“Ombepo nomuyalekwa otaa ti: ‘Ila!’”
“Ombepo nomuyalekwa otaa ti: ‘Ila!’ . . . Kehe ngoka a sa enota, ne ye; naangoka a hala, na taambe omeya gomwenyo omagano.”—EH. 22:17.
1, 2. Iinima yUukwaniilwa oyi na okukala ya simana shi thike peni monkalamwenyo yetu?
IINIMA yUukwaniilwa oyi na okukala ya simana shi thike peni monkalamwenyo yetu? Jesus okwa li a ladhipike aalanduli ye ya ‘konge tango Uukwaniilwa waKalunga’ nokwe ya shilipaleke kutya ngele oye shi ningi, Kalunga ote ke ya pa shoka ya pumbwa. (Mat. 6:25-33) Okwa li a yelekanitha Uukwaniilwa waKalunga nokawe kondilo hoka omuhalithi sho e ka mono, a “landitha po ayihe e te ki ilandele.” (Mat. 13:45, 46) Mbela iilonga yokuuvitha yUukwaniilwa kayi na okukala ya simanenena kutse?
2 Ngaashi twa li twe shi mono miitopolwa iyali ya tetekele, okupopya kwetu nuulaadhi nokulongitha oohapu dhaKalunga nuukeka muukalele ohaku ulike kutya otatu wilikwa kombepo yaKalunga. Ombepo ndjoka ohayi dhana wo onkandangala ya simana opo tu vule okukala hatu kutha ombinga pandjigilile miilonga yUukwaniilwa yokuuvitha. Natu ka tale kutya shika ohashi ningwa ngiini.
Atuheni otwa hiywa!
3. Aantu ayehe otaya hiywa ye ‘ye’ ya nwe omeya ga tya ngiini?
3 Aantu otaya hiywa okupitila mombepo ondjapuki. (Lesha Ehololo 22:17.) Ehiyo ndoka kutya “ila” otali hiya aantu ye ye ya nwe omeya gi ikalekelwa opo ya kumwe. Kage shi omeya golelalela ngoka ga tholomwa po miitopolwa iyali yo ohidrogeno noshitopolwa shimwe shohapi. Nonando omeya golelalela oga pumbiwa opo kehe shimwe kombanda yevi shi vule okukala nomwenyo, Jesus okwa li e na momadhiladhilo omeya gamwe gi ili sho a lombwele omukiintu Omusamaria ngoka a li pomuthima a ti: “Shaa ngoka ta nu omeya ngoka tandi ge mu pe, oye ita ka sa we enota sigo aluhe. Oshoka omeya ngoka tandi ge mu pe, otaga ka ninga muye oluthithiya lwomeya taga fuluka sigo omomwenyo gwaaluhe.” (Joh. 4:14) Omeya omakumithi ngoka aantu taya hiywa ye ye ya nwe oongoka taga gandja omwenyo gwaaluhe.
4. Ompumbwe yomeya gomwenyo oya li ye ya po ngiini, nomeya ngoka otaga thaneke shike?
4 Ompumbwe yomeya gomwenyo ga tya ngaaka oye ya po sho omuntu gotango Adam a landula omukulukadhi gwe Eva mokwaaha vulika komushiti gwawo, Jehova Kalunga. (Gen. 2:16, 17; 3:1-6) Aaihokani yotango oya li ya tidhwa mo moshikunino shoka sha li egumbo lyawo opo ‘Adam kaa lye we iiyimati yokomuti gwomwenyo ye a kale e na omwenyo sigo aluhe.’ (Gen. 3:22) Adam e li hekulululwa yaantu ayehe, oye e eta eso maantu ayehe. (Rom. 5:12) Omeya gomwenyo otaga thaneke elongekidho ndyoka Jehova a tula po opo a hupithe aantu aavuliki muulunde neso noku ya pa onkalamwenyo ya gwanenena mOparadisa kombanda yevi. Omauwanawa ngaka oga ningwa taga wapa okupitila mekuliloyambo lyaJesus Kristus.—Mat. 20:28; Joh. 3:16; 1 Joh. 4:9, 10.
