Oto vulu okukala nomwenyo sigo aluhe

OOITAALI oyendjiyendji yomomalongelokalunga gomuuyuni oye na etegameno lyokukala nomwenyo sigo aluhe momukalo gwontumba. Nonando elongelokalunga kehe olyi itaala oshinima shimwe shi ili, agehe oge na etegameno limwe alike: okukala nomwenyo monkalo ombwanawa yu uvite elago kaapu na okutila eso. Mbela nangoye hasho wa hala? Mbela ongiini taku vulu okuyelithwa kutya omolwashike eitaalo ndyoka li li apuhe? Mbela etegameno lyokukala nomwenyo sigo aluhe onali ka monike ngaa?

Omanyolo otagu ulike kutya Omushiti okwa tula ehalo lyokukala nomwenyo sigo aluhe momadhiladhilo gaantu okuza ketameko lela, sho a shiti aantu yaali yotango. Ombiimbeli otayi ti: “[Kalunga] okwa tula uukwaaluhe moomwenyo dhaantu.”—Omuuvithi 3:11.

Ihe opo ehalo ndyoka lyokukala nomwenyo sigo aluhe li gwanithwe po, aantu yaali yotango oya li ye na okutaamba ko oonkondopangelo dhaKalunga dhokutokola shoka shi li mondjila naashoka sha puka. Ngele oye shi ningi, Jehova okwa li te ke ya tala ko ye li ya gwana okukala nomwenyo sigo aluhe mehala ndyoka a li e ya longekidhila, oshikunino shaEden.—Genesis 2:8; 3:22.

Okukala nomwenyo sigo aluhe okwa kana po

Ehokololo lyOmbiimbeli otali ulike kutya Kalunga okwa li a menitha moshikunino ‘omuti gwokutseya uuwanawa nuuwinayi,’ ngoka a li i indika Adam naEva ya lye iiyimati yago, opo kaaya se. (Genesis 2:9, 17) Okwiidhilika kwaAdam naEva okulya oshiyimati shoka okwa li taku ku ulukila Kalunga kutya oya zimina oonkondopangelo dhe. Mepingathano naashika, okulya komuti ngoka osha li tashi ku ulika kutya oya tinda oonkondopangelo dhaKalunga. Adam naEva oya li inaaya vulika kelombwelo lyaJehova noya li ya gama kombinga yaSatana, oshishitwa shopambepo shoka sha li sha ningile oshipotha oonkondopangelo dhaJehova. Oshizemo, Kalunga okwa li e li mondjila sho a tokola kutya Adam naEva kaya li ya gwana okukala nomwenyo sigo aluhe.—Genesis 3:1-6.

Shoka Kalunga a li a gandja osha li omwenyo nenge eso, okukala po nenge okwaahakala po. Oshizemo shokwaahavulika osha li eso nokwaahakala po we nandonando. Kapwa li pu na omiti dhontumba dhopashikumithalonga ndhoka dha li tadhi vulu okukaleka Adam naEva nosho wo oluvalo lwawo nomwenyo uuna ya sa nokaya li ye na omwenyo ihaagu si.a

Oluvalo aluhe lwaAdam olwa mono iihuna molwuunashipotha we. Iilanduliko oya yelithwa komuyapostoli Paulus. Okwa nyola ta ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.”—Aaroma 5:12.

Aantu otaya ka vula ishewe okukala nomwenyo sigo aluhe

Omuyapostoli Paulus okwa li a ningi eudhi kombinga yonkalo yoluvalo lwaAdam moku yi yelekanitha naandjoka yomupika gwomethelemumvo lyotango. Molwaashoka aanona yaAdam naEva oya li ya thigulula uulunde, oya li ya valwa “aapika yuulunde” noya li ye na okusa. (Aaroma 5:12; 6:16, 17) Oya li itaaya vulu okuyanda eso ando Jehova ka ningile ekulilo lyoku ya kulila mo muupika mboka. Paulus okwa yelitha a ti: “Ngashika okuyona [kwaAdam] kwe etele aantu ayehe epangulo, osho tuu oshilonga shimwe shuuyuuki otashi mangulula aantu ayehe e taa pewa omwenyo.” ‘Oshilonga shoka shuuyuuki’ osha ningitha Jesus a gandje omwenyo gwe gwa gwanenena gwopantu gu li “iikulila yaantu ayehe.” Jehova okwa li a mono kutya opwa pumbiwa oonkondo dhekulilo okumangulula aantu ‘mokupangulilwa meso.’—Aaroma 5:16, 18, 19; 1 Timoteus 2:5, 6.

Aanongononi itaya ka mona nando moosele dhaantu kutya omolwashike aantu haya si. Eyamukulo ndyoka otali adhika palwe pwi ili. Ombiimbeli otayi ti kutya shoka hashi etitha eso lyaantu osho eihumbato lyopamikalo nokwaahakala pampango, ihe kashi shi sha shi li moosele dholutu. Opo aantu ya ka mone ishewe omwenyo gwaaluhe, ekuliloyambo lyaJesus oli li oshitegelelwa shopampango. Ekulilo oli li wo euliko lyuuyuuki nuuwanawahenda waKalunga. Mbela oolye taya ka mona uuwanawa mekulilo ndika nokumona omwenyo gwaaluhe?

