Longitha Ombiimbeli nuukeka
1. Omolwashike Ombiimbeli yi na oshilonga noonkondo?
1 Ngele otu shi okulongitha nuukeka Oohapu dha nwethwa mo, otatu ka vula okuuvitha nokulonga oshili momukalo gwa yela nokuyaneka pomutenya omalongo giifundja noonkuluhedhi dhopantu. — 2 Tim. 2:15; 1 Pet. 3:15.
2. Oshike tashi ke tu kwathela tu mone omanyolo nuupu?
2 Kala wu shi nawa Ombiimbeli: Omuntu oho tseya nawa okulongitha oshilongitho shoka ho longitha olundji. Ngele owa lesha Ombiimbeli ayihe oto ka mona kutya enenedhiladhilo lyayo olini. Otashi ke ku kwathela wo wu dhimbulukwe Omanyolo nokukala ho ga mono nuupu. Sho to ilongo nawa Omanyolo oto ka popya nehwamo nonuushili sho to gandja uunzapo wontukuluka nosho wo uuna wu li muukalele. — 1 Tes. 1:5.
3, 4. (a) Omikalo dhimwe ndhoka tadhi tu kwathele tu tseye nawa Ombiimbeli odhini? (b) Mbela owu na omikalo dhilwe ndhoka ho longitha oku ku kwathela wu tseye Omanyolo?
3 Kala ho landula mOmbiimbeli yoye uuna Omanyolo taga leshwa pokugongala. Uuna to ningi ekonakono lyopaumwene nenge to ilongekidhile okugongala, lesha Omanyolo ngoka inaaga tothwa mo nokutedhatedha nkene wu na oku ga tula miilonga. Oyendji ohaya dhimbulukwa nuupu Omanyolo ngoka ya lesha mOmbiimbeli yo yene, pehala lyoku ga lesha kokompiuta. — Joh. 14:26.
4 Omaukwanegumbo gamwe ohaga unganeke ethimbo lyokwiilonga Omanyolo gOmbiimbeli momutse. Shika otashi vulu okuningwa mokulongitha uukalata mboka enyolo hali kala lya nyolwa kombinga yimwe e tali tothwa mo kombinga onkwawo. Ohaya ningi omalufo ya tale ngele otaya vulu okudhimbulukwa Omanyolo ngoka. Okwiidheula omafalomo giilonga yomomapya nosho wo okuyamukula aapataneki nenge omapulo mokulongitha Ombiimbeli, otashi ka humitha wo komeho ontseyo yetu.
5. Omolwashike twa pumbwa okuhumitha komeho ontseyo yetu yOmbiimbeli?
5 Ombiimbeli itayi vulu okuyelekanithwa nando nembo lyontumba. Muyo omwa nyolwa oohapu ndhoka tadhi vulu oku pa aantu ‘oondunge ya thike mehupitho.’ (2 Tim. 3:15) Otu na etompelo ewanawa okuhumitha komeho ontseyo yashili ndjoka yi li mOmbiimbeli noku yi ulukila aantu, molwaashoka oyendji moshitopolwa shetu inaya tseya uunongo mboka wu li mo wu na ondilo. — Omayel. 2:1-5.