Ontopolwa omulongo nontiheyali
Kala netilokalunga megumbo
1. Oshizemo oshini sho aantu ya landula ewiliko lyomOohapu dhaKalunga?
JEHOVA oye Omutoti gwondjokana, nOohapu dhe otadhi gandja ewiliko lya dhenga mbanda komaukwanegumbo. Aantu oyendji oye na oondjokana dhi na omupondo molwashoka oya landula ewiliko ndyoka. Oshi shi okupandulwa sho yamwe mboka ya li ya kala pamwe yo inaaya hokana, yi inyengithwa opo ya hokane paveta. Yalwe oye etha po omakwatathano gopamilalo pondje yondjokana. Aasamane aakwanyanya mboka ya li ya ningi nayi aakulukadhi yawo nosho wo aanona yawo oyi ilongo okukala aanambili nosho wo okukala ye na olukeno.
2. Oshike sha kwatelwa monkalamwenyo yuukwanegumbo wopaKriste?
2 Onkalamwenyo yuukwanegumbo wopaKriste oya kwatela mo iinima oyindji, ngaashi nkene twa tala ko okukalelela kwondjokana, shoka hatu ningi okugwanitha po iinakugwanithwa yetu muukwanegumbo, nonkene hatu kala niilyo yuukwanegumbo wetu. (Aaefeso 5:33–6:4) Nonando otashi vulika tu shi shoka Ombimbeli tayi ti kombinga yonkalamwenyo yuukwanegumbo, shoka sha simana osho okutula miilonga omayele gOmbimbeli. Kapu na gumwe gwomutse a hala okukala a fa mboka ya pangulwa kuJesus molwashoka inaaya vulika kiipango yaKalunga. Oya tompathana papuko kutya osha gwana okukala owala ye li aatilikalunga. (Mateus 15:4-9) Inatu hala tu kale tu na emoniko lyowala lyetilokalunga e tatu kala inaatu li ulika muukwanegumbo wetu. Pehala lyaashono, otwa hala okukala tu na etilokalunga lyashili, ndyoka li li “eliko enene.”—1 Timoteus 5:4, NW; 6:6, KB; 2 Timoteus 3:5.
Ondjokana oyi na okukala uule wethimbo li thike peni?
3. (a) Oshike hashi ningilwa oondjokana odhindji, ihe oshike shi na okukala etokolotoko lyetu? (b) Longitha Ombimbeli yoye e to yamukula omapulo ngoka ge li pevi lyokatendo haka.
3 Omakwatathano gondjokana methimbo lyetu otage ende taga nkundipala noonkondo. Aayihokani yamwe mboka ya kala ya hokana uule woomvula oya tokola okwiihenga nokuhokana nagulwe i ili. Noinashi pumba we okuuva aayihokani aagundjuka ya topoka konima yokukala ya hokana uule owala wethimbo efupi. Kutya nduno yalwe ohaya ningi shike, otu na okukala twa hala okunyanyudha Jehova. Onkee ano natu konakoneni omapulo nosho wo omanyolo taga landula okumona shoka Oohapu dhaKalunga tadhi ti kombinga yokukalelela kwondjokana.
Uuna omulumentu nomukiintu taya hokana, uule wethimbo li thike peni ye na okukala ya tegelela okukala ye li pamwe? (Markus 10:6-9; Aaroma 7:2, 3)
Onetompelo owala lini lya taambiwa ko kuKalunga omuntu ta vulu okuhengana e ta kala e na ompito okuhokanununa nenge okuhokanununwa? (Mateus 5:31, 32; 19:3-9)
Jehova ohu uvu ngiini kombinga yomahengathano ngoka inaaga pitikwa kOohapu dhe? (Malakia 2:13-16)
Mbela Ombimbeli otayi popile okutopoka kwookuume kopandjokana opo ya kandule po uupyakadhi mondjokana? (1 Aakorinto 7:10-13)
Omoonkalo dhini okutopoka taku vulu okukala kwa pitikwa? (Epsalmi 11:5, NW; Lukas 4:8; 1 Timoteus 5:8)
