Ontopolwa 48
Oto vulu okukala muuyuni uupe waKalunga wombili
KALUNGA okwa li a tula Adam naEva moshikunino shaEden. Nonando Adam naEva kaya li ya vulika noya si, Kalunga okwe shi ningi tashi wapa opo oluvalo lwawo, natse kunena twa kwatelwa mo, tu vule okukala nomwenyo sigo aluhe mOparadisa. Ombiimbeli oyu uvaneka tayi ti: “Aayuuki otaa ka thigulula evi e taa kala mo sigo aluhe.”—Episalomi 37:29.
Ombiimbeli otayi popi kombinga ‘yegulu epe’ nosho wo ‘evi epe.’ (Jesaja 65:17; 2 Petrus 3:13) “Egulu” lyongashingeyi olya thikama po momapangelo gopantu gokunena, ihe Jesus Kristus naamboka taya ka pangela pamwe naye megulu oyo taya ka kala oshitopolwa ‘shegulu epe’ naamboka taya ka pangela pamwe naye. Itashi ka kala tuu shi li nawa sho egulu ndika epe, ndyoka li li epangelo lyaKalunga li li pauyuuki lyombili tali ka pangela ombanda yevi ayihe!
Mbela ‘evi epe’ oshike?— Evi epe olyo aantu aawanawa mboka ye hole Jehova. Uