Kwatheleni aakonakonimbiimbeli ya kale ya kola moshili

1-2. (a) Omolwashike aakonakonimbiimbeli yamwe haya kakadhala okupopila oshili? (b) Oshike tatu ka kundathana moshitopolwa shika?

MBELA opu na iinima yimwe mbyoka ya li ye ku imbi wu ninge gumwe gwomOombangi dhaJehova? Otashi vulika wa li wa tila kutya aaniilonga pamwe nangoye, ookuume koye nosho wo yaandjeni, itaya ka kala we ye na ekwatathano nangoye. Nenge tashi vulika wa li wu uvite kutya ito ka vula okukala metsokumwe nomithikampango dhaKalunga. Ngele osho, hangoye awike wa li wu uvite ngawo, oshoka aakonakonimbiimbeli yamwe nayo oya li ye shi mono oshidhigu okukala ya kola moshili.

² Jesus okwa li a ndhindhilike kutya uumbanda mbono otawu vulu okuningitha yalwe kaaya koke pambepo. (Mat. 13:20-22) Ihe ka li a etha po mboka ya li taya kakadhala oku mu landula. Pehala lyaashono, okwa li a ulukile aalongwa ye nkene ye na oku ya kwathela (1) ya ndhindhilike mo shoka tashi ya imbi ya ninge ehumokomeho, (2) ya kokeke ohole yawo yokuhola Jehova, (3) ya pitithe komeho iinima mbyoka ya simana (4) noya sinde omashongo gawo. Ongiini tatu vulu okutula miilonga shoka Jesus a lombwele aalongwa ye, sho tatu longitha embo Kala nonkalamwenyo ombwanawa sigo aluhe, tu kwathele omukonakonimbiimbeli a kale a kola moshili?

KWATHELA OMUKONAKONI A NDHINDHILIKE MO SHOKA TASHI MU IMBI A NINGE EHUMOKOMEHO

3. Oshike tashi vulika sha li sha imbi Nikodemus a ninge omulongwa gwaJesus?

³ Nikodemus, omuleli a simana gwAajuda, okwa li a taalela eshongo ndyoka lya li lye shi ningitha oshidhigu a ninge omulongwa gwaJesus. Konima yoomwedhi hamano lwaampono, sho Jesus a tameke uukalele we, Nikodemus okwa li a ndhindhilike kutya Jesus omukalelipo gwaKalunga. (Joh. 3:1, 2) Nonando ongawo, Nikodemus okwa li a hogolola okutsakanena naJesus meholamo, ‘oshoka okwa li a tila Aajuda.’ (Joh. 7:13; 12:42) Otashi vulika a li ta dhiladhila kutya ota ka kanitha oshindji ngele okwa ningi omulongwa gwaJesus.a

4. Jesus okwa li a kwathele ngiini Nikodemus, a uve ko shoka Kalunga a tegelela a ninge?

⁴ Nikodemus okwa li e shi Ompango yaMoses, ihe okwa li a pumbwa okukwathelwa a uve ko shoka Jehova a tegelela a ninge. Jesus okwa li e mu kwathele ngiini? Okwa li a yamba po ethimbo lye, sho a tsakanene naNikodemus kongulohi. Jesus okwa li a yelithile Nikodemus shoka e na okuninga, opo a ninge omulongwa, ano i iyele ombedhi omolwomayono ge, a ninginithwe noku ulike eitaalo mOmwana gwaKalunga. — Joh. 3:5, 14-21.

5. Ongiini tatu vulu okukwathela omukonakonimbiimbeli a ndhindhilike mo shoka tashi mu imbi a ninge ehumokomeho?

⁵ Nonando omukonakonimbiimbeli oku na euvoko li li hwepo lyOmanyolo, otashi vulika a pumbwa ekwatho, a ndhindhilike mo shoka tashi mu imbi a ninge ehumokomeho. Iilonga ye yokwiikongela omboloto nenge omapataneko okuza kuyaandjawo, otashi vulika ge mu imbe a adhe omalalakano ge gopambepo. Onkee ano konga ethimbo wu kwathele omukonakoni gwoye. Oto vulu oku mu hiya mu ka nwe pamwe okoothiwa, nenge mu ki iyuthe momagulu. Kungawo, otashi vulika wu ke mu kwathele a kale e ku mangulukila, noku ku lombwele kombinga yomashongo ngoka ta piti mugo. Ladhipika omukonakoni gwoye a ninge omalunduluko ngaashi tashi vulika, opo a nyanyudhe Jehova, ihe hangoye.

