Novomba

Ngele ngoye omuvali, kwathela aamwoye yi ilongekidhe omatyokosha gi ikolelela komimvo dhawo. Omathimbo gamwe oshitopolwa shoka tashi kundathanwa megongalo otashi vulika shi kale tashi popi kombinga yiinima ya kwata miiti, ngaashi omaupyakadhi gomondjokana nenge iinima yopamikalo, ihe otashi vulika pu kale okatendo kamwe nenge uyali mboka okanona taka vulu okutya ko sha kuwo. Shimwe ishewe, kwathela aamwoye yu uve ko kutya omolwashike tashi vulika kaaya tumbulwe oshikando kehe taya ganeke. Ngele owe shi ya yelithile, otashi vulu oku ya kwathela kaaya yemate uuna yalwe oyo ya tumbulwa. (1 Tim. 6:18) Atuheni otatu vulu okwiilongekidha omatyokosha taga tungu, ngoka taga simanekitha Jehova notaga tsu omukumo Aakriste ooyakwetu. (Omayel. 25:11) Nonando poompito dhimwe otashi vulika tu gandje iimoniwa yetu paufupi, otu na okuyanda okupopya unene kombinga yetu yene. (Omayel. 27:2; 2 Kor. 10:18) Pehala lyaashono, ohatu kambadhala okugandja eitulomo kuJehova, kOohapu dhe nokoshigwana she. — Eh. 4:11. w23.04 24-25 ¶17-18

Ohole oya simanenena, opo tu kale twa tonata notu na eidhiliko. (Mat. 22:37-39) Ohole yetu yokuhola Kalunga ohayi tu kwathele tu idhidhimikile uupyakadhi kehe tatu iyadha muwo sho tatu uvitha. (2 Tim. 1:7, 8) Molwaashoka otu hole aantu mboka ihaaya longele Jehova, otatu tsikile noku ya uvithila, mwa kwatelwa nokuli okuuvitha okupitila mokudhenga oongodhi nokunyola oontumwafo. Otu na etegameno kutya sikulimwe lyomomasiku, aantu otaya ka lundulula iikala yawo, nokutameka okulonga shoka sha uka noshiwanawa. (Hes. 18:27, 28) Otu na okukala tu hole aantu ooyakwetu, mwa kwatelwa Aakriste ooyakwetu. Ohatu ulike kutya otu ya hole ‘mokukumagidhathana nomokukwathathana.’ (1 Tes. 5:11) Ngaashi aakwiita haya kwathelathana molugodhi, natse ohatu tsaathana omukumo. Itatu ke ehameka owina aamwatate naamwameme, nenge tu ya galulile uuwinayi. (1 Tes. 5:13, 15) Ohatu ulike wo ohole yetu mokusimaneka aamwatate mboka taya kwatele komeho megongalo. — 1 Tes. 5:12. w23.06 10 ¶6; 11 ¶10-11

Omukalo gumwe tatu vulu okukoleka eitaalo lyetu omokutedhatedha kekulilo. Ekulilo ohali tu shilipaleke kutya omauvaneko gaKalunga otaga ka gwanithwa. Uuna tatu dhiladhila muule kutya omolwashike ekulilo lya li lya gandjwa nosho wo kutya olya kwatela mo shike, ohatu koleke eitaalo lyetu meuvaneko ndyoka Kalunga e tu uvanekela lyomwenyo gwaaluhe muuyuni uuwanawa kutya otali ka gwanithwa shili. Omolwashike tatu vulu okutya ngawo? Ekulilo olya li lya kwatela mo shike? Jehova okwa li a tumu Omwana omuholike, kuume ke kopothingo, okuza megulu e ye a valwe e li omuntu a gwanenena kombanda yevi. Sho Jesus a li kombanda yevi, okwa li i idhidhimikile omaudhigu agehe. Opo nduno, okwa li a mono iihuna nokusa eso tali uvitha omwenyo omutoye. Jehova ina futa tuu ofuto onene! Kalunga ketu omunahole ka li nando ta ka pitika Omwana a mone iihuna noku se, opo owala tu kale nomwenyo uule wethimbo efupi. (Joh. 3:16; 1 Pet. 1:18, 19) Molwaashoka Jehova okwa futa ofuto onene, ota ka shilipaleka kutya otatu ka vula okukala nomwenyo sigo aluhe muuyuni uupe. w23.04 27 ¶8-9

Jehova oku na ngaa ehalo lyoku ka yumudha oonakusa? Eeno, oku li na. Okwa li a nwetha mo aanyoli yOmbiimbeli yontumba ya nyole euvaneko lye lyeyumuko lyomonakuyiwa. (Jes. 26:19; Eh. 20:11-13) Shimwe ishewe, uuna Jehova a ningi euvaneko, aluhe ohe li gwanitha po. (Jos. 23:14) Jehova okwa halelela shili oku ka yumudha oonakusa. Dhiladhila kwaashoka sha li sha popiwa kutatekulululwa Job. Okwa li e shi kutya nonando oku se, Jehova okwa li ta kala a hala oku mu mona ishewe e na omwenyo. (Job 14:14, 15) Kunena, Jehova osho wo e uvitile ngaaka aalongeli ye ayehe mboka ya sa. Okwa halelela oku ke ya yumudha ye na uukolele noya nyanyukwa. Ongiini kombinga yaantu omabiliyona mboka ya sa inaaya mona ompito yokwiilonga oshili kombinga yaJehova? Kalunga ketu omunahole, okwa hala wo oku ke ya yumudha. (Iil. 24:15) Okwa hala ya ka mone ompito yokuninga ookuume ke, nokukala nomwenyo sigo aluhe kombanda yevi. — Joh. 3:16 w23.04 9 ¶5-6

