshinima shaJob, Satana ota ti kutya otu na owala ohokwe onene miinima yetu yopamaliko, uuwanawa wetu nonkalonawa yetu yopaumwene nonokutya otatu longele owala Kalunga nomatompelo gokwiihola. Ihe ngele otatu kongo shili tango Uukwaniilwa, otashi tu kwathele okuulika kutya Ondiaboli oyo shili omuniifundja omunyanyalithi. Otatu ulike kutya iilonga yokulongela Kalunga oyo tango monkalamwenyo yetu. Kungawo otatu ulike moohapu nomiilonga ohole yetu yomuule yokuhola Jehova, okuyambidhidha kwetu nuudhiginini uunamapangelo we nosho wo ohole yetu yokuhola aantu ooyakwetu.—Job 1:9-11; 2:4, 5; Omayeletumbulo 27:11, OB-1986.

14. (a) Omolwashike elandulathano lyiilonga yomomapya lya pumbiwa? (b) Oonzapo odhindji ohadhi kutha ombinga shi thike peni miilonga yomomapya?

¹⁴ Elandulathano otali vulu oku tu kwathela tu longe oshindji shi vulithe pwaashoka hatu ningi shito. Jehova okwa “tula po ethimbo” okugwanitha elalakano lye. (Eksodus 9:5, KB; Daniel 8:19, KB) Ngele otashi wapa, oshi li nawa okukutha ombinga muukalele womomapya ethimbo lyontumba lyu uthwa nenge li vule po oshiwike kehe. Oonzapo dhaJehova omayuvi omathele muuyuni auhe ohadhi kutha ombinga muukwathelikokolindjila, tadhi longitha konyala oowili mbali esiku kehe mokuuvitha onkundana ombwanawa. Dhilwe omayuvi gomathele ohadhi longo dhi li aakokolindjila yondjigilile, tadhi longitha konyala oowili mbali netata esiku kehe okutseyitha etumwalaka lyUukwaniilwa. Aakokolindjila yi ikalekelwa naatumwa ohaya longitha nokuli ethimbo olindji miilonga yUukwaniilwa. Otatu vulu wo okukonga oompito tu lombwele inaatu shi longekidha kehe gumwe ngoka a hala okupulakena etegameno lyUukwaniilwa. (Johannes 4:7-15) Oshi na okukala ehalo lyetu okukala nombinga yu udha miilonga mbika ngele oonkalo dhetu tadhi shi pitika, oshoka Jesus okwa hunganeke ta ti: “Nevaangeli ndika [lyuukwaniilwa, KB] otali ku uvithilwa nuuyuni auhe, li ningile iigwana ayihe ehokololo; notaku ya ihe ehulilo.”—Mateus 24:14; Aaefeso 5:15-17.

15. Omolwashike to dhiladhila kutya omayele ge na ko nasha nuukalele wetu, ngoka ge li mAakorinto yotango 15:58 oge li pethimbo?

¹⁵ Oonzapo dhaJehova muuyuni auhe ohadhi kutha ombinga dha hangana muuthembahenda mboka wiilonga, kutya nduno omoshilongo shini dhi li. Ohadhi tula miilonga omayele gOmbimbeli ga nwethwa mo, ngoka taga ti: “Kaleni mwi ikolelela, mwaa tenguke, aluhe aalaadhi, omoshilonga shOmuwa, mu kale mu shi shi, oshilonga sheni kashi shi osima omOmuwa.”—1 Aakorinto 15:58.

Oonkundathana dhokweendulula

• Sho Jesus a ti kutya natu kale “nokukonga tango uukwaniilwa,” okwa li ta popi shike osho shi na okukalekwa konima?

• Otu na okutala ko ngiini okusila oshimpwiyu oompumbwe dhetu dhopalutu nodhomaukwanegumbo getu? Ekwatho lini Kalunga te ke tu pa?

• Omoombinga dhini dhiilonga yUukwaniilwa tatu vulu okukutha ombinga?

[Ethano pepandja 107]

Moshilongo kehe, Oonzapo dhaJehova nena otadhi uvitha onkundana ombwanawa, manga ehulilo inaali ya