“Inamu Hinda Aana Yeni”

“OOHE, inamu hinda aana yeni.” Omuyapostoli Paulus osho a ti ngawo. (Aaefeso 6:4, KB) Miilongo yUuninginino, moka aakuluntu ye li momathininiko geputuko lya huma komeho, kashi shi aluhe oshipu kuyo okukala naanona yawo nombili. Nomiilongo inaayi putuka oshi li wo naanaa eshongo enene okuputudha aanona. Dhoshili, onkalamwenyo otayi ende kashona shi vulithe mUuninginino. Ihe omikalo nomithigululwakalo omikulu otadhi vulu okunwetha mo aakuluntu okukala naanona yawo pamikalo ndhoka pwaahenomalimbililo tadhi ke ya uvitha nayi noku ya hinda.

Miilongo yimwe inaayi putuka aanona ohaya tulwa pondondo yopevi lela shi na ko nasha nokuziminwa nonokusimanekwa. Momaputuko gontumba aanona ohaya tumagulwa pamukalo goku ya mbandameka nokuya ndwandwamena, haa gandagulwa nohaya ningwa nayi. Otashi vulu okukala sha pumba okuuva omukuluntu ta lombwele okanona oshitya shombili, ndaadhini kutumbula oshitya ngaashi “alikana” na “tangi.” Oohe ohaa dhiladhila kutya oye na okuulika oonkondo dhawo niikaha yi na oonkondo; oohapu oonkunkutu otadhi kolekwa nomankawa ga kola.

Momaputuko gamwe muAfrika ohashi talika ko nokuli elundu ngele okanona taka popitha omukuluntu kuko kene. Inashi pumba okumona aagundjuka ya humbata omitsalo omidhigu komitse ya tegelela neidhidhimiko epitikilo okupopitha ongundu yaakuluntu. Aakuluntu otaa tsikile nokupopya kwawo, kaaye na ko nasha naagundjuka mboka ya tegelela sigo taya tokola kutya aanona otaa vulu nduno oku ya popitha. Ongele owala aanona ya mana oku ya popitha, taa pitikwa ya pite po.

Oluhepo olwo natango oshinima shoka tashi vulu okweetela onkalonawa yaanona oshiponga. Aagundjuka aamati naakadhona ohaya lilwa monomola okukala aalongeli yaakuluntu yawo nonando otashi ye etele uukolele uuwinayi nokwaaha ya kosikola. Iilonga oyindji unene otayi vulu nokuli okupewa aanona kegumbo. Nongele omaukwanegumbo kage li mondoolopa, ohaga tumu aanona yawo kiilando iinene ya ka silwe oshimpwiyu kaakwawo omanga taa yi kosikola, olundji ohaa ningwa naanaa ya fa aapika. Dhoshili, okuninga nayi akuhe nkuka okuwinayi otaku hindi aanona!

Shoka ‘Oku Ya Hinda’ Taku Ti

Aakuluntu yamwe ohaya putudha aanona yawo pamukalondjigilile ngono hagu longithwa kwaayehe pwaa na okudhiladhila kutya oshilanduliko otashi ka kala ngiini. Ihe Oohapu dhaKalunga odhi na etompelo ewanawa lyokukumagidha aakuluntu kaaya hinde aanona yawo. Uutumbulilo wotango wOshigreka mboka tau fatulula ‘inamu hinda,’ otau ti lelalela “ino penduthila gumwe ondjahi.” (Kingdom Interlinear) MAaroma 10:19 (OB-1986) oshityalonga osho tuu shono otashi lundululwa “okuninga [gumwe] a geele [sha].”

Today’s English Version otayi ti ano: “Inamu ninga aanona yeni ngaaka ya kale ya geya.” The Jerusalem Bible otayi ti komukalo gwa faathana: “Inamu ikwatithitha onkone kaanona yeni.” Ano Ombimbeli otayi popi omahindo omashona ngoka sikulimwe omukuluntu ha ningile okanona ke inee shi tseya molwokwaaudhithwa, na itayi gandja uusama keputudho ndyoka tali longithwa pauyuki. PaLange’s Commentary on the Holy Scriptures ovelise ndjika yOmbimbeli otayi popi kombinga ‘yokukala naanona komukalo gwokundwandwamena, nogwokwaahenomikalo, opo . . . ye ya angale naanona ya tamaneke aakuluntu yawo, ye ya tukuluthile oshipotha noye ya yemateke.’

