Mbela iilonga yuukokolindjila inayi ku opala?
1-3. Yamwe ohaya ti kutya uukokolindjila kawu shi wakehe gumwe. Otandi shi tseya ngiini kutya otawu opala ndje?
1 Mbela owa dhiladhila ngaa pamwe negalikano ngele iilonga yuukokolindjila inayi ku opala? Molwaashoka otwi iyapulila Jehova nomutima aguhe, otu na okukala twa hala okutala ngele itatu vulu okukala tu na ombinga pakuudha mokutaandeleka onkundana ombwanawa yUukwaniilwa. Onkee ano, tala komapulo gamwe ngoka oyendji haya pula kombinga yiilonga yuukokolindjila.
2 Eyamukulo otali ki ikolelela koonkalo dhoye nosho wo kiitegelelwa yopamanyolo. Opu na oyendji mboka uukolele wawo nenge oonkalo moka ye li monkalamwenyo itaadhi ya pitike ya longe oowili 70 omwedhi kehe muukalele. Shimwe ishewe, aamwatate oyendji naamwameme mboka kaaye na iinakugwanithwa oya kambadhala okukonga oompito opo ya vule okuya miilonga yuukokolindjila mokuninga omalunduluko miinima mbyoka ya li ya pititha komeho. Ongiini kombinga yoye? Mbela owu li omugundjuka ngoka a mana osikola? Mbela owu li omukulukadhi ngoka e na omusamane ta vulu okusila oshimpwiyu lela uukwanegumbo? Mbela owu li mondjokana noku na aanona mboka ya pumbwa esiloshimpwiyu? Mbela owa penzelwa? Okuninga omukokolindjila nenge hasho etokolo ndyoka kehe gumwe e na okuninga kuye mwene. Epulo oli li nduno mpano kutya, mbela ito vulu okugwedha mo uukokolindjila monkalamwenyo yoye?
3 Satana oha longitha onkalelo ye yiinima yuuyuni opo e tu ndumbile iinima mbyoka tayi tu piyaganeke noku tu ningitha tu kale nonkalamwenyo yokwiihola mwene. Ngele otwa tokola toko okukala kaatu shi oshitopolwa shuuyuni, Jehova ote ke tu kwathela tu pitithe komeho iinima yUukwaniilwa notu lalakanene nokukakatela omauthembahenda agehe giilonga yopaKalunga ngoka tu na. Ngele oto vulu okuninga omalunduluko moonkalo dhoye opo wu ninge omukokolindjila, omolwashike itoo shi ningi?
4-7. Ongiini tandi vulu okukala nuushili kutya otandi vulu okwiisila oshimpwiyu pashimaliwa miilonga yethimbo lyu udha?
4 Oshoshili kutya miilongo oyindji oowili ndhoka omuntu a tegelelwa a longe miilonga yokwiikongela omboloto oshiwike kehe opo a mone iipumbiwa yakehe esiku otadhi ende dhu uka pombanda omimvo nomimvo. Ihe kakele kaashono, oyendji oya kala taya kokola ondjila uule woomvula omilongo, na Jehova ota tsikile oku ya kwathela. Opo wu pondole wu li omukokolindjila, owa pumbwa eitaalo nosho wo ombepo yeiyambo. (Mat. 17:20) Otu na eshilipaleko ndyoka li li mEpisalomi 34:10 kutya mboka taya ‘kongo Jehova ihaya pumbwa sha.’ (OB-1954) Kehe ngoka ta yi miilonga yuukokolindjila oku na oku shi ninga neinekelo alihe kutya Jehova ote ku mu sila oshimpwiyu. Shoka ohe shi ningile aakokolindjila ayehe aadhiginini muuyuni awuhe! (Eps. 37:25) Eeno shili, metsokumwe nekotampango ndyoka li li mAatessalonika aatiyali 3:8, 10 nosho wo muTimoteus gwotango 5:8, aakokolindjila inaya tegelela yalwe oyo ya kale taye ya ambidhidha pashimaliwa.
