Henuka elongelokalunga loipupulu!
“Djeni mo mokati kavo nye mu liyoolole mo muvo, Omwene osho [ta] ti, nye inamu kuma eshi sha nyata.” — 2 OVAKORINTO 6:17.
1. Ovanamitima diwa vahapu ove li monghalo yopamhepo ya tya ngahelipi?
OVANAMITIMA diwa vahapu kave shii oshili kombinga yaKalunga nosho yo yonakwiiwa younhu. Molwaashi kave na omanyamukulo komalipulo avo e na sha noinima yomoule yopamhepo, ove li mengwangwano nomomalimbililo. Ovanhu omamiliyona ova pikwa koidila, keenghulunghedi dopamalongelokalunga nosho yo komadano omafiku oo itaa hafifa Omushiti wetu. Otashi dulika u na ovashiinda ile ovapambele ovo va itavela momundilo woheli, Oukwatatu, omwenyo ihau fi ile momahongo amwe oipupulu e lili noku lili.
2. Ovawiliki vomalongelokalunga ova ninga shike, nosha etifa oidjemo ya tya ngahelipi?
2 Oshike sha etifa omilaulu dopamhepo da tya ngaho, odo di li apeshe mounyuni? Shikumwifi, omilaulu odo oda etifwa komalongelokalunga, unene tuu omahangano opamalongelokalunga nosho yo ovawiliki vao ovo va xumifa komesho omahongo oo itaa tu kumwe nokudiladila kwaKalunga. (Markus 7:7, 8) Oshidjemo, ovanhu vahapu ova pukifwa va itavele kutya otava longele Kalunga kashili, ndele paulelalela otava longo oilonga oyo itai mu hafifa. Omalongelokalunga oipupulu oo a etifa filufilu onghalo oyo inyikifa oluhodi.
3. Olyelye e li omuxwaxwameki munenenene welongelokalunga loipupulu, nOmbibeli otai mu hokolola ngahelipi?
3 Ope na oshishitwa shopamhepo ihashi monika osho tashi xwaxwameke elongelokalunga loipupulu. Omuyapostoli Paulus okwa popya kombinga yasho a ti: “Muava ve he neitavelo, eendunge davo da twikifwa kukalunga kefimbo lounyuni eli, vo itava minikilwa kouyelele wevangeli loshinge shaKristus, Oye ou efano laKalunga.” (2 Ovakorinto 4:4) Satana Ondiaboli oye ‘kalunga kounyuni ou,’ oo ta twikifa ovanhu. Oye omuxwaxwameki munenenene welongelokalunga loipupulu. Paulus okwa shanga natango a ti: “[Satana] mwene ote lifefa omwengeli wouyelele. Kashi fi hano oshinima shinene, ngenge ovapiya vaye tave liningi ovayakuli vouyuki.” (2 Ovakorinto 11:14, 15) Satana oha ningifa oinima oyo ii i kale tai monika ya fa iwa, nokungaha, oha pukifa ovanhu va itavele oipupulu.
4. Omhango yaKalunga oyo ya li ya pewa Israel shonale oya popya shike shi na sha novaprofeti ovanaipupulu?
4 Onghee hano, itashi kumwifa eshi Ombibeli ya tokola filufilu elongelokalunga loipupulu. Pashihopaenenwa, Omhango yaMoses oya li ya londwela kondadalunde oshiwana shaKalunga, Israel, shi na sha novaprofeti ovanaipupulu. Keshe tuu oo a li ta xumifa komesho omahongo oipupulu nosho yo elongelo loikalunga okwa li e na ‘okudipawa omolwokuudifa eliteeko kOmwene Kalunga.’ Ovaisrael ova li va lombwelwa va ‘dime mo owii mokati kavo.’ (Deuteronomion 13:1-5) Doshili, Jehova okwa li a tala ko elongelokalunga loipupulu li li oshinima shii. — Hesekiel 13:3.