6. Ongiini to vulu okukwathela omukonakoni a kale e na uulaadhi wokupopila oshili? (1 Aakorinto 16:13)

⁶ Uuna omukonakonimbiimbeli e na einekelo kutya Jehova ote ke mu kwathela a kale metsokumwe nomithikampango dhOmbiimbeli, ohashi mu pe uulaadhi a tule miilonga shoka ti ilongo. (Lesha 1 Aakorinto 16:13.) Onkandangala ndjoka to dhana, otayi vulu okuyelekanithwa naandjoka yomulongisikola. Sho wa li mosikola, omulongi guni wa li wu hole unene? Otashi vulika wa li wu hole omulongi ngoka a li he ku kwathele neidhidhimiko wu kale wu na einekelo kutya oto vulu okuninga iinima yontumba. Momukalo gwa faathana, omulongi gwOmbiimbeli omwaanawa iha longo owala shoka Kalunga a hala tu ninge, ihe oha shilipaleke wo omukonakoni gwe kutya kekwatho lyaJehova ota vulu okuninga omalunduluko ga simana monkalamwenyo ye. Ongiini to vulu okuninga ngawo?

KWATHELA OMUKONAKONI A KOKEKE OHOLE YE YOKUHOLA JEHOVA

7. Jesus okwa li a kwathele ngiini mboka ya pulakene kuye, ya kokeke ohole yawo yokuhola Jehova?

⁷ Jesus okwa li e shi kutya ohole yokuhola Kalunga, otayi ki inyengitha aalongwa ye ya tule miilonga shoka yi ilonga. Olundji okwa li ha longo aalongwa ye iinima mbyoka tayi vulu oku ya kwathela, ya kokeke ohole yawo yokuhola He gwomegulu. Pashiholelwa, okwa yelekanitha Jehova nomulumentu ngoka ha gandja iinima iiwanawa koyana. (Mat. 7:9-11) Otashi vulika yamwe yomaapulakeni yaJesus, kaaya li ye na oohe aanahole. Dhiladhila owala kunkene ya li ye uvite, sho Jesus a longitha ethaneko lyahe omunahenda, ngoka a li a taamba ko omwanamati sho a galukile kegumbo, konima sho a li e na onkalamwenyo inaayi yogoka. Oya li ya mono kutya Jehova oku hole oyana mboka ye li kombanda yevi. — Luk. 15:20-24.

8. Ongiini to vulu okukwathela omukonakonimbiimbeli a kokeke ohole ye yokuhola Jehova?

⁸ Nangoye oto vulu okukwathela omukonakonimbiimbeli a kokeke ohole ye yokuhola Jehova, mokutsa omuthindo omaukwatya gaKalunga sho to mu longo. Ethimbo kehe tamu konakona, mu kwathela a mone ekwatathano ndyoka li li pokati kaashoka ti ilongo nohole yaJehova. Uuna tamu kundathana kombinga yekuliloyambo, tsa omuthindo kuuwanawa mboka ta vulu okumona mo. (Rom. 5:8; 1 Joh. 4:10) Uuna omukonakoni a mono kutya Jehova oku mu hole paumwene, ohashi mu inyengitha a kale e mu hole noonkondo. — Gal. 2:20.

9. Oshike sha li sha kwathele omulumentu gwedhina Michael, a lundulule onkalamwenyo ye?

⁹ Natu taleni koshiholelwa shaMichael, ngoka a za koIndonesia. Okwa putudhilwa moshili, ihe ka li a ninginithwa. Sho a li e na omimvo 18, okwa yi koshilongo shimwe hoka a ka longa iilonga yokuhinga omaloli. Lwanima, okwa hokana nokwa thigi po yaandjawo, opo a ka tsikile okulonga koshilongo shilwe. Manga a li ta longo koshilongo hoka, omukulukadhi gwe nomwanakadhona oya tameke okukonakona Ombiimbeli noya ningi ehumokomeho. Konima sho yina a hulitha, Michael okwa tokola a galukile kegumbo, opo a sile he oshimpwiyu nokwa li a zimine ekonakonombiimbeli. Sho ya li taya kundathana oshitopolwa “Ilonga oshindji” moshileshwa 27 shembo Kala nonkalamwenyo ombwanawa sigo aluhe, osha li sha gumu Michael. Sho a dhiladhila kunkene Jehova a li e uvite sho a mono Omwana ta mono iihuna, Michael okwa tameke okulila. Okwa li e na olupandu olunene omolwekuliloyambo, nolye mu inyengitha a lundulule onkalamwenyo ye nokuninginithwa.