5. Olye ta hiya aantu ye ye ya “taambe omeya gomwenyo omagano”? Shi yelitha.
5 Olye ta hiya aantu ye ye ya “taambe omeya gomwenyo omagano”? Uuna aantu ya mono omauwanawa agehe gonkalamwenyo pethimbo lyElelo lyaKristus lyOomvula Eyuvi otaya thanekwa ye li “omulonga gwomeya gomwenyo omuyelele, tagu tayima ngekende.” Omulonga ngoka ogwa monika ‘tagu fuluka tagu zi moshipangelapundi shaKalunga noshOnzigona.’ (Eh. 22:1) Onkee ano, Jehova Omugandji gwomwenyo oye Oluthithiya lwomeya ngoka taga gandja omwenyo. (Eps. 36:9) Oye ta gandja omeya okupitila ‘mOnzigona,’ Jesus Kristus. (Joh. 1:29) Omulonga nguka gwopathaneko Jehova ogwo ta ka longitha okukutha po uuwinayi mboka we etithwa po kokwaahavulika kwaAdam. Eeno, Jehova Kalunga oye ta hiya aantu ye ‘ye.’
6. “Omulonga gwomeya gomwenyo” ogwa tameke okukunguluka uunake?
6 Nonando “omulonga gwomeya gomwenyo” otagu ka kunguluka meityo lyolela pethimbo lyElelo lyaKristus lyOomvula Eyuvi, ogwa tameke okukunguluka “mesiku lyOmuwa” ndyoka lya tameke sho “Onzigona” ya langekwa po mo 1914. (Eh. 1:10) Onkee ano, omauwanawa gamwe gonkalamwenyo oga tameke okumonika konima yaashoka. Oga kwatela mo Oohapu dhaKalunga, molwaashoka etumwalaka lyOmbiimbeli otali popiwa li li ngaashi “omeya.” (Ef. 5:26) Ehiyo lyaantu ya “taambe omeya gomwenyo” mokuuva nokutaamba ko onkundana ombwanawa yUukwaniilwa olye egulukila aantu ayehe. Ihe mbela olye lela ta hiya aantu mesiku lyOmuwa?
“Omuyalekwa” ota ti: “Ila!”
7. Oolye ya tameke tango okuhiya aantu “mesiku lyOmuwa” ye ‘ye,’ noya li taya hiya oolye?
7 Iilyo yongundu yomuyalekwa, sha hala okutya, Aakriste aagwayekwa oyo tango taya gandja ehiyo kutya “ila.” Otaye li gandja koolye? Osha yela kutya omuyalekwa iti ihiya ye mwene. Ehiyo lye olyu ukilila mboka ye na etegameno lyoku ka mona omwenyo gwaaluhe konima ‘yiita mesiku enene lyaKalunga Omunankondoadhihe.’—Lesha Ehololo 16:14, 16.
8. Oshike tashi ulike kutya Aakriste aagwayekwa oya kala nokugandja ehiyo lyaJehova okutameka konima yo 1918?
8 Aalanduli yaKristus aagwayekwa oya kala nokuhiya aantu okutameka konima yo 1918. Momvula ndjoka oshipopiwa shi na oshipalanyolo “Aantu omamiliyona mboka ye na omwenyo ngashingeyi itaya ka sa we,” osha li sha gandja etegameno kutya aantu otaya ka mona omwenyo mevi paradisa konima yiita yaArmagedon. Oshipopiwa shoka sha li sha gandjwa poshigongi shAakonakonimbiimbeli poCedar Point, Ohio, muAmerika, mo 1922 osha li sha ladhipike aapulakeni ya ‘tseyithe Omukwaniilwa nuukwaniilwa we.’ Eindilo ndika olya li lya kwathele oshihupe shongundu yaagwayekwa shi hiye aantu oyendji ngaashi tashi vulika. Mo 1929, Oshungolangelo yaMaalitsa 15 yOshiingilisa oya li yi na oshitopolwa shi na oshipalanyolo: “Ehiyo lyombili,” noshipalanyolo osha li shi ikolelela kEhololo 22:17. Moshitopolwa moka omwa popiwa taku ti: “Ongundu yaagwayekwa aadhiginini oyi imbwanga mumwe [nOmukombandambanda] mokugandja ehiyo ndyoka tali ti: “Ila!” Etumwalaka ndika oli na okuuvithilwa mboka ye hole uuyuuki noshili. Oshi na okuningwa ngashingeyi.” Sigo okunena ongundu yomuyalekwa otayi tsikile okuhiya aantu.