5. Omalondwelo elipi tu na okupwilikina kuo kunena?
5 Jesus Kristus novayapostoli vaye navo ova li va tala ko elongelokalunga loipupulu ngaashi Jehova e li tala ko. Jesus okwa li a londwela ovahongwa vaye a ti: “Lungameni ovaprofeti ovanaipupulu, ava have uya kunye moikafa yeedi, ndele meni lavo ovo omambungu haa [lyana].” (Mateus 7:15; Markus 13:22, 23) Paulus okwa shanga a ti: “Ehandu laKalunga tali holoka tali di meulu li hange ouhenakalunga aushe noukolokoshi wovanhu ava hava [uvike, OB-1986] oshili mouhenouyuki.” (Ovaroma 1:18) Onghee hano, osha fimanenena kOvakriste vashili okupwilikina komalondwelo oo nokuhenuka ovo hava uvike oshili yEendjovo daKalunga ile hava tandavelifa omahongo oipupulu. — 1 Johannes 4:1.
Djeni mo ‘muBabilon shinene’
6. “Babilon shinene” osha faafanifwa nashike mOmbibeli?
6 Natu konakoneni nghee embo lEhololo tali hokolola elongelokalunga loipupulu. Elongelokalunga loipupulu otali fanekwa li li ombwada ya kolwa oyo tai pangele omauhamba mahapu nosho yo oiwana yomomauhamba oo. Ombwada oyo yopafaneko ohai haele neehamba dihapu noya kolwa kohonde yovalongelikalunga vashili. (Ehololo 17:1, 2, 6, 18) Oya shangwa edina mombaba yoshipala shayo olo li li metwokumwe noilonga yayo ya nyata noitondifa. Edina layo olo: “Babilon shinene, ina yeembwada noyoixuna aishe yedu.” — Ehololo 17:5.
7, 8. Omalongelokalunga otaa haele meityo lilipi, naasho osha etifa oidjemo ya tya ngahelipi?
7 Babilon Shinene osho tashi hokololwa mOmishangwa otashi faneke omalongelokalunga oipupulu aeshe mounyuni. Nonande omalongelokalunga oipupulu omayovi kae fi lelalela ehangano limwe lomounyuni, oku na omalalakano a faafana nohaa longo oilonga ya faafana. Metwokumwe nefaneko olo li li mEhololo li na sha nombwada, omalongelokalunga oipupulu ohaa nwefa mo neenghono omapangelo opapolotika. Ngaashi naanaa omukainhu oo ta ifanwa Babilon Shinene a ninga ombwada omolwokuhakala omudiinini keano laye lohombo, omalongelokalunga okwa ya moluhaelo nomapangelo opapolotika e lili noku lili mokupanga oukaume nao. Omuhongwa Jakob okwa shanga a ti: “Ovanyoni vohombo nye, kamu shi shii hamba nokutya, oukaume wounyuni ou owo okutonda Kalunga? Hano ou a hala okukala kaume kounyuni, ota ningi omutondi waKalunga.” — Jakob 4:4.
8 Okulimbwanga mumwe kwomalongelokalunga nomapangelo opapolotika okwa etifa okumona oixuna kwovanhu kuhapu. Omukonakoni umwe woipambele yopapolotika muAfrika, Dr. Xolela Mangcu, okwa popya kutya “ondjokonona younyuni oi yadi oihopaenenwa yomadipao manene oo a etifwa kokulimbwanga mumwe kwomalongelokalunga novanapolotika.” Efimbo opo la di ko, oshifokundaneki shimwe osha ti: “Eenhamanana odo da kwata moiti noda etifa etileshi lohonde lihapu kunena . . . oda etifwa komalongelokalunga.” Ovanhu omamiliyona ova dipawa omolwomalipumomumwe oo a xwaxwamekwa komalongelokalunga. Babilon Shinene osha hepeka nokudipaa nokuli ovapiya vaKalunga, nomolwaasho taku tiwa osha kolwa kohonde yavo, oku shi popya pafaneko. — Ehololo 18:24.
9. Oushili oo kutya Jehova oku tonde omalongelokalunga oipupulu ou liwetikile ngahelipi mwaasho sha popiwa membo lEhololo?