Ongiini to vulu okukoleka etegameno lyoye lyonakuyiwa? Pashiholelwa, ngele owu na etegameno lyoku ka kala nomwenyo sigo aluhe kombanda yevi, lesha omanyolo ngoka taga popi kombinga yOparadisa nokutedhatedha kugo. (Jes. 25:8; 32:16-18) Dhiladhila muule kunkene onkalamwenyo tayi ka kala muuyuni uupe. Dhiladhila ando wu li mo. Ngele otwa tsikile nokukonga ethimbo lyokudhiladhila kombinga yetegameno lyuuyuni uupe, omaupyakadhi getu otaga ka kala ‘gopokathimbo notage ke tu etela eadhimo.’ (2 Kor. 4:17) Etegameno ndyoka Jehova e tu pa otali vulu oku tu kwathela tu idhidhimikile omaupyakadhi. Okwe ku pa nale shoka wa pumbwa, opo wu vule okumona oonkondo puye. Onkee ano uuna wa pumbwa ekwatho, opo wu vule okugwanitha po oshinakugwanithwa shoye, wu idhidhimikile omamakelo, nenge wu kale wa nyanyukwa, galikana Jehova wa mana mo nokukonga ewiliko kuye okupitila megalikano lyopaumwene. Taamba ko etsomukumo ndyoka to pewa kaamwatate naamwameme. Kala ho kongo aluhe ethimbo lyokudhiladhila kombinga yetegameno lyoye li na ko nasha nonakuyiwa. Opo nduno oonkondo ndhoka tadhi ‘zi mesindano lyoonkondo dhaKalunga, otadhi ku koleke, opo wu vule okwiidhidhimikila ashihe shoka tashi ku adha.’ — Kol. 1:11. w23.10 17 ¶19-20

Otu na omatompelo ogendji gokupandula Jehova megalikano. Otatu vulu oku mu pandula omolwiinima iiwanawa ayihe mbyoka tu na, molwaashoka omagano kehe omawanawa ohaga zi kuye. (Jak. 1:17) Pashiholelwa, otatu vulu oku mu pandula, omolwevi ewanawa niinima iikumithi mbyoka a shitila ko. Otatu vulu wo oku mu pandula, sho e tu pa omwenyo, uukwanegumbo wetu, ookuume nosho wo etegameno. Otwa hala wo okupandula Jehova, sho e tu pitika tu kale tu na uukuume wa dhenga mbanda naye. Otashi vulika tu kale twa pumbwa okuninga oonkambadhala dhi ikalekelwa, tu dhiladhile kombinga yomatompelo ngoka tu na pauhandimwe gokupandula Jehova. Aantu oyendji kunena ihaya pandula. Olundji ohaya dhiladhila owala kombinga yankene taya vulu okumona shoka ya hala, pehala lyokudhiladhila kombinga yankene taya vulu okuulika olupandu lwawo. Ngele otwa etha iikala ya tya ngawo yi tu nwethe mo, omagalikano getu otashi vulika owala ga kale gokupula shoka twa hala. Opo shoka tu shi yande, otwa pumbwa okutsikila okukokeka olupandu lwetu nokupandula Jehova, omolwiinima ayihe mbyoka he tu ningile. — Luk. 6:45. w23.05 4 ¶8-9

E li Tate yetu omunahole, Jehova ke hole oku tu tala tatu mono iihuna. (Jes. 63:9) Shono itashi ti kutya oha keelele omamakelo getu agehe, ngoka taga vulu okuyelekanithwa nomilonga nenge nomililo. (Jes. 43:2) Ihe ohe tu kwathele tu ‘pite mo’ mugo. Ye ita ka etha omamakelo ngoka hage tu adha ge tu etele uuwinayi tawu kalelele. Jehova ohe tu pe natango ombepo ondjapuki yi tu kwathele tu idhidhimike. (Luk. 11:13; Fil. 4:13) Oshizemo, otatu vulu okukala neinekelo kutya otatu kala tu na shoka twa pumbwa, opo tu idhidhimike nokukala aadhiginini kuye. Jehova okwa tegelela tu kale twe mu inekela. (Heb. 11:6) Omathimbo gamwe ohashi vulika tu kale tu wete kutya otu li muudhigu wu vule oonkondo dhetu. Ohashi vulika nokuli tu tameke okukala twa limbililwa ngele Jehova ote ke tu kwathela ngaa. Ombiimbeli oye tu shilipaleka kutya kekwatho lyombepo yaKalunga otatu vulu “okunuka ekuma.” (Eps. 18:29, NW) Pehala lyokukala twa limbililwa, otu na okugalikana twa mana mo, tu na einekelo kutya Jehova ota ka yamukula omagalikano getu. — Jak. 1:6, 7. w23.11 22 ¶8-9

