Elongelokalunga lini u na okuhogolola?
‘OMALONGELOKALUNGA ga yoolokathana ogo owala oondjila dha yoolokathana dhu uka kelalakano limwe alike. Dhoshili, oku na owala Kalunga gumwe awike, hasho mbela?’ Edhiladhilo ndyoka ohali popiwa kaantu oyendji mboka taya dhiladhila kutya nonando eendathano lyopalongelokalunga olya simana, itashi ti sha lela kutya elongelokalunga lini omuntu ta hogolola okulandula.
Mokutala neendelelo ketompelo ndika, otashi vulika li monike lya fa li shi okwiitaalwa, molwaashoka oshoshili kutya oku na owala Kalunga gumwe awike, Omunankondoadhihe. (Jesaja 44:6; Johannes 17:3; 1 Aakorinto 8:5, 6) Ihe itatu vulu okwiipwililika omayoolokathano gi iwetikile—nokuli nomakondjithathano—mokati koongundu odhindji dhopalongelokalunga ndhoka tadhi ti kutya otadhi longele Kalunga kashili. Odha yoolokathana noonkondo miilonga yadho, mwaashoka dhi itaala, momalongo gadho nomiitegelelwa yadho. Omayoolokathano omanene noonkondo onkene mboka yomelongelokalunga limwe nenge yomongundu yimwe otaya mono shi li oshidhigu okuuva ko nenge okutaamba ko shoka yalwe taya longo aantu nenge shoka yi itaala.
Mepingathano naashoka, Jesus okwa ti: “Kalunga oye Ombepo; naamboka taye mu galikana, oyo ye na okugalikana mombepo nomoshili.” (Johannes 4:24) Mbela okugalikana Kalunga moshili otashi ti kutya otapu vulu okukala omadhiladhilo ogendji taga kondjithathana kombinga yokutya Kalunga oye lye, elalakano lye kutya olini nonkene a hala tu mu longele? Oshi li mbela pandunge okwiitaala kutya Kalunga Omunankondoadhihe ke na ko nasha nomukalo moka tatu mu longele?
Aakriste yashili nale nongashingeyi
Aakriste yomethelemumvo lyotango omathimbo gamwe oya li ye na omadhiladhilo ga yoolokathana kombinga yiinima. Pashiholelwa, omuyapostoli Paulus okwa popi naamboka yomuKorinto a ti: “Onde mú kundanene, aamwameme, mwaamboka yaandjaKloe, one mu na oontamanana mokati keni. Otandi popi ndhoka tadhi popiwa kukehe tuu gwomune, gumwe sho ta ti: Ongame gwaPaulus, nomukwawo: Ongame gwaApollos, nenge: Ongame gwaKefas, niishewe: Ongame gwaKristus.”—1 Aakorinto 1:11, 12.
Mbela Paulus omayoolokathano ngaka okwa li e ga tala ko itaaga ti sha unene? Mbela handimwe kehe okwa li owala a landula ondjila ye yokufala kehupitho? Hasho nando! Paulus okwe ya kumagidha a ti: “Otandi mu kumagidha, aamwatate, omolwedhina lyOmuwa gwetu Jesus Kristus, amuhe mu popye shimwe, ne mwaa kale mu na iimpaga mokati keni, ihe mu kale mu uvathana, mwa tsu oondunge dhimwe nokudhiladhila kumwe.”—1 Aakorinto 1:10.
Dhoshili, uukumwe weitaalo itau vulu okukondjithilwa omuntu. Otau adhika owala uuna aantu taya konakona nuukeka iinima e taya thiki pehulithodhiladhilo limwe alike noku li taamba ko. Kungeyi, ekonakono lyopaumwene lyOohapu dhaKalunga nosho wo ehalo lyu uka okutula miilonga shoka to ilongo oyo oonkatu dha simanenena okunyanyukilwa uukumwe woludhi ndoka lwa popiwa kuPaulus. Mbela uukumwe wa tya ngaaka otau vulu ngaa okumonika? Ngaashi twa mona, Kalunga okwa li u ungaunga ethimbo ele noshigwana she shi li ongundu. Mbela nena oshi li ngaa tashi wapa okudhimbulula mo ongundu ndjoka?
