Oongeleka mbela otadhi vulu okuhupithwa?
STEPHEN TIRWOMWE, omukwambepo Omuuganda ota ti: “Aantu muBritania oyi itaala natango Kalunga ihe inaya hala okwiigandja kuKristus.” Oomvula 20 lwaampono dha piti, okwa hupile momadhipago gekuni gaantu yomongeleka ye muUganda. Nena, ohu uvithile mooklaba dhaalumentu muLeeds, Ingilanda, ta ningi euvitho lye lyuule wominute omulongo manga aapulakeni inaaya tameka okudhana uudhano wobingo.
Handiyaka yEnenefuta lyaAtilanda, Etumo lyaAngelikana muAmerika lya adhika opo lyu unganekwa otali kondjo nuupyakadhi wopambepo wa faathana. Oweb site yopambelewa yi na ko nasha netumo ndyoka otayi ti: “Iilongohangano ngashingeyi oyi li oshilongo shi na aakalimo oyendji noonkondo aapopi yOshiingilisa muuyuni mboka kaaye li iilyo yongeleka yontumba nokaaye na ko nasha niinima yopambepo. Tse otu li ngashingeyi oshilongo moka mwa pumbwa okulongwa iilonga yetumo.” Sho yu uvithwa nayi koonkambadhala inaadhi pondola sha ya ninge omalunduluko mongeleka yawo, etumo epe olye etha okulandula omikalondjigilile nolyi imbwanga mumwe naawiliki Aayasia nAayafrika opo ya tameke “okutamununa mo iilonga yuutumwa mIilongohangano.”
Ihe omolwashike aatumwa Aayafrika, Aayasia nosho wo Aayamerika shaLatina taya longo iilonga ‘yokuhupitha oomwenyo’ miilongo mbyoka tayi iti Iikriste yaEuropa naAmerika lyokOlundume?
Oolye taya hupitha oolye?
Uule woomvula dhi vulithe pomathele gane, embombolokelomo lyaatumwa aatilikalunga Aaeuropa olya landula nziya ehumokomeho enenenene lyetamunukomo lyopakoloni muAfrika, Asia, Efuta lya mwena nosho wo muAmerika lyokOlukadhi. Elalakano lyawo olya li okweetela elongelokalunga lyawo mboka aniwa aapagani miilongo mbyoka. Konima yethimbo, ookoloni dhaAmerika ndhoka aniwa odha kankamena komakotampango gopaKriste, odhi imbwanga mumwe nayo nopo nduno lwahugunina odha vulu po paatumwa Aaeuropa mokutota po omatumo gokuuvitha evaangeli gawo yene muuyuni auhe. Ngashingeyi onkalo oya lunduluka.
Andrew Walls, omutoti-omuwiliki gwEndiki lyOkukonakona Uukriste mIilongo mbyoka kaayi shi yokUuninginino ota ti: “Endiki [lyUukriste edhina] olya lunduluka.” Mo 1900 oopersenda 80 dhaamboka yi iti Aakriste odha li Aaeuropa nenge Aayamerika lyokOlundume. Ihe nena oopersenda 60 dhaayehe mboka yi iti Aakriste odhi li muAfrika, Asia naAmerika shaLatina. Ehokololoningomwa lyomasiku ngano lyomiinyanyangidhwa otali ti: “Oongeleka dhaKatoolika muEuropa ohadhi longitha aapristeli yokuFilipine noyokoIndia,” na “gumwe gwomaapristeli yahamano ngoka ta longo ngashingeyi momagongalo gaKatoolika muAmerika okwa za kiilongo yilwe yi ili.” Aaevangeli Aayafrika muHolanda, unene tuu Aaghana, oyi itala ko ye li “ongeleka yuutumwa menenevi kaali na ko nasha nelongelokalunga.” Aaevangeliste ya za kuBrasilia ngashingeyi ohaya ningi ondjendamushigakano miitopolwa yi ili noyi ili yaBritania. Omunyoli gumwe ota ti: “Olweendo lwaatumwa yopaKriste olwi ishuna monima.”
Eipumomumwe oli li pokuholoka
Otashi vulika shili ku tiwe kutya aatumwa oya pumbiwa menenevi lyaEuropa nolyaAmerika lyokOlundume moka okwaahenakonasha nelongelokalunga taku indjipala. Oshifokundaneki shimwe otashi ti: “MuSkotland Aakriste inaaya adha poopersenda 10 oyo haya yi aluhe kongeleka.” Nokuli muFulaanisa nomuNdowishi ohashi ningwa kAakriste ye vulike kuyo. Sho ya pulwapulwa, ehokololoningomwa limwe natango miikundaneki otali ti kutya “oopersenda 40 lwaampono dhAayamerika noopersenda 20 dhAakanada odha ti kutya ohadhi yi aluhe kongeleka.” Mepingathano naashono, mboka haya yi kongeleka muFilipine otaku tiwa oye li konyala oopersenda 70, nosho wo shi li ngawo miilongo yilwe mbyoka opo tayi putuka.
Oshinima shoka shi shi nokuli okundhindhilikwa, osho kutya mboka haya yi kongeleka ketatangonga lyokOlukadhi oye hole unene omikalondjigilile ye vulithe mboka yoketatangonga lyokOlundume. Pashiholelwa, uuna Aakatoolika yomIilongohangano noyomuEuropa taya pulwapulwa, olundji ohayu ulike kutya inayi inekela moonkondopangelo dhaakwambepo nohaya ti kutya aanangeleka oye na okukala ye na ombinga onene mongeleka nonokutya aakiintu oye na okukala ye thike pamwe naalumentu. Mepingathano naashono, Aakatoolika oyendji noonkondo yoketatangonga lyokOlukadhi oya taamba ko shoka ongeleka ya kala tayi popi shi na ko nasha noompata ndhika. Molwaashoka eambidhidho lyokwaambidhidha ongeleka ndyoka nale olya li hali zi kolundume ihe ngashingeyi otali zi unene tuu kolukadhi, otashi ulike nale kutya otapu ka kala eipumomumwe monakuyiwa. Philip Jenkins, omulongwantu gwondjokonona nogwelongelokalunga, ota tengeneke ta ti: “Otashi vulika lela ku tiwe kutya konima yoomvula 10 nenge 20 Aakriste yokomatatangonga agehe gaali itaya ka talathana ko we ye li Aakriste yashili.”
Mokutala komalunduluko ngaka, Walls ota ti kutya epulo lye endelela olyo kutya “Aakriste Aayafrika, Aayasia, Aayamerika shaLatina, Aayamerika yokOlundume nAaeuropa otaya vulu ngiini okukala pamwe mongeleka yimwe, ye na shili eitaalo limwe alike”? Oto dhiladhila ngiini? Oongeleka mbela otadhi vulu ngaa okuhupa muuyuni mbuno wa topauka? Oshike osho ekankameno lyuukumwe washili wUukriste? Oshitopolwa tashi landula otashi ka gandja omayamukulo gopamanyolo nosho wo omauliko ga yela kutya uulipamwe wUukriste wa hangana ou li nale tau humu komeho nawa muuyuni auhe.
[Ethano pepandja 4]
Ongeleka ndjoka yonale ngashingeyi oyi li orestolanda moka hamu dhanenwa omusika
[Edhina lyomuthaneki]
AP Photo/Nancy Palmieri