5 Kehe ngoka ta dhiladhila iilonga yuukokolindjila oku na okukala ngaashi Jesus a popi a ti: ‘Kuutumba tango, wu yalule kutya otayi pula shi thike peni.’ (Luk. 14:28) Okuninga ngeyika ohaku ulike kutya owu na uunongo. Popya naamboka ye shi enditha nawa muukokolindjila wawo uule woomvula dhontumba. Ya pula kutya ongiini Jehova e ya sila oshimpwiyu.
6 Omuntu otashi vulika kaa mone thiluthilu uushili woohapu dhaJesus ndhoka a li u uvaneke muMateus 6:33 sigo i igandja ye mwene miikaha yaJehova. Uuyuni mboka we tu kundukidha otawu ende tawu nayipala mokulalakanena omaliko. Ihe okukala tu na olupandu lwuukalele wethimbo lyu udha ohalu tu ningitha tu kale twa gwanenwa nokashona hoka tu na. (1 Tim. 6:8) Aakokolindjila mboka haya kaleke oonkalamwenyo dhawo dhanathangwa nodhi na elandulathano ohaya kala ye na ethimbo lya gwana lyuukalele nohaya mono enyanyu olindji nosho wo oonkondo dhopambepo mokulonga yalwe oshili. Nonando ihaya kambadhala okukala ya fa oonun dhomalongelokalunga, omukalo moka haya tala ko onkalo yawo yopamahupilo ohagu ya ningitha ya nyanyukilwe omalaleko nuuyamba ngoka haga zi muukokolindjila.
7 Ngele owu wete lela kutya otu li momasiku gahugunina nosho wo kutya uuyuni mbuka wa kolokosha owu uka pehulilo, oto ki inyengithwa pambepo wu ninge omaiyambo ngoka ga pumbiwa opo wu kale ho uvitha onkundana ombwanawa pompito kehe. Mokutala nawa konkalo yoye yopashimaliwa nokutula iinima miikaha yaJehova, otashi vulika wu mone kutya oto vulu oku mu longela methimbo lyu udha. Nokuli nando owu na okweetha po iinima yontumba yopamaliko opo wu vule okukokola ondjila, oto ka nyanyukilwa omalaleko nuuyamba gaJehova. — Eps. 145:16.
8-12. Ndi li omugundjuka gwoomvula omulongo nasha, omolwashike ndi na okutala ko iilonga yuukokolindjila yi li eithano ndyoka omuntu ta vulu okuhogolola?
8 Manga wu li moomvula dhoye dhahugunina mosikola, oho dhiladhila kombinga yonakuyiwa. Oho kala wa hala okukala wa gamenwa, wa nyanyukwa nowa gwanenwa. Aalongi nosho wo mboka haya gandja omayele shi na ko nasha nosikola otashi vulika ya kambadhale oku ku ningitha wu lalakanene eithano hali futu nawa ndyoka hali pula wu ki ilonge oomvula odhindji kokoolidji. Eiyuvo lyoye lyopaKriste lya dheulwa nawa ohali ku lombwele kutya owu na okukala wi ilongekidha okulongela Jehova pakuudha ngaashi to vulu. (Omuuv. 12:1) Otashi vulika wo wu dhiladhile kombinga yokuya mondjokana nosho wo okukala nuukwanegumbo. Oto ka ninga po shike?
9 Omatokolo ngoka to ningi ngashingeyi otashi vulika ga ka nwethe mo onkalamwenyo yoye ayihe. Ngele owu li nale Onzapo yaJehova ye mu iyapulila noya ninginithwa, owa gandja omwenyo gwoye aguhe kuJehova. (Heb. 10:7) Ompito yotango wu na, kambadhala okukutha uukwathelikokolindjila uule womwedhi gumwe nenge dhi vule po. Shika otashi ke ku ningitha wu lole enyanyu nosho wo iinakugwanithwa mbyoka hayi endele pamwe nuukokolindjila, netaloko lyoye li na ko nasha naashoka wu na okuninga monkalamwenyo yoye otali ka kala lya yela. Pehala lyokulalakanena iilonga yokwiikongela omboloto ngele wa mana osikola, omolwashike itoo tameke uukokolindjila wondjigilile? Yamwe mboka ya li ya tegelele ye shi ninge nale monkalamwenyo ohayi ipe uusama sho inaaya tameka nziya.
