Antikristus oye lye?

OKUZA sho uutumbulilo “antikristus” wa kala nokulongithwa kaakwaniilwa nosho wo moomuvi wu li endhindhiliko mu kehe shimwe, oshi li pandunge okupula kutya: Antikristus oye lye? Mbela uutumbulilo mbuno owe tu guma kunena? Opo tu mone lela mpoka pwa za uutumbuli antikristus, tango natu tale mOmbiimbeli, moka wa holoka mo lwiikando itano.

ANTIKRISTUS TA HOLOLWA KUTYA OYE LYE

Omuyapostoli Johannes, oye owala gumwe gwomaanyoli yOmbiimbeli ngoka a longitha uutumbulilo “antikristus.” Uutumbulilo mboka okwe wu yelitha ngiini? Montumwafo ye yotango ndjoka ye mu lukilwa okwa ti: “Aamwandje, ehulilo oli li popepi! One mwa lombwelwa kutya omukondjithi gwaKristus ote ke ya. Ngashingeyi okwa holoka nale aakondjithi oyendji yaKristus, onkee otu shi shi kutya ehulilo oli li popepi. Aantu mbaka oya zile mutse, ihe kaya li [ooyakwetu], onkee oye tu thigi po e taa yi. . . . Olye ano omufundja? Oye tuu ngoka ta tindi okutya, Jesus oye Kristus.” —  1 Johannes 2:18, 19, 22.

Oshike tatu ilongo moohapu ndhika? Sho Johannes a tumbula “aakondjithi oyendji yaKristus,” oku ulike kutya antikristus, keshi omuntu gwotumba, ihe ongundu yaantu. Aantu nenge omahangano ngoka ge li ooantikristus, otaga taandelitha iifundja, sho taga ti kutya Jesus ke shi Kristus nenge Messiasa. Otaga kambadhala okupukitha aantu kombinga yaKalunga nOmwana Jesus Kristus. Aantu mboka ye li ooantikristus, oya li ya hala oyo yi ithanwe Kristus nenge aakaleli po ye. Ihe okuza ngaa sho ‘ye tu thigi po,’ oye etha okulandula omalongo gashili gOmbiimbeli. Natango, ongundu yaantu mbaka opo ya li pethimbo sho Johannes a nyola ontumwafo ye ‘pethimbo lyehulilo,’ tashi vulika pehulilo lyethimbo lyaayapostoli.

Omuyapostoli Johannes okwa nyola ishewe shike kombinga yooantikristus? Sho a popi kombinga yaahunganeki aafundja, okwa ti: “Kehe ngoka ta hempulula kutya Jesus Kristus okwa ningi omuntu, oye oku na Ombepo yaKalunga. Ihe kehe ngoka ta tindi oshinima shika kombinga yaJesus, oye kee na Ombepo yaKalunga, ndele ombepo yomukondjithi gwaKristus, ngoka mwe mu uvu kutya ote ya, nongashingeyi oku li nale muuyuni.” (1 Johannes 4:2, 3) Montumwafo ye ontiyali, Johannes okwe endulula ishewe oshinima shika kutya: “Aapukithi oyendji oya ya nuuyuni. Aantu ya tya ngaaka itaa hempulula nande kutya Jesus Kristus okwa ningi omuntu. Aantu mboka oyo aahongololi naakondjithi yaKristus!” (2 Johannes 7) Osha yela kutya, Johannes okwa li u uvite ko kutya antikristus aantu mboka ye na elalakano lyokutaandelitha iifundja momalongelokalunga kombinga yaJesus Kristus nomalongo ge.

“AAHUNGANEKI AAFUNDJA” NOSHO WO “MWIINAYI MWENE”

Nalenale manga Johannes inaa nyola kombinga yiifundja mbyoka tayi taandelithwa komalongelokalunga, Jesus Kristus okwa londodha aalanduli ye a ti: “Angaleni aahunganeki aafundja mboka taye ya kune molupe lwoonzi, ihe meni lyawo omambungu haga lyana.” (Mateus 7:15) Omuyapostoli Paulus naye wo okwa li a londodha Aakriste yomuTessalonika a ti: “Inamu etha mu pukithwe nando komuntu okomukalo gwasha. Oshoka esiku ndyoka [esiku lyaJehova] itali ya, eiteko manga inaali ya, nomuntu [omukeenampango, NW] manga ina holoka, oongoka omuna gwekano.” — 2 Aatessalonika 2:3, OB 1954.

Methelemumvo lyotango, aahunganeki aafundja nosho wo mboka hayi iti aakriste, oya kala nale taya kambadhala okuthindila pevi egongalo lyopaKriste. Uutumbulilo “antikristus” mboka wa yelithwa kuJohannes, owa kwatela mo aantu ayehe mboka haa taandelitha iifundja nosho wo mboka taya pukitha aantu momalongelokalunga, shi nasha naJesus Kristus nomalongo ge. Etaloko lyaJehova kombinga yaantu mbaka olya hololwa sho Paulus e ya ithana ‘aana yekano.’

KOTOKELA OOANTIKRISTUS YOKUNENA

Ongiini kunena? Aantu nosho wo omahangano ngoka ge li ooantikristus, onkee ngaa taya tsikile okukondjitha Kristus nomalongo ge. Elalakano lyawo lyokutaandelitha iifundja nokupukitha aantu, olyo okungwangwaneka aantu kaaya mone eyooloko pokati kaJehova Kalunga nosho wo Omwana Jesus Kristus. Otu na lela okukala twa kotokela iifundja yomalongelokalunga ngoka. Natu tale kiiholelwa iyali.

Uule womathelemimvo, Oongeleka odha kala nokuhumitha komeho elongo lyUukwatatu, kutya kalunga oHe kalunga Omwana. Ooantikristus mboka oya kala nokupopya iifundja nokungwangwaneka aantu, opo kaaya mone eyooloko pokati kaJehova Kalunga naJesus Kristus. Engwangwano ndika olyi imba aantu kaaya vule okuholela Jesus Kristus nosho wo ya hedhe popepi naKalunga ngaashi Ombiimbeli tayi ya ladhipike. —  1 Aakorinto 11:1; Jakob 4:8.

Oongeleka odha ngwedha ko kengwangwano lyaantu sho tadhi longitha omatoloko gOombiimbeli ndhoka kaadhi na edhina lyaKalunga, Jehova. Ohaye shi ningi nonando edhina Jehova olya holoka mOmbiimbeli lwiikando 7 000 mOmanyolo gotango. Oshizemo oshini? Engwangwano ndyoka olyi imba Kalunga kashili a kale i iwetikile.

Mepingathano naashono, okutseya edhina lyaKalunga, Jehova, okwa kwathela aanamitima omiwanawa oyendji ye mu longele noya hedhe popepi naye. Richard, ota dhimbulukwa oonkundathana dhe nOonzapo dhaJehova mbali. Okwa ti: “Oyu ulukile ndje okuza mOmbiimbeli kutya edhina lyaKalunga kashili, oJehova. Onda li nda kumwa sho ndu uvu kutya Kalunga oku na edhina lye lyopaumwene, oshinima shoka inaandi uva nando onale.” Okuza mpono, okwa ningi omalunduluko monkalamwenyo ye a landule omithikampango dhOmbiimbeli nokunyanyudha Jehova. “Sho ndi ilongo kombinga yedhina lyaKalunga osha kwathela ndje ndi kokeke ekwatathano lyopothingo naye.”

Muule woomvula omathele, ooantikristus oya kala nokutula aantu omamiliyona momilema dhopambepo. Sho tatu konakona oohapu dhaKalunga, Ombiimbeli, otatu vulu okwiilonga mpoka pwa ziilila antikristus nosho wo okukala twa manguluka komalongelokalunga giifundja nokomapukitho gawo. —  Johannes 17:17.