Pulakena e to ilongo
1. Omolwashike tashi vulika tu kale twa pumbwa okuninga oonkambadhala dha mana mo tu pulakene nokwiilonga po sha poshigongi shoshitopolwa?
1 Masiku oshigongi shoshitopolwa sho 2013 otashi tameke. Opwa ningwa omalongekidho ogendji, opo oshigongi shi vule okukwathela aantu muuyuni awuhe moompumbwe dhawo. Mbela owa ninga nale omalongekidho opo wu ka kale po omasiku agehe gatatu? Piigongi iinene ohapu kala omapiyaganeko ogendji, onkee ano, otashi vulika twa pumbwa okuninga oonkambadhala dha mana mo tu gandje eitulomo kopolohalama. Molwaashoka omutumba ohagu kwata ethimbo ele gu vule ethimbo lyokugongala, ohashi pula omuntu a kale ta gandja eitulomo ethimbo ele. Kakele kaashono, olweendo nosho wo iinima yilwe otayi vulu okuningitha omuntu a kale a vulwa. Oshike tashi ke tu kwathela tu kale twa tonata opo tu vule okupulakena nokwiilonga? — Deut. 31:12.
2. Ongiini tatu vulu okulongekidhila omitima dhetu opolohalama yoshigongi?
2 Manga oshigongi inaashi tameka: Kehala lyetu lyokointaneta lyopambelewa, www.pr2711.com, oku na elandulathano lyoshigongi (ethimbo lyopolohalama yeni yoshigongi olyu ulikwa pevi) ndyoka li na iipalanyolo yiipopiwa ayihe nosho wo enyolo limwe nenge gaali poshipalanyolo kehe. Ngele otu na ointaneta, okweendulula uuyelele mbuka otashi ke tu kwathela tu longekidhile omitima dhetu shoka tashi ka popiwa po. (Esra 7:10) Mbela itamu vulu okukundathana opolohalama yoshigongi pethimbo lyElongelokalunga lyUukwanegumbo weni, opo aanegumbo lyeni ya kale ya tegelela oshigongi nondjuulukwe?
3. Oshike tashi ke tu kwathela tu pulakene neitulomo?
3 Pethimbo lyomutumba: Ngele otashi wapa natu ye kokandjugo omanga omutumba inaagu tameka. Dhima ongodhi yoye, opo kuu piyaganekwe kwaamboka taye ku dhengele nenge taye ku tumine omatumwalaka nenge wu kale to tumine yalwe omatumwalaka pethimbo lyopolohalama. Ngele ongodhi yoye oyi na okukala ya patuluka, yi tula momukalo moka itaayi piyaganeke aapulakeni ngele gumwe te ku dhengele. Ngele oto longitha oshikwaelektronika shoka hashi ithanwa tablet pethimbo lyopolohalama, shi ninga momukalo ngoka itaagu piyaganeke yalwe. Ino lya nenge wu nwe pethimbo lyomutumba. (Omuuv. 3:1) Kala wa tala komupopi. Landula mOmbiimbeli yoye uuna taku leshwa enyolo. Nyola omaidhimbulukitho.
4. Ongiini aavali taya vulu okukwathela oyana ya pulakene noyi ilonge?
4 Otwa hala wo aanona yetu ya kale taya pulakene noyi ilonge po sha. Omayeletumbulo 29:15 otaga ti: “Olunwa negeelo ohali gandja owino, ihe omumati ngoka a lelwa ondembula, ota sitha yina ohoni.” Onkee ano, oshi li nawa aanegumbo ya kuutumbe pamwe, opo aavali ya vule okumona kutya oyana otaya pulakene kopolohalama pehala lyokukala taya popi, taya tumu omatumwalaka nenge taye endagula. Nonando aashona unene okuuva ko kehe shimwe tashi popiwa, aanona otaya vulu okudheulwa ya kale ya tonata noya kuutumba ya mwena.
5. Omolwashike shi li nawa tu endulule shoka twi ilongo poshigongi, nongiini tatu vulu oku shi ninga?
5 Esiku kehe konima yokuzimbuka: Ino talela po sigo kwa toko. Ka lale kuyele, opo wu vululukwe nawa. Okweendulula shoka sha popiwa po otashi ke ku kwathela wu kale to shi dhimbulukwa ethimbo ele. Onkee ano, otashi ka kala shi li nawa mu longithe ominute dhontumba mu kundathane shoka sha popiwa poshigongi mu li aanegumbo ongulohi kehe. Ngele oto yi korestolanda nookuume koye, oshike itoo faalele omaidhimbulukitho goye nokukundathana nayo oshitsa shimwe nenge iyali mbyoka wa li wa nyanyukilwa unene. Ngele oshigongi sha pu, otamu vulu okukala hamu kundathana omathimbo gamwe pethimbo lyElongelokalunga lyUukwanegumbo weni nkene tamu vulu okutula miilonga uuyelele mboka mu li aanegumbo. Otamu vulu wo okwiitulila po ethimbo oshiwike kehe mu endulule omanenedhiladhilo goshipopiwa shi na ko nasha nokugandja oshileshomwa kehe oshipe.
6. Mbela osha gwana owala okukala poshigongi? Shi yelitha.
6 Nonando otu kale tu na iikulya oyindji, itayi ke tu kwathela sha ngele itatu yi li nenge ngele epunda lyetu itali yi myanga. Otatu vulu okupopya sha faathana shi na ko nasha niikulya yopambepo mbyoka tayi ka gandjwa poshigongi shoshitopolwa. Ngele otwa ka kala po poshigongi ashihe, tatu pulakene neitulomo nokutula miilonga shoka twi ilongo, otatu ka mona po uuwanawa owindji.