Iilonga mbyoka tayi shambula unene
1. Iilonga yokwaaludha pambepo yini tayi longwa kunena?
1 Omitima dhaantu yomethelemumvo lyotango odha li tadhi hunga kenyanyu sho ya li ya mono aavu taya aludhwa komikithi. (Luk. 5:24-26) Kunena, natse otatu nyanyukilwa iilonga yokwaaludha pambepo. (Eh. 22:1, 2, 17) Ohashi tu nyanyudha uuna tatu lesha iimoniwa yoohandimwe mboka ya ninga omalunduluko kekwatho lyOohapu dhaJehova nolyombepo ye ondjapuki. Ihe shoka hashi tu nyanyudha noonkondo, ongele hatu kutha ombinga miilonga mbika mokukala tu na omukonakonimbiimbeli ta humu komeho.
2. Enyanyu lini hatu mono uuna tatu longo omuntu oshili?
2 Yamwe ohaye tu pula taya ti: Edhina lyaKalunga olye? Omolwashike e etha aantu taya mono iihuna? Uukwaniilwa waKalunga otawu ke tu ningila shike? Iha tu kala owala twa nyanyukwa sho tatu yamukula omapulo ngoka, ihe naasho wo tu wete omukonakonimbiimbeli u udha enyanyu sho ti ilongo oshili. (Omayel. 15:23; Luk. 24:32) Sho omukonakonimbiimbeli ta ningi ehumokomeho, otashi vulika a tameke okutumbula edhina lyaJehova, okuzala nokwiiyopaleka nawa, okweetha omikalondjigilile omiwinayi, nokutameka okuuvithila yalwe. Ngele okwa ningi ehumokomeho sigo i igandjele Jehova e ta ninginithwa, oha ningi omumwatate nomulongi pamwe natse. Iinima ayihe mbyoka ohayi tu nyanyudha. — 1 Tes. 2:19, 20.
3. Oshike tatu vulu okuninga opo tu tameke ekonakonombiimbeli?
3 Mbela oto vulu okukutha ombinga? Ngele owa hala okulonga iilonga mbika tayi nyanyudha noonkondo, galikana Jehova e ku pe uuthembahenda wokutameka ekonakonombiimbeli e to katuka metsokumwe negalikano lyoye. (1 Joh. 5:14) Uvitha pehala nopethimbo mpoka aantu taya monika. Uuna tashi opalele kambadhala wu tameke ekonakonombiimbeli. (Omuuv. 11:6) Uuna wa mono omuntu tu ulike ohokwe, shuna ko wu ka tekele oombuto dhoshili ndhoka wa kuna. — 1 Kor. 3:6-9.
4. Omolwashike shi li she endelela tu konakone Ombiimbeli naantu kunena?
4 Aantu oyendji kunena onkee ngaa taya hepekwa kondjala nokenota lyuuyuuki. Mbela olye te ke ya kwathela ya tseye Jehova? (Mat. 5:3, 6) Omanga ethimbo lyeteyo inaali thika pehulilo, natu longeni iilonga yokuuvitha noyokuninga aantu aalongwa tatu shi ningi nehalo ewanawa. — Jes. 6:8.