Desemba

Mbela Jehova oku na oonkondo dhokuyumudha oonakusa? Eeno, oku dhi na! Ye “Omunankondoadhihe.” (Eh. 1:8) Onkee oku na oonkondo lela dhokusinda omutondi kehe, nokuli neso. (1 Kor. 15:26) Etompelo lilwe kutya omolwashike tu shi kutya Kalunga ota vulu okuyumudha oonakusa, olyo kutya iha dhimbwa sha. Oha tumbula onyothi kehe kedhina lyayo. (Jes. 40:26) Shimwe ishewe, oha dhimbulukwa mboka ya sa. (Job 14:13; Luk. 20: 38) Ota vulu okudhimbulukwa nuupu okanima kehe kombinga yaamboka ta ka yumudha, mwa kwatelwa eholokopo lyawo nuukwatya wawo, iimoniwa yawo yomonkalamwenyo nosho wo omadhiladhilo gawo. Osha yela kutya otatu vulu okwiinekela meuvaneko lyaJehova lyokuyumudha aantu monakuyiwa, molwaashoka tu shi kutya oku na ehalo noonkondo dhoku shi ninga. Tala ketompelo lilwe kutya omolwashike tatu vulu okwiitaala meuvaneko lyaKalunga lyeyumuko. Jehova okwa li a yumudha aasi. Pethimbo lyOmbiimbeli, okwa li a pe oonkondo aalumentu aadhiginini yontumba, mwa kwatelwa Jesus, ya yumudhe aasi. w23.04 9-10 ¶7-9

Ngele otwa kala hatu popi nondjaalela notwa ngungumana, omuntu otashi vulika a kale e na ehalo lyoku tu pulakena nokutsikila noonkundathana. Ihe ngele omuntu okwa hala owala okutsa oompata natse, nenge okusheka eitaalo lyetu katu na okutsikila noonkundathana. (Omayel. 26:4) Haantu ayehe taye ki inyenga ngaaka, ihe oyendji otaya ka pulakena. Okukala tu na omwenyo omwaanawa ohaku tu etele uuwanawa owundji. Galikana kuJehova e ku pe oonkondo ndhoka wa pumbwa wu kale wa ngungumana, uuna to yamukula mboka taye ku pataneke, nenge taya sheke eitaalo lyoye. Dhimbulukwa kutya ngele owa kala wa ngungumana, otashi ku kwathele opo oonkundathana dheni kaadhi lundulukile mokunyenyeta. Ngele owa yamukula nombili nonesimaneko otashi vulu okwiinyengitha aapulakeni ya lundulule etaloko lyawo li na ko nasha natse nosho wo noshili yOmbiimbeli. “Kaleni mwi ilongekidha aluhe okuyamukula kehe ngoka te mu pula okufatulula etegameno ndyoka li li mune. Ihe shi ningeni nombili nonesimaneko.” (1 Pet. 3:15, 16) Tsikila okukala wu na omwenyo omwaanawa. w23.09 19 ¶18-19

Natu taleni omikalo ne moka tatu vulu okuulika eidhidhimiko. Gwotango, omuntu ngoka e na eidhidhimiko iha geye mbala. Oha kambadhala okukala a ngungumana, uuna yalwe ye mu geyitha noihe ya shunithile uuwinayi. (Eks. 34:6) Omukalo omutiyali, omuntu ngoka omwiidhidhimiki oha vulu okutegelela a ngungumana. Ngele oshinima shontumba ohashi pula ethimbo ele, omuntu a tya ngawo oha kambadhala okukala a ngungumana nenge inaa kenyanana. (Mat. 18:26, 27) Omukalo omutitatu, omuntu ngoka omwiidhidhimiki iha katuka nziya manga inaa dhiladhila. Uuna omuntu ngoka omwiidhidhimiki a pumbwa okumana oshilonga shoka sha simana, iha kambadhala okweendelela e shi mane. Pehala lyaashono, oha kongo ethimbo lya gwana a tale nkene te ke shi enda. Opo nduno oha longitha ethimbo lye nawa, opo a longe oshilonga shoka. Omukalo omutine, omuntu ngoka omwiidhidhimiki oha kambadhala okwiidhidhimikila omaupyakadhi nopwaa na okunyenyeta. Oha dhiladhila kiinima mbyoka iiwanawa monkalamwenyo ye, nota ka ninga ngaashi ta vulu a tsikile okulongela Jehova a nyanyukwa. (Kol. 1:11) Tu li Aakriste, otwa pumbwa okukala tu na eidhidhimiko moonkalo adhihe. w23.08 20-21 ¶3-6

Etompelo lya simanenena lyokugamena omutima gwetu gwopathaneko olyo kutya Jehova oha konakona omitima dhetu. Shono osha hala okutya oha mono shono aantu ihaaya vulu okumona noku shi kutya tse aantu ya tya ngiini lela. Ngele otwa tsikile okukala hatu dhiladhila kombinga yomayele ge, ngono tage tu kwathele tu kale nomwenyo sigo aluhe, ota kala e tu hole. (Joh. 4:14) Itatu ka nwethwa mo nando keihumbato ewinayi, kiifundja yaSatana nosho wo kaakolokoshi yomuuyuni mbuka. (1 Joh. 5:18, 19) Ngele otwa hedha popepyeelela naJehova, ohole yetu yoku mu hola otayi ka koka notatu ka kala twe mu simaneka. Molwaashoka inatu hala okuuvitha nayi Tate yetu, otatu ka kala tu tonde okudhiladhila okuninga oshinima kehe sha puka. Marta, omumwameme gwokoCroatia, ngoka a li a makelwa a ye momilalo dha nyata okwa nyola a ti: “Onda li handi mono oshidhigu okudhiladhila nawa nokukondjitha ehalo lyokuninga shoka sha puka, ihe uumbanda wokutila Jehova owa li wa gamene ndje.” Etilo lyokutila Kalunga olye mu kwathele ngiini? Marta okwa ti kutya okwa tedhatedha kiilanduliko iiwinayi mbyoka hayi zi momatokolo ga puka. Natse otatu vulu okuninga sha faathana. w23.06 20-21 ¶3-4