KWATHELA OMUKONAKONI A PITITHE KOMEHO IINIMA MBYOKA YA SIMANA

10. Jesus okwa li a kwathele ngiini aalongwa ye, ya pitithe komeho iinima mbyoka ya simana? (Lukas 5:5-11) (Tala wo ethano.)

¹⁰ Aalongwa yaJesus yotango oya li ye shi ndhindhilike mo nziya kutya oye Mesiasa, ihe oya li ya pumbwa ekwatho ya pitithe komeho iilonga yokuuvitha. Petrus naAndreas oya adhika nale aalongwa yaJesus, pethimbo e ya hiya ye mu landule miilonga yethimbo lyuudha. (Mat. 4:18, 19) Oya li haya longo naJakob naJohannes miilonga yokuyula oohi, noya li taye shi enditha nawa. (Mark. 1:16-20) Sho Petrus naAndreas ya “thigi po oonete dhawo,” otashi vulika ya li ya ningi oonkambadhala ya sile oshimpwiyu yaandjawo, omanga taya landula Jesus. Oshike she yi inyengitha ya pitithe komeho shoka sha simana? Mehokololo ndyoka tali adhika muLukas, otatu lombwelwa kutya Jesus okwa li a longo oshikumithalonga, shoka sha li sha koleke einekelo lyawo muJehova kutya ote ke ya sila oshimpwiyu. — Lesha Lukas 5:5-11.

11. Ongiini tatu vulu okulongitha iimoniwa yetu, tu koleke eitaalo lyomukonakoni gwetu?

¹¹ Itatu vulu okulonga iikumithalonga ngaashi Jesus a li a ningi, ihe otatu vulu okuhokolola iimoniwa yankene Jehova ha ambidhidha mboka haye mu pititha komeho monkalamwenyo yawo. Pashiholelwa, mbela oto dhimbulukwa sho Jehova a li e ku kwathele sho wa tameke okuya kokugongala? Ngele iilonga yoye ohayi ku imbi okuya kokugongala, otashi vulika wa li wa popi nomugandji gwoye gwiilonga noku mu yelithila kutya omolwashike itoo vulu we okulonga olutayima. Sho to hokololele omukonakoni gwoye iimoniwa yoye, mu yelithila nkene eitaalo lyoye lya li lya nkondopalekwa, sho wa mono nkene Jehova ta ambidhidha etokolo lyoye ndyoka wa ninga wu pitithe komeho oku mu longela.

12. (a) Omolwashike tu na okuhiya aauvithi ya yoolokathana ye tu wayimine pekonakonombiimbeli? (b) Ongiini to vulu okulongitha uuvidio wu longe omukonakoni gwoye nomupondo? Gandja oshiholelwa.

¹² Omukonakonimbiimbeli gwoye ota vulu wo okumona mo uuwanawa mokupulakena kunkene Aakriste yalwe ya li ya pititha komeho okulongela Jehova. Onkee hiya ooitaali ooyakweni mboka ya za momaputuko ga yoolokathana, ye ku wayimine pekonakonombiimbeli. Ya pula ya yelithe nkene ye ya moshili, naashoka ya ninga ya pitithe komeho okulongela Jehova monkalamwenyo yawo. Shimwe ishewe, ngoye nomukonakoni gwoye, otamu vulu okutala uuvidio miitopolwa ngaashi “Ilonga oshindji” nenge “Uuyelele wa gwedhwa po,” membo Kala nonkalamwenyo ombwanawa sigo aluhe. Pashiholelwa, sho tamu konakona oshileshwa 37, oto vulu okupopya nomukonakoni gwoye kombinga yaashoka sha popiwa mokavidio ke na oshipalanyolo Jehova ote ke ku sila oshimpwiyu, wu mu kwathele a mone shoka tashi vulu oku mu kwathela a pitithe Jehova komeho monkalamwenyo ye.

KWATHELA OMUKONAKONI A SINDE OMASHONGO

13. Jesus okwa li a kwathele ngiini aalongwa ye, ya kale yi ilongekidhila omapataneko?

¹³ Jesus okwa li a lombwele aalanduli ye lwiikando kutya otaya ka taalela omapataneko okuza kuyalwe, nokuli nokaakwanezimo yawo. (Mat. 5:11; 10:22, 36) Lwopehulilo lyuukalele we, Jesus okwa li a londodha aalongwa ye kutya otashi vulika ya ka dhipagwe. (Mat. 24:9; Joh. 15:20; 16:2) Okwe ya ladhipike ya kale ya kotoka miilonga yawo yokuuvitha. Okwa li wo e ya lombwele kaaya nyenyete naamboka taye ya pataneke, noya kale ya kotoka, opo ya tsikile nokuuvitha.

