Jesus Kristus oku na okudhimbulukiwa ngiini?

Jesus Kristus “okwa li shili gumwe gwomaanenentu mboka ya li ko nale.”—“The World Book Encyclopedia.”

AANENENTU olundji ohaya dhimbulukiwa molwaashoka ya longa. Ano mbela omolwashike oyendji haya dhimbulukwa Jesus omolwokuvalwa kwe pehala lyiilonga ye? MUukwakriste auhe, aantu oyendji otaya vulu okuhokolola iiningwanima mbyoka ya ningwa pethimbo lyokuvalwa kwe. Mbela yangapi haya dhimbulukwa nohaya kambadhala okutula miilonga elongo lye dhingi ndyoka tali adhika mEuvitho lyokOndundu?

Dhoshili, okuvalwa kwaJesus okwa li okundhindhilikwedhi, ihe aalongwa ye yonale oya li ye wete kutya shoka a ningi naashoka a longo aantu osha li lela sha simana. Odhoshili kutya Kalunga ka li nando a hala okuvalwa kwaKristus ku kale kwa simana ku vule onkalamwenyo ye e li omuntu omukuluntu. Ihe molwashoka Okrismesa oyu udha oongano dhi na ko nasha nokuvalwa kwaKristus, oye shi pondola okuningitha aantu kaaya dhimbulule Kristus e li omuntu.

Epulo lilwe epiyaganeki ohali vulu okupulwa shi na ko nasha nomukalo gwokudhana Okrismesa. Ando Jesus oku galukile kombanda yevi nena, mbela ota ka dhiladhila ngiini shi na ko nasha nokungeshefa okunene pOkrismesa? Oomvula omayuvi gaali dha piti, Jesus okwa talele po otempeli muJerusalem. Okwa li a geyithwa kaalandakanithi yiimaliwa naalandithi mboka ya li taya longitha oshituthi shopalongelokalunga shOshijuda mokumona mo iimaliwa. Okwa ti: “Tuteni mo mbino. Ongulu yaTate inamu yi ninga oshilandelo.” (Johannes 2:13-16) Osha yela kutya Jesus ka li a hokwa engeshefo lya vundakanithwa mumwe nelongelokalunga.

Aakatoolika oyendji Aaspania oyi ipula shi na ko nasha nonkalo tayi indjipala yokungeshefa pOkrismesa. Ihe egamo lya tya ngaaka lyokungeshefa otashi vulika ihaali vulu okuyandwa, mokutala koonzo dhomikalo odhindji ndhoka hadhi longithwa pOkrismesa. Omunyoliifo Juan Arias ota ti: “Mboka ye li mUukriste notaya gandja uusama komukalo ngoka Okrismesa ya ningwa ‘pashipagani’ noya ninga unene oshinima shoka shi igandja unene kokwiinyanyudha nokokulanditha pehala lyokwiigandja kelongelokalunga, kaye shi kutya etameko lyokudhana okuvalwa kwaJesus . . . olya li nale lya kwatela mo omaukwatya ogendji goshituthi shoshipagani shAaroma [shetango].”—El País, 24 Desemba, 2001.

Moomvula opo dha zi ko, aanyoliifo oyendji Aaspania nooensiklopedia odhe shi popi kutya omadhano gOkrismesa oga za maapagani nosho wo kutya ogu udha okungeshefa. Shi na ko nasha nesiku lyokudhana Okrismesa, OEnciclopedia de la Religión Católica otayi popi sha yela tayi ti: “Osha yela kutya etompelo kutya molwashike Ongeleka yaRoma ya tokola okulongitha esiku ndyoka olyo li dhanwe oshituthi shoka [shOkrismesa], otashi vulika olyo molwashoka oya li ye hole okupingena po iituthi yoshipagani naambyono yopaKriste. . . . Otu shi kutya muRoma ethimbo ndyoka, aapagani oya li ya yapula 25 Desemba omo haya dhana natalis invicti, evalo ‘lyetango ihaali sindwa nando kusha.’”

OEnciclopedia Hispánica nayo otayi popi sha faathana tayi ti: “Esiku 25 Desemba lyokudhana Okrismesa inali kankamena keyalulo li li mondjila lyolelalela lyesiku lyevalo [lyaJesus], ihe pehala lyaashono olya kankamena kokuninga iituthi yopokufu ya dhanwa muRoma yi kale yopaKriste.” Mbela Aaroma oya li ya dhana ngiini epito lyetango pethimbo lyokufu? Omokudhana oshituthi, mokunwa nokulya sha pitilila nokupaathana omagano. Molwashoka aawiliki yongeleka oya li inaaya hala okuhulitha po okudhana oshituthi sha tya ngaaka shi holike apuhe, oye shi “ningi shi kale shopaKriste” moku shi ithana okuvalwa kwaJesus pehala lyokuvalwa kwetango.