Oohapu ndhoka itadhi yelitha tuu ohole momukalo omwaanawa! Otadhi tsu lela omukumo aaihokani, oshoka otadhi ulike kutya otamu vulu okukala mu holathane noonkondo. Ngele aaihokani oya hala okukala nohole itaayi hulu po, oshi ikwatelela kuyo. Natu shi thaneke ngeyi, omulilo ohagu vulu owala okukala gwa tema, ngele otagu tulwa iikuni. Ngele hasho, omulilo ngoka otagu ka endela ko tagu dhimi. Sha faathana, ohole pokati komusamane nomukulukadhi otayi vulu owala okukala ya kola lela, ngele ohaya koleke ekwatathano lyawo. Omathimbo gamwe, aaihokani ohashi vulika ya kale yu uvite kutya ohole yawo otayi talala, unene tuu ngele oye na omaupyakadhi gopamahupilo, gopaukolele nenge gokuputudha aanona. Opo aaihokani ya kaleke “ehayango lyOmuwa” lya tema, ayehe omusamane nomukulukadhi, oye na okulonga, opo ya kale ye na ekwatathano lya kola naJehova. w23.05 20-21 ¶1-3

Opo tu kokeke uulaadhi, otwa pumbwa okuninga shike? Aavali yetu otashi vulika ye tu ladhipike tu kale aalaadhi, ihe itaya vulu oku tu pa uukwatya mboka nokuli nonando yo oye wu na. Okukala omulaadhi osha faathana nokwiilonga uunkulungu uupe. Omukalo gumwe to vulu okukala wu na uunkulungu omokukala to tala nawanawa nkene omulongi gwoye te shi ningi, opo nduno to mu holele. Momukalo gwa faathana, ohatu ilongo okukala aalaadhi mokukala tatu tala nawa nkene yalwe haye shi ningi, nopo nduno tatu ya holele. Ngaashi Daniel, natse otwa pumbwa okukala tu shi nawa Oohapu dhaKalunga. Otu na okukala hatu popi naJehova olundji noku mu lombwela nkene tu uvite lela. Otwa pumbwa okukala twa inekela muJehova nokukala twa tompwa kutya ote ke tu kwathela aluhe. Opo nduno uuna eitaalo lyetu tali makelwa otatu ka kala aalaadhi. Aantu mboka aalaadhi ohaya simanekwa kuyalwe. Otaya vulu wo okukwathela aanamitima omiwanawa ya tseye Jehova. Odhoshili kutya otu na omatompelo omawanawa okukokeka uulaadhi. w23.08 2 ¶2; 4 ¶8-9

Oshitya shOshigreka shoka sha tolokwa “konakoneni,” osha li sha longithwa sho taku yelithwa omukalo moka aantu ya li haya tala iitenda ngaashi iingoli niiyela ngele oyolela ngaa. Onkee otwa pumbwa okukala hatu tala ngele shoka twa uvu nenge twa lesha oshoshili ngaa. Oshinima shika osha simanenena kutse, unene tuu sho uudhigu uunene tawu hedha popepi. Pehala lyokwiitaala kehe shoka yalwe taya popi, ohatu longitha oondunge dhetu dhokuyoolola nokutala ngele shoka twa lesha nenge twa uva oshi li ngaa metsokumwe naashono Ombiimbeli nosho wo ehangano lyaJehova tali ti. Ngele otwa ningi ngawo, itatu ka pukithwa komitotolombo dhoondemoni. (Omayel. 14:15; 1 Tim. 4:1) Oshigwana shaKalunga shi li ongundu, otashi ka hupa puudhigu uunene. Ihe katu shi kutya ngula oshike tashi ke tu ningilwa pauhandimwe. (Jak. 4:14) Nando ongawo, kutya nduno otatu ka pita mo muudhigu uunene, nenge otatu si omanga inaawu ya, otatu ka pewa ondjambi yomwenyo gwaaluhe, ngele otwa kala aadhiginini. Onkee ano atuheni natu gandjeni eitulomo ketegameno lyetu li tuntula, nokukala twa ilongekidhila esiku lyaJehova! w23.06 13 ¶15-16

Katu shi kutya omahunganeko gamwe gOmbiimbeli otaga ka gwanithwa ngiini. (Dan. 12:8, 9) Ihe molwaashono katu shi lela nkene omahunganeko ngono taga ka gwanithwa, shono itashi ti kutya itaga ka gwanithwa shili. Kapu na omalimbililo, otatu vulu okukala tu na einekelo kutya Jehova ote ke tu ulukila shoka twa pumbwa okutseya pethimbo lyo opala, ngaashi owala a li e shi ningi monakuziwa. Eigidho ‘lyombili negameno’ otali ka igidhwa. (1 Tes. 5:3) Opo nduno omapangelo otaga ka ponokela omalongelokalunga giifundja. (Eh. 17:16, 17) Okuza mpono, omapangelo otaga ka ponokela oshigwana shaKalunga. (Hes. 38:18, 19) Iiningwanima mbika otayi fala sigo opiita yaArmagedon. (Eh. 16:14, 16) Otatu vulu okukala nuushili kutya iiningwanima mbika masiku otayi ka ningwa. Onkee ano natu tsikileni okuulukila Tate yetu gwomegulu omunahole kutya otwa pandula, mokugandja eitulomo komahunganeko gOmbiimbeli nomokukwathela yalwe ya ninge sha faathana. w23.08 13 ¶19-20