14. Ongiini tatu vulu okukwathela omukonakoni i ilongekidhile omapataneko? (2 Timoteus 3:12)

¹⁴ Otatu vulu okukwathela omukonakoni i ilongekidhile omapataneko, moku mu yelithila shoka tashi vulika aaniilonga pamwe naye, ookuume nenge aakwanezimo ya popye. (Lesha 2 Timoteus 3:12.) Aaniilonga yamwe otashi vulika ya sheke omukonakonimbimbeli omolwonkalamwenyo ompe ndjoka a hogolola. Yalwe, nokuli naakwanezimo yopopepi, otashi vulika ye mu pe uusama omolweitaalo lye ndyoka lya kankamena kOmbiimbeli. Ngele otwa kwathele aakonakoni yetu ya kale yi ilongekidhila omapataneko komeho yethimbo, otashi ke ya kwathela uuna ge ya adha.

15. Oshike tashi vulu okukwathela omukonakonimbiimbeli i idhidhimikile omapataneko okuza kuyaandjawo?

¹⁵ Ngele omukonakoni gwoye ota patanekwa kuyaandjawo, mu ladhipika a dhiladhile kutya omolwashike aakwanezimo ye tashi vulika ya geya. Otashi vulika ya dhiladhile kutya ota pukithwa, nenge tashi vulika kaaye hole Oombangi dhaJehova. Nokuli naakwanezimo yaJesus kaya li ya nyanyukilwa shoka a li ta ningi. (Mark. 3:21; Joh. 7:5) Longa omukonakoni gwoye a kale e na eidhidhimiko nosho wo ondjaalela nayalwe, mwa kwatelwa noyaandjawo.

16. Ongiini tatu vulu okukwathela omukonakonimbiimbeli a lombwele yalwe kombinga yeitaalo lye momukalo omwaanawa?

¹⁶ Nonando aakwanezimo oye na ohokwe, omukonakoni oku na okukala a kotoka kee ya yelithile kehe shimwe poshikando. Oshoka ngele okwe shi ningi, otashi vulika aakwanezimo ye ya kale ye uvite ya dhigupalelwa, noshizemo otashi vulika ya kale inaaya hala we okupopya naye kombinga yeitaalo lye. Onkee ano ladhipika omukonakoni gwoye a popye kombinga yeitaalo lye momukalo ngoka aakwanezimo ye taya ka kala ishewe ya hala okupopya naye. (Kol. 4:6) Ota vulu okulombwela aakwanezimo ye, ya ye kepandja lyetu jw.org. Shika otashi ke ya kwathela yi ilonge oshindji kombinga yOombangi dhaJehova, shi ikolelela kokuvula kwawo nokethimbo lyawo.

17. Ongiini to vulu okudheula omukonakoni a ungaunge niifundja mbyoka yalwe tashi vulika ya popye kombinga yOombangi dhaJehova? (Tala wo ethano.)

¹⁷ Oto vulu okulongitha iitopolwa ya landulathana yi li ko jw.org, kohi yoshitopolwa “Omapulo ngoka haga pulwa olundji kombinga yOombangi dhaJehova,” wu kwathele omukonakoni gwoye a longekidhe omayamukulo omapu komapulo ngoka aakwanezimo nenge aaniilonga pamwe naye tashi vulika ye mu pule. (2 Tim. 2:24, 25) Pehulilo lyoshileshwa kehe, endululeni oshitopolwa “Aantu yamwe ohaya ti,” shembo Kala nonkalamwenyo ombwanawa sigo aluhe. Ladhipika omukonakoni gwoye i iyendithe po pomayamukulo ge niitya ye mwene. Ino kakadhala oku mu pa omaetopo gankene ta vulu okuhwepopala mokugandja omayamukulo. Oku mu dheula momukalo gwa tya ngawo, otaku ke mu kwathela a popile eitaalo lye nomukumo.