Petameko, methelemimvo etine netitano, ohole yokuhola okugalikana etango nomikalondjigilile dhalyo kaya li ya hulithwa po nuupu. “Omuyapuki” gwaKatoolika Augustine (354-430 E.N.) okwa li e wete kutya oku na okukumagidha ooitaali ooyakwawo kaaya dhane 25 Desemba ngaashi aapagani ya li ya ningi mokusimaneka etango. Nokuli nena, omikalondjigilile ndhoka dha za miituthi yonale yOshiroma otadhi dhana onkandangala onene noonkondo.

Oshituthi shokwiinyanyudha noshokungeshefa

Muule womathelemimvo, iinima oyindji oya li ya dhana onkandangala ya simanenena mokuninga Okrismesa oshituthi shopaigwana shi holike noonkondo omolwokwiinyanyudha nokungeshefa. Niishewe, omikalondjigilile dhiituthi yilwe yopokufu, unene tuu mbyoka hayi dhanwa molundume lwaEuropa, odha li dha tameke okulandulwa kashona nakashona muRoma.a Nomethelemimvo eti-20, aalandithi noonkulungu mokungeshefa oya humitha komeho omukalondjigilile kehe ngoka tagu vulu oku ya likolitha iimaliwa oyindji.

Mbela oshizemo osha li shike? Okudhana okuvalwa kwaKristus pehala lyaashoka taku ti, okwa ningi oshinima sha simana. Miinima oyindji, nokuli okupopya Kristus okwa kana mo momikalo dhokudhana Okrismesa. Oshifokundaneki shaSpania El País otashi ti: “[Okrismesa] oyo oshituthi shuuyuni, hashi dhanwa komaukwanegumbo, nakehe gumwe ohe yi dhana komukalo ngoka a hala.”

Etyokosha ndyoka otali ulike iikala tayi koko moSpania nomiilongo yilwe oyindji muuyuni auhe. Nonando Okrismesa ohayi dhanwa sha pitilila, ontseyo yokutseya Kristus oya shonopala. Muushili wo wene, iituthi yOkrismesa oya shuna unene kwaashoka ya li yi li pethimbo lyaRoma petameko—okunwa nokulya sha pitilila, okudhana oshituthi nokupaathana omagano.

Okanona ke tu valelwa

Ngele Okrismesa kayi na lela ekwatathano naKristus, mbela Aakriste yashili oye na okudhimbulukwa ngiini okuvalwa nonkalamwenyo yaKristus? Omathelemimvo gaheyali manga Jesus inaa valwa, Jesaja okwa hunganeke kombinga ye ta ti: “Otse twa valelwa okanona, twa pewa omumati, nelelo, te li pewa, ku li na komapepe ge.” (Jesaja 9:5) Omolwashike Jesaja u ulike kutya okuvalwa kwaJesus nonkandangala ndjoka ta ka dhana konima yakwo otayi kala yi na eityo lya simana? Omolwashoka Jesus okwa li ta ka ninga omupangeli omunankondo. Okwa li te ki ithanwa Omukwaniilwa gwombili, nombili ndjoka nosho wo elelo lye kaya li tayi ka hula po. Kakele kaashono, elelo lyaJesus olya li tali dhikwa “keutho nokuuyuuki.”—Jesaja 9:6.

Omuyengeli Gabriel okwe endulula oohapu dhaJesaja tadhi tseyithile Maria kutya Jesus oku li pokuvalwa. Okwa hunganeke ta ti: “Oye ta kala omunene, ye e nokwiithanwa Omuna gwOkombandambanda, Omuwa Kalunga note mu pe oshipundi shuukwaniilwa wahe David, ota ningi omukwaniilwa gwegumbo lyaJakob sigo aluhe, nuukwaniilwa we kau na mpoka tau hulu po.” (Lukas 1:32, 33) Osha yela kutya eityo lya simana lyokuvalwa kwaJesus oli na ko nasha niilonga mbyoka Kristus a li ta ka longa e li Omukwaniilwa a langekwa po gUukwaniilwa waKalunga. Okupangela kwaKristus otaku vulu okweetela ayehe uuwanawa, mwa kwatelwa ngoye naaholike yoye. Dhoshili, aayengeli oya ti kutya okuvalwa kwe okwa li taku ke eta ‘ombili kombanda yevi maantu [Kalunga] e ya hokwa.’—Lukas 2:14.