9 Oushili oo kutya Jehova oku tonde omalongelokalunga oipupulu ou liwetikile nawa mwaasho tashi ka ningilwa Babilon Shinene. Ehololo 17:16 otali ti: “Neembinga odo omulongo we di mona, noshiliyani, ovo tava ka tonda ombwada ndee tave i dula, tai kala hamuhele ndee tava li ombelela yayo, ndee tave i xwike momundilo.” Tete, Babilon Shinene otashi ka ponokelwa koshilyani shinene ndele tashi mu dipaa nokulya po ombelela yasho. Konima yaasho, oinhimbu yolutu lasho oyo tai ka fyaala po otai ka xwikwa po filufilu. Metwokumwe nefaneko olo, mafiku omapangelo opapolotika omounyuni ou otaa ka katukila onghatu omalongelokalunga oipupulu. Kalunga ota ka unganeka oinima opo exunganeko olo li wanifwe. (Ehololo 17:17) Heeno, Babilon Shinene, ouhamba wounyuni womalongelokalunga oipupulu, otashi ka hanaunwa po, “ndele itashi [ka] monika vali nande.” — Ehololo 18:21.
10. Mbela otu na okutala ko ngahelipi omalongelokalunga oipupulu?
10 Mbela ovalongelikalunga vashili ove na okutala ko ngahelipi Babilon Shinene? Ombibeli oya yandja elombwelo la yela filufilu, ya ti: “Djeni mo musho, nye ovanhu vange, mu ha kwatafane noulunde washo, mu ha hangike komahepeko asho.” (Ehololo 18:4) Aveshe ovo va hala oku ka xupa eshi omalongelokalunga oipupulu taa ka hanaunwa po ove na okudja mo muo fimbo pepi. Eshi Jesus Kristus a li kombada yedu, okwa li a xunganeka kutya momafiku axuuninwa ovanhu vahapu otava ka kala tave liti kutya ove li ovashikuli vaye. (Mateus 24:3-5) Ndele ye ota ka tya kuvo: “Inandi mu shiiva nandenande; djeni po puame, onye ovakolokoshi!” (Mateus 7:23) Jesus Kristus, oo paife e li ohamba ya nangekwa po meulu, ina hokwa nandenande omalongelokalunga oipupulu.
Ongahelipi hatu dulu okuhenuka elongelokalunga loipupulu?
11. Oshike tu na okuninga opo tu henuke elongelokalunga loipupulu?
11 Ovakriste vashili ohava henuka elongelokalunga loipupulu mokuhatambula ko omahongo oipupulu. Osho osha hala kutya otu na okuhenuka okupwilikina keeprograma domalongelokalunga koradio noko-TV, nokatu na okulesha oileshomwa yomalongelokalunga oyo tai tandavelifa oipupulu kombinga yaKalunga nosho yo Eendjovo daye. (Epsalme 119:37) Otu na yo okuhenuka okukufa ombinga moivilo nomomalihafifo oo taa kwatelwa komesho komalongelokalunga oipupulu. Kakele kaasho, katu na nande okuyambidida elongelokalunga loipupulu monghedi yonhumba ile yongadi. (1 Ovakorinto 10:21) Mokuhenuka oinima oyo ya popiwa metetekelo, ohatu ka amenwa opo tuha ‘yulwe nounongo wovanhu nomapukifo ongaho, e likolelela keenghulunghedi nokomahovelohongo ounyuni, ndele hamuKristus.’ — Ovakolossi 2:8, yelekanifa NW.
12. Ongahelipi omunhu ta dulu okuxulifa po oukwashilyo waye melongelokalunga loipupulu?
12 Omunhu oo e li oshilyo shelongelokalunga loipupulu oku na okuninga po shike ngeenge okwa hala okuninga umwe womEendombwedi daJehova? Oku na okushangela elongelokalunga omo a kala e li oshilyo omukanda oo tau ulike kutya ina hala vali okukala oshilyo shalo. Omunhu a tya ngaho okwa pumbwa yo okuhenuka filufilu enwefemo keshe lopamhepo lelongelokalunga loipupulu. Elihumbato noikala yomunhu a tya ngaho oi na okukala i liwetikile kelongelokalunga omo a dja nokovanhu aveshe kutya ye ke fi vali oshilyo shelongelokalunga olo.