18. Ongiini to vulu okukwathela omukonakoni a popye kombinga yeitaalo lye miilonga yokuuvitha? (Mateus 10:27)

¹⁸ Jesus okwa li a ladhipike aalongwa ye ya uvithe onkundana ombwanawa montaneho. (Lesha Mateus 10:27.) Ngele omukonakoni okwa tameke okulombwela yalwe kombinga yeitaalo lye manga kuyele, otashi ke mu kwathela a kale i inekela muJehova. Ongiini to vulu okukwathela omukonakoni a ninge oshinima shoka elalakano lye? Uuna megongalo lyeni mwa tseyithwa kombinga yoshikonga shokuuvitha, ladhipika omukonakoni gwoye a dhiladhile kombinga yankene ta vulu okukala a gwana okuninga omuuvithi. Mu yelithila nkene oyendji ye shi mona oshipu okutameka okuuvitha okupitila miikonga ya tya ngaaka. Ota vulu wo okumona mo uuwanawa mokwiitulila po elalakano lyokugandja iipopiwa pokugongala kwomokati koshiwike. Sho ta kambadhala okwaadha elalakano ndyoka, otashi ke mu kwathela a kale a tompwa kwaashoka i itaala noku shi lombwela yalwe.

ULIKA KUTYA OWI INEKELA OMUKONAKONI GWOYE

19. Jesus okwa li a ulike ngiini kutya oku na einekelo maalongwa ye, nongiini tatu vulu oku mu holela?

¹⁹ Manga Jesus inaaya megulu, okwa li a lombwele aalongwa ye kutya ota ka hangana ishewe nayo. Kaya li ye shi ndhindhilike mo kutya Jesus okwa li ta popi kombinga yawo sho taya ka ya megulu. Nonando ongawo, Jesus okwa li a gandja eitulomo kuudhiginini wawo, ihe hakomalimbililo gawo ngoka ya li ye na. (Joh. 14:1-5, 8) Okwa li e shi kutya oya pumbwa ethimbo, opo ya uve ko iinima yontumba, ngaashi etegameno lyoku ka kala nomwenyo megulu. (Joh. 16:12) Natse wo otatu vulu okwiinekela kutya aakonakoni yetu oye na ehalo lyokunyanyudha Jehova.

20. Omumwameme gumwe gwokoMalawi, okwa li a ulike ngiini kutya okwiinekela omukonakoni gwe?

²⁰ Ohatu kala tu na einekelo kutya aakonakoni yetu oya hala okuninga shoka shi li mondjila. Natu taleni koshiholelwa shomumwameme gwedhina Chifundo, ngoka ha zi koMalawi. Okwa li a tameke ekonakonombiimbeli membo Kala nonkalamwenyo ombwanawa sigo aluhe, nomukiintu omugundjuka Omukaatolika, gwedhina Alinafe. Sho ya mana okukundathana oshileshwa 14, Chifundo okwa li a pula omukonakoni gwe kutya okwa tala ko ngiini okulongitha iihongwathano melongelokalunga. Alinafe okwa geye e ta ti: “Ndyono etokolo lyandje lyopaumwene.” Chifundo okwa li ti ipula kutya Alinafe ita ka kala we a hala okukonakona Ombiimbeli. Ihe okwa li a tsikile okukonakona naAlinafe neidhidhimiko, e na einekelo kutya mokweendela ko kwethimbo ota ka uva ko kutya osha puka okulongitha iihongwathano. Konima yoomwedhi oonshona, Chifundo okwa li e mu pula epulo ndyoka li li moshileshwa 34 tali ti: “Sho wa kala to konakona Ombiimbeli nosho wo kombinga yaKalunga kashili, Jehova, oshe ku etela uuwanawa washike?” Chifundo ota hokolola nkene Alinafe a li a yamukula ta ti: “Okwa li a popi kombinga yiinima oyindji iihokithi, nashimwe shomuyo oosho a popi kutya Oombangi ihadhi kutha ombinga miinima mbyoka Ombiimbeli tayi ti oya puka.” Nziya konima yaashono, Alinafe okwa li a etha po okulongitha iihongwathano nokwa ninginithwa.

21. Ongiini tatu vulu okukwathela omukonakoni a ninge etokolo lyokulongela Jehova?

²¹ Nonando Jehova oye “ha kokitha,” ohatu dhana onkandangala tu kwathele omukonakonimbiimbeli a ninge ehumokomeho. (1 Kor. 3:7) Ohatu ningi oshindji shi vulithe owala oku mu longa shoka Kalunga a hala a ninge. Ohatu mu kwathele a kokeke ohole yomuule yokuhola Jehova. Ohatu mu ladhipike wo a ulike ohole ye yokuhola Jehova moku mu pititha tango komeho. Ohatu mu longo wo nkene e na okwiinekela muJehova, uuna a taalela omashongo. Ngele otwa kala tu na einekelo muye, otatu ke mu kwathela a kale a tompwa kutya naye ota vulu okukala metsokumwe nomithikampango dhaJehova, nokukala a kola moshili.