Palutha oompumbwe dhoye dhopambepo
1 Oshigongi shetu tashi ya shoshitopolwa “Aauvithi yUukwaniilwa aalaadhi” otashi tu pe ompito onkumithi okupalutha oompumbwe dhetu dhopambepo. Ngaashi okulya panyama okuwanawa, oprograma otayi uvaneke oku tu palutha pambepo “noohapu dheitaalo.” (1 Tim. 4:6) Otashi ke tu kwathela tu hedhe popepi naJehova. Otatu vulu okutegelela okumona omayele netsomukumo oku tu kwathela tu pondole omamakelo monkalamwenyo yetu. Jehova ote tu shilipaleke ta ti: “Ongame nda hala, ndi ku longe nondi ku tseyithile ondjila u na okweenda nayo, otii ku pukulula noku ku tonatela nomeho gandje.” (Eps. 32:8) Inatu lalekwa tuu nuuyamba okukala tu na ewiliko lye lyopahole monkalamwenyo yetu! Tala koonkatu dhimwe tadhi kwatha ndhoka tatu vulu okukatuka opo tu mone uuwanawa oundji moprograma yoshigongi.
2 Otu na okulongekidha omutima gwetu: Kehe gumwe gwomutse oku na oshinakugwanithwa okugamena omutima gwe gwopathaneko. (Omayel. 4:23) Shika otashi pula opo tu kale tu na eipangelo nopo twaahi ifundjaleke. Oshigongi osho ethimbo lyokutedhatedha kombinga yekwatathano lyetu naJehova, ethimbo ‘lyokutala mompango ya gwana yemangululo.’ Okulongekidha omutima gwetu gu kale tagu ‘taamba oohapu dha tsikwa mutse,’ otu na okwiindila Jehova e tu konakone, a dhimbulule ‘ondjila yepukitho’ kehe yi li mutse ya pumbwa okwoopalekwa, noku tu endithila “mondjila yaaluhe.” — Jak. 1:21, 25, yelekanitha KB; Eps. 139:23, 24, yelekanitha KB.
3 Pulakena e to tedhatedha: Jesus okwa pandula Maria mokugandja eitulomo koohapu dhe, ta ti: “Maria okwi ihogololele ontumba ombwanawa itayi mu kuthwa.” (Luk. 10:39, 42) Ngele otu na iikala yopamadhiladhilo ya fa mbyoka, itatu ka pitika omaupyakadhi omashona ge tu piyaganeke. Otatu ka shilipaleka opo tu kale twa kuutumba nokupulakena nawa oprograma ayihe. Otatu ka yanda okupopyapopya nenge okweendagula inaashi pumbiwa notatu ka kala twa kotoka kaatu piyaganeke yalwe noongodhi dhopeke, oopager, omathano gokuthaneka nomathano gokuninga oovidio.
4 Uuna tatu pulakene iipopiwa, oshi li nawa okuninga omaidhimbulukitho omafupi oku tu kwatha tu landule manga oshipalanyolo tashi gandjwa. Otu na okukwatakanitha kumwe shoka tu uva naashoka tu shi nale. Shika otashi ke tu kwathela tu uve ko notu dhimbulukwe uuyelele mboka. Ngele tatu endulula omaidhimbulukitho getu, otu na oku shi ninga nelalakano lyokutula miilonga uuyelele mboka. Kehe gumwe gwomutse ota vulu okupula ta ti: ‘Shika mbela otashi gumu ngiini ekwatathano lyandje naJehova? Omalunduluko geni ndi na okuninga monkalamwenyo yandje? Ongiini mbela tandi vulu okulongitha uuyelele mbuka mokweendathana kwandje nayalwe? Ongiini mbela tandi vulu oku wu longitha muukalele wandje?’ Kundathana nayalwe iitsa mbyoka wa pandula unene. Okuninga iinima mbika otaku tu kwatha tu ipungulile oohapu dhaJehova ‘moomwenyo dhetu.’ — Omayel. 4:20, 21.
5 Natu tule miilonga shoka tatu ilongo: Konima yokukala poshigongi shoshitopolwa, gumwe ngoka a li po okwa ti: “Oprograma oya li tayi inyengitha omuntu noonkondo paumwene a konakone onkalo yomutima gwe nosho wo yomomutima gwuukwanegumbo we, nosho wo okugandja ekwatho lyopahole lyopamanyolo ngaashi sha pumbiwa. Oya kwathele ndje ndi kale nda tseya unene oshinakugwanithwa shandje okugandja ekwatho olindji kegongalo.” Otashi vulika oyendji yomutse twa li tu uvite sha faathana. Ihe inashi gwana tu ze po owala tu uvite twa tungwa notwa talalekwa. Jesus okwa ti: ‘Shika ngele mu shi shi, one aanelago, nge tamu shi ningi.’ (Joh. 13:17) Otu na okutula miilonga nuudhiginini iitsa mbyoka tayi longo kutse yene. (Fil. 4:9) Shika osho oshipatululo shokupalutha thiluthilu oompumbwe dhetu dhopambepo.
[Oshimpungu pepandja 3]
Tedhatedha shoka wu uva:
■ Otashi gumu ngiini ekwatathano lyandje naJehova?
■ Otashi nwetha mo ngiini okweendathana kwandje nayalwe?
■ Ongiini tandi vulu oku shi tula miilonga monkalamwenyo yandje nomuukalele wandje?