10 Wu li omugundjuka, longitha nawa oompito ndhoka wu na wu lalakanene okukala inoo ya mondjokana, nyanyukilwa omauwanawa ngoka ho mono miilonga yokuuvitha ethimbo lyu udha. Ngele owu na ehalo lyokuya mondjokana siku limwe, kapu na sha shilwe hashi ningi ekankameno lyondjokana kaashi shi shi iilonga yuukokolindjila wondjigilile. Sho to koko palutu nopambepo, otashi vulika wu hogolole uukokolindjila owo wu ninge eithano lyoye pamwe naakuume koye kopandjokana ngoka naye e na edhiladhilo lya faathana. Aihokani yamwe mboka ya kala taya kokola ondjila pamwe oya ya miilonga yuutonatelishikandjo nenge yuutumwa. Eeno shili, hoka okukalamwenyo okwaanawa kwonkalamwenyo!
11 Kashi na nduno mbudhi kutya otu tsikile nuukokolindjila, oto ka kala wa tunga nawa onkalamwenyo yoye nokukala wa mona elongo lyongushu ndyoka kaapu na gulwe ta vulu oku li gandja. Uukokolindjila ohawu tu longo evuliko, okukala wu na elandulathano paumwene, nkene wu na okuungaunga naantu, okukala wi inekela muJehova nankene wu na okukokeka uukwatya weidhidhimiko nowohenda, uukwatya mboka tawu ke ku longekidha wu kale to vulu okuungaunga niinakugwanithwa iinene.
12 Onkalamwenyo yaantu oya kala nokulunduluka. Iinima iishona otayi kalelele shili, kakele kwaambyoka Jehova u uvaneka. Molwaashoka onakuyiwa yoye oye ku tegelela, ethimbo lini li li nawa to vulu okulongitha wu gandje eitulomo lya gwana kokudhiladhila kwaashoka to ka longitha onkalamwenyo yoye moomvula dhi li komeho? Tala nawa uuthembahenda wuukokolindjila. Ito ki ipa nando uusama ngele owa hogolola iilonga yuukokolindjila yi li eithano lyoye.
13-16. Mbela ihapu kala pu na ombunda aluhe okugwanitha po oowili? Ongiini ngele onda kala inaandi gwanitha oowili dhandje?
13 Uuna to udhitha ofooloma yuukokolindjila wondjigilile, owu na okuyamukula epulo ndika: “Mbela owa unganeka ngaa iinima yoye opo wu vule okugwanitha po oowili dhokomumvo 840?” Eeno, shika otashi pula wu unganeke nawa iinima yoye nosho wo eipangelo. Aakokolindjila oyendji ohaya kala ye na omukalo gu shi okugwanitha po oowili muule woomwedhi dhontumba.
14 Ihe nonando oongawo, Omuuvithi 9:11 ota popi oshili sho ta ti: “Ethimbo nombaadhilila otayi adha ayehe.” (NW) Uuwehame wa kwata miiti nenge oonkalo dhimwe dhombaadhilila ohadhi vulu okuningitha omukokolindjila a shune monima. Ngele uupyakadhi inawu kwata ethimbo ele nowa holoka po petameko lyomumvo gwiilonga, omukokolindjila ota ka pumbwa owala okulonga nuudhiginini kashona opo a futile po ethimbo ndiyaka a kanitha. Ihe ongiini mbela ngele opwa holoka uupyakadhi wa kwata miiti ku na owala oomwedhi oonshona omumvo gwiilonga gu pwe ko nomukokolindjila ita ka vula okugwanitha po oowili dhe?
15 Ngele owu na uuvu oomwedhi dhontumba nenge omolwomatompelo gamwe ge endelela ngoka itoo vulu okulundulula noito vulu okugwanitha po oowili, oto vulu okupopya noshilyo shOkomitiye yIilonga yEgongalo e to popi uudhigu woye. Ngele aakuluntugongalo mbaka oye wete kutya otashi ka kala shi li nawa ye ku ethe wu tsikile miilonga yuukokolindjila nopwaahe na okwiipula nokugwanitha po ethimbo ndyoka wa kanitha, otaya vulu okutokola. Amushanga ota ka ndhindhilika mokakalata komuuvithi ngoka [Congregation Publisher Record] u ulike kutya ina pumbwa okulongela po oowili ndhoka dha kana.