Jesus oku shi kutya elalakano lyaJehova olyo okuyapulitha edhina Lye, sha hala okutya oku li kaleka lya yela. Nomolwashono Omuwa gwetu a longa aalanduli ye ya galikane taya ti: “Tate yetu ngu wu li megulu, edhina lyoye nali yapulwe.” (Mat. 6:9) Jesus okwa li e shi kutya ndjika ompata onenenene ndjoka ya taalela eshito alihe. Kapu na oshishitwa oshinandunge meshito alihe, sha ninga oshindji shi na ko nasha nokuyapulitha edhina lyaJehova, shi vulithe Jesus. Ihe sho Jesus a kwatwa po, mbela aatondi ye oya li taye mu lundile kutya okwa ninga shike? Oya li taya ti kutya okwa sheka edhina lyaKalunga. Jesus okwa li e shi kutya okusheka, nenge okupopila edhina lyaHe eyapuki muuwinayi, eyono lya kwata miiti. Okwa li a uvu nayi lela sho a lundilwa naasho a monika ondjo. Oshinima shoka otashi vulika osho sha li unene sha ningitha Jesus a ‘adhike kuuwehame uunene,’ sho a li pokukwatwa po. — Luk. 22:41-44. w24.02 11 ¶11

Sho tu li methigathanopo ndika lyoku ka mona omwenyo gwaaluhe, otu na okukala tu hole Jehova naJesus shi vulithe paakwanezimo yetu. (Mat. 10:37) Ihe shika inashi hala okutya katu na okusila oshimpwiyu aanegumbo lyetu, tatu dhiladhila kutya oku shi ninga, pamwe otashi tu imbi tu kale twa hokiwa kuKalunga nokuKristus. Opo tu kale twa hokiwa kuJehova nokuKristus, otu na okugwanitha po iinakugwanithwa yetu mbyoka tu na megumbo. (1 Tim. 5:4, 8) Ngele otwe shi ningi, otatu ka kala twa nyanyukwa. Komeho gaayihe, Jehova oku shi kutya aanegumbo otaya ka kala ya nyanyukwa, ngele omusamane nomukulukadhi oye holathane noya simanekathana, ngele aavali oye hole oyana nohaye ya putudha nawa, nongele aanona ohaya vulika kaavali yawo. (Ef. 5:33; 6:1, 4) Kutya nduno owu li omusamane, omukulukadhi nenge okanona, kala aluhe ho tula miilonga omayele gopandunge ngoka ge li mOmbiimbeli. Ino ninga owala shoka wu uvite kutya oshi li mondjila, nenge shoka hashi ningwa meputuko lyeni, nenge shoka aantu yamwe haya ti. Longitha nawa iileshomwa yetu mbyoka ya kankamena kOmbiimbeli, oshoka omu na omaetopo omawanawa gankene to vulu okutula miilonga omakotampango gOmbiimbeli. w23.08 28 ¶6-7

Omukiintu Omukriste okwa pumbwa okwiilonga uunkulungu mboka tawu mu kwathele monkalamwenyo. Iilonga yimwe mbyoka aakadhona haya ilongo sho aashona ohayi ya kwathele monkalamwenyo yawo ayihe. Pashiholelwa, ilonga okulesha nokunyola nawa. Momaputuko gamwe, okwiilongwa okulesha nokunyola inaku talika ko ku li oshinima sha simana shoka aakiintu ye na okuninga. Ihe osha simana kOmukriste kehe a kale e shi iinima mbyoka. (1 Tim. 4:13) Onkene ino etha nando osha shi ku imbe wu ilonge okukala wu shi okulesha nokunyola nawa. Uuwanawa wuni to ka mona? Okulesha nokunyola otaku vulu oku ku kwathela wu mone iilonga noku yi kaleka po. Otaku ke ku kwathela wu kale wu shi okukonakona nawa Ombiimbeli noku yi longa aantu. Shoka sha dhenga mbanda, oto ka hedha popepi naJehova sho to lesha Ombiimbeli nokutedhatedha kuyo. — 1 Tim. 4:15. w23.12 20 ¶10-11