4. Omolwashike oondjokana dhimwe hadhi kalelele?
4 Oondjokana dhimwe ohadhi shi pondola okukalelela. Omolwashike? Etompelo limwe olyo molwashoka ayehe yaali oya tegelele sigo taya koko opo ya hokane, ihe osha simana wo okukonga kuume kopandjokana ngoka e na ohokwe miinina mbyoka nangoye u hole naangoka to vulu okukundathana naye wa manguluka. Ihe osha simana noonkondo okukonga kuume ngoka e hole Jehova noha simaneke Oohapu dhe dhi li ekankameno lyokupongolola po omaupyakadhi. (Epsalmi 119:97, 104; 2 Timoteus 3:16, 17) Omuntu a tya ngaaka ita ka kala e na iikala mbyoka kutya ngele iinima itayi ende nawa, ota vulu aluhe okutopoka nakuume ke kopandjokana nenge okuhengana. Ita ka longitha omaunkundi gakuume ke ongo eipopilo lyokuyanda iinakugwanithwa ye. Pehala lyaashono, ota ka ungaunga nomaupyakadhi nokumona omakandulopo taga longo.
5. (a) Uudhiginini kuJehova ohau dhana onkandangala yini mondjokana? (b) Nokuli nonando opu na omapataneko, omauwanawa geni taga vulu okuza mokudhiginina omithikampango dhaJehova?
5 Satana ota ti kutya ngele tatu mono iihuna, otatu ke etha po oondjila dhaJehova. (Job 2:4, 5; Omayeletumbulo 27:11) Ihe Oonzapo dhaJehova odhindji ndhoka dha mona iihuna molwokukala dhi na ookuume kopandjokana haye dhi pataneke inadhi teya po oondjokana dhadho. Otadhi tsikile okukala dhi li aadhiginini kuJehova nokuvulika kiipango ye. (Mateus 5:37) Yamwe mboka ya dhiginina, oya mono enyanyu sho ookuume kawo kopandjokana ya tameke okulongela Jehova pamwe nayo—nokuli konima yoomvula odhindji dhokupatanekwa. (1 Petrus 3:1, 2) Shi na ko nasha nAakriste mboka ookuume kawo kopandjokana ihaaya lunduluka nando nenge mboka ookuume kawo kopandjokana ye ye etha po molwashoka taya longele Jehova, nayo oye shi wo kutya otaya ka lalekwa nuuyamba molwokuulika etilokalunga megumbo.—Epsalmi 55:23; 145:16.
Kehe gumwe na gwanithe po oshinakugwanithwa she
6. Opo ondjokana yi kale yi na omupondo, elongekidho lini li na okusimanekwa?
6 Dhoshili, opo ondjokana yi kale yi na omupondo otashi pula oshindji kaashi shi owala okukala pamwe. Osha pumbiwa noonkondo opo kuume kehe mondjokana a simaneke elongekidho lyaJehova lyuukwamutse. Shoka otashi eta elandulathano ewanawa nokukala wu uvite wa gamenwa megumbo. Otatu lesha mAakorinto yotango 11:3, taku ti: “Kristus oye omutse gwakehe omulumentu nomutse gwomukiintu omulumentu nomutse gwaKristus oKalunga.”
7. Uukwamutse ou na okulongithwa ngiini muukwanegumbo?
7 Mbela owa ndhindhilika ngaa shoka ovelise ndjoka ya tumbula tango? Eeno, omulumentu kehe oku na Omutse, Kristus, ngoka e na okuvulika kuye. Shoka otashi ti kutya omusamane oku na okulongitha uukwamutse momukalo ngoka tagu ulike omaukwatya gaJesus. Kristus oha vulika kuJehova, oku hole egongalo noonkondo adhihe nohe li sile oshimpwiyu. (1 Timoteus 3:15) Nokuli okwi “igandja omolwalyo.” Jesus ke na uuntsa noke li ihaa yawala, ihe ‘omunambili nomomutima okwi ishonopeka.’ Mboka ye li kohi yuukwamutse we ‘otayi imonene oomwenyo dhawo evululuko.’ Uuna omusamane tu ungaunga nuukwanegumbo we komukalo ngoka, otu ulike kutya ye oha vulika kuKristus. Omukiintu Omukriste oku na ano okumona kutya otashi kwatha notashi talaleke sho ta longele kumwe nomusamane gwe nokuvulika kuukwamutse we.—Aaefeso 5:25-33; Mateus 11:28, 29; Omayeletumbulo 31:10, 28.