Sho omuyapostoli Paulus a popi kombinga yeitaalo, yetegameno nosho wo ohole, okwa hulitha a ti kutya “oshinima oshinene kwaayihe mbika osho ohole.” (1 Kor. 13:13) Omolwashike Paulus a li a vulu okupopya ngawo? Omolwaashoka monakuyiwa itatu ka kala twa pumbwa eitaalo momauvaneko gaKalunga kombinga yuuyuni uupe, nenge yetegameno kutya omauvaneko ngoka otaga ka gwanithwa, oshoka otaga ka adhika ga gwanithwa nale. Ihe otatu ka pumbwa aluhe okukala tu hole Jehova nosho wo aantu ooyakwetu. Uushili owo kutya ohole yetu yokuhola aantu ooyakwetu otayi ka tsikila nokukoka sigo aluhe. Shimwe ishewe, ohole ohayi tu ndhindhilikitha mo tu li Aakriste yashili. Jesus okwa li a lombwele aayapostoli ye a ti: “Kungawo, aantu ayehe otaya ka tseya kutya ne aalongwa yandje, ngele omu holathane.” (Joh. 13:35) Shimwe ishewe, okukala tu holathane ohaku tu ningitha tu kale twa hangana. Paulus okwa ti kutya ohole “oyo epaya tali vulu okumangela iinima ayihe kumwe.” (Kol. 3:14) Omuyapostoli Johannes okwa li a nyolele ooitaali ooyakwawo a ti: “Oongoka e hole Kalunga, oku na wo okukala e hole omuntu mukwawo.” (1 Joh. 4:21) Ngele otu holathane, nena otatu ulike kutya otu hole Kalunga. w23.11 8 ¶1, 3

Ombiimbeli otayi yelekanitha onkalamwenyo yetu tu li Aakriste nethigathano. Aamatuki mboka taya matuka sigo okehulilo, otaya ka mona ondjambi yomwenyo gwaaluhe. (2 Tim. 4:7, 8) Otwa pumbwa okuninga kehe shoka tatu vulu, tu tsikile okumatuka, unene tuu molwaashoka otu li popepyeelela nokuthika kethikilo. Omuyapostoli Paulus, okwa popya kombinga yaashoka tashi vulu oku tu kwathela tu sindane methigathano. Okwe tu lombwela tu ‘ethe po kehe shoka sha hala oku tu kata notu matuke twa mana mo methigathano ndyoka li li komeho getu.’ Mbela Paulus okwa li a hala okutya Omukriste ke na okuhumbata omutenge gwasha? Aawe, hasho a li a hala okutya ngawo. Pehala lyaashono, okwa a li a hala okutya otwa pumbwa okweekelahi omitenge kehe ndhoka inaatu pumbwa okuhumbata. Uudhigu mbuka otawu vulu oku tu kata noku tu vulitha. Opo tu idhidhimike, otwa pumbwa okukala hatu ndhindhilike mo nziya iinima mbyoka tayi tu kata e tatu yi etha po. Ihe nando ongawo, inatu hala okweekelahi omitenge ndhoka tu na okuhumbata. Ngele otwa etha okuhumbata omitenge ndhoka, itatu ka kala we methigathano ndyoka. — 2 Tim. 2:5. w23.08 26 ¶1-2

Okukala nondjele ohaku tu kwathele tu simaneke omataloko gayalwe. Pashiholelwa, yamwe yomaamwameme oye hole okwiimumamuma omanga yalwe kaaye shi hole. Aakriste yamwe ohaya nu iikunwa yoalkoholi pandjele, ihe yamwe oya tokola kutya momakana gawo itayi ende mo. Aakriste ayehe oya hala uukolele wu li nawa, ihe ohaya hogolola omikalo dhokupangwa dha yoolokathana. Ngele otwa kala hatu dhiladhila kutya otu li aluhe mondjila, nohatu kambadhala okwiitaalitha aamwatate naamwameme ya ninge shoka hatu ningi, otatu vulu okupundukitha yalwe nokweeta etopoko. (1 Kor. 8:9; 10:23, 24) Pashiholelwa, pehala Jehova e tu lombwele shoka tu na okuzala, okwe tu pa omakotampango ngoka tu na okulandula. Otwa pumbwa okuzala momukalo tagu simanekitha Kalunga, mokukala nondjele, eifupipiko nosho wo okuzala oonguwo “dhi shi okutalwa.” (1 Tim. 2:9, 10) Onkee ano, katu na okugandja eitulomo lya pitilila kutse, mokuningitha yalwe ya kale owala otse taya tala. Omakotampango gOmbiimbeli ohaga kwathele aakuluntugongalo kaaya tule po omithikampango dhawo yene dhi na ko nasha nokuzala nokwiiyopaleka momutse. w23.07 23-24 ¶13-14

