Ontopolwa 1
Omwenyo Gwaaluhe Kagu Shi Owala Ondjodhi
1, 2. Omolwashike shi li oshidhigu okwiitaala kutya aantu otaa vulu okukala nomwenyo sigo aluhe melago kombanda yevi?
ELAGO kombanda yevi kutse inali fa nando oshipewa shopokathimbo. Omauvu, uukulupe, ondjala, iilonga yomuyonena—mokutumbula owala omaupyakaddi gamwe po—olundji otage eta oluhodhi monkalamwenyo. Onkee ano otashi vulika u tye, aantu oya thithikilitha omeho gawo koshili mokupopya omwenyo gwaaluhe moparadisa kombanda yevi. Ngiika oto dhiladhila kutya shika ehepitho owala lyethimbo okupopya kwaashoka, kutya omwenyo gwaaluhe ogwo owala ondjodhi.
2 Pwaa na omalimbililo, aantu oyendji otaa ka zimina pamwe nangoye. Ano omolwashike tatu vulu okukala ngawo nuushili mbuka kutya ngoye oto vulu okukala nomwenyo sigo aluhe moparadisa kombanda yevi? Omolwashike tatu vulu okwiitaala kutya omwenyo gwaaluhe kagu shi owala ondjodhi?
MOLWASHIKE TATU VULU OKU SHI ITAALA
3. Oshike tashi holola kutya Kalunga okwa hala aantu ya kale melago kombanda yevi?
3 Otatu vulu oku shi itaala oshoka Kalunga ngoka Omunenenene nOmunankondo adhihe, okwa gandja evi naayihe mbyoka twe yi pumbwa okugwanitha oompumbwe dhetu. Evi okwe li umbu lye tu gwanenena! Nokwa shitile omulumentu nomukiintu ngawo ya vule okunyanyukilwa omwenyo megumbo ndika lyopevi—sigo aluhe.—Epsalmi 115:16.
4. Oshike sha monika mo kaanongononi kombinga yolutu lwomuntu shoka tashi holola kutya lwo olwa shitwa okukala nomwenyo sigo aluhe?
4 Aanongononi oye shi tseya mo nale kutya olutu lwomuntu olu na oonkondo okwiipepaleka lwo lwene. Momukalo omukumithi, uuntimbu wolutu ohau pingenwa po nenge hau tungululwa, shi ikolelela mompumbwe ndjoka yi li po. Nosha fa omukalo ngoka gweipepaleko lwo lwene gu na okutsikila sigo aluhe. Ihe shika ihashi ningwa nando, naashika osho oshinima shoka aanongononi itaa vulu oku shi yelitha. Natango yo kayu uvite ko thiluthilu kutya omolwashike aantu haa kulupa. Yo otaa ti, ando aantu oya kale moonkalo dhu uka, ando oye na okukala sigo aluhe.—Epsalmi 139:14.
5. Ombimbeli otayi ti ngiini kombinga yompangela yaKalunga kevi?
5 Ihe shika osho ompangela yaKalunga shili kutya aantu ya kale melago kombanda yevi sigo aluhe? Ngele osho, nena omwenyo gwaaluhe kagu shi owala ehalo nenge ondjodhi—otagu ke ya shili! Ombimbeli, embo ndyoka tali yelitha oompangela dhaKalunga, otayi ti ngiini moshinima shino? Yo otayi popi Kalunga ngoka “a gumbu evi nokwe li opaleke,” notayi gwedha ko: “Okwe li koleke, ye inee li shita, li mbugale, aawe, okwe li shitile okukala mo.”—Jesaja 45:18.
6. (a) Nena onkalelo kombanda yevi oya tya ngiini? (b) Shika osho tuu sha halika kuKalunga?
6 Kungoye osha fa ngashingeyi evi li liwe pamukalo ngoka Kalunga a li a hala? Dhoshili, aantu ohaa kala miitopolwa ayihe yevi. Ihe oye li tuu pamwe melago ngaashi egumbo lya hangana, pamukalo omwaanawa ngoka Omushiti gwawo a li a hala? Nena uuyuni owa topoka. Opu na uutondwe. Opu na iilonga yomuyonena. Opu na iita. Aantu omamiliyona otaa hepekwa kondjala notaa alukwa. Yamwe oye na iimpwiyu yakehe esiku omolwokwaana omutumba, molwiilonga nomolwondilo. Nokapu na shimwe shiinima mbika tashi simanekitha Kalunga. Ano shika osha yela naanaa kutya evi kali liwe nando pamukalo ngoka Kalunga Omunankondo adhihe a li a hala petameko.