13. Ombibeli otai yandje omayele elipi e na sha nokuhenuka elongelokalunga loipupulu?
13 Omuyapostoli Paulus okwa shanga a ti: “Inamu humbata ondjoko imwe pamwe naava ve he neitavelo; osheshi ouyuki ou noukumwe washike nouhenouyuki? Ile ouyelele ou nekwatafano lashike nomulaulu? Ndele Kristus naBelial tava udafana ngahelipi? Ile omwiitaveli e noshitukulwa shashike naau e he fi omwiitaveli? Otembeli yaKalunga oi nekwatafano lashike noikalunga? . . . Onghee: Djeni mo mokati kavo nye mu liyoolole mo muvo, Omwene osho [ta] ti, nye inamu kuma eshi sha nyata.” (2 Ovakorinto 6:14-17) Ohatu dulika keendjovo odo mokuhenuka elongelokalunga loipupulu. Mbela omayele oo aPaulus okwa hala okutya otu na okuhenuka filufilu oilyo yomalongelokalunga oipupulu?
“Mokweendafana naava ve li pondje kaleni mu neendunge”
14. Mbela otu na okuhenuka filufilu ovanhu ovo ve li oilyo yomalongelokalunga oipupulu? Shi yelifa.
14 Mbela ovalongelikalunga vashili ove na okuhenuka filufilu ovanhu ovo ve li oilyo yomalongelokalunga oipupulu? Mbela otu na okukala tuhe na ko nasha novanhu ovo vehe fi veitavelo letu? Hasho nandenande. Oshipango oshitivali shomoipango ivali inenenene otashi ti: “Hola omukweni ngaashi ove u lihole mwene.” (Mateus 22:39) Ohatu ulike kutya otu hole vamwe shili moku va lombwela onghundana iwa yOuhamba. Ohatu ulikile yo ovanhu vakwetu ohole mokukonakona navo Ombibeli nosho yo moku va kwafela va mone kutya ova pumbwa okudja mo momalongelokalunga oipupulu.
15. Okukala ‘tuhe fi vomounyuni’ osha hala lela okutya ngahelipi?
15 Nonande ohatu udifile ovanhu vakwetu onghundana iwa, tu li ovashikuli vaJesus, ‘katu fi vomounyuni’ ou. (Johannes 15:19) Oshitya ‘ounyuni’ osho sha longifwa momushangwa oo otashi ulike koulikumwe wovanhu ovo va tukuka ko kuKalunga. (Ovaefeso 4:17-19; 1 Johannes 5:19) Otwa yooloka ko kounyuni, molwaashi ohatu henuka oikala, okupopya nosho yo elihumbato olo inali hokiwa kuJehova. (1 Johannes 2:15-17) Kakele kaasho, metwokumwe nefinamhango olo tali ti kutya “ookaume [vai] otava nyono po eenghedi diwa,” ohatu henuka okupanga oukaume wopofingo novanhu ovo ihava kala metwokumwe nomifikamhango dopaKriste. (1 Ovakorinto 15:33) Okuhakala oshitukulwa shounyuni otashi ti ‘okuhanyatekwa kounyuni.’ (Jakob 1:27) Onghee hano, okukala twa yooloka ko kounyuni itaku ti kutya otu na okuhenuka filufilu ovanhu vakwetu. — Johannes 17:15, 16; 1 Ovakorinto 5:9, 10.
16, 17. Ovakriste ove na okuungaunga ngahelipi novanhu ovo vehe shii oshili yOmbibeli?
16 Ngeenge osho shi li ngaho, otu na okuungaunga ngahelipi novanhu ovo vehe shii oshili yOmbibeli? Paulus okwa li a shangela eongalo lomuKolossi a ti: “Mokweendafana naava ve li pondje kaleni mu neendunge nokukoneka efimbo liwa. Eendjovo deni nadi kale alushe donghenda, da fingala omongwa, nye mu kale mu shi shii nhumbi mu nokunyamukula keshe umwe.” (Ovakolossi 4:5, 6) Omuyapostoli Petrus okwa shanga a ti: “Yapuleni Omwene Kristus momitima deni, nye mu hangike alushe mu shii kunyamukula keshe tuu ou te mu pula ekanghameno leteelelo eli li li munye, ndelenee shi ningeni [nombili nosho yo nefimaneko, OB-1986].” (1 Petrus 3:15, 16) Natango, Paulus okwa li a kumaida Ovakriste “va ha tuke nande omunhu, va ha patafane, ndele [va] kale nombili ve nonghenda novanhu aveshe.” — Titus 3:2.