Pula Jehova ekwatho, opo wu sinde omamakelo. Tu li aantu inaatu gwanenena, ohatu kondjo aluhe nemakelo lyokuninga shoka sha puka. Satana ota ningi ngaashi ta vulu, opo e shi ningithe oshidhigu ngaashi tashi vulika. Omukalo gumwe ha kambadhala okunyateka omadhiladhilo getu, okupitila momainyanyudho inaaga yogoka. Omainyanyudho ngoka otaga vulu okuudhitha omadhiladhilo getu niinima ya nyata, omadhiladhilo ngoka haga nyateke omuntu gwetu gwomeni nohage tu ningitha tu yone sha kwata miiti. (Mark. 7:21-23; Jak. 1:14, 15) Otwa pumbwa ekwatho lyaJehova, ngele otwa hala okusinda emakelo lyokuninga shoka sha puka. Jesus okwa li a kwatele oohapu ndhika megalikano ndyoka e tu longa, tadhi ti: ‘Ino tu ethela momamakelo, ihe tu hupitha kumwiinayi.’ (Mat. 6:13) Jehova okwa hala oku tu kwathela, ihe otu na oku mu pula ekwatho. Otu na wo okukatuka metsokumwe nomagalikano getu. w23.05 6-7 ¶15-17

Uuna aaihokani ya lenga ekwatathano lyawo naHe gwawo gwomegulu, ohaya tula omayele ge miilonga nuupu, shoka hashi ya kwathele ya yande nokusinda omaupyakadhi ngoka tashi vulika ga ningithe ohole yawo yi talale. Aantu mboka ye na ekwatathano lya kola naJehova ohaya ningi wo ngaashi taya vulu ye mu holele nokukokeka omaukwatya ngoka ha ulike, ngaashi olukeno, eidhidhimiko nosho wo edhiminopo. (Ef. 4:32–5:1) Aaihokani mboka haya ulike omaukwatya ngoka ohaye shi ningitha oshipu, opo ohole yawo yi ende tayi koko. Omumwameme gwedhina Lena, ngoka ngashingeyi a hokanwa uule womimvo dhi vulithe po 25, okwa ti: “Oshipu okukala wu hole nowa simaneka omuntu ngoka e na ekwatathano lya kola naJehova.” Tala koshiholelwa shika shomOmbiimbeli. Sho Jehova a hogolola aaihokani yamwe ya ninge aavali yaangoka a li ta ka ninga Mesiasa, okwa hogolola Josef naMaria moluvalo olundji lwaDavid. Omolwashike mbela? Omolwaashoka ayehe oya li ye na ekwatathano paumwene naJehova, na Jehova okwa li e shi kutya otaye ke mu pititha komeho mondjokana yawo. w23.05 21 ¶3-4

Nonando omuwiliki gwetu, Jesus, okwa gwanenena, mboka ta longitha ya kwatele komeho kombanda yevi inaya gwanenena. Otashi vulika shi kale oshidhigu okuvulika kuyo, unene tuu ngele otaye tu pula tu ninge oshinima shoka inaatu hala okuninga. Omuyapostoli Petrus okwa li a pewa elombwelo, ndyoka petameko a li inaa hala okuvulika kulyo. Sho a li a lombwelwa komuyengeli a lye onyama yiinamwenyo mbyoka inaayi yogoka paMpango yaMoses, Petrus okwa tindi lwiikando ayihe itatu. (Iil. 10:9-16) Omolwashike a li inaa hala? Omolwaashoka elombwelo ndyoka epe, okwa li e wete lya fa kaali li pandunge. Nonando ongawo, omuyapostoli Paulus okwa li a vulika sho Aalumentu Aakriste aakuluntu yomuJerusalem ye mu lombwele a kuthe aalumentu yane e ya fale kotempeli noya ka iyoge pamwe naye, opo a ulike kutya oha vulika kOmpango. Paulus okwa li e shi kutya Aakriste kaye li we kohi yOmpango yaMoses, noka li a ninga sha sha puka. Ihe nonando ongawo, Paulus ‘okwa kutha aalumentu mboka esiku lya landula nokwa iyogola pamwe nayo.’ (Iilonga 21:23, 24, 26) Okuvulika kwaPaulus okwa li kwa humitha komeho uukumwe. — Rom. 14:19, 21. w23.10 10 ¶15-16

Otashi vulika kuu dhiladhile kutya uumbanda owu li uukwatya wa simana ngele tashi ya puukuume uuwanawa. Ihe mboka ya hala okupanga uukuume naJehova oye na ‘okuvulika kuye.’ Kutya nduno otwa longela Jehova uule wethimbo li thike peni, atuheni otwa pumbwa okukala tu na etilosimaneko. Ihe okutila Kalunga osha hala okutya shike? Omuntu ngoka ha tila Kalunga oha kala e Mu hole noiha kala a hala okuninga sha shoka tashi yono po ekwatathano lye Naye. Jesus okwa li e na “etilokalunga.” (Heb. 5:7, NW) Ka li nando ha tila Jehova netilo ewinayi. (Jes. 11:2, 3) Pehala lyaashono okwa li e mu hole noonkondo, nokwa li a hala okuvulika kuye. (Joh. 14:21, 31) Ngaashi Jesus, natse otwa hala lela okusimaneka nokutila Jehova, molwaashoka omunahole, omunandunge, omuyuuki nomunankondo. Otu shi wo kutya Jehova oku tu hole, noku na ko nasha nankene hatu inyenge uuna te tu longo. Ngele otwa kala ihaatu vulika kuJehova, Jehova ota ka kala u uvite nayi, ihe ngele otwa vulika kuye otatu ke mu nyanyudha. — Eps. 78:41; Omayel. 27:11. w23.06 14 ¶1-2; 15 ¶5