Omauwanawa geendathano li li mondjila
Omupsalmi David nale okwa pulile ta ti: “Omuwa, olye ta pitikilwa okukala omuyenda metsali lyoye, olye okukala kondundu yoye ondjapuki?” Epulo ndyoka otali pendutha lela omadhiladhilo. David okwa gandja eyamukulo tali ti: “Oongoka omunamikalo naangoka ta ningi shoka shu uka noha popi dhoshili okomwenyo gwe.” (Epsalmi 15:1, 2) Okuuva ko nawa Ombimbeli otaku ka vulitha omuntu a mone mo elongelokalunga ndyoka hali tsakanitha iitegelelwa mbyoka yaKalunga. Opo nduno, mokweendathana nongundu ndjoka, omuntu ota ka nyanyukilwa uukumwe tau tungu pamwe naantu mboka haya longele Kalunga muukumwe nosho wo “mombepo nomoshili.”
Oonzapo dhaJehova odhu ulike kutya otashi wapa okwaadha uukumwe meitaalo nomiilonga nokuli nomuuyuni wonena mbuka kaamu na uukumwe. Mokati kawo omu na mboka ya li nale iilyo yomalongelokalunga ogendji ga yoolokathana noyomoongundu dhopamihoko odhindji. Oonzapo dhilwe nale odha li inaadhi itaala kutya Kalunga oko e li. Opu na natango dhilwe ndhoka inaadhi kala nokudhiladhila nokuli dha mana mo kombinga yelongelokalunga. Mokati komalongelokalunga, omaputuko nomaufilosofi ngoka ga yoolokathana omwa zi aantu mboka taya nyanyukilwa ngashingeyi uukumwe wopalongelokalunga mboka kaau mo nokuli muuyuni nena.
Ekankameno lyuukumwe wa tya ngaaka olyo Oohapu dhaKalunga, Ombimbeli. Dhoshili, Oonzapo dhaJehova odhi shi kutya dho itadhi vulu okulombwela yalwe shoka ye na okuninga. Ihe odha pandula uuthembahenda wokuladhipika yalwe yi ilonge sha mOmbimbeli opo ya kale ya kankamekela ehogololo lyawo li na ko nasha nokulongela Kalunga kekankameno ndyoka lya kola. Komukalo nguka, aantu oyendji otaya vulu okukutha ombinga momauwanawa ngoka taga zi mokulongela Kalunga “mombepo nomoshili.”
Nena opu na oshiponga oshinene shokuninga oshihakanwa shomanwethomo nomapukitho omawinayi. Osha simanenena okuhogolola eendathano lyoludhi ndoka lu li mondjila. Ombimbeli otayi ti kutya ‘ngoka te endathana nomunandunge oti indungike oondunge’ nonokutya “ookuume aawinayi otaa yonagula omikalo omiwanawa.” (Omayeletumbulo 13:20; 1 Aakorinto 15:33) Okweendathana naalongeli Kalunga yashili oku li egameno. Onkee ano Ombimbeli otayi tu dhimbulukitha tayi ti: “Tu tonatelathaneni, tu kumidhathaneni okuhola nokulonga iilonga iiwanawa, twaa [ethe po okugongala pamwe, OB-1986] ngashika yamwe haa ningi, aawe, tu kumagidhathaneni, nuunene sho tamu mono esiku ndyoka tali hedha ko.” (Aaheberi 10:24, 25) Kashi li tuu elaleko nuuyamba uuna ookuume kashili, aamwatate naamwameme yopambepo, taya watelathana pahole okugwanitha po iinakugwanithwa yawo kuKalunga!