“Kehe ngoka tu uvu ko, na tye: ‘Ila!’ ”
9, 10. Ongiini mboka yu uva ehiyo nayo wo ya lombwele yalwe ye ‘ye’?
9 Ongiini kombinga yaamboka tayu uvu ehiyo ndyoka tali ti: “Ila”? Oya hiywa wo ya tye: “Ila!” Pashiholelwa Oshungolangelo ye 1 Auguste yomo 1932 yOshiingilisa pepandja 232 oya ti: “Aagwayekwa naya ladhipike aantu ayehe mboka taya ka kutha ombinga mokuuvithila yalwe onkundana ombwanawa yUukwaniilwa. Inaya pumbwa okukala aagwayekwa yOmuwa opo ya vule okuuvitha etumwalaka lyOmuwa. Oshi li ehekeleko enene kOonzapo dhaJehova okutseya kutya oya pewa uuthemba wokufala omeya gomwenyo kaantu mboka taya ka pitithwa muArmagedon nokupewa omwenyo gwaaluhe kombanda yevi.”
10 Oshungolangelo yo 15 Auguste yomo 1934 yOshiingilisa pepandja 249 oya tsu omuthindo kutya ngoka tu uvu ko naye oku na okukala e na oshinakugwanithwa shokutya: “Ila!” sho ya ti: “Mboka yomongundu yaJonadab oye na okulongela kumwe naamboka yomongundu yaJehu yopathaneko, ndjoka yi li ongundu yaagwayekwa noye na okuuvitha etumwalaka lyuukwaniilwa, nonando yo kaye shi oonzapo dhaJehova dha gwayekwa.” Mo 1935, okwa li kwa monika kutya “ongundu onene” ndjoka ya popiwa mEhololo 7:9-17 otayi thaneke oolye. Shoka osha li sha ningitha iilonga yaKalunga yokuhiya aantu yi hume komeho neendelelo. Okuza mpoka omwaalu gwongundu onene yaalongelikalunga yashili ngoka tagu indjipala natango gu vulithe pomamiliyona gaheyali ngashingeyi ogwa taamba ko ehiyo ndyoka. Omolwolupandu lwetumwalaka ndyoka yu uvu, oyi igandjela Kalunga e taya ninginithwa momeya nokwiimbwanga mumwe nongundu yomuyalekwa mokuhiya yalwe ye ‘ye ya taambe omeya gomwenyo omagano.’
“Ombepo” otayi ti: “Ila!”
11. Methelemumvo lyotango E.N., ongiini ombepo ondjapuki ya li ya dhana onkandangala miilonga yokuuvitha?
11 Sho Jesus a li tu uvitha mosinagoga muNasaret, okwa li a yanuna ondhinga yembo lyomupolofeti Jesaja e ta lesha ta ti: “Ombepo yOmuwa oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye. Okwa tumu ndje, ndi igidhile oonkwatwa emanguluko, naaposi ya tonate, okumangulula oonakuhepekwa, okutseyitha omumvo, uuna Omuwa te ya, a hupithe aantu ye.” Opo nduno Jesus oku ukitha oohapu ndhika kuye mwene a ti: “Nena ndjika oohapu ndhoka mu uvu dha leshwa, odha gwanithwa.” (Luk. 4:17-21) Manga Jesus inaa londa a ye megulu okwa li a lombwele aalongwa ye a ti: “Otamu ka pewa oonkondo, uuna Ombepo Ondjapuki ta ka tililwa mune. Nena one otamu ka ninga oonzapo dhokuhokolola ndje . . . sigo omiilongo ayihe yokombanda yevi.” (Iil. 1:8) Methelemumvo lyotango, ombepo ondjapuki oya li ya dhana onkandangala ondhindhilikwedhi miilonga yokuuvitha onkundana ombwanawa.