Sho Omukwaniilwa Ussia a kala e na oonkondopangelo, okwa dhimbwa kutya Jehova oye Onzo yoonkondo dhe noka li we e na olupandu omolwiinima ayihe iiwanawa mbyoka e mu ningila. Shono otashi tu longo shike? Natu dhimbulukwe aluhe kutya omalaleko nuuyamba getu nosho wo iinakugwanithwa mbyoka tu na oya za kuJehova. Pehala lyokukala tatu itangele shoka twa pondola, olupandu natu kale hatu lu ukitha kuJehova. (1 Kor. 4:7) Natu zimine neifupipiko kutya inatu gwanenena notwa pumbwa egeeloputudho. Omumwatate ngoka e na omimvo tadhi ihilile po 60 okwa ti: “Ondi ilonga okukala ihaandi geye mbala uuna gumwe a popi epuko lyandje. Uuna nda pukululwa omolwepuko lya nika uugoya ndyoka nda ninga, ohandi kambadhala okulundulula e tandi tsikile okupa Jehova shoka sha dhenga mbanda.” Uushili owo kutya ngele ohatu vulika kuJehova nokukala aayifupipiki, otatu ka kala shili tu na ombili monkalamwenyo. — Omayel. 22:4. w23.09 10 ¶10-11

Aakriste yonale oya li ya pumbwa okwiidhidhimika. Oya li ye na omaupyakadhi ga faathana naangoka gaantu oyendji yopethimbo ndyoka. Ihe oya li wo ye na omashongo, molwaashoka ye li Aakriste. Oyendji yomuyo oya li ya hepekwa, hakaawiliki owala yelongelokalunga lyOshijuda nokaakwanepangelo Aaroma, ihe nokuyaandjawo wo. (Mat. 10:21) Shimwe ishewe, megongalo oya li ye na okukondjitha enwethomo lyaashunimonima nosho wo omalongo gawo giifundja. (Iil. 20:29, 30) Ihe nando ongawo, Aakriste mboka oya li ya idhidhimike. (Eh. 2:3) Ngiini mbela? Oya li ya idhidhimike nuudhiginini nokulandula iiholelwa yopamanyolo yaamboka ya li ya idhidhimike, ngaashi shaJob. (Jak. 5:10, 11) Oya li ya galikana ya pewe oonkondo. (Iil. 4:29-31) Oya li ya gandja eitulomo kiizemo iiwanawa mbyoka hayi zi mokwiidhidhimika. (Iil. 5:41) Otatu vulu wo okwiidhidhimika ngele otwa kala hatu konakona aluhe iiholelwa kombinga yeidhidhimiko mOohapu dhaKalunga nomiileshomwa yetu e tatu tedhatedha kuyo. w23.07 3 ¶5-6

Jehova naJesus itaye ke tu sa nando uunye. Omuyapostoli Petrus konima yokwiidhimbika Jesus okwa li e na okuninga etokolo lya simana. Mbela na tsikile okukala omulongwa gwaKristus nenge ne ku ethe po? Jesus okwa galikana Jehova, opo eitaalo lyaPetrus kaali nkundipale. Jesus okwa lombwele Petrus kombinga yegalikano ndyoka, nokwa ulike einekelo kutya lwanima Petrus ota ka vula okunkondopaleka aamwahe. (Luk. 22:31, 32) Shoka kasha li tuu sha shilipaleke Petrus a dhimbulukwe oohapu dhaJesus! Uuna tu na okuninga etokolo lya simana monkalamwenyo yetu, Jehova ota vulu okulongitha aasita mboka haye tu sile oshimpwiyu ye tu tse omukumo, tu kale aadhiginini. (Ef. 4:8, 11) Ngaashi owala Jehova a li a sile oshimpwiyu oompumbwe dhaPetrus nodhaayapostoli yalwe, ota ka sila wo oshimpwiyu oompumbwe dhetu, uuna twa pititha komeho iilonga yokuuvitha monkalamwenyo yetu. w23.09 24-25 ¶14-15

Jehova oha ndhindhilike nokuli nuunima uushona mboka hatu ningile yalwe tatu inyengithwa kolukeno. Ohe shi tala ko shi li eyambo li na ongushu noli li oongunga ndhoka ta ka futila po. Ngele owa li nale omuyakuligongalo nenge omukuluntugongalo, Jehova oha dhimbulukwa iilonga mbyoka wa longa nale nosho wo ohole ndjoka ye ku inyengitha wu yi ninge. (1 Kor. 15:58) Oha mono wo ohole ndjoka to tsikile okuulika. Jehova okwa hala atuheni tu kokeke ohole yoku mu hola noyokuhola yalwe. Otatu vulu okukokeka ohole yetu yokuhola Jehova okupitila mokulesha Oohapu dhe nokutedhatedha kudho nosho wo mokukala hatu popi naye pandjigilile megalikano. Ohole yetu yokuhola aamwatate naamwameme otayi vulu okukola uuna tatu ya ningile iinima yi ili noyi ili. Sho ohole yetu tayi koko, otatu ka hedha popepyeelela naJehova nosho wo naamwatate naamwameme. Otatu ka nyanyukilwa wo uukuume wetu mboka sigo aluhe. w23.07 10 ¶11; 11 ¶13; 13 ¶18

