Olye ha kala mehala moka hamu kala iishitwa yopambepo ngoka tu na okupopya naye?

KALUNGA OMUNANKONDOADHIHE okwa li i inekelele iinakugwanithwa yontumba iishitwa yopambepo yilwe. Pashiholelwa, okwa pa Jesus Kristus uuthemba wokupangela evi nokwa langeka po aayengeli aadhiginini ya wilike iilonga yokuuvitha onkundana ombwanawa. (Ehololo 14:6) Omagalikano inaga kwatelwa miinima mbika. Ine yi pa oshinakugwanithwa shokupulakena omagalikano. Omagalikano getu oge na okugalikanwa gu ukilila owala kuKalunga ye mwene.

Jehova oye ‘omuuvi gwomagalikano.’ (Episalomi 65:2) Oha pulakene komagalikano getu nohe ga yamukula. Omuyapostoli Johannes okwa li a nyolele aapiya yaJehova ooyakwawo kombinga yegalikano a ti: ‘Ngele tatu mu indile shaa shoka she mu opalela, Kalunga ote tu uvu ethimbo kehe ndyoka tatu mu indile. Onkee ano sho tu shi shi kutya shika oshoshili, nena otu shi shi wo kutya oye ote tu pe shoka tatu mu indile.’—1 Johannes 5:14, 15.

Aayengeli aadhiginini inaya hala tu ya galikane. Oyu uvite ko elongekidho lyaKalunga li na ko nasha negalikano ndyoka omathimbo gamwe hali kala lye ya kwatela mo nohaya kala metsokumwe nalyo. Omomukalo guni? Sho omupolofeti Daniel a li a galikana kuJehova Kalunga kombinga yembugaleko lyaJerusalem, Jehova okwa li a yamukula egalikano lyaDaniel sho a tumu omuyengeli Gabriel netumwalaka tali tsu omukumo.—Daniel 9:3, 20-22.

Mbela oonakusa ohaya tumu omatumwalaka?

Mbela otu na okukambadhala tu popye noonakusa? Opu na omahokololo ogendji taga hokolola nkene aantu ya li anuwa ya popi noombepo dhoonakusa. Pashiholelwa, omukulukadhi gwokoIreland okwa li a popiwa naye kompulile e ta yi mu lombwele kutya ongulohi ya tetekele okwa li a popi naFred, omusamane gwomukulukadhi ngoka. Ihe Fred okwa adhika a sa nale pwa pita iiwike yontumba. Ompulile oya li ye mu lombwele iinima mbyoka omukulukadhi ngoka oye owala a li e yi shi, tayi ti anuwa okwe yi lombwelwa kuFred. Kasha li tuu tashi vulu okukala oshipu kuye okwiitaala kutya Fred okwa li e na omwenyo mehala moka hamu kala iishitwa yopambepo nokwa li ta kambadhala okupopya naye okupitila mompulile ndjoka! Okuthika pehulithodhiladhilo ndyoka, otaku ka kondjithathana naashoka Ombiimbeli tayi ti kombinga yonkalo yoonakusa. Tala oshimpungu pevi.

Ongiini nduno ehokololo ngaashi ndika tali vulu okuyelithwa? Oshilongitho shimwe shoka oompwidhuli hadhi longitha osho okwiifetha oonakusa, pompito ndjoka odha li dhi ifetha Fred. Mbela onelalakano lyashike? Onelalakano lyokuningitha aantu ya gamuke ko kwaashoka Ombiimbeli tayi longo nodhi nkundipaleke eitaalo lyaantu muJehova nokaaya kale ye mu inekela. Nopwaahe na omalimbililo, Satana noompwidhuli dhe ohaya fundjaleke aantu ‘niikumithalonga, nomandhindhiliko, niilongankondo yiifundja yoludhi kehe nonokupukitha mboka ye li mondjila ndjoka yu uka mekano.’—2 Aatessalonika 2:9, 10.

Odhoshili kutya opu na oompulile naamboka haya kwatathana nadho mboka yi itaala kutya ohaya popi shili naamboka ya sa. Ngele otaya popi nomuntu gwontumba a sa nale, muushili wo wene otaya popi niishitwa yopambepo mbyoka yi li ompinge naJehova. Sha faathana, opu na mboka yi itaala kutya otaya longele Kalunga, ihe hasho. Omuyapostoli Paulus okwa li a nwethwa mo a nyole elondodho ndika lya kwata miiti a ti: “Omayambo ngoka taga yambelwa pomayambelo gopashipagani, itaga pewa Kalunga, ihe otaga pewa oombepo dhoompwidhuli.”—1 Aakorinto 10:20, 21.