12. Ongiini ombepo yaKalunga hayi dhana onkandangala mokuhiya aantu kunena?
12 Ongiini ombepo ondjapuki yaKalunga ya kwatelwa mokuhiya aantu momasiku getu? Ombepo ondjapuki ohayi zi kuJehova. Oha longitha ombepo yi patulule omitima nomadhiladhilo gongundu yomuyalekwa opo yu uve ko Oohapu dhe, Ombiimbeli. Ombepo ohayi ya inyengitha ya tsikile okuhiya mboka inaaya uva ehiyo nokuyelithila mboka ye na etegameno lyoku ka kala nomwenyo sigo aluhe mOparadisa kombanda yevi ooshili dhopamanyolo. Ongiini kombinga yaamboka taya taamba ko ehiyo nokuninga aalongwa yaJesus Kristus notaya tsikile okuhiya yalwe? Ombepo otayi kutha ombinga moku ya kwathela wo. Okukala ya ninginithwa ‘medhina lyombepo ondjapuki’ ohaya longele kumwe nayo nohaye yi inekele yi ya kwathele. (Mat. 28:19) Dhiladhila wo kombinga yetumwalaka ndyoka tali uvithwa kaagwayekwa nokongundu onene ndjoka tayi indjipala. Ohali zi mOmbiimbeli ndjoka yi li embo lya nyolithwa koonkondo dhombepo yaKalunga. Kungawo ehiyo otali thiki kaantu okupitila mombepo ondjapuki. Dhoshili ohatu wilikwa kombepo ndjoka. Shoka oshi na okuguma ngiini okukutha ombinga kwetu miilonga yokuhiya aantu?
Otaya “tsikile okutya: ‘Ila!’”
13. Epopyo kutya “Ombepo nomuyalekwa otaya tsikile okutya: ‘Ila!’” olya hala okutya shike?
13 “Ombepo nomuyalekwa” ihaya ti owala: “Ila!” Oshitya shelaka lyopetameko shoka sha longithwa mpaka otashi ulike koshinima shoka tashi tsikile okulongwa. Mokutsa kumwe nedhiladhilo ndyoka, Ombiimbeli yo-New World Translation otayi ti: “Ombepo nomuyalekwa otaya tsikile okutya: ‘Ila!’” Shika otashi ulike okugandja kuyalwe ehiyo lyaKalunga pandjigilile. Ongiini kombinga yaamboka taya uvu nokutaamba ehiyo ndyoka? Nayo ohaya ti: “Ila!” Ongundu onene yaalongelikalunga yashili otayi popiwa yi li tayi ‘yakula uusiku nomutenya motempeli yaKalunga.’ (Eh. 7:9, 15) Omeityo lini taya ‘yakula uusiku nomutenya’? (Lesha Lukas 2:36, 37; Iilonga 20:31; 2 Aatessalonika 3:8.) Oshiholelwa shomupolofeti omukiintu Anna naashoka shomuyapostoli Paulus otayi ulike kutya ‘okuyakula uusiku nomutenya’ otashi ti kutya okulonga nuudhiginini muukalele nokukala wa mana mo.
14, 15. Ongiini Daniel a li u ulike nkene sha simana okulongela Kalunga pandjigilile?
14 Omupolofeti Daniel naye okwa li u ulike nkene sha simana okulongela Kalunga pandjigilile. (Lesha Daniel 6:4-10, 16.) Ka li a lundulula omukalo gwe gwokulongela Kalunga pandjigilile nando omwedhi gumwe, sha hala okutya, omukalo gwe gwokugalikana kuKalunga “lutatu mesiku, ngaashi a li ha ningi shito,” nonando shoka osha li tashi ke mu umbilithitha mekololo lyoonime. Iikala ye kaya li tuu yu ulukile aatali naakonakoni kutya kapu na shoka sha simana shi vulithe okulongela Jehova pandjigilile!—Mat. 5:16.
15 Konima sho Daniel a li a kala uusiku mekololo lyoonime, omukwaniilwa ye mwene okwa yi ko e ti igidha ta ti: “Daniel, mumati gwaKalunga omunamwenyo! Kalunga ngoka ho mu longele nuudhiginini, okwa vulu tuu oku ku hupitha koonime?” Daniel mbalambala okwa yamukula ta ti: “Nkeyama, kala u na omwenyo sigo aluhe! Kalunga okwa tumu omuyengeli gwe, a mutike omakana goonime, opo dhaa lye ndje po. Okwe shi ningi, oshoka oku shi shi kutya ngame kandi na mbedhi noinandi yona kungoye, Nkeyama.” Jehova okwa laleke nuuyamba Daniel molwaashoka okwa kala he mu longele “nuudhiginini.”—Dan. 6:19-22.