Ngaashi omuputudhi J. A. Farrant e shi ndhindhilike: “Uushili owo kutya aanona oyo aantu. Yo ihayi inyenge owala ya mwena ngaashi iimeno mbyoka ihayi inyengithwa komudhingoloko gwayo. Yo ohayi inyenge pakulonga.” Nolundji einyengo lyawo sho kaaye liwe nayo pauyuki otali eta etekauko lyopambepo nosho wo lyopamaiyuvo. Omuuvithi 7:7 ota ti: “Ehepeko hali goyapaleke omunandunge.”

Putudha Aanona Pakuputudha kwaKalunga

Aakuluntu mboka ya hala aanona yawo ya kale moshili, kaye na okupitika nando omithikampango nomithigululwakalo dheputuko dhi kale odho awike iinima mbyoka tayi utha nkene yo ye na okuputudha aanona yawo. (Faathanitha 3 Johannes 4.) Sho Paulus a londodha aakuluntu yaaha hinde aanona yawo, okwa gwedha po: “Tsikileni noku ya putudha meputudho nomomakumagidho ga kwata miiti gaJehova.” (Aafeso 6:4, NW) Ano omithikampango dhaJehova ohadhi pingene po omikalo nomataloko gopuyo.

Nonando oshi li shaapuhe miilongo yontumba okutala ko aanona inaaya simana noku ya ninga aapika yiilonga, mEpsalmi 127:3 Ombimbeli otayi ti: “Tala, aanona oyo omagano gOmuwa, noluvalo lwela olwo oshipewa.” Omukuluntu mbela ota vulu ngaa okukala e na ekwatathano ewanawa naKalunga ngele oha longitha nayi uuthiga we? Nandonando! Kapu na ekankameno lyasha lyetaloko kutya aanona oye li po owala okusila oompumbwe dhaakuluntu yawo oshimpwiyu. Mu 2 Aakorinto 12:14, Ombimbeli otayi tu dhimbulukitha: “Aanona ndishi ihaa likolele aakuluntu iinima, aawe, aakuluntu ohaa likolele oyana.”

Itashi ti kutya aanona oye na okweethwa yaaha gwanithe ombinga yiilonga yawo niinakugwanithwa yawo megumbo. Ihe mbela uuwanawa wokanona hawo wu na okusilwa oshimpwiyu? Pashiholelwa, sho Yaa, okakadhona Okakriste muAfrika, ka pulwa shoka ka hala unene aakuluntu yako ye ka ningile, oka yamukula: “Onda hala iilonga yandje megumbo yi shonopekwe momasiku ngoka ndi na omalongekidho gokuya momapya.” Ano ngele okanona oke wete oshidhigu okuthika kosikola pethimbo nenge okukala pokugongala omolwiilonga oyindji unene kegumbo, itashi ka kala mbela oshiwanawa okuninga po omalunduluko gontumba?

Dhoshili, kashi shi aluhe oshipu okutseya nkene aagundjuka ye na okukaliwa nayo. Ongiini mbela aakuluntu taa vulu okukala nayo komukalo ngoka inaagu puka nenge okwaa ya hinda? Omayeletumbulo 19:11 otaga ti: “Oondunge dhomuntu tadhi mu talanteneke.” Eeno, tango oto vulu okukambadhala okuuva ko okanona koye ke li omuntu. Okanona kehe oki ili noke na omahalo, oonkondo noompumbwe dhako. Omahalo, oonkondo noompumbwe mbika mbela iishike? Owa kutha ngaa mbela ethimbo opo wi ilonge okanona koye nokutseya eyamukulo kepulo ndika? Eyamukulo olyo kutya ne omu na okulongela kumwe, nokugalikana pamwe, nokukutha ombinga mevululukopo lyuukwanegumbo pamwe—iinima mbika otayi gandja oompito kaakuluntu okukala ye na ekwatathano lyopothingo naanona yawo.