Jehova okwe tu ulukile nkene tatu vulu oku ka kala nonakuyiwa ombwanawa. Mboka taya taamba ko ehiyo ‘lyomukiintu egoya’ noha igidha muule ohaya gandja eitulomo kokutyapula ‘uutoye’ womeholamo. Oonkantu dhawo otadhi fala “muule woshaasi.” (Omayel. 9:13, 17, 18) Mboka haya taamba ko ehiyo lyomukiintu ngoka ta thaneke “owino” yashili, otaya ka kala ye na onakuyiwa ya yooloka ko. (Omayel. 9:1) Otatu ilongo okukala tu hole Jehova nokukala tu tonde shoka e tonde. (Eps. 97:10) Otwa nyanyukwa wo molwaashoka ohatu vulu okuhiya yalwe ya mone uuwanawa ‘mowino’ yashili. Otwa fa aapiya mboka taya “igidha muule wopombanda moshilando: ‘Ngoka gwanathangwa ne ye huka.’” Uuwanawa mboka tatu mono mo nosho wo mboka taya pulakene kawu shi owala wongashingeyi. Otawu kalelele notawu tu ningitha tu ‘kale nomwenyo’ sigo aluhe sho tatu ‘ende momapola goondunge.’ — Omayel. 9:3, 4, 6. w23.06 24 ¶17-18

Oho kala wu uvite ngiini ngele omuniilonga, nenge omunasikola omukweni e ku pula kombinga yeitaalo lyoye? Mbela oho kala wa tila? Oyendji yomutse ohatu kala twa tila. Ihe epulo ndyoka otashi vulika li tu kwathele tu uve ko shoka omuntu ngoka ta dhiladhila, nenge shoka a itaala, nokungawo ohashi kala oshipu kutse tu mu lombwele kombinga yonkundana ombwanawa. Ihe omathimbo gamwe omuntu ohashi vulika a pule ngawo, molwaashoka itaa tsu kumwe naashoka twa itaala. Shoka inashi tu kumitha. Olundji ohashi kala ngawo molwaashoka a uva omadhiladhilo ga puka kombinga yeitaalo lyetu. (Iil. 28:22) Shimwe ishewe, otu li ‘momasiku gahugunina,’ ano ethimbo moka aantu oyendji ‘haa lundilathana, noye li aakwanyanya’ nokuli. (2 Tim. 3:1, 3, yelekanitha NW) Otashi vulika wu ipule to ti: ‘Ongiini tandi vulu okukala nda ngungumana nokuyamukula noohapu oombwanawa uuna gumwe ta pataneke eitaalo lyandje?’ Oshike tashi vulu oku ku kwathela? Okukala wu na omwenyo omwaanawa. Omuntu ngoka e na omwenyo omwaanawa, oha pangele ongeyo ye uuna gumwe te mu hindi, nenge kee shi kutya na yamukule ta ti ngiini. w23.09 14 ¶1-2

Omathimbo gamwe, ohatu pewa omayele ngoka tage tu gamene kiinima ngaashi, ohole yomaliko nosho wo iinima mbyoka tayi vulu oku tu ningitha tu yone oompango dhaKalunga. Ngele otwe ga tula miilonga, otashi ke tu etela uuwanawa. (Jes. 48:17, 18;1 Tim. 6:9, 10) Kapu na omalimbililo kutya Jehova ota ka tsikila okulongitha aakalelipo ye yopantu e tu wilike puudhigu uunene sigo opethimbo lyElelo lyOomvula Eyuvi. Mbela otatu ka tsikila ngaa okulandula ewiliko ndyoka? Oshindji osha ikolelela komukalo moka hatu inyenge kewiliko ndyoka Jehova he tu pe ngashingeyi. Onkee ano natu kaleni aluhe hatu landula ewiliko lyaJehova, ndyoka he tu pe okupitila maalumentu mboka a langeka po ye tu tonatele. (Jes. 32:1, 2; Heb. 13:17) Ngele otwe shi ningi, otatu ka kala twa inekela mOmuwiliki gwetu, Jehova, ngoka he tu gamene kiiponga yopambepo note ke tu gamena sigo okethikilo, muuyuni uupe moka tatu ka mona omwenyo gwaaluhe. w24.02 25 ¶17-18

Omuyapostoli Paulus okwa li a nyanyukwa okulongela Jehova, ihe kasha li aluhe oshipu kuye. Olundji okwa li ha ende iinano iile, nokweenda pethimbo ndyoka, kasha li aluhe oshinima oshipu. Molweendo lwe, omathimbo gamwe okwa li ha “adhika kiiponga yomafundja noyaayugi,” omathimbo gamwe okwa li wo ha dhengwa kaatondi ye. (2 Kor. 11:23-27) Aamwahe kaya li aluhe haye mu pandula omolwiinima mbyoka e ya ningila. (2 Kor. 10:10; Fil. 4:15.) Oshike sha li sha kwathele omuyapostoli Paulus a tsikile okulongela Jehova? Paulus okwa li a ilongo oshindji kombinga yomaukwatya gaJehova mOmanyolo nosho wo kiimoniwa ye mwene. Okwa li a tameke okukala a tompwa kutya Jehova Kalunga oku mu hole. (Rom. 8:38, 39; Ef. 2:4, 5) Nokwa tameke okukala e hole Jehova noonkondo. Paulus okwa ulike ohole yokuhola Jehova ‘mokuyakula Aakriste ooyakwawo.’ — Heb. 6:10. w23.07 9 ¶5-6