Omukriste kehe oku na okutokola nkene e na okusila oshimpwiyu uukolele we. Ngele Aakriste otaya hogolola epango lyopaunamiti, oye na okuvulika kekotampango li na ko nasha nokuyanda okutulwa ombinzi nosho wo uumpulile. (Iil. 15:20; Gal. 5:19, 20) Miinima yilwe oye na okutokola kutya epango lini taya ka taamba ko. Kutya nduno otu uvitile ngiini epango lyopaunamiti lyontumba, otu na okusimaneka uuthemba waamwatate naamwameme wokuninga omatokolo gawo yene ngele tashi ya puukolele wawo. Onkee otu na okudhimbulukwa iitsa mbika ine: (1) Uukwaniilwa waKalunga owo owala tawu ka eta eyaludho thiluthilu notali kalele. (Jes. 33:24) (2) Omukriste kehe oku na okukala “a kola” nenge a tompwa kutya oshike tashi mu opalele. (Rom. 14:5) (3) Ihatu pangula yalwe nenge tu ninge oshinima shoka tashi ya pundukitha. (Rom. 14:13) (4) Aakriste ohaya ulike ohole noihaya pititha emanguluko lyawo lyokuninga omatokolo gopaumwene komeho yuukumwe wegongalo. — Rom. 14:15, 19, 20. w23.07 24 ¶15

Mbela owa lenga ngaa ekwatathano lyoye naJehova? Kapu na omalimbililo, owe li lenga. Okuza pethimbo lyonale, aantu oyendji oya kala ya lenga ekwatathano lyawo naKalunga. (Eps. 104:33, 34) Oyendji oya li ya ningi omaiyambo ya longele Jehova. Shoka osha li sha ningilwa mboka yomuIsraeli shonale ya tseyika ye li Aanasiri nenge aayapulwa. Oshitya shoka otashi yelitha nawa Aaisraeli aalaadhi, mboka ya li ya ningi omaiyambo ya longele Jehova momukalo gwa ikalekelwa. Ompango yaMoses oya li ya pitika omulumentu, nenge omukiintu a ningile Jehova egano lya ikalekelwa mokuhogolola a kale Omunasiri uule wethimbo lyontumba. (Num. 6:1, 2) Egano nenge euvaneko ndyoka olya li lya kwatela mo okuvulika komalombwelo ngoka Aaisraeli ooyakwawo kaaya li ye na okuvulika kugo. Omolwashike Omuisraeli a li e na okuninga egano lyokukala Omunasiri? Molwaashoka Omuisraeli ngoka okwa li e hole Jehova noonkondo nokwe mu pandula sho e mu laleka nuuyamba, otashi vulika osho sha li she mu inyengithwa a ninge egano. — Deut. 6:5; 16:17. w24.02 14 ¶1-2

Oshitya shOshihebeli shoka sha tolokwa mOmbiimbeli “uudhiginini” nenge “ohole yi na uudhiginini,” otashi popi kombinga yuudhiginini nenge yohole ndjoka Kalunga ha ulukile ookuume ke. Oshitya osho tuu shono ohashi longithwa wo okupopya ohole ndjoka aapiya yaKalunga ye na. (2 Sam. 9:6,7) Uudhiginini wetu ota wu vulu okukala wa kola ethimbo kehe. Natu taleni nkene shino sha li sha ningilwa Daniel. Uudhiginini waDaniel owa li wa makelwa monkalamwenyo ye ayihe. Ihe okwa li a adhika kemakelo limwe enenenene sho e na omimvo 90 nasha. Omalenga gomukwaniilwa Darius kaga li ge hole naanaa Daniel nokaga li ga simaneka Kalunga ke. Onkee oga pangele ompangela ga dhipagithe Daniel. Oga li ga shainitha omukwaniilwa ompango, ndjoka tayi ka ningitha Daniel ulike kutya oku li omudhiginini kuKalunga ke nenge okomukwaniilwa. Shoka Daniel a li e na okuninga, opo a ulike uudhiginini we komukwaniilwa okweetha po owala okugalikana kuJehova uule womasiku 30. Ihe Daniel okwa tindi okukala kee shi omudhiginini kuJehova. — Dan. 6:12-15, 20-22. w23.08 5 ¶10-12

Jehova okwa hala tu kale hatu idhidhimike mokuulukila ohole aamwatate naamwameme. Ngele gumwe oha nyengwa okuulika uukwatya wontumba wopaKriste, otatu vulu okukala tu na einekelo kutya ina hala oku tu uvitha nayi, ihe oha kambadhala okuninga shoka Jehova a ti oshi li mondjila. (Omayel. 12:18) Kalunga oku hole aapiya ye aadhiginini, nonando ohaya ningi omapuko. Nokuli nonando ohatu ningi omapuko, oha tsikile okukala kuume ketu noiha kala e tu geela. (Eps. 103:9) Inashi simana tuu kutse okuholela Tate yetu ngoka ha dhimine po! (Ef. 4:32–5:1) Dhimbulukwa kutya sho ehulilo tali ende tali hedha popepi, otwa pumbwa okukala tu na ekwatathano naamwatate naamwameme. Otashi vulika nokuli omahepeko ge ki indjipale. Otashi vulika nokuli tu ki iyadhe tu li mondholongo omolweitaalo lyetu. Ngele shono oshe tu ningilwa, otatu ka kala twa pumbwa aamwatate naamwameme shi vulithe nale. — Omayel. 17:17. w24.03 15-16 ¶6-7

