1 Ilonga okwiinekela shoka Ombiimbeli tayi ti

“Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka.”—2 Timoteus 3:16.

OPU NA ESHONGO LINI? Aantu oyendji ohaya ti kutya Ombiimbeli oyo owala embo lya nyolwa kaantu. Yamwe oyi itaala kutya ondjokonona yomahokololo gomOmbiimbeli kayi shi yoshili. Yalwe ohaya ti kutya omayele gayo itaga longo nenge taya ti kage li pethimbo.

ONGIINI TO VULU OKUSINDA ESHONGO NDIKA? Olundji mboka haya ti kutya Ombiimbeli kayi shi okwiinekelwa nokayi na oshilonga inaya konakona oshinima shoka kuyo yene. Ohaye endulula owala shoka sha popiwa kuyalwe. Onkee ano, Ombiimbeli otayi londodha tayi ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.”—Omayeletumbulo 14:15.

Pehala lyokutaamba ko shoka yamwe taya popi, omolwashike itoo landula oshiholelwa shAakriste yomethelemumvo lyotango mboka ya li muBerea shoka shi li ngashingeyi kuumbangalantu waGreka? Aakriste mboka kaya li ya taamba ko owala shoka yalwe ye ya lombwele. Pehala lyaashoka, oya “kala nokukonakona Omanyolo, opo ya tale, ngele shoka tashi popiwa kuPaulus, oshoshili tuu.” (Iilonga 17:11) Natu tale paufupi omatompelo gaali kutya omolwashike to vulu okwiinekela kutya Ombiimbeli oyi li Oohapu dhaKalunga dha nwethwa mo.

Ondjokonona yomahokololo gomOmbiimbeli oyoshili. Oomvula dha pita aantu yamwe oya ti kutya omadhina gaantu nomahala ngoka ga tumbulwa mOmbiimbeli kage shi goshili notaya tsikile oku shi popya. Ihe omathimbo nomathimbo uunzapo owu ulika kutya okupopya hoka kaku na ekankameno lyasha nonokutya omahokololo gomOmbiimbeli oge shi okwiinekelwa.

Pashiholelwa, opwa li ethimbo sho aalongwantu ya li ya limbililwa ngele omukwaniilwa Sargon gwaAssur ngoka a popiwa muJesaja 20:1, oko a li shili. Ihe mo 1840 aalafululi yiikulunima oya li yi itsu ombala yomukwaniilwa ngoka. Ngashingeyi, Sargon oku li gumwe gwomaakwaniilwa yaAssur a tseyika nawa.

Opwa li pu na yamwe mboka tayi ipula ngele omupangeli Omuroma Pontius Pilatus ngoka a dhipagitha Jesus oko a li shili. (Mateus 27:1, 22-24) Ihe mo 1961 emanya lya nyolwa edhina lyaPilatus nondondo ye olya li lyi itsuwa popepi noshilando Kesarea muIsraeli.

Oshifo U.S.News & World Report osha popi uushili kombinga yondjokonona yomOmbiimbeli mo 25 gaKotoba 1999 sha ti: “Aalafululi yongashingeyi oye shi koleka momikalo tadhi kumitha kutya ondjokonona yomEtestamendi Ekulu nomEtestamendi Epe oyoshili. Oya gandja uunzapo wu na ko nasha niitopolwa ya simana yomomahokololo kombinga yootatekulululwa yaIsraeli, olweendo lwaIsraeli okuza muEgipiti, aakwaniilwa yomezimo lyaDavid nosho wo onkalamwenyo yopethimbo lyaJesus.” Nonando eitaalo mOmbiimbeli inali ikolelela kwaashoka aalafululi yiinima ya mona po, oshili yopandjokonona ndjoka oyo twa tegelela membo ndyoka lya nwethwa mo kuKalunga.

Uunongo tawu longo mboka wu li mOmbiimbeli otawu etele aantu yomomaputuko agehe uuwanawa. Nale manga inapu monika iikwaniipangitho yokukonakona nkene omikithi hadhi taandele, Ombiimbeli oya popya nale omikalo dha simana kombinga yuuyogoki ndhoka tadhi longo nokunena. (Levitikus 11:32-40; Deuteronomium 23:12, 13) Uukwanegumbo mboka hawu tula miilonga omayele gOmbiimbeli kombinga yankene wu na okuungaunga nayalwe owu li wa nyanyukwa. (Aaefeso 5:28–6:4) Omuntu ngoka ha tula miilonga omakotampango gOmbiimbeli otashi vulika a kale omuniilonga omwanawa nenge omugandji gwiilonga e na ondjele. (Aaefeso 4:28; 6:5-9) Okutula miilonga omakotampango gOmbiimbeli otashi tu etele uuwanawa pamaiyuvo nopalutu. (Omayeletumbulo 14:30; Aaefeso 4:31, 32; Aakolossa 3:8-10) Omayele taga longo ga tya ngaaka ogo twa tegelela okuza kOmushiti gwetu.

OTATU KA MONA ONDJAMBI YASHIKE? Uunongo mboka tawu adhika mOmbiimbeli otawu vulu okulonga omuntu oondunge. (Episalomi 19:7) Pehala lyaashoka, otatu vulu okukala neinekelo mOmbiimbeli molwaashoka oyo awike tayi vulu oku tu kwathela tu kale neitaalo lya kola.

Ngele owa hala okumona uuyelele wa gwedhwa po, tala ontopolwa 2, “Ombiimbeli oyo embo lya za kuKalunga” membo Omalongo gashili gOmbiimbeli ogeni naanaa?a

[Enyolo lyopevi]