Aantu oyendji oya mona kutya otwa pumbwa omapangelo nonokutya otwa pumbwa okuvulika koompango dhimwe ndhoka dha tulwa po “kaapangeli.” Ihe aantu oyo tuu mboka otashi vulika kaaya vulike koompango ndhoka kaaye hole, nenge ye wete kaadhi li nawa. Ombiimbeli otayi ti kutya omapangelo gopantu ngoka taga monitha aantu iihuna oge li kohi yepangelo lyaSatana, notaga ka hanagulwa po masiku. (Eps. 110:5, 6; Omuuv. 8:9; Luk. 4:5, 6) Oya ti wo kutya kehe ngoka ta tindi okuvulika kepangelo “oye okwa tsa ondumbo neutho lyaKalunga.” Ngashingeyi Jehova okwa etha omapangelo ga pangele, opo iinima yi kale melandulathano nokwa tegelela tu vulike kugo. Onkee ano otu na ‘oku ya pa shoka ye na okupewa,’ mwa kwatelwa oompale, oku ya simaneka nokuvulika kuyo. (Rom. 13:1-7) Otashi vulika tu tale ko ompango kaayi shi ombwanawa, kaayi li pauyuuki nondhigu okuvulika kuyo. Ihe ohatu vulika kuJehova nohe tu lombwele tu vulike kaapangeli, uuna itaaye tu pula tu teye oompango dhe. — Iil. 5:29. w23.10 8 ¶9-10

Sho Simson a valwa, Aafilisti oya li taya pangele oshigwana shaIsraeli noya li taye shi thindile kongudhi. (Aatok. 13:1) Aaisraeli oya li taya mono iihuna noonkondo omolwonyanya yAafilisti. Jehova okwa li a hogolola Simson a ‘mangulule Israeli miikaha yAafilisti.’ (Aatok. 13:5) Opo Simson a vule okulonga oshilonga shoka okwa li e na okukala a inekela muJehova. Pompito yimwe, etangakwiita lyAafilisti olya li lye ya okukwata po Simson ombambyona kuLehi, shoka tashi vulika sha li muJuda. Aalumentu yomuJuda oya li ya tila, onkee oya tokola ya gandje Simson kaatondi. Aantu yomoshilongo shawo oye mu manga noongodhi mbali oompe e taye mu fala kAafilisti. (Aatok. 15:9-13) Nonando ongawo, ‘ombepo yOmuwa oye ya muSimson’ e ta imangulula mo ye mwene moongodhi. Opo nduno ‘okwa mono ondjamama yokasino opo ka si,’ nokwa petama e te yi toola po e ta dhipaga nayo aalumentu Aafilisti 1 000. — Aatok. 15:14-16. w23.09 2 ¶3-4

Jehova okwa holola elalakano lye mOmbiimbeli. Jehova ota vulu okuhogolola omikalo dha yoolokathana a gwanithe po elalakano lye, molwaashoka ‘iinima ayihe okwe yi shitile elalakano lye.’ (Omayel. 16:4) Niizemo yaashoka Jehova ha ningi, otayi ka kala sigo aluhe. Elalakano lyaJehova olini, nomalunduluko geni a ninga, opo e li gwanithe po? Kalunga okwa li a lombwele Adam naEva elalakano lye li na ko nasha nayo. Okwa li e ya lombwele a ti: ‘Valathaneni, ne mu indjipale nokuudha evi alihe. Li tuleni mepangelo lyeni; pangeleni iinamwenyo ayihe’ yokombanda yevi. (Gen. 1:28) Sho Adam naEva ya tukulile Jehova uunashipotha nokweetela aantu ayehe uulunde, shono kasha li she mu imbi a gwanithe po elalakano lye. Okwa lundulula omukalo moka lya li li na okugwanithwa po. Nziya nziya, Jehova okwa li a tokola okudhika po Uukwaniilwa megulu mboka tawu ka gwanitha po elalakano lye lyopetameko li na ko nasha naantu nosho wo nevi. — Mat. 25:34. w23.10 20 ¶6-7

Jehova ota vulu oku tu kwathela tu kale tu na omukumo. Ngele uunkundi wontumba owa menekela mo mutse, otashi vulika tu kale twa teka omukumo. Omathimbo gamwe uunkundi wetu otashi vulika wu monike wa fa uudhigu wu vulithe pwaamboka womuyapostoli Petrus. Ihe Jehova ota vulu oku tu pa oonkondo kaatu teke omukumo. (Eps. 94:18, 19) Omumwatate gumwe okwa kala eshenge uule womimvo manga inee ya moshili. Okwa etha po thiluthilu uushenge e ta kala ta iyutha komithikampango dhOmbiimbeli. Ihe nando ongawo, omathimbo gamwe okwa kala ha kondjitha omahalo omawinayi. Oshike sha li she mu kwathele, opo a kale ishewe e na omukumo? Okwa ti: “Jehova ohe tu pe oonkondo.” Okwa gwedha ko a ti: “Kekwatho lyombepo yaJehova . . . , onda ilongo kutya omuntu oto vulu okutsikila okwiihumbata ngaashi Jehova a hala. Jehova okwa kala nokulongitha ndje, nonando inandi gwanenena, okwa tsikile oku pa ndje oonkondo.” w23.09 23 ¶12