Ngele otu shi kutya otatu vulu okugalikana kOmukombandambanda ngoka e tu hole noku na ko nasha natse, omolwashike tatu ka kala twa hala tu galikane kugulwe? Kakele kaashono, Ombiimbeli otayi tu shilipaleke tayi ti: “OMUWA ota tonatele uuyuni auhe, a nkondopaleke mboka ye na omitima dhe mu inekela.”—2 Ondjalulo 16:9.

[Oohapu dha simana pepandja 9]

Ngele otu shi kutya otatu vulu okugalikana kOmukombandambanda ngoka e tu hole noku na ko nasha natse, omolwashike tatu ka kala twa hala tu galikane kugulwe?

[Oshimpungu/Ethano pepandja 8]

Shoka shoshili naashoka kaashi shi shoshili

OSHILI: SATANA OYE OMUNTU SHILI

‘Satana ohi ishitukitha, a kale a fa omuyengeli gwuuyelele.’—2 Aakorinto 11:14.

“Kotokeni ne mu tonate! Oshoka omutondi gweni Satana ohe mú kundukidha, ta ndunduma a fa onime, ta kongo omuntu gontumba, e mu ketsule po.”—1 Petrus 5:8.

“Kehe ngoka ta longo uulunde, oye ota longithwa komuhindadhi, oshoka omuhindadhi nkene a kala oha longo uulunde.”—1 Johannes 3:8.

“Vulikeni ano kuKalunga. Kondjitheni Satana, oye note mú yi ontuku.”—Jakob 4:7.

‘Omuhindadhi oye omudhipagi okuza ketameko ye ke na nando oompoka a li moshili, oshoka muye kamu na nando oshili. Ngele ta popi iifundja, ota popi shoka shomuukwatya we mwene, oshoka oye omufundja nahe yiifundja ayihe.’—Johannes 8:44.

SHOKA KAASHI SHI SHOSHILI: OMUNTU NGELE A SI OHA YI MEHALA MOKA HAMU KALA IISHITWA YOPAMBEPO

“Ou na okulonga nuudhigu nokupusha, opo evi li ku pe sha, sigo to ka shuna mevi moka wa kuthwa mo. Owa kuthilwe mevi nou na okushuna mevi.”—Genesis 3:19.

“Aanamwenyo otaa tseya kutya oye na okusa, ihe aasi itaa tseya sha nando, nokaa na we ondjambi yasha.”—Omuuvithi 9:5.

“Longa ashihe to vulu niikaha yoye, shi longa noonkondo dhoye, oshoka kaku na iilonga, ompangela, uunongo nenge owino moshaasi, moka no ka ya mo.”—Omuuvithi 9:10.

“Uuna taa mana oondjenda, otaa shuna montsi moka ya zile. Esiku ndyoka oompangela dhawo otadhi hulu po.”—Episalomi 146:4.

OSHILI: AAYENGELI AADHIGININI OYE NA KO NASHA NATSE

“Omuyengeli gwOMUWA ota tonatele mboka haa vulika kOMUWA note ya hupitha moshiponga.”—Episalomi 34:7; 91:11.

“Aayengeli oolye ano? Oyo ayehe oombepo ndhoka tadhi yakula Kalunga. Ohaa tumwa kuye okukwatha aantu mboka taa ka hupithwa.”—Aahebeli 1:14.

“Onda mono omuyengeli gulwe e na oohapu dhelaka etoye lyaaluhe, a tuka mombanda muule, a ka uvithile aantu yokomdanda yevi, omihoko adhihe, omaludhi agehe, omalaka agehe niigwana ayihe. Oye okwa popi newi enene a ti: ‘Tileni Kalunga, ne mu simaneke uunene we!’”—Ehololo 14:6, 7.

SHOKA KAASHI SHI SHOSHILI: JESUS OKU THIKE PAMWE NAKALUNGA

“Onda hala, mu kale mwa tseya kutya Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.”—1 Aakorinto 11:3.

“Uuna iinima ayihe ya tulwa mepangelo lyaKristus, nena Omwana oti itula wo ye mwene kohi yepangelo lyaKalunga, ngoka a tula iinima ayihe kohi yepangelo lye; naKalunga ota ka ninga oye awike omupangeli gwaayihe.”—1 Aakorinto 15:28.

“Ngame otandi mú lombwele oshili: Omwana ita vulu okuninga nando osha muye mwene. Ota longo owala shoka e wete He te shi ningi.”—Johannes 5:19.