8. (a) Omolwashike tashi vulika tashi monika sha fa omikalo dhopaKriste momagumbo gamwe ihaadhi eta iizemo mbyoka ya halika? (b) Oshike tu na okuninga ngele twa taalelwa konkalo ya tya ngaaka?
8 Ihe nonando ongaaka, omaupyakadhi otaga ka holoka po. Sho pwa li kaapu na gumwe gwomuukwanegumbo a tameka okulongitha omakotampango gOmbimbeli, otashi vulika yamwe ya li haa kwatele onkone ngele ya pukululwa kuyalwe. Okwiindila sha pamukalo gwombili nogwopahole otashi vulika itaaku eta iizemo yasha. Otu shi shi kutya Ombimbeli otayi ti kutya ‘ekehuko nondjahi noontamanana netukano’ nayi kale kokule natse. (Aaefeso 4:31) Ihe oshike shi na okuningwa ngele yamwe yomuukwanegumbo otaya monika ya fa kaaye uvite ko ngele tatu popi nombili? Nonando ongaaka Jesus ina holela mboka ya si ondjahi noya tukana, ihe okwa kala i inekela He. (1 Petrus 2:22, 23) Onkee ano uuna oonkalo oondhigu tadhi holoka po megumbo, ulika kutya ou na etilokalunga mokugalikana Jehova e ku kwathele, pehala lyokulongitha omikalo dhuuyuni.—Omayeletumbulo 3:5-7.
9. Oshike aasamane oyendji Aakriste yi ilongo okuninga, pehala lyokukonga owala omapuko?
9 Omalunduluko olundji ihaga ningwa nziya, ihe omayele gOmbimbeli ohaga longo lela ngele taga tulwa miilonga neidhidhimiko nonuudhiginini. Aasamane oyendji oya mono kutya ondjokana oya tameke okuhwepopala sho ya tameke okuuva ko nkene Kristus hu ungaunga negongalo. Egongalo ndyoka inali thikama po maantu ya gwanenena. Ihe Jesus oku li hole, ohe li tulile po oshiholelwa oshiwanawa e ta longitha Omanyolo oku li kwathela li hwepopale. Okwa gandja omwenyo gwe molwegongalo. (1 Petrus 2:21) Oshiholelwa she osha ladhipike aasamane oyendji Aakriste ya kale omitse omiwanawa dhomaukwanegumbo noya gandje ekwatho lyopahole okuhwepopaleka oondjokana dhawo. Shoka otashi eta iizemo iiwanawa shi vulithe okukonga omapuko maakiintu yawo nenge okutinda okupopya nayo.
10. (a) Ongiini omusamane nenge omukulukadhi—nokuli ngoka ta ti kutya ye Omukriste—tashi vulika a dhigupalekele yalwe onkalamwenyo megumbo? (b) Oshike tashi vulu okuningwa opo ku hwepopalekwe onkalo?
10 Ongiini ngele omusamane iha sile oshimpwiyu oompumbwe dhuukwanegumbo we dhopamaiyuvo nenge iha katuka onkatu okulongekidha oonkundathana dhOmbimbeli dhuukwanegumbo nenge omaipyakidhilo galwe? Nenge ongiini ngele omukulukadhi iha longele kumwe nomusamane gwe nokuulika evuliko lyopakalunga? Yamwe ohaya mono iizemo iiwanawa mokukundathana omaupyakadhi komukalo gwesimaneko ye li uukwanegumbo. (Genesis 21:10-12; Omayeletumbulo 15:22) Ihe nokuli nonando iizemo hayo naanaa mbyoka twa li twa hala, kehe gumwe gwomutse ota vulu okuyambidhidha okuhwepopaleka ombepo yomegumbo mokwiimika iiyimati yombepo yaKalunga monkalamwenyo yetu nokuyaalela pahole iilyo iikwetu yuukwanegumbo. (Aagalati 5:22) Onkalo itayi hwepopala ngele otwa tegelela omuntu gulwe oye a ninge sha, ihe ongele tatu ningi po sha kombinga yetu, nokungawo otatu ulike kutya otu na etilokalunga.—Aakolossa 3:18-21.
