Oshileshwa 3

Ou na okwiilonga kombinga yaKalunga

Okukala kuume kaKalunga, ou na okwiilonga kombinga ye. Ookuume koye edhina lyoye mbela oye li shi nohaye li longitha? Eeno, ohaye shi ningi. Kalunga okwa hala u tseye edhina lye nou li longithe wo. Edhina lyaKalunga oJehova. (Eksodus 15:3; Mateus 6:9) Ou na wo okwiilonga shoka e hole naashoka kee hole. Ou na okutseya kutya ookuume ke oyo oolye noolye aatondi ye. Ohashi pula ethimbo okutseya gumwe. Ombimbeli otayi ti kutya oshi li pandunge okutula po ethimbo lyokwiilonga kombinga yaJehova.—Aaefeso 5:15, 16, OB-1986.

Ookuume kaKalunga ohaya longo shoka tashi mu nyanyudha. Dhiladhila kombinga yookuume koye. Ngele oto ya ningi nayi noto longo iinima mbyoka ye tonde, otaya ka tsikila ngaa mbela okukala ookuume koye? Hasho nando! Momukalo gwa faathana, ngele owa hala okukala kuume kaKalunga, ou na okulonga shoka tashi mu nyanyudha.—Johannes 4:24.

Hamalongelokalunga agehe taga kwatha aantu ya kale nuukuume naKalunga. Jesus, ngoka e li kuume kopothingo kaKalunga, okwa popi oondjila dhi li mbali. Ondjila yimwe oya mbwalangandja noyu udha aantu. Ondjila ndjoka otayi fala kehanagulo. Ondjila onkwawo oya thinana notamu endwa kaantu aashona. Ondjila ndjoka otayi fala komwenyo gwaaluhe. Shika otashi ti kutya ngele owa hala okukala u na uukuume naKalunga, ou na okwiilonga omukalo ngoka gu li mondjila gwoku mu longela.—Mateus 7:13, 14.