7. Oshike sha li ompangela yaKalunga kevi sho ye a shiti aantu yotango yaali?
7 Konima sho Kalunga a shiti aantu yotango yaali, ye okwe ya tula moparadisa yokevi. Ye okwa halele kutya ya kale sigo aluhe kombanda yevi. Osha li ompangela ye kutya yo ya longe evi alihe sigo lya ningi oparadisa. Shika oshi wetike momalombwelo ge kuyo: “Kaleni mu na oluvalo, indjipaleni, nevi mu li udhithe aantu, ne mu li pangele.” (Genesis 1:28) Eeno, osha li ompangela yaKalunga kutya konima yethimbo evi alihe li kale mepangelo lyaantu yoludhi oluyuki, mboka ayehe ya li ye na okukala pamwe mombili nomelago.
8. Omolwashike tatu vulu okukala nuushili kutya ompangela yaKalunga kevi inayi lunduluka, nonando aantu yotango yaali inaa vulika kuye?
8 Ompangela yaKalunga yopetameko inayi lunduluka, nonando aantu yotango yaali inaa vulika kuKalunga, nopo ihe inayi ilongela okukala nomwenyo sigo aluhe. Yo yi na okugwanithwa! (Jesaja 55:11) Ombimbeli otayi uvaneke: “Aayuuki otaa ka thigulula evi e taa kala mo sigo aluhe.” (Epsalmi 37:29, OB-1986) Olundji Ombimbeli otayi popi kombinga yelongekidho lyaKalunga okupa aantu mboka haye mu longele omwenyo gwaaluhe.—Johannes 3:14-16, 36; Jesaja 25:8; Ehololo 21:3, 4.
EHALO LYOKUKALA NOMWENYO—PENI?
9. (a) Pandjigilile, ehalo lini po lya kala maantu? (b) Otashi ti ngiini ngele Ombimbeli tayi ti kutya ‘Kalunga okwa tula moomwenyo dhaantu uukwaaluhe’?
9 Otatu vulu okukala twa nyanyukwa shili oshoka shika osho ompangela yaKalunga kutya tse tu kale nomwenyo sigo aluhe. Dhiladhila owala: Ando ngoye owa li u na okuhogolola, omesiku lini po ando wa hala okusa? Ito vulu okuhogolola nando olimwe, hashili? Ito hala nando okusa, nosha kwatela mo kehe omuntu gwolela e na ngaa uukolele. Kalunga okwe tu shiti nehalo lyokukala nomwenyo, hanehalo lyokusa po. Kombinga yomukalo ngoka Kalunga a shiti aantu, Ombimbeli otayi ti: “Okwa tula uukwaaluhe moomwenyo dhaantu.” (Omuuvithi 3:11, OB-1986) Otashi ti ngiini? Otashi ti kutya aantu oye na ehalo lyokutsikila nomwenyo noyaa na okusa. Omolwehalo ndika lyokukala nonakuyiwa yaa na ehulilo, aantu oya kala nale nokukonga omukalo gwokukala aagundjuka sigo aluhe.
10. (a) Openi mpoka aantu ya halelela okukala nomwenyo sigo aluhe? (b) Omolwashike tatu vulu okukala nuushili kutya Kalunga ote ke shi tu ningila opo tu vule okukala nomwenyo sigo aluhe kombanda yevi?
10 Pandjigilile, openi mpoka aantu ya hala okukala nomwenyo sigo aluhe? Opehala tuu ndyoka yi igilila okukala, mpaka pevi. Omuntu okwa shitwa omolwevi, nevi omolwomuntu. (Genesis 2:8, 9, 15) Ombimbeli otayi ti: “Evi [Kalunga] we li dhikila koongundhi dhalyo, lyaa tenguke nosigo aluheluhe.” (Epsalmi 104:5) Molwashoka evi olya shitwa okukala sigo aluhe, omuntu naye wo oku na okukala sigo aluhe. Alikana, Kalunga omunahole ita shiti aantu nehalo lyokukala nomwenyo sigo aluhe, nopo ihe ando ine shi ya gwanithila!—1 Johannes 4:8; Epsalmi 133:3.