Aamwatate aagundjuka otamu vulu okukala Aakriste ya pyokoka pambepo. Omwa pumbwa okuhogolola okulandula iiholelwa iiwanawa, ngaashi okukala hamu dhiladhila pandunge, mu shi okwiinekelwa, mu na uunkulungu mboka tawu mu kwathele monkalamwenyo nokwiilongekidhila iinakugwanithwa yomonakuyiwa. Omathimbo gamwe otashi vulika mu kale mu uvite mwa gwililwa po, uuna tamu dhiladhila kiilonga ayihe mbyoka mu na okulonga. Ihe nando ongawo otamu vulu oku yi longa. Dhimbulukweni kutya Jehova okwa halelela oku mu kwathela. (Jes. 41:10, 13) Odhoshili kutya aamwatate naamwameme megongalo lyeni otaye ke mu kwathela wo. Ngele omwa kala ngaashi Jehova a hala, otamu ka nyanyukilwa onkalamwenyo yeni. Aamwatate aagundjuka otu mu hole! Jehova ne mu laleke nuuyamba ngashingeyi sho tamu longo mu kale Aakriste ya pyokoka. w23.12 29 ¶19-20

Natu tye andola owu li pokatuthi kontumba pamwe nongundu yaamwatate naamwameme. Otamu tyapula nawa nowe ya ithana mu ithaneke mu li pamwe. Owa thaneke omathano ga konda pugaali wa ningila ngele lyotango inali za mo nawa. Ngashingeyi owu na omathano gatatu, ihe mulimwe owa ndhindhilike kutya omumwatate gumwe ita imemeha. Onkee ano owe li dhimi mo, oshoka owu na omathano gaali moka kehe gumwe ta imemeha, mwa kwatelwa nomumwatate ngoka. Ohatu dhimbulukwa omathimbo omawanawa ngoka twa kala pamwe naamwatate naamwameme. Natu tye ihe pompito yimwe, omumwatate nenge omumwameme okwa popi nenge a ningi sha shoka kaashi li nawa. Mbela oto ka ninga po shike? Omolwashike mbela itoo dhimi mo oshinima shoka momadhiladhilo goye, ngaashi owala wa ningi nethano ndyoka wa thanekele? (Ef. 4:32) Odhoshili kutya otatu vulu, molwaashoka otu na iinima oyindji iiwanawa mbyoka tatu vulu okudhimbulukwa kombinga yawo. Otwa hala okukala hatu dhimbulukwa iinima iiwanawa, mbyoka ya ninga, nokukala twe yi lenga. w23.11 12-13 ¶16-17

Iitya yOshigreka mbyoka ya longithwa movelise ndjika, otayi gandja edhiladhilo kutya omukiintu Omukriste oku na okuzala momukalo tagu simanekitha Kalunga, notagu yaalele omaiyuvo nomataloko gayalwe. Otu na okukala twa lenga aakiintu Aakriste aadhiginini sho haya zala oonguwo tadhi opalele. Oondunge dhokuyoolola odho uukwatya wulwe mboka aamwameme ayehe ya pumbwa okukokeka. Oondunge dhokuyoolola oshike? Odho okuninga omatokolo omawanawa, ano okukala tu shi okuyoolola shoka shi li mondjila naashoka sha puka, opo ihe to ningi shoka shi li mondjila. Natu taleni koshiholelwa shaAbigal. Omusamane gwe okwa li a ningi etokolo lya samapala, ndyoka lya li tali vulu okutula aanegumbo lye ayehe muupyakadhi lela. Abigal okwa li a katuka onkatu nziya. Omolwetokolo lye ewanawa, okwa hupitha oomwenyo odhindji. (1 Sam. 25:14-23, 32-35) Oondunge dhokuyoolola ohadhi tu kwathele tu mone kutya uunake tu na okupopya nokumwena. Ohadhi tu kwathele wo tu kale tu na ondjele ngele tashi ya pokukala tu na ko nasha nayalwe. — 1 Tes. 4:11. w23.12 20 ¶8-9

Omuyapostoli Paulus okwa nyolele egongalo lyomuRoma oohapu ndhoka. Aamwatate naamwameme yaamoka oyi ilongo kombinga yaJehova naJesus, e taya ulike kutya oye na eitaalo noya ningi Aakriste. Onkee ano oya “ningwa aayuuki koshipala shaKalunga molweitaalo,” nokwe ya gwayeke wo nombepo ondjapuki. (Rom. 5:1) Odhoshili kutya oya li ya mono etegameno ewanawa. Konima yethimbo Paulus okwa ka nyolela Aakriste aagwayekwa muEfeso kombinga yetegameno ndyoka ya ithanenwa. Etegameno ndyoka olya kwatela mo ‘uuthiga waayapuki.’ (Ef. 1:18, OB-1954) Paulus okwa li wo a lombwele Aakolossa kutya etegameno lyawo olyoku ka kala nomwenyo peni. Okwa ti: “Shoka mwe shi tegamena pauvaneko, oshe mu pungulilwa nawa megulu.” (Kol. 1:4, 5) Onkee ano etegameno lyAakriste aagwayekwa olyo okuyumudhwa ya kale nomwenyo sigo aluhe megulu, moka taya ka pangela pamwe naKristus. — 1 Tes. 4:13-17; Eh. 20:6. w23.12 9 ¶4-5