Ottmar ota koleke etaloko ndika. Nonando okwa tekulwa muukwanegumbo Uukatoolika muNdowishi, okwe etha okuya kongeleka. Ota yelitha ta ti: “Shampa nda yi kongeleka, ohandi zi ko ndi uvite ndi li owala ngaashi nda yile ko.” Nonando ongaaka, ine etha po eitaalo lye muKalunga. Opo nduno okwa ningi ekwatathano nOonzapo dhaJehova nodhe mu tompo e ti itaale kutya dho odhi li aapiya yashili yaKalunga. Okwa mono sha pumbiwa okweendathana nadho. Ngashingeyi ota ti: “Otandi nyanyukilwa ombili yopamadhiladhilo noyokomutima sho ndi li ndi ipyakidhila mehangano lyomuuyuni auhe. Otandi kwathelwa kashona nakashona okumona ontseyo yashili oyindji yokutseya Ombimbeli. Shika osho oshinima shi na ongushu onene kungame paumwene.”
Ehiyo kwaamboka taya kongo oshili
Aantu mboka taya longo ye li metsokumwe ye li ongundu otaya vulu okulonga oshilonga nomupondo ye vule aantu mboka taya longo kehe gumwe polwe. Pashiholelwa, omalombwelo gaJesus sho a li ta topoka naalanduli ye oga li: “Indeni ano, ka ningeni aantu ayehe aalongwa yandje noku ya [ninginithila, NW] medhina lyaTate nolyOmwana nolyOmbepo Ondjapuki, noku ya longa okudhiginina ayihe mbika nde yi mú lombwele.” (Mateus 28:19, 20) Oshilonga shoka mbela ando osha longwa ngiini nawa ando kapwa li ewiliko nenge ehangano? Mbela ando omuntu okwa li ta vulu ngiini okuvulika kelombwelo ndyoka lyopamanyolo ando okwa kambadhalele okulongela Kalunga e li kuye mwene?
Omvula ya zi ko, Oonzapo dhaJehova muuyuni auhe odha gandjele omambo, uumbo uushona nuubroshure wa kankamena kOmbimbeli u thike po 91 933 280, kwa gwedhwa iifo 697 603 247, nokungawo odha thiki kaantu ye thike pomamiliyona omathele miilongo 235 netumwalaka lyOohapu dhaKalunga. Ndika kali shi tuu shili euliko lya tongomana kutya oonkambadhala dhongundu ya hangana noyu unganekwa nawa ohadhi tompoka inaashi monika nando onale dhi vule kokule oonkambadhala inaadhi ambidhidhwa dhopauhandimwe!
Kakele ketaandeleko lyiileshomwa yOmbimbeli, Oonzapo dhaJehova ohadhi gandja ekonakonombimbeli oshali okukwathela aantu ya mone euvoko lyomuule lyaashoka Kalunga ta pula. Omumvogu, uupokati womakonakonombimbeli ga tya ngaaka u thike po 5 726 509 owa li wa ningwa oshiwike kehe noohandimwe nenge nongundu. Elongo lyOmbimbeli ndyoka olya kwathele aantu omamiliyona ya mone ekankameno lya kola lyokuninga omatokolo gawo miinima yi na ko nasha nokulongela Kalunga. Oto hiywa u ilonge iitegelelwa yaKalunga ngaashi ya nyolwa mOmbimbeli. Opo nduno oto vulu okuninga ehogololo lyoye.—Aaefeso 4:13; Aafilippi 1:9; 1 Timoteus 6:20; 2 Petrus 3:18.
Ngele owa hala u hokiwe kuKalunga, eendathano lyopalongelokalunga olya simanenena—ihe hanongundu owala kehe yopalongelokalunga. Owa pumbwa okukankamekela ehogololo lyoye okuhogolola elongelokalunga kontseyo yashili yOmbimbeli, hakomalongo gowala nenge kwaashoka wa lombwelwa kuyalwe. (Omayeletumbulo 16:25) Ilonga iitegelelwa yelongelokalunga lyashili. Yi yelekanitha naashoka wi itaala. Opo nduno hogolola shi ikolelela kuyo.—Deuteronomium 30:19.
[Omathano pepandja 7]
Oonzapo dhaJehova ohadhi nyanyukilwa uukumwe muuyuni moka kaamu na uukumwe