Ou na mbela okukala u li mongeleka yontumba?
‘INANDI pumbwa okukala ndi li mongeleka yontumba nenge handi yi kongeleka aluhe opo ando ndi kale ndi itaala Kalunga!’ Aantu oyendji osho taya dhiladhila ngaaka shi na ko nasha nokukala oshilyo shongeleka nenge shehanganongeleka lyontumba. Dhoshili, yamwe otaya ti kutya ohaya kala ye uvite ye li popepi lela naKalunga uuna ye li pondje taya nyanyukilwa uunshitwe shi vulithe uuna ye li pelongelokalunga mongeleka. Nena, oshi li edhiladhilo li li apuhe kutya eendathano nongundu nenge ehangano lyopalongelokalunga kashi shi oshitegelelwa shokwiitaala muKalunga.
Ihe yalwe hasho nando taya dhiladhila ngawo. Otaya ti kutya okukala oshilyo shongeleka nokukala ho yi ko okwa pumbiwa, nokwa simanenena nokuli, ngele omuntu owa hala okukala wa hokiwa kuKalunga. Onkee ano epulo ngele eendathano lyopalongelokalunga olya pumbiwa ngaa shili olyo oshinima sha simana shili kukehe omuntu, kali shi owala li na ko nasha nokutseya omiyalu dhaamboka haya gongala nosho wo iinima yilwe. Kutya nduno oshike, molwaashoka ekwatathano lyetu naKalunga olya kwatelwa mo, itashi ka kala mbela shi li pandunge okumona kutya Kalunga oshinima shono ohe shi tala ko ngiini? Oshike ano tatu vulu okwiilonga mOohapu dhe, Ombimbeli, shi na ko nasha noshinima shika?
Nkene Kalunga u ungaunga naantu yonale
Oomvula 4 400 lwaampono dha piti, oshiponga oshinene sheyelu osha li sha dhenge evi alihe. Oshiningwanima sha tya ngaaka itashi vulu okudhimbiwa nuupu, naantu muuyuni auhe oye li hokolola mondjokonona yawo yonale. Nonando omahokololo kombinga yeyelu oga yoolokathana, omahokololo ngoka otaga tsu kumwe noonkondo, molwaashoka omwa kwatela oshili kutya aantu owala aashona niinamwenyo yimwe ya li ya hupile mo.
Mbela mboka ya hupu mEyelu oya li owala oohandimwe mboka yi ihaluka owala ya hupa meyelu? Ehokololo lyOmbimbeli otali ulike kutya hasho sha li ngawo. Oshi li oshindhindhilikwedhi kutya Kalunga ina tseyithila omuntu kehe polwe kombinga yEyelu ndyoka lya li tali ke ya. Pehala lyaashono, okwa lombwele Noa, ngoka a li wo a londodha mboka ya li ko pethimbo limwe naye kombinga yEyelu ndyoka lya li pokuya.—Genesis 6:13-16; 2 Petrus 2:5.
Okuhupa okwa li kwi ikolelela kokukala oshitopolwa shongundu ndjoka yi na ekwatathano lyopothingo mokati kayo noyi na ehalo okutaamba ko omalombwelo gaKalunga ngoka ga pewa Noa. Nokuli niinamwenyo monguluwato mbyoka ya hupu mEyelu oya hupu molweendathano lyayo nongundu ndjoka. Noa okwa pewa omalombwelo gokondandalunde a ninge omalongekidho tago opalele opo iinamwenyo yi hupe.—Genesis 6:17–7:8.
Konima yomathelemimvo, oluvalo lwaNoa okupitila momwanamati Sem olwa ningi aapika muEgipiti. Ihe Kalunga okwa li e na elalakano oku ya mangulula noku ya fala koshilongo shoka u uvanekela hekulu yawo Abraham. Natango, shika kasha li sha hololelwa kehe gumwe polwe ihe osha li tango sha hololelwa mboka ya hogololwa ya kale aawiliki yawo—Moses nomumwayinamati, Aaron. (Eksodus 3:7-10; 4:27-31) Konima sho mboka ya li nale aapika ya mangululwa muupika waEgipiti ye li ongundu, oya li ya pewa Ompango yaKalunga kondundu Sinai e taya ningi oshigwana shaIsrael.—Eksodus 19:1-6.
Okuhupa okwa li taku vulika kAaisrael pauhandimwe molwaashoka owala ya li ye na ekwatathano nongundu ndjoka ya tulwa po kuKalunga nokulandula ewiliko lyaawiliki yongundu ndjoka mboka ya tulwa po. Omalongekidho oga li nokuli ga ningilwa handimwe kehe Omuegipiti a kale te endathana nongundu ndjoka sha yela kutya oya hokiwa kuKalunga. Sho Aaisrael ya zi muEgipiti, oohandimwe mboka oya yi pamwe nayo, nokungeyi oya kala ye na etegameno lyokulalekwa nuuyamba kuKalunga.—Eksodus 12:37, 38.
Opo nduno methelemumvo lyotango, Jesus okwa tameke iilonga ye yokuuvitha nokugongela aantu ya ninge aalongwa ye. Okwe endathana nayo ye li ongundu, nonando okwa li a gandja wo eitulomo lyopahole koohandimwe shi ikolelela koompumbwe dhawo. Jesus okwa lombwele aayapostoli 11 aadhiginini, a ti: “One tuu mbaka mwa kala pungame momamakelo gandje, ngame notandi mú uthile ongaashi Tate oku uthila ndje oshilongo.” (Lukas 22:28, 29) Konima yethimbo aalongwa oya tililwa ombepo ondjapuki yaKalunga sho ya li ya gongala pamwe ye li ongundu.—Iilonga 2:1-4.
Iiholelwa mbyoka otayi ulike sha yela kutya nale Kalunga okwa li u ungaunga aluhe noshigwana she shi li ongundu yu unganekwa. Oohandimwe aashona lela mboka Kalunga a li e endathana nayo paumwene—Noa, Moses, Jesus nayalwe—oya li ya longithwa shili kuYe okupopya nongundu ndjoka ya li yi na ekwatathano lyopothingo mokati kayo. Kapu na etompelo okwiitaala kutya Kalunga oha longitha omikalo dha yoolokathana mokweendathana naapiya ye nena. Dhoshili, shika otashi pendutha epulo lilwe tali ti: Mbela osha gwana okweendathana owala nongundu yelongelokalunga kehe? Epulo ndika lya simanenena otatu ke li kundathana moshitopolwa tashi landula.
[Ethano pepandja 4]
Kalunga okwa kala nokuungaunga noshigwana she shi li ongundu yu unganekwa