Mu 2 Timoteus 2:22 Paulus okwa ningi natango uundhindhilikilo wa simana sho a lombwele Timoteus a ti: “Za ontuku okahalu kuugundjuka.” Eeno, Paulus okwa li u uvite ko kutya uugundjuka otau vulu okukala ethimbo edhigu. Omalunduluko omanene noonkondo gopalutu nogopamaiyuvo ohaga holoka po. Ohole pokati kaamati naakadhona ohayi indjipala. Pethimbo ndika, aagundjuka oya pumbwa ewiliko lya pyokoka nolyohole okuyanda oomwigo dha kwata miiti. Ihe kaye na okukaliwa nayo ya fa kaaye na omikalo. Omukadhona ngoka u uvite nayi e na he Omukriste okwa nyenyeta ta ti: “Nando inandi hondela, tate oha ti onde shi ninga, ano otandi vulu owala ndi ke shi ninge.” Pehala lyokupa okanona koye ondjo kutya oke na omainyengotompelo omawinayi, ka lombwela kutya owe ki inekela. (Faathanitha 2 Aatessalonika 3:4.) Pehala lyokugandja uusama, ou na okuulika ohenda neuvoko komukalo gu na ohole noihaagu lunduluka.

Ihe omaupyakadhi ogendji otaga vulu okukeelelwa ngele aakuluntu taa kundathana manga kuyele iiponga yi na ko nasha nomikalo mbyoka okanona ka taalela. Dhimbulukwa, Kalunga ota lombwele aakuluntu ya longe aanona yawo noku ya putudha mOohapu dhaKalunga. (Deuteronomium 6:6, 7) Otashi vulika tashi ka pula ethimbo olindji noonkambadhala odhindji. Mupya munene, aakuluntu yamwe ihaa longo uunona wawo molwaashoka kaye na eidhidhimiko. Okwaatseya okulesha, nkoka ku li uupyakadhi uunene miilongo mbyoka inaayi putuka, otashi vulika haku imbi aakuluntu yalwe yaaha vule okulonga aanona yawo nawa.

Moompito dhimwe Omukriste a pyokoka ota vulu okupulwa a kwathele. Otashi vulika omukuluntu ngoka e na owino onshona a pewe owala epukululo. (Omayeletumbulo 27:17) Nenge tashi vulika a kwathelwe okuninga ekonakono lyuukwanegumbo ye mwene. Ihe itashi mangulula omukuluntu koshinakugwanithwa she okulonga aanona ye Oohapu dhaKalunga. (1 Timoteus 5:8) Ye ota vulu okwiitula mo okulonga pamwe naanona ye muukalele womomapya nokukundathana iinima yopambepo poshililo nenge poompito dhilwe ndhoka tadhi opalele.

Omugundjuka ngoka a koka pandjigilile, oha kala a hala emanguluko lyokuninga omatokolo gamwe ye mwene. Olundji ohashi talwa ko papuko kutya ota ningi oshipotha nenge omanganga. Itashi ke mu uvitha tuu nayi unene ngele aakuluntu ye tayi inyenge mokukala naye ya fa ye li nokanona okashona notaa tindi oku mu pa emanguluko lyokuninga omatokolo gamwe ye mwene! Otashi ke mu hinda wo ngele oyo haye mu ningile omatokolo mokanima kehe monkalamwenyo ye—shi na ko nasha nelongo, eithano, ondjokana—noitaaya kundathana naye iinima ya tya ngawo komukalo gwa gundjila nogwesimaneko. (Omayeletumbulo 15:22) Omuyapostoli Paulus ota ladhipike Aakriste ooyakwawo ya kale ‘aakuluntu moondunge.’ (1 Aakorinto 14:20) Aakuluntu mbela inaya pumbwa nando aanona yawo ya koke—pamaiyuvo nopambepo? Ihe “oonkondo dhokudhiladhila” dhomugundjuka otadhi vulu owala okudheulwa “mokulongithwa.” (Aaheberi 5:14, NW) Oku dhi longitha, ye oku na okukala a pewa emanguluko lyokuhogolola miinima yimwe.

Kashi shi oshipu okuputudha aanona pethimbo ndika edhigu. Ihe aakuluntu mboka taa landula Oohapu dhaKalunga, ihaa hindi nenge ihaa geyitha aanona yawo “ya teke omukumo.” (Aakolossa 3:21, NW) Pehala lyaashono yo otaa kambadhala okukala naanona yawo nohole, neuvoko nonesimaneko. Aanona yawo ohaya wilikwa, ihaa thininikwa; ohaa papatelwa, ihaya dhinwa; ohaa kwathelwa ya kale aanahole, ihaya geyithwa nenge yu uvithwe nayi.

[Ethano pepandja 21]

Okudhana naanona oshidhanitho “oware,” uudhano hau dhanwa megumbo muGhana, ohaku pe aakuluntu mbano ompito okweendathana naanona yawo