Omuuvithi ta kundathana nomunegumbo—Mbela aantu ayehe aawanawa otaya yi megulu?

OONZAPO DHAJEHOVA ohadhi nyanyukilwa okukundathana naantu pomagumbo gawo kombinga yOmbiimbeli. Mbela opu na oshikundathanwa shopaMbiimbeli shoka ho ipula nasho? Mbela oho kala wa hala okuuva oshindji nenge to ipula kombinga yomalongo nenge yiinima yopalongelokalunga mbyoka hayi ningwa kOonzapo dhaJehova? Ngele osho, ino kakadhala okupula kombinga yaashoka ho ipula nasho ngele owa mono gumwe gwomOonzapo dhaJehova. Ota ka kala a nyanyukwa oku shi kundathana nangoye.

Mpaka otapu landula oonkundathana ndhoka tashi vulika dhi ningwe kugumwe gwomOonzapo dhaJehova naangoka ta adha megumbo. Natu tye nduno Onzapo yedhina Marcus oya yi kegumbo lyomulumentu gwedhina Robert.

Aantu mboka taya yi megulu otaya ka ninga mo shike?

Marcus: Mbela sho to tala, aantu aawanawa oya tegelela onakuyiwa yi li ngiini?

Robert: Ondi wete kutya nonando onakuyiwa kombanda yevi oya fa tayi ka kala ombwinayi, ondi itaala kutya aantu aawanawa otaya ka pewa ondjambi ngele ya yi megulu.

Marcus: Ndyoka etegameno ewanawa shili. Ombiimbeli otayi popi oshindji kombinga yankene megulu mu li nonokutya mboka taya yi mo otaya ka ninga mo shike. Mbela owa dhiladhila nale kutya mboka taya yi mo otaya ka ninga mo shike?

Robert: Otatu ka kala pamwe naKalunga noku mu tanga sigo aluhe.

Marcus: Etegameno ndyoka ewanawa shili. Ihe Ombiimbeli itayi popi owala kombinga yuuthembahenda mboka tawu ka pewa mboka taya yi megulu, ihe otayi popi wo kombinga yoshilonga sha simana shoka taya ka longa.

Robert: Otaya ka longa shike?

Marcus: Otaya ka longa iilonga mbyoka tayi popiwa mEhololo 5:10. Ovelise ndjika otayi ti: “Ongoye [Jesus] owe ya ningi ombala ye naayambi okulongela Kalunga ketu, oyo notaa ka pangela [ombanda] yevi.” Robert, mbela owa mona kutya mboka taya yi megulu otaya ka ninga mo shike?

Robert: Ovelise otayi ti kutya otaya ka pangela ombanda yevi.

Marcus: Mbela shika kashi shi oshinima oshiwanawa?

Otaya ka pangela oolye?

Marcus: Mbela ito ka zimina kutya ngele opu na mboka taya ka pangela megulu, opu na wo okukala aalelwa? Nenge epangelo olyashike ngele kapu na aalelwa?

Robert: Ondi wete kutya owa hala okutya shike.

Marcus: Epulo limwe nda hala oku ku pula olyo kutya, otaya ka pangela oolye?

Robert: Ondi wete kutya otaya ka pangela aantu mboka inaaya ya megulu natango.

Marcus: Ndyoka otali ka kala etompelo ewanawa, ngele ando aantu ayehe aawanawa otaya yi megulu. Ihe onda hala tu tale oshinima shilwe. Mbela otashi vulika aantu yamwe aawanawa itaaya yi mo megulu?

Robert: Inandi uva nando onale Omukriste i itaala oshinima sho.

Marcus: Oohapu ndhoka dhi li mEpisalomi 37:29, odho dha ningitha ndje ndi ku pule epulo ndyoka. Mbela oto vulu okulesha ovelise ndjika?

Robert: Eewa. Otayi ti: “Aayuuki otaa ka thigulula evi e taa kala mo sigo aluhe.”

Marcus: Tangi. Mbela owa mona kutya aantu aawanawa otaya ka kala peni?

Robert: Ovelise otayi ti kutya okombanda yevi.