MOmbiimbeli otamu adhika omahokololo taga popi kombinga yaagundjuka mboka ya hedha kuJehova, e ta kala e ya hokwa noya mono kutya onkalamwenyo yawo oya kala tayi ende nawa. David oye gumwe gwomuyo. Sho a li omugundjuka okwa li a tokola okulongela Jehova, nolwanima okwa ningi omukwaniilwa omulaadhi. (1 Aak. 3:6; 9:4, 5; 14:8) Ngele otwa konakona onkalamwenyo yaDavid niilonga ye yuudhiginini, otashi vulu oku tu tsa omukumo noku tu inyengitha tu longele wo Jehova nuudhiginini. Oto vulu wo okwiilonga koshiholelwa shaMarkus naTimoteus. Otatu ka mona kutya oya li ya longele Jehova nuudhiginini manga ya li aagundjuka, noya tsikile oku mu longela nuudhiginini. Etokolo lyawo lyokulongela Jehova olya li lye mu nyanyudha. Shoka ho ningi ngashingeyi otashi ka guma onkalamwenyo yoye yomonakuyiwa. Ngele owa inekela muJehova, ihe hamoondunge dhoye mwene, otashi ke ku kwathela wu ninge omatokolo ge li nawa. Oto vulu okukala wu na onkalamwenyo ombwanawa noya lalekwa nuuyamba. Dhimbulukwa kutya Jehova okwa lenga shoka ho mu ningile. Kapu na we omukalo gumwe to vulu okulongitha onkalamwenyo yoye shi vulithe okulongela Tate yetu gwomegulu, Jehova. w23.09 13 ¶18-19

Omuyapostoli Paulus okwa li e shi kutya Aakriste ooyakwawo nayo inaya gwanenena. Pashiholelwa, yamwe megongalo sho ya tsakanene naye, oya li inaaya itaala ngele oku li ngaa omulongwa. (Iil. 9:26) Lwanima, yamwe oya li ya popi iinima iiwinayi kombinga ye, opo ya ningithe yalwe ya kale inaaye mu inekela we. (2 Kor. 10:10) Paulus okwa li a mono omukuluntugongalo gumwe ta ningi etokolo lya puka, ndyoka tashi vulika li pundukithe yalwe. (Gal. 2:11, 12) Gumwe gwomookuume kaPaulus kopothingo, Markus, okwa li e mu yemateke nayi. (Iil. 15:37, 38) Paulus okwa li ta vulu okweetha oonkalo adhihe ndhoka dhi mu ningithe a tinde okweenda pamwe naamboka ye mu uvitha nayi. Ihe nando ongawo, okwa tsikile okukala e na etaloko ewanawa li na ko nasha naamwatate naamwameme, e ta kala nokulongela Jehova nuudhiginini. Oshike sha li sha kwathele Paulus a idhidhimike? Paulus okwa li e hole aamwatate naamwameme. Ohole yaPaulus yokuhola yalwe oya li ye mu kwathele kaa gandje eitulomo kokwaagwanenena kwawo, ihe okomaukwatya gawo omawanawa. Ohole oya li wo ya kwathele Paulus a ninge shoka sha popiwa menyolo lyesiku lyonena. w24.03 15 ¶4-5

MOmbiimbeli omu na omahokololo ogendji ngoka taga ulike kutya osha simana okukala nomwenyo omwaanawa. Natu taleni koshiholelwa shaIsak. Sho a li moshitopolwa Gerar shAafilisti, aashiinda she oye mu sile efupa e taya file omithima ndhoka dha li dha hupwa kaapiya yahe. Pehala lyokukondjela omithima, Isak okwa tembukile pamwe nuukwanegumbo we koshitopolwa shokokule e ta hupu omithima dhilwe. (Gen. 26:12-18) Ihe Aafilisti oya ti kutya omeya ngoka ge li momithima ndhoka nago oga wo. Nonando ongawo, Isak okwa ungaunga nayo nombili. (Gen. 26:19-25) Mbela oshike sha li she mu kwathele a kale a ngungumana nokuli nando yalwe oya li ya kambadhala oku mu hinda? Osha yela kutya okwa li a ilongo oshindji koshiholelwa shaavali ye, ngaashi okukala omunambili ngaashi he, Abraham nokukala ‘nombepo yi na ombili noya ngungumana,’ ngaashi Sara. — 1 Pet. 3:4-6; Gen. 21:22-34. w23.09 15 ¶4

Jehova okwa li a tumu Omwana gwe gwosheeli omuholike kombanda yevi, a longe aantu kombinga yUukwaniilwa noku gandje omwenyo gwe e tu kulile muulunde neso. Opo nduno Jesus okwa yumudhwa, e ta shuna megulu a ka pangele e li Omukwaniilwa gUukwaniilwa waKalunga. Enenedhiladhilo lyOmbiimbeli olyo kutya edhina lyaJehova otali ka yapulwa, sho ta ka gwanitha po elalakano lye li na ko nasha nevi, okupitila mUukwaniilwa we mboka Kristus oye e li omupangeli gwawo. Elalakano lyaJehova itali vulu okulunduluka. Jehova oku uvaneka kutya kehe shimwe otashi ka ningwa ngaashi e shi popi. (Jes. 46:10; Heb. 6:17, 18) Mokweendela ko kwethimbo, evi otali ka ninga oparadisa, moka oluvalo lwaAdam naEva lwa gwanenena nolwuyuuki talu ka ‘kala nomwenyo sigo aluhe.’ (Eps. 22:26, yelekanitha NW.) Ihe hasho owala shoka Jehova ta ka gwanitha po. Elalakano lye limwe ishewe, ota ka hanganitha iishitwa ye iinandunge yomegulu noyokombanda yevi. Opo nduno kehe gumwe ota ka kala ha vulika kuJehova e li Omupangeli gwe. (Ef. 1:8-11) Mbela ino kuminwa omukalo gwa dhenga mbanda moka Jehova ha gwanitha po elalakano lye? w23.10 20 ¶7-8