Oshitya shoka sha tolokwa ‘gamena’ osha li hashi longithwa muukwiita nosha li hashi popiwa sha ukithwa kaakwiita mboka ya gamena oshilando kaashi ponokelwe. Aakalimo yomoshilando shoka sha gamenwa oya li haya kotha taya mbonyoka, ye shi kutya omatangakwiita oga keelela kiiyelo. Sha faathana, uuna ombili yaKalunga tayi gamene oomwenyo nomadhiladhilo getu, ohatu kala twa ngungumana, tu shi kutya otu li megameno. (Eps. 4:8) Ngaashi moshinima shaHanna, nokuli nonando onkalo yetu inayi lunduluka mbala, otatu vulu natango okukala twa ngungumana. (1 Sam. 1:16-18) Nongele otwa kala twa ngungumana, olundji otatu ka mona oshipu okudhiladhila nawa nokuninga omatokolo gopandunge. Oshike tatu vulu okuninga po? Uuna wu uvite wa gwililwa po, pula Jehova e ku gamene. Ngiini mbela? Galikana sigo to kala wu na ombili yaKalunga. (Luk. 11:9; 1 Tes. 5:17) Uuna wa taalela uupyakadhi, dhiginina okugalikana, noto ka mona nkene ombili yaJehova tayi gamene omutima nomadhiladhilo goye. — Rom. 12:12. w24.01 21 ¶5-6

Opo Jesus a yapulithe edhina lyaHe, okwa li a idhidhimikile uuwehame uunene, a tukwa nokwa lundilwa. Okwa li e shi kutya okwa vulika kuHe miinima ayihe; onkene ina pumbwa okukala a sa ohoni. (Heb. 12:2) Okwa li wo e shi kutya Satana oye a li te mu ponokele pethimbo ndyoka edhigu. (Luk. 22:2-4; 23:33, 34) Satana okwa li a hala okuteya po uudhiginini waJesus, ihe ine shi pondola nando. Jesus okwa li a ulike kutya Satana oye omufundja omukwanyanya nonokutya Jehova oku na aapiya aadhiginini, mboka haya kakatele uudhiginini wawo, nonando oye li momamakelo omanene. Mbela owa hala okunyanyudha Omukwaniilwa gwoye, ngoka ta pangele ngashingeyi? Tsikila okusimanekitha edhina lyaJehova, mokukwathela yalwe ya ilonge kombinga yuukwatya uuwanawa waKalunga ketu. Uuna to shi ningi, kungawo oto landula oshiholelwa shaJesus. (1 Pet. 2:21) Ngaashi Jesus, oto nyanyudha Jehova noto ulike kutya omutondi Gwe, Satana, oye omufundja a shiga ko. w24.02 11-12 ¶11-13

Momukokomoko gwomimvo ntano dha ka pita, aantu ye vulithe pomiliyona yimwe, oya li ya ninginithwa ya ninge Oonzapo dhaJehova. Uuna wa iyapulile Jehova, owa tokola okukala omulongwa gwaJesus Kristus nokutala ko okulonga ehalo lyaJehova ku li oshinima sha simanenena monkalamwenyo yoye. Eiyapulo lyopaKriste otali ti shike kungoye? Jesus okwa ti: “Kehe ngoka a hala okulandula ndje, na ihupule ye mwene.” (Mat. 16:24) Uutumbulilo wOshigreka mboka wa tolokwa “na ihupule ye mwene” otawu vulu wo okutolokwa “ke na okwiikalela ye mwene.” Wu li omupiya gwaJehova e mu iyapulila, owa pumbwa okutinda kehe shimwe shoka shi li ompinge nehalo lye. (2 Kor. 5:14, 15) Shoka osha kwatela mo okutinda “iilonga yuuhalu wopantu,” ngaashi ohole yiipala. (Gal. 5:19-21; 1 Kor. 6:18) Mbela okuvulika komalombwelo ngoka otaku ningi onkalamwenyo yoye yi kale ondhigu? Hasho nando, ngele owu hole Jehova nowa tompwa kutya oompango dhe odhi li po omoluuwanawa woye. — Eps. 119:97; Jes. 48:17, 18. w24.03 2 ¶1; 3 ¶4

Jehova oha gandja ombepo ye ondjapuki kwaamboka a hokwa. (Mat. 12:18) Otatu vulu okwiipula tatu ti: ‘Mbela ohandi ulike ngaa gamwe gomomaukwatya giiyimati yombepo ondjapuki monkalamwenyo yandje?’ Mbela owa ndhindhilika ngaa kutya oho idhidhimikile yalwe shi vulithe nale manga inoo tseya Jehova? Sho to ilongo okuulika iiyimati yombepo ondjapuki yaKalunga, oto ka kala wu shi iwetele kutya Jehova okwe ku hokwa. Jehova oha longitha ongushu yekuliloyambo, opo mboka a hokwa ya mone mo uuwanawa. (1 Tim. 2:5, 6) Ihe ongiini ngele momitima dhetu otatu dhiladhila kutya Jehova ine tu hokwa, nokuli nando otwa itaala mekuliloyambo notwa ninginithwa? Dhimbulukwa kutya itatu vulu aluhe okukala twa inekela omaiyuvo getu yene, ihe otatu vulu okukala twa inekela muJehova. Okwa tala ko mboka ya itaala mekuliloyambo ye li aayuuki koshipala she, nokwa uvaneka oku ya laleka nuuyamba. — Eps. 5:12; Rom. 3:26. w24.03 30 ¶15; 31 ¶17