Marcus: Osho naanaa, ihe itaya kala ko owala okathimbo okashona. Ndhindhilika kutya ovelise otayi ti: ‘Otaa ka kala mo sigo aluhe.’

Robert: Ngiika shoka otashi ti owala kutya kombanda yevi otaku kala aluhe aantu aawanawa. Molwaashoka ngele otwa si e tatu yi megulu, ohatu pingenwa po kaantu yalwe aawanawa mboka taya valwa.

Marcus: Aantu oyendji otashi vulika osho ya fatulule ovelise ndjika ngaaka. Ihe mbela otashi vulika ovelise ndjika yi kale tayi popi shimwe shi ili? Mbela otashi vulika tayi ti kutya aantu aawanawa oyo yene taya ka kala sigo aluhe kombanda yevi?

Robert: Kandi shi shi naanaa kutya oto ti ngiini.

Evi otali ka ninga Oparadisa

Marcus: Natu tale ishewe shoka ovelise yilwe yOmbiimbeli tayi ti kutya onkalamwenyo kombanda yevi otayi ka kala ngiini monakuyiwa. Natu leshe Ehololo 21:4. Kombinga yaantu mboka taya ka kala ko monakuyiwa ovelise otayi ti: “Oye [Kalunga] ota ka theta po omahodhi agehe momeho gawo. Oko noitaku kala we eso, oluhodhi, [elilo] nenge uuwehame. Oshoka iikulu oya hula po.” Mbela ndika kali shi etegameno ewanawa?

Robert: Ee. Ihe ondi wete kutya ovelise otayi popi kombinga yankene onkalamwenyo tayi ka kala megulu.

Marcus: Oshoshili kutya mboka taya yi megulu otaya ka mona omalaleko nuuyamba ga faathana. Ihe natu tale po ishewe povelise mpoka. Aniwa oshike tashi ka ningilwa eso?

Robert: Otayi ti kutya ‘itaku ka kala we eso.’

Marcus: Osho lela. Ondi inekela oto ka zimina kutya opo oshinima kaashi kale po we oshi na okukala opo sha li nale.

Robert: Osho.

Marcus: Ndele megulu shivalelwe mu kale eso. Kombanda yevi oko owala aantu haya si.

Robert: Hmm. Ondi na oku shi dhiladhila manga.

Marcus: Owu wete ko Robert, Ombiimbeli otayi ti kutya aantu yamwe aawanawa otaya ka ya megulu, ihe oyendji yomwaamboka otaya ka kala kombanda yevi huka sigo aluhe. Ondi inekela owu uva nale oohapu dha tseyika nawa ndhoka tadhi ti: “Aanelago oomboka aaifupipiki, oshoka oyo taa ka thigulula evi.”—Mateus 5:5.

Robert: Ee, oohapu ndhono ohandi dhi uvu tadhi leshwa iikando oyindji mongeleka.

Marcus: Ngele aaifupipiki otaya ka thigulula evi, mbela shoka itashi ulike kutya aantu otaya ka kala kombanda yevi? Mboka taya ka kala kombanda yevi otaya ka mona uuwanawa mboka wa hunganekwa mEhololo muka. Otaya ka mona sho uuyuni tawu lunduluka thiluthilu, molwaashoka Kalunga ota ka kutha po uuwinayi auhe, neso nokuli.

Robert: Ngashingeyi ondi uvite kutya owa hala okutya shike, ihe kandi wete ngele ovelise yimwe nenge mbali odha yelitha ngaa oshitsa shoye.

Marcus: Owu li mondjila, molwaashoka opu na omanyolo ogendji taga popi kombinga yankene onkalamwenyo kombanda yevi tayi ka kala monakuyiwa. Otandi vulu ndi ku ulukile oohapu dhimwe ndhoka ndi hole ngele owu na okathimbo?

Robert: Aaye ondi na po uumunute wontumba.

“Aadhudhu otaa ka kana po mbala”

Marcus: Metetekelo otwa lesha Episalomi 37:29. Natu shune ko ishewe kEpisalomi hoka. Ngashingeyi natu leshe ovelise 10 nosho wo 11. Mbela oto vulu okulesha po poovelise ndhika?

Robert: Ee. Otadhi ti: “Aadhudhu otaa ka kana po mbala; nando u ya konge, ito ya mono. Aaifupipiki otaa ka thigulula evi notaa ka mona uulinawa nombili.”

Marcus: Tangi. Ovelise 11 otayi popi kutya “aaifupipiki” nenge aantu aawanawa otaya ka kala peni?

Robert: Otayi ti kutya “otaa ka thigulula evi.” Ihe ondi wete kutya ovelise ndjino otayi popi kombinga yethimbo ndika tu li, molwaashoka kombanda yevi kunena oku na aantu aawanawa.

Marcus: Owu li mondjila. Ihe ndhindhilika wo kutya ovelise otayi ti aantu aawanawa otaya ka mona “uulinawa nombili.” Mbela muuyuni kunena omu na ombili?

Robert: Aaye, kamu na.

Marcus: Ongiini euvaneko ndika tali ka gwanithwa? Natu shi thaneke: Natu tye ando owu na egumbo lyuufuleta moka we etha mu kale aantu yalwe taya futu komwedhi. Yamwe yomaakalimo oye li nawa nohaye li sile oshimpwiyu noye li nawa naashiinda. Owa hala nokuli ya kale mo. Ihe aakalimo yalwe kaye li nawa nohaya yonagula iinima megumbo nokaye na ekwatathano ewanawa naashiinda. Mbela ngele aakalimo mboka ye na iikala iiwinayi inaya hala okulundulula omikalo dhawo, oto ka ninga po shike?

Robert: Otandi ya tidha mo.

Marcus: Shoka osho naanaa Kalunga ta ka ningila aantu mboka aawinayi kunena. Natu tale ishewe ovelise 10. Otayi ti: “Aadhudhu otaa ka kana po mbala.” Shoka osha hala okutya Kalunga ota ka “tidha” po aantu mboka taya ningile yalwe uuwinayi. Ngele sha ningwa, aantu aawanawa otaya ka vula okunyanyukilwa onkalamwenyo yombili kombanda yevi. Ondi shi shi kutya oshinima shika shaantu aawanawa taya ka kala sigo aluhe kombanda yevi otashi vulika sha yooloka ko kwaashoka wa longwa nale.

Robert: Inandi shi uva mo nale mongeleka yetu.

Marcus: Ihe ngaashi we shi popi metetekelo, inashi gwana owala okutala kovelise yimwe nenge mbali. Ihe otwa pumbwa okukonakona shoka Ombiimbeli ayihe tayi ti kombinga yonakuyiwa yaantu aawanawa. Shi na ko nasha nomanyolo ngoka twa lesha nena, mbela otashi vulika shi kale shi li ngeyi kutya aantu owala yamwe aawanawa taya yi megulu, omanga ayehe yalwe aawanawa taya ka kala kombanda yevi sigo aluhe?

Robert: Kandi shi shi naanaa. Ihe onda mona kutya osha fa osho tashi popiwa momanyolo ngoka twa zi nokulesha. Onda hala oku ke shi dhiladhila muule.

Marcus: Sho to ka dhiladhila kombinga yaashoka, otashi vulika wu ka kale wu na omapulo galwe. Pashiholelwa, ongiini kombinga yaantu aawanawa mboka ya li ko nale omanga inaatu valwa? Mbela ayehe oya ya megulu? Ngele hasho, oye li peni ngashingeyi?

Robert: Omapulo ngoka omawanawa shili.

Marcus: Opu na iinima iyali tandi vulu oku ku ningila. Shotango, nandi ku nyolele pokambapila omanyolo gontumba ngoka taga popi kombinga yoshinima shika.a Oshitiyali, onda hala ndi galuke tu ye tu kundathane omanyolo ngoka konima ngele wa mono ethimbo lyoku ga lesha noku ga dhiladhila. Mbela shoka oshi li ngiini?

Robert: Eewa, oshi li nawa. Tangi.

[Enyolo lyopevi]