Mbela olye inaa hala okukala muuyuni wombili nowuuyuuki? Ihe opo tu nyanyukilwe ombili ndjoka elelo lyaKristus tali ke eta, otwa pumbwa okunyanyudha Kalunga nokukala tu na ekwatathano ewanawa naye. Jesus okwa ti kutya onkatu yotango yokukala nekwatathano lya tya ngaaka oyo okwiilonga kombinga yaKalunga naKristus. Jesus okwa ti: “Nomwenyo gwaaluhe ogwo tuu nguka, oyo ye ku tseye, ongoye Kalunga awike gwashili, naanguka we mu tuma, Jesus Kristus.”—Johannes 17:3.

Ngele otu shi Jesus nawa, inatu pumbwa we okwiipula nkene a hala tu mu dhimbulukwe. Mbela omokulya, okunwa nokupaathana omagano mesiku omo tuu moka aapagani yonale ya li ya dhana oshituthi shawo? Hasho nando. Ongulohi manga Jesus inaa sa, okwa lombwelele aalongwa ye shoka a hala shi ningwe. “Oongoka e na iipango yandje note yi dhiginine, oye tuu ngoka e hole ndje; ihe oongoka e hole ndje, oye e holike kuTate, nangame wo ndi mu hole.”—Johannes 14:21.

Oonzapo dhaJehova odha ningi ekonakono lyomuule lyOmanyolo Omayapuki, ngoka ge dhi kwathele dhi uve ko kutya iipango yaKalunga naJesus oyini. Otadhi ka kala dha nyanyukwa oku ku kwathela u uve ko nawa iipango mbyoka ya simanenena opo u vule okudhimbulukwa Jesus ngaashi e na okudhimbulukiwa.

[Enyolo lyopevi]

[Oshimpungu/Omathano pepandja 6, 7]

Ombimbeli otayi indike mbela okudhana iituthi nokugandja omagano?

Okugandja omagano

Ombimbeli otayi popile okugandja omagano, oshoka Jehova oti ithanwa Omugandji ‘gwoshipewa kehe oshiwanawa nomagano ga gwana.’ (Jakob 1:17) Jesus oku ulike kutya aavali ye li nawa ohaya gandja omagano kaanona yawo. (Lukas 11:11-13) Ookuume kaJob niilyo yuukwanegumbo we oye mu pele omagano sho a aluka. (Job 42:11) Ihe okugandja kwa tya ngaaka kakwa li kwa pula okudhanwa momasiku gi ikalekelwa. Okwa li kwa zi komutima.—2 Aakorinto 9:7.

Okutalelathana po kuukwanegumbo

Okutalelathana po kuukwanegumbo otaku vulu okuninga oshindji okuhanganitha iilyo yuukwanegumbo, unene tuu ngele inayi kala we megumbo limwe. Jesus naalongwa ye oya li pohango muKaana, nokapu na omalimbililo, opwa li ongundu onene yaakwanegumbo nookuume. (Johannes 2:1-10) Meudhi lyaJesus lyomumati a kanene, he okwa li a ningi oshituthi shokugaluka kwomwanamati okulya iikulya iitoye pamwe nuukwanegumbo, shoka sha kwatela mo omusika nokundanisa.—Lukas 15:21-25.

Okunyanyukilwa okulya iikulya iiwanawa

Ombimbeli otayi popi olundji kombinga yaapiya yaKalunga mboka ya nyanyukilwa iikulya iiwanawa pamwe nuukwanegumbo, ookuume, nenge aalongelikalunga ooyakwawo. Sho aayengeli yatatu ya li ya talele po Abraham, okwa li e ya longekidhile oshituthi shoka sha kwatela mo onyama yongombe, omahini niikwiila. (Genesis 18:6-8) Salomo okwa hokolola kutya ‘okulya, okunwa nokunyanyukwa’ oyo omagano ga za kuKalunga.—Omuuvithi 3:13; 8:15.

Osha yela kutya Kalunga okwa hala tu nyanyukilwe iikulya iiwanawa mokukala pamwe nookuume nosho wo nuukwanegumbo, nokwa hokwa okugandja omagano. Otu na oompito odhindji oku shi ninga ethimbo kehe momumvo aguhe.