OLUDHI LWOMWENYO NGOKA NGOYE WA HALA
11. Ombimbeli otayi ti ngiini okuholola kutya aantu otaa vulu okunyanyukilwa ealuko lya gwanenena sigo aluhe?
11 Tala kepandja tali landula. Oludhi lwomwenyo guni po aantu mbaka ya nyanyukilwa? Ino hala okukala gumwe gwawo? Onda halelela, ngoye to ti! Tala nkene yo taa monika ye na uundjolowele noye li aagundjuka! Oto shi itaale tuu ngele gumwe te ku lombwele kutya aantu mbaka oya kala nale uule woomvula dhomayuvi? Ombimbeli otayi tu lombwele kutya aakulupe otaa ka ninga ishewe aagundjuka, aavu otaa ka aluka, nonokutya iilema, aaposi, oombolo nelaka lyoshikokoma, ayehe otaa ka aluka. Sho Jesus Kristus a li kombanda yevi, ye okwa aludha aavu paikumithalonga. Nongaaka ye okwa holola nkene aantu methimbo ndika lyenyanyu li li popepi, taa ka nyanyukilwa natango ealuko lya gwanenena.—Job 33:25; Jesaja 33:24; 35:5, 6; Mateus 15:30, 31.
12. Onkalo yini po tu wete momafano ngaka?
12 Alikana, tala owala kutya shika oshikuninogumbo oshiwanawa unene ngiini! Shika osho lela oparadisa, ngaashi Kristus u uvaneke, noya fa naanaa ndjiyaka ya kanithwa komulumentu nomukiintu yotango oonakwaavulika. (Lukas 23:43, NW) Ihe ndhindhilika ombili nuukumwe. Aantu yomaludhi agehe—aaluudhe, aatokele, aambambi—oye li pamwe ngaashi egumbo limwe. Nokuli niinamwenyo oyi li pamwe nombili. Tala nkene okanona taka dhana nonime. Ihe kapu na etompelo omolwokutila ishewe. Mwaashono Omushiti ota ti: “Nongwe otayi kala ya lala puukombwena; ontana nonime ongundjuka nondumetana tadhi napele mumwe, nokamati okashona take dhi litha . . . nonime otayi li omwiidhi ya fa ongombe. Okanona [kokegundji] taka dhanene pokwena kwefu.”—Jesaja 11:6-9.
13. Oshike itaashi ka kala po we uuna ompangela yaKalunga ya gwanithwa?
13 Moparadisa ndjoka Kalunga a nunina aantu komeho, tse otatu ka kala netompelo kehe okukala nelago. Evi otali ka gandja eloolo lyiikulya iiwanawa. Itaku ka kala we nando gumwe ta ka sa ondjala. (Epsalmi 72:16; 67:7) Iita, iilonga yomuyonena, ekuni, nokuli uutondwe nokwiihola mwene, otayi ka hula po thiluthilu. Eeno, itayi ka holoka we nandonando! (Epsalmi 46:9, 10; 37:9-11) Ngoye owi itaala ngaa kutya otashi vulika kiinima ayihe mbika?
14. Oshike tashi ku itaalitha kutya Kalunga ota ka hulitha po omeehameko?
14 Eeno, dhiladhila owala: Andola ongoye owa li u na oonkondo, andola ino hulitha po iinima ayihe mbyoka tayi ehameke aantu? Andola ino eta po nando onkalo ndjoka ya halika kaantu? Nokuli ando osho wa ningi. Osho naanaa ngaaka Tate gwetu gwomegulu omunahole ta ka ninga. Ye ota ka gwanitha oompumbwe nomahalo getu, oshoka Epsalmi 145:16 otali popi Kalunga: “To matula oshikaha shoye, to kutitha iinamwenyo ayihe kesilohenda.” Ihe uunake tashi ka ningwa?
OMALALEKO NUUYAMBA OMAKUMITHI OGE LI POPEPI
15. (a) Ehulilo lyuuyuni otali ka tya shike kevi? (b) Otali ka tya shike kaantu aawinayi? (c) Otali ka tya shike kwaambono haa longo ehalo lyaKalunga?
15 Opo a vule okweeta omalaleko nuuyamba ngano omakumithi kombanda yevi, Kalunga otu uvaneke okuhulitha po uukolokoshi naamboka haye u eta. Methimbo tuu ndyoka, ye ota ka gamena mboka haye mu longele, oshoka Ombimbeli otayi ti: “Uuyuni notau hulu po pamwe nokahalu kawo; ihe oongoka ta gwanitha ehalo lyaKalunga, oye ha kala aluhe.” (1 Johannes 2:17) Alikana, elunduluko ndika otali ka kala li thike peni! Ehulilo lyuuyuni itali ka tya ehulilo lyevi lyetu. Ihe ongaashi owala sha ningilwe pEyelu lyuuyuni pethimbo lyaNoa, otashi ka tya owala ehulilo lyaantu aawinayi nomikalo dhawo. Ihe mbono haa longele Kalunga, otaa ka hupa mehulilo. Opo nduno, mevi lya yogolwa, yo otaa ka kala ya manguluka kwaayehe mboka ya hala oku ya ehameka noku ya thiminika.—Mateus 24:3, 37-39; Omayeletumbulo 2:21, 22.