Omagano gomwenyo ihaagu si

Jehova Kalunga okwa kala ko “aluhe sigo aluhe.” Iha si. (Episalomi 90:2) Omuntu gwotango ngoka Jehova a li a pe omwenyo ihaagu si okwa li Jesus Kristus. Omuyapostoli Paulus okwe shi yelitha a ti: “Otu shi shi kutya Kristus okwa yumudhwa kuusi, ita si we. Eso kali na we oonkondo oku mu pangela.” (Aaroma 6:9) Mokuninga ekondjithathano pokati kaJesus omuyumudhwa naaleli yokombanda yevi, Paulus okwe mu hokolola e li oye awike ngoka e na omwenyo ihaagu si. Jesus ota kala e na “omwenyo sigo aluhe.” Omwenyo gwe kagu na “ehulilo.”—Aahebeli 7:15-17, 23-25; 1 Timoteus 6:15, 16.

Jesus haye awike a pewa omagano ngoka. Aakriste aagwayekwa nombepo mboka ya hogololwa ya ka pangele ye li aakwaniilwa megulu nayo oya pewa eyumuko lya fa lyaJesus. (Aaroma 6:5) Omuyapostoli Johannes otu ulike kutya omagano ngoka oga pewa aantu 144 000. (Ehololo 14:1) Nayo oya pewa omwenyo ihaagu si. Shi na ko nasha neyumuko lyawo, Paulus okwa ti: “Olutu nduka lwonyama nombinzi italu vulu okuya mOshilongo shaKalunga . . . Uuna enkuma . . . tali tameke okuhika, aasi otaa ka yumudhwa nomalutu itaaga si we, nena atuheni otatu ka shitululwa. Oshoka shoka tashi ka yonuuka po, oshi na okwiizaleka shoka itaashi ka yonuuka po; naashoka tashi ka sa, oshi na okwiizaleka shoka itaashi si.” Mboka taya ka yumuka meyumuko ndika itaya ka sa we.—1 Aakorinto 15:50-53; Ehololo 20:6.

Okwiihololelwa huka kwa za kuKalunga oku li okundhindhilikwedhi lela. Nonando aayengeli oye li iishitwa yopambepo, nayo ohaya vulu okusa. Shoka shu ulikwa kuushili kutya iishitwa yopambepo mbyoka ya yambidhidha Satana muunashipotha we otayi ka sa. (Mateus 25:41) Mepingathano naashoka, aapangeli pamwe naJesus oya pewa omagano gomwenyo ihaagu si, shoka tashi ulike kutya Jehova okwe yi inekela nopwaahe na omalimbililo kutya otaya ka kala aadhiginini muye.

Mbela shoka otashi ti kutya aantu 144 000, mboka ye li omwaalu omushona gowala moku gu yelekanitha nogwaantu omamiliyona omayuvi mboka ya li ko nale, oyo ayeke taya ka kala nomwenyo sigo aluhe? Aawe. Natu tale kutya omolwashike.

Omwenyo gwaaluhe moparadisa kombanda yevi

Embo lyOmbiimbeli Ehololo otali hokolola ongundu onene yaantu mboka taya ka pewa omwenyo gwaaluhe moparadisa kombanda yevi. Otaya ka kala pamwe naamboka ya li ya sa ihe oya yumuka noya galukila muugundjuka ye na omalutu ge na uukolele. (Ehololo 7:9; 20:12, 13; 21:3, 4) Otaye ke etwa ‘pomulonga gwomeya gomwenyo omayelele, tagu tayima ngekende notagu fuluka tagu zi moshipangelapundi shaKalunga.’ Handiyaka yagwo oku na “omuti gwomwenyo . . . , omafo gomuti nguka ogokwaaludha aantu.” Jehova Kalunga ota hiya aantu nombili ta ti: “Kehe ngoka a sa enota, ne ye; naangoka a hala, na taambe omeya gomwenyo omagano.”—Ehololo 22:1, 2, 17.

Omiti ndhika nomeya ngaka kayi shi omiti dhopashikumithalonga dhokupanga nenge othithiya yuugundjuka, ngaashi ndjoka ya li ya kongwa nale kaanongononi nokaaendikonakoni omathelemimvo ga piti. Pehala lyaashono, iinima mbyoka otayi thaneke omasiloshimpwiyu gaKalunga okupitila muJesus Kristus gokukwathela aantu ya kale ishewe monkalo ya gwanenena moka ya li petameko.

Elalakano lyaKalunga opo aantu aavuliki ya kale nomwenyo sigo aluhe kombanda yevi inali lunduluka. Elalakano ndyoka otali ka gwanithwa molwaashoka Jehova oha gwanitha po omalalakano ge. Episalomi 37:29 otali ti: “Aayuuki otaya ka thigulula evi e taa kala mo sigo aluhe.” Euvaneko ndika otali tu inyengitha pamwe naamboka ya pewa omwenyo ihaagu si megulu, tu tye: “Omuwa Kalunga Omunankondoadhihe, iilonga yoye iinene ngiini niikumithi! Omukwaniilwa ngoye [gwiigwana] ayihe, omautho goye ogu uka ngiini nogoshili! Omuwa, olye ngoka itee ku tila? Olye ta tindi [okuhokolola] uunene woye? Oshoka ongoye awike omuyapuki.”—Ehololo 15:3, 4.

Mbela owa hala oku ka mona omagano ge na ondilo gomwenyo gwaaluhe? Ngele osho, ou na okukala omudhiginini noho vulika ‘kOmukwaniilwa ngoka gwiigwana ayihe.’ Owa pumbwa okwiilonga kombinga yaJehova nosho wo Jesus Kristus ngoka okupitila muye omwenyo gwaaluhe tagu vulu okumonika. Ayehe mboka ye na ehalo okutaamba ko omakotampango gaKalunga gaashoka shi li mondjila naashoka sha puka otaya ka mona omagano ngoka ‘gomwenyo gwaaluhe.’—Johannes 17:3.

[Enyolo lyopevi]