17 Tu li Eendombwedi daJehova, ihatu ungaunga novanhu vakwetu noikala yonyanya ile youngame. Ihatu ula ovanhu vomomalongelokalunga amwe omalaka mai. Kutya nee omuneumbo, ile omushiinda shetu, ile omunailonga mukwetu oku tu ninge nai ile e tu tuke, ohatu ungaunga ashike naye nombili. — Ovakolossi 4:6; 2 Timoteus 2:24.
“Diinina oshihopaelelwa sheendjovo odo diwa”
18. Ovo hava efa po oshili yOmbibeli ndele tava shuna komalongelokalunga oipupulu ohava i monghalo yopamhepo ya nyika oshiponga ilipi?
18 Kashi nyikifa tuu oluhodi komunhu oo e shii oshili yOmbibeli okushuna vali kelongelokalunga loipupulu! Ombibeli oya hokolola oilanduliko inyikifa oluhodi yokukatuka onghatu ya tya ngaho, ya ti: “Nande ova [ya] onhapo eenyata dounyuni, mokukoneka Omwene nOmuxupifi Jesus Kristus, . . . otava yuulwa vali notava findwa kudo, hano oxuuninwa yavo oii i dule yotete. . . . Ndelenee vo ova ningwa ngaashi omayeletumbulo ashili taa ti: Ombwa otai alukile konghungo yayo, noshingulu sha koshwa otashi alangatele monhata.” — 2 Petrus 2:20-22.
19. Omolwashike sha fimanenena okuhaefa nande osha shi tule moshiponga oupamhepo wetu?
19 Otu na okulungama tuha efe nande osha shi tule oupamhepo wetu moshiponga. Eshongo la tya ngaho opo alushe li na okukala. Omuyapostoli Paulus okwa londwela a ti: “Omhepo otai popi eendjovo di uditike nawa nokutya, momafiku axuuninwa vamwe otave liteeka po eitavelo, ndee tava ka shikula eemhepo dipukifi nomalongo eendemoni.” (1 Timoteus 4:1) Otu li “momafiku axuuninwa” oo a popiwa momushangwa oo. Ovo itava henuka elongelokalunga loipupulu ove na oupu ‘okutelaanifwa nokufungaafungifwa keemhepo adishe delongo nokomanyanekelodanauko ovanhu nokomakonda omalungameno omapukifo.’ — Ovaefeso 4:13, 14.
20. Ongahelipi hatu dulu okuliamena kenwefemo lii lomalongelokalunga oipupulu?
20 Ongahelipi hatu dulu okuliamena kenwefemo lii lomalongelokalunga oipupulu? Diladila komafiloshisho aeshe oo Jehova e tu pa. Okwe tu pa Eendjovo daye, Ombibeli. (2 Timoteus 3:16, 17) Ohe tu pe yo eendja dopamhepo dihapu okupitila ‘momupiya omudiinini nomunaendunge.’ (Mateus 24:45) Eshi hatu ende hatu ningi exumokomesho moshili, mbela katu na okukulika ehalo lokulya ‘eendja da pama daavo va kula’ nosho yo lokukala pokwoongala opo hatu lihongo oshili yOmbibeli? (Ovaheberi 5:13, 14; Epsalme 26:8) Natu kaleni twa tokola toko okulongifa omafiloshisho aeshe oo Jehova he tu pe, opo tu dule ‘okudiinina oshihopaelelwa sheendjovo odo diwa’ odo twa uda. (2 Timoteus 1:13) Kungaha, opo ashike hatu ka henuka elongelokalunga loipupulu.
Owe lihonga shike?
• “Babilon shinene” oshike?
• Oshike tu na okuninga opo tu henuke elongelokalunga loipupulu?
• Oinima ilipi oyo tai dulu okunyona po oupamhepo wetu tu na okuhenuka?
[Efano pepandja 14]
Mbela ou shii kutya omolwashike “Babilon shinene” tashi fanekwa shi li ombwada?
[Efano pepandja 15]
“Babilon shinene” otashi ka hanaunwa po
[Efano pepandja 17]
Ohatu ungaunga naavo vehe fi veitavelo letu “nombili nosho yo nefimaneko”