Mpoka tapu adhika omayamukulo
11, 12. Jehova okwa gandja shike oku tu kwathela tu ninge onkalamwenyo yuukwanegumbo yi na omupondo?
11 Opu na oonzo odhindji hoka aantu haya ka konga omayele miinima yi na ko nasha nomaukwanegumbo gawo. Ihe otu shi shi kutya Oohapu dhaKalunga odhi na omayele dhingi notwa nyanyukwa sho Kalunga okupitila mehangano lye li wetike te tu kwathele oku ga longitha. Oto kwathelwa mbela lela kekwatho ndyoka?—Epsalmi 119:129, 130; Mika 4:2.
12 Kakele kokukala pokugongala kwegongalo, mbela owi itulila po ethimbo ihaali faula lyekonakonombimbeli lyuukwanegumbo? Omaukwanegumbo ngoka hage shi ningi otaga vulu okukala ga hangana mokulongela Kalunga kwago. Onkalamwenyo yuukwanegumbo wago ohayi yambekwa sho taya longitha Oohapu dhaKalunga moonkalo dhawo.—Deuteronomium 11:18-21.
13. (a) Ngele tu na omapulo ge na ko nasha niinima yuukwanegumbo openi olundji hatu vulu okumona ekwatho lya pumbiwa? (b) Oshike shi na okuulikwa momatokolo agehe ngoka hatu ningi?
13 Otashi vulika u na omapulo kombinga yiinima yuukwanegumbo. Pashiholelwa, ongiini kombinga yokungambeka oluvalo? Mbela opu na ngaa oompito dhimwe okwiikutha ela ku li mondjila? Ngele okanona kake na naanaa ohokwe miinima yopambepo, oka tegelelwa ka kuthe ombinga yi thike peni mokulongela Kalunga kuukwanegumbo? Ogendji gomomapulo ngoka oga kundathanwa miileshomwa ya nyanyangidhwa kOonzapo dhaJehova. Ilonga okulongitha omakwatho gokukonakona Ombimbeli, mwa kwatelwa iiyuliki, opo u mone omayamukulo. Ngele ku na iileshomwa mbyoka tayi ulikwa koshiiuliki, tala mondjugo yomambo yopOshinyanga shUukwaniilwa. Nenge otashi vulika iileshomwa mbyoka to vulu oku yi mona mokompiuta yoye. Oto vulu wo okukundathana omapulo goye naalumentu naakiintu Aakriste ya pyokoka. Ihe ino kala aluhe wa tegelela u yamukulwe kutya eeno nenge aawe kepulo kehe. Olundji ou na okutokola mwene, polwoye nenge mu li aayihokani. Opo nduno ninga omatokolo ngoka tagu ulike kutya iho ulike owala etilokalunga montaneho yaantu, ihe nomegumbo wo.—Aaroma 14:19; Aaefeso 5:10.
Oonkundathana dhokweendulula
• Uudhiginini kuJehova owa kwatelwa ngiini muudhiginini wetu kukuume ketu kopandjokana?
• Oshike tashi ke tu kwathela okuninga shoka tashi nyanyudha Kalunga uuna tu li kohi yethinininiko lyomaupyakadhi guukwanegumbo?
• Oshike tatu vulu okuninga opo tu hwepopaleke onkalo nokuli nonando yalwe muukwanegumbo itaya ningi shoka shi na okuningwa?
[Ethano pepandja 155]
Okukala kwomusamane e li omutse oku na okuulika omaukwatya gaJesus
[Ethano pepandja 157]
Ekonakonombimbeli lyuukwanegumbo ihaali faula ohali u kwathele u kale wa hangana