16. Iiningwanima yini po ya hunganekwa ‘molwomasiku omahugunina’?
16 Ihe otashi vulika gumwe a tye: ‘Onkalo otayi nayipala owala, itayi hwepopala nando. Ongiini tatu vulu okukala nuushili kutya elunduluko ndika ekumithi oli li popepi?’ Jesus Kristus okwa hunganeka iinima oyindji kuyo aalanduli ye yokomeho ye na okundhindhilika opo ya vule okutseya kutya ethimbo olya thikana Kalunga a hulithe po uuyuni. Jesus okwa ti kutya omasiku gahugunina gonkalelo ndjika oga li ge na okundhindhilikwa miinima ngaashi iita iinene, oompumbwe dhiikulya, omakakamo gevi omanene, eindjipalo lyokwaanuuyuki neshonopalo lyohole. (Mateus 24:3-12) Ye okwa hunganeka: “Naantu yokombanda yevi ye na ethininiko notaa si uumbanda.” (Lukas 21:25) Ishewe Ombimbeli otayi ti kutya “omasiku omahugunina otaku ya omathimbo omadhigu.” (2 Timoteus 3:1-5) Hayo mbela naanaa onkalo ndjoka tse tu li muyo nena?
17. Aanamadhiladhilo otaa ti ngiini kombinga yonkalo yonena?
17 Aantu oyendji mboka haa konakona iiningwanima yuuyuni, otaa ti elunduluko enene oli li pokuya. Pashiholelwa, omukuluntu gwoshifo shoonkundana Herald, shaMiami, Iilongohangano yaAmerika, okwa nyola: “Kehe tuu gumwe ngoka e na omadhiladhilo golela ota vulu okuyelitha lela iiningwanima yiiponga iinenenene yomoomvula ndhika opo dha piti, nkene tayi ti, nokuuva ko kutya pandjokonona uuyuni ou li pondondo ya shiga ko. . . . Shoka otashi ka lundulula onkalamwenyo yaantu sigo aluhe.” Omunyoli Omuamerika Lewis Mumford okwa popile wo sha faathana e ta ti: “Dhoshili, eputuko oli li mokuyonuka po. . . . Methimbo lya piti, sho eputuko lya li mokuyonuka po, osha li owala oshiningwanima shoka sha li shi iwetikile pehala mpoka. . . . Molwashoka nena uuyuni ou li po moothina oonene nowa mangelwa kumwe kiilongitho yomakwatathano goshinanena, opulanete ayihe otayi ka hula po ngele eputuko lya yonuka po.”
18. (a) Oshike tashi hololwa konkalo yuuyuni kombinga yonakuyiwa? (b) Oshike tashi ka pingena po omapangelo ngoka ge li po nena?
18 Onkalo yuuyuni wonena otayi holola kuyo yene kutya tse otu li lela popepi nehanagulopo lyonkalelo ndjika ayihe. Eeno, masiku Kalunga ota ka yogola evi kwaayehe mboka ya hala oku li yona po. (Ehololo 11:18) Ye ota ka kutha po omapangelo ngoka ge li po nena opo epangelo lye lyuuyuki li vule okupangela kombanda yevi alihe. Osho omolwepangelo lyUukwaniilwa ndika Kristus a longa aalanduli ye okugalikana.—Daniel 2:44; Mateus 6:9, 10.
19. Otu na okuninga shike ngele twa hala okukala nomwenyo sigo aluhe?
19 Ngele u hole omwenyo nowa hala okukala nomwenyo sigo aluhe kohi yepangelo lyaKalunga kombanda yevi, u na okweendelela opo u mone ontseyo yashili kombinga yaKalunga, noompangela dhe niitegelelwa ye. Jesus Kristus okwi indile kuKalunga ta ti: “Nomwenyo gwaaluhe ogwo tuu nguka, oyo ye ku tseye, ongoye Kalunga awike gwashili, naanguka we mu tuma, Jesus Kristus.” (Johannes 17:3) Alikana, oshinyanyudhi ngiini okutseya kutya otatu vulu okukala nomwenyo sigo aluhe—kutya kashi shi owala ondjodhi! Ihe okutaamba elaleko nuuyamba ndika lyaKalunga otu na okutseya oshindji kombinga yomutondi ngoka e li po te tu keelele twaa mone elaleko nuuyamba ndika.
[Picture on page 8, 9]
[Full-page picture on page 11]
Shika osha li tuu elalakano lyaKalunga kuuyuni?