16 Aakokolindjila mboka ya pyokoka ohaya longo oowili odhindji petameko lyomumvo gwiilonda. Iilonga yawo yuukokolindjila oyo hayi ya tango, onkee omathimbo gamwe ohaya kala ye wete sha simana ya kuthe mo iinima mbyoka inaayi simana. Ngele omukokolindjila okwa kala konima molwaashoka inaa longekidha nawa iinima ye nenge kee na eipangelo mokukala metsokumwe nalyo, oku na okukala e wete kutya oshi li oshinakugwanithwa she a futile po ethimbo ndyoka lya kana ye ta kala inaa tegelela u ungaungiwe naye momukalo gwi ikalekelwa.
17. Onda hala okugwanitha po sha nonda hala oku shi nyanyukilwa. Mbela uukokolindjila otawu ka gwanitha po ngaa ompumbwe ndjoka?
17 Enyanyu lyashili ohali ikolelele unene mokukala nekwatathano lyopothingo naJehova nosho wo etokolo toko kutya otatu mu longele nuudhiginini. Monkalelo ndjika yiinima, otatu vulu okukala twa nyanyukwa shili ngele iilonga yetu oyindji oyi ikolelela kokulongela kwetu Jehova. Omalalakano gopambepo ohage tu ningitha tu kale tu na elalakano molwaashoka ohatu kala tu wete kutya otatu longo shoka shu uka. Enyanyu ohali zi mokugandja, notu shi shi kutya kapu na we omukalo omwaanawa kaagu shi owala okulonga yalwe nkene ye na okumona omwenyo gwaaluhe muuyuni uupe waKalunga. — Iil. 20:35.
18, 19. Ngele kashi shi oshitegelelwa opo omuntu a ka mone omwenyo gwaaluhe, mbela kashi shi ngaa ilonga yandje mwene ngele otandi yi muukokolindjila nenge hasho?
18 Eeno shili, etokolo kutya oto kutha uukwathelikokolindjila nenge hasho oli na okukala lyoye mwene. Jehova oye owala ta vulu okutala onkalo yoye yonkalamwenyo. (Rom. 14:4) Oshi li mondjila sho a tegelela wu mu longele nomutima aguhe, nomwenyo, nomadhiladhilo nosho wo noonkondo dhoye adhihe. (Mark. 12:30; Gal. 6:4, 5) Oku hole ngoka ha gandja nenyanyu, ngoka he mu longele nenyanyu, hanokungungutula nenge kethiminiko. (2 Kor. 9:7; Kol. 3:23) Etompelo lyoye lyokukala methimbo lyu udha oli na okukala molwaashoka owu hole Jehova nosho wo aantu moshitopolwa. (Mat. 9:36-38; Mark. 12:30, 31) Ngele osho wu uvite ngaaka, iilonga yuukokolindjila oya tegelela wu gandje eitulomo lya kwata miiti kuyo.
19 Otwi inekela kutya shoka sha popiwa moshitopolwa muka otashi ke ku kwathela wu tale ngele ito vulu okukokola ondjila. Mbela ito vulu okuninga omalunduluko moonkalo dhoye opo wu ninge omukokolindjila gwondjigilile? Pakwatho lyaJehova oto vulu okupondola! Oku uvaneka ta ti: ‘Otandi mu lokithile eloolo lyomaliko guuyamba owindji.’ (Mal. 3:10) Onkee ano, otatu pula tatu ti: “Mbela iilonga yuukokolindjila inayi ku opala?” Ngele oto ti “eeno,” itulila po esiku wu tameke uukokolindjila wondjigilile nziya ngoye to kala wa shilipalekwa kutya Jehova ote ke ku laleka nuuyamba nonkalamwenyo ombwanawa!