16. Oshiholelwa shaDaniel oshi na oku tu inyengitha tu pule omapulo geni kombinga yokukutha ombinga kwetu muukalele?
16 Daniel okwa li i ilongekidha okusa pehala lyokwiipwililikila okulongela Jehova nuudhiginini. Ongiini kombinga yetu? Omaiyambo geni hatu ningi opo tu vule okuuvitha onkundana ombwanawa yUukwaniilwa waKalunga nuudhiginini? Katu na okweetha omwedhi gu pite po inaatu lombwela yalwe kombinga yaJehova. Ngele otashi vulika, mbela ka tu na okukambadhala tu kuthe ombinga muukalele oshiwike kehe? Nonando otu kale tu na omangambeko omolwuukolele wopalutu notatu vulu owala okuuvitha uule wominute 15 momwedhi, otu na okulopota shoka twa longa. Omolwashike? Omolwaashoka tu li ta tu longo pamwe nomuyalekwa nombepo, otu na okukala tu na ehalo lyokulombwela yalwe kutya “Ila!” Eeno, otwa hala okuninga ashihe shoka tatu vulu opo tu kale aauvithi yUukwaniilwa yondjigilile.
17. Oompito dhini kaatu na okweetha dhokuuvithila aantu yalwe ehiyo lyaJehova?
17 Otu na okukambadhala tu gandje kuyalwe ehiyo lyaJehova pompito kehe, kaashi shi owala poompito ndhoka twi ikalekela dhokuuvitha muukalele womontaneho. Kashi li tuu uuthembahenda okuhiya mboka ya sa enota ‘ye ye ya taambe omeya gomwenyo omagano’ pomathimbo gamwe gi ili, ngaashi ngele twa yi koostola, uuna tu li momalweendo, momafudho, tatu ende nenge ngele tatu yi koskola! Nonando omapangelo oga ngambeke iilonga yokuuvitha, otatu ka tsikila okuuvitha nuukeka tashi vulika tatu longo owala omagumbo omashona moshitopolwa e tatu yi koshitopolwa shilwe.
Tsikila nokutya: “Ila!”
18, 19. Oho ulike ngiini kutya owa lenga uuthembahenda wokukala omulongi pamwe naKalunga?
18 Uule woomvula dhi vulithe 90 ngashingeyi, ombepo nomuyalekwa oya kala nokutya: “Ila!” kukehe ngoka a sa enota a taambe omeya gomwenyo. Mbela owu uva nale ehiyo lyayo li nyanyudha? Onkee ano, oto ladhipikwa wu thikithe ehiyo ndika kuyalwe.
19 Katu shi shi kutya sigo uunake ehiyo lyaJehova lyopahole tali tsikile okugandjwa, ihe okuyamukula kwetu kulyo mokulombwela yalwe kutya “Ila!” otashi tu ningi tu kale aalongi pamwe naKalunga. (1 Kor. 3:6, 9) Shoka kashi shi tuu uuthembahenda! Natu kale nokuulika kutya otwa lenga uuthembahenda mboka nokukala tatu ‘hambelele Kalunga aluhe’ mokuuvitha pandjigilile. (Heb. 13:15) Pamwe nongundu yomuyalekwa, ayehe mboka ye na etegameno lyokukala kombanda yevi naya kale nokutya: “Ila!” Aantu oyendjiyendji naya tsikile ‘okutaamba omeya omagano’!
Owi ilonga shike?
• Ehiyo kutya “Ila” olyu ukithwa koolye?
• Omolwashike taku vulu okutiwa kutya Jehova oye lela ta hiya aantu ta ti: “Ila!”?
• Ombepo ondjapuki ohayi dhana onkandangala yini mokuthikitha ehiyo kaantu ndyoka tali ti: “Ila!”?
• Omolwashike tu na okukambadhala tu kale hatu yi muukalele pandjigilile?
[Oshimpungu/Ethano pepandja 25]
(Opo wu mone nkene uuyelele wu unganekwa, tala oshileshomwa)
Tsikila nokutya: “Ila!”
1914
Aauvithi 5 100
1918
Oyendji otaya ka mona omwenyo mOparadisa kombanda yevi
1922
“Uvitheni, uvitheni, uvitheni, Omukwaniilwa nUukwaniilwa we”
1929
Oshihupe oshidhiginini otashi ti: “Ila!”
1932
Aagwayekwa hayo ayeke ya hiywa ehiyo ndyoka tali ti: “Ila!”
1934
Ongundu yaJonadab oya hiywa yi uvithe
1935
“Ongundu onene” oya monika kutya otayi thaneke oolye
2009
Aauvithi 7 313 173