Sho Aajuda mboka ya thigi po Babilon ya thiki muJerusalem, osha li oshidhigu koyendji okusila oshimpwiyu yaandjawo. Opwa li wo omapiyagano muukwaniilwa waPersia, noya li wo taya patanekwa kiilongo mbyoka ye ya kundukidha. Osha li oshidhigu kAajuda yamwe ya kale taya gandja eitulomo kiilonga yokutungulula otempeli. Onkee ano Jehova okwa li a tumu aahunganeki ye yaali, Haggai naSakaria, ye ya kwathele ya kale ye na uulaadhi wokulongela Jehova, shoka sha li sha eta iizemo iiwanawa. (Hag 1:1; Sak 1:1) Ihe konima yomimvo 50 lwaampono, mboka ya shuna kuJerusalem oya li ya pumbwa natango etsomukumo. Omunyolululi gwOmpango a pyokoka, Esra, okwa li a zi kuBabilon e te ya kuJerusalem, a ladhipike oshigwana shaKalunga shi pitithe komeho elongelokalunga lyashili. (Esra 7:1, 6) Ngaashi owala omahunganeko ngoka ge li membo lyaHaggai naSakaria ga li ga kwathele oshigwana shaKalunga shi tsikile okukala she mu inekela sho tashi patanekwa, natse otaga vulu oku tu kwathela tu kale twa inekela muJehova, uuna twa iyadha moonkalo oondhigu. — Omayel 22:19. w23.11 14-15 ¶2-3

Ongiini tatu vulu okuulika ohole yokuhola ooitaali ooyakwetu? Omukalo gumwe tatu vulu oku shi ninga, omoku ya hekeleka. Ombiimbeli otayi ti kutya “onkee ano talalekathaneni,” notatu ka vula owala oku shi ninga ngele otu na olukeno. (1 Tes. 4:18) Ongiini tatu vulu okukaleka ohole yetu yokuhola yalwe ya kola? Omokuninga ngaashi tatu vulu tu ya dhimine po. Omolwashike sha simana noonkondo kunena tu ulukilathane ohole? Petrus okwa gandja etompelo a ti: “Ehulilo lyiinima ayihe oli li popepi. Komeho gaayihe holathaneni nomwenyo aguhe.” (1 Pet. 4:7, 8) Oshike twa tegelela shi ka ningwe sho ehulilo lyuuyuni mbuka wa kolokosha tali hedha popepi? Jesus okwa popi shi na ko nasha naalanduli ye a ti: ‘Otamu ka kala mu tondike kiigwana ayihe omolwedhina lyandje.’ (Mat. 24:9) Ngele otwe shi ningi, oonkambadhala dhaSatana dhoku tu topola otadhi ka ponya, oshoka otwa hanganithwa kohole. — Fil. 2:1, 2. w23.11 13 ¶18-19

Oshili yomOohapu dhaKalunga oyi na oonkondo oonene. Ngele otwa longo aantu kombinga yaJehova nonkene a tya lela, otatu ka mona iizemo iiwanawa. Aantu itaya ka kala we ya tsikithwa kiifundja yaSatana, ihe otaya ka kala ye wete omaukwatya omawanawa gaTate yetu omunahole. Otaya ka kuminwa oonkondo dhe oonenenene. (Jes. 40:26) Otaya ka kala ye mu inekela thiluthilu, oshoka ye omuyuuki a shiga ko. (Deut. 32:4) Otaya ka kuminwa uunongo we uunene. (Jes. 55:9; Rom. 11:33) Otashi ke ya hekeleka wo okutseya kutya Kalunga oye ohole. (1 Joh. 4:8) Sho taya hedha popepi naJehova, etegameno lyawo lyokukala nomwenyo sigo aluhe ye li oyana, ohali kolo. Katu na tuu uuthembahenda uunene wokukwathela aantu ya hedhe kuTate yetu! Ngele otwe shi ningi, Jehova ote ke tu tala ko tu li ‘aalongi pamwe naye.’ — 1 Kor. 3:5, 9. w24.02 12 ¶15

Ngele ngoye oto konakona Ombiimbeli, nenge wa putudhwa kaavali Oonzapo, mbela oto dhiladhila kombinga yeninginitho? Ngele osho, shoka oshi shi okupandulwa. Ihe manga inoo ninginithwa, owa pumbwa okwiiyapulila Jehova. Oho iyapulile Jehova ngiini? Oho mu uvanekele megalikano kutya oye awike to ka longela, nonokutya oto ka pititha komeho okulonga ehalo lye monkalamwenyo yoye. Opo nduno oho uvanekele Jehova kutya oto ka tsikila okukala wu mu hole “nomutima gwoye aguhe, nomwenyo gwoye aguhe, nomadhiladhilo goye agehe nosho wo noonkondo dhoye adhihe.” (Mark. 12:30) Eiyapulo lyoye oshinima shopaumwene, hashi kala pokati koye naJehova. Mepingathano naashoka, eninginitho ohali ningwa montaneho, shoka tashi ulukile yalwe kutya owa iyapulila Jehova. Eiyapulo euvaneko lya kwata miiti, na Jehova okwa tegelela wu kale metsokumwe nalyo, ngaashi owala nangoye osho wa hala okuninga. — Omuuv. 5:4. w24.03 2 ¶2; 3 ¶5

Oondjokana adhihe odhi na omaupyakadhi. Ombiimbeli oye shi popya sha yela kutya aantu mboka ya hokana otaya ka kala ye li muudhigu wonkalamwenyo. (1 Kor. 7:28) Omolwashike mbela? Omolwaashoka ondjokana ohayi tula pamwe aantu yaali inaaya gwanenena, kehe gumwe e na omaukwatya ge gi ili, shoka e hole naashoka kee hole. Ookuume kopandjokana otashi vulika ya za momaputuko ga yoolokathana. Mokweendela ko kwethimbo, otashi vulika ya ulukilathane omaukwatya ngoka ya li inaaya ndhindhilika sho ya li taya endelathana. Iinima ayihe yoludhi ndono ohayi etitha omaipumo mumwe. Otashi vulika ya kale taya paathana uusama omolwomaupyakadhi ngoka ye na mondjokana, nokuli nonando ayehe oya ninga epuko noye na owala okulongela kumwe, ye ga kandule po. Otashi vulika nokuli ya tameke okumona kutya oya pumbwa okutopoka, nenge okuhengathana. Ihe mbela okutopoka oko ekandulopo lyuupyakadhi? Hasho nando. Jehova okwa ti kutya aaihokani oye na okusimaneka ondjokana nokuli nuuna ookuume kawo kopandjokana shi li oshidhigu okukala pamwe nayo. w24.03 16 ¶8; 17 ¶11

Konima sho wa iyapulile Jehova e to ninginithwa, etegameno lyoye lyoku ka kala nomwenyo sigo aluhe kombanda yevi moparadisa otali tsikile okukoka sho to ilongo kombinga ye nokukoka pambepo. (Heb. 5:13–6:1) Otashi vulika wa ningilwa oshinima shoka sha popiwa mAaroma 5:2-4. Owa li wa iyadha momaudhigu gi ili nogi ili, ihe owe ga idhidhimikila nowa mona kutya Kalunga okwe ku hokwa. Molwaashoka owu na einekelo kutya okwe ku hokwa, ngashingeyi owu na etompelo lya kola kutya ote ke ku pa iinima mbyoka a uvaneka. Onkene etegameno lyoye olya kola shi vulithe nale. Oli li oshinima sholela kungoye noshopaumwene. Ohali ku gumu meni lyomutima gwoye, ohali nwetha mo kehe shimwe shoka ho ningi monkalamwenyo yoye, ohali lundulula nkene ho ungaunga naantu yaandjeni, nkene ho ningi omatokolo nosho wo nkene ho longitha ethimbo lyoye nokuli. Omuyapostoli Paulus okwa gwedha ko oshitsa sha simana kombinga yetegameno ndyoka wu na sho Kalunga a tameke okukala e ku hokwa. Paulus okwe ku shilipaleka kutya etegameno lyoye otali ka gwanithwa. — Rom. 15:13. w23.12 12-13 ¶16-19

Uuna tu li muupyakadhi, omaiyuvo getu, okudhiladhila kwetu neihumbato lyetu otashi vulika kaayi kale we ngaashi yi na okukala. Otashi vulika omaiyuvo getu ga kale taga falwafalwa. Mbela Jehova ohe tu kwathele ngiini, uuna twa gwililwa po pamaiyuvo? Okwe tu shilipaleka kutya ote ke tu kwathela. Uuna mefuta mu na oshikungulu, osikepa ohashi vulika yi tameke tayi ihiki. Opo oosikepa kaadhi kale tadhi inyenge, odhindji dhomudho odha tulwa omilenge kohi kombinga kehe dha fa dhoohi. Omilenge ndhoka ohadhi kwathele osikepa kaayi tengauke, aanasikepa ya kale ye uvite ye li megameno noya nyanyukilwe olweendo lwawo. Ihe omilenge ndhoka ohadhi longo owala nawa uuna osikepa ya uka komeho. Sha faathana, Jehova ote ke tu kwathela sho tatu humu komeho nuudhiginini momathimbo omadhigu. w24.01 22 ¶7-8

Uuna wu uvite wa tila, ipula ngeyi, ‘Oshike Jehova a ningila ndje nale?’ Kala ho tedhatedha kwaashoka a shita. Pashiholelwa, uuna tatu ‘tala’ nkene Jehova ha sile oshimpwiyu uudhila noongala, iinima mbyoka inaayi shitwa oshifetha she noihayi vulu oku mu longela, otatu koleke einekelo lyetu kutya ote ke tu sila wo oshimpwiyu. (Mat. 6:25-32) Natu taleni wo kwaashoka Jehova a ningila aalongeli ye. Otashi vulika wa konakona kombinga yomuntu gwomOmbiimbeli ngoka a li e na eitaalo lya dhenga mbanda, nenge tashi vulika wa lesha oshimoniwa shomupiya gwaJehova gwokunena. Shimwe ishewe, tedhatedha kunkene Jehova e ku sila nale oshimpwiyu. Okwe ku kwathele ngiini wu mu tseye? (Joh. 6:44) Omagalikano goye okwa li e ga yamukula ngiini? (1 Joh. 5:14) Oho mono ngiini uuwanawa esiku kehe mekuliloyambo lyOmwana omuholike? — Ef. 1:7; Heb. 4:14-16. w24.01 4 ¶6; 7 ¶17