Hanga omutima womukonakoni woye
1 Fimbo ina londa keulu, Jesus okwa lombwela ovahongwa vaye va honge ovanhu va ‘diinine’ oinima aishe oyo e va lombwela. (Mat. 28:19, 20) Ngeenge omunhu ota ka ‘diinina’ omalombwelo aKristus, ouyelele u na sha nomalombwelo aa ou na okuhanga omutima waye. (Eps. 119:112) Ongahelipi to dulu okulinyengifa omutima wao to kwafele a konakone Ombibeli?
2 Ilikana Jehova e ku pe omayele: Okuninga ovanhu ovahongwa oilonga yaKalunga. Enangeko noupuna laye olo la fimanenena mokushipondola, ndelenee haenghono detu. (Oilonga 16:14; 1Kor. 3:7) Onghee hano, okwiilikana omolwekwafo laJehova mokuhonga oshili kuvamwe osha fimanenena.—Jes. 50:4.
3 Shiiva kutya omukonakoni okwa itavela shike: Okushiiva osho ovanhu va itavela nomolwashike va itavela musho, otashi dulu okutu pa ouyelele tu mone kutya oshike tu na okupopya opo tu hange omitima davo. Omolwashike omukonakoni e wete ehongo lonhumba lihokwifa kuye? Oshike she mu tomha kutya oli shii okwiitavelwa? Eshiivo latya ngaha otali dulu okutu kwafela tu popye neendunge dokuyoolola.—Oilonga 17:22, 23.
4 Ninga etomhafano lopamishangwa ta li itavelifa: Oshili nai kale tai ti sha komukonakoni. (Oilonga 17:24-31) Otu na okuyandja etomheno la kola leteelelo letu. (1Pet 3:15) Ndelenee, shi ninga alushe monghedi yonghenda noyelididimiko.
5 Li koleka nomafaneko: Omafaneko i tae shi ningi ashike shipu komukonakoni a ude ko ndelenee otaa pendula yo omaliudo. Omafaneko otaa nwefa mo omadiladilo nomutima. Jesus okwe a longifa luhapu. (Mark 4:33, 34) Doshili, opo efaneko olo tali longifwa li kale nomupondo, oli na okukala tali wapalele oshitwa osho tashi kundafanwa noli na okukala lina ekwatafano nonghalamwenyo yomukonakoni.
6 Ulika komauwa oo taa di mokutambula ko oshili: Ovanhu ova hala okushiiva omauwa oo taa di mokulongifa osho tave lihongo. Kwafela omukonakoni woye a mone ounongo weendjovo daPaulus mu 2 Timoteus 3:14-17.
7 Ino teka omukumo ngeenge vamwe itave linyenge kehongo loye. Havanhu aveshe ve na omitima di na ehalo loku li tambula ko. (Mat. 13:15) Ndelenee, oohandimwe vamwe ohava ningi ovaitaveli. (Oilonga 17:32-34) Eenghendabala doye dokuhanga omitima nonghundana iwa nadi kwafele natango vahapu va tambule ko nova ‘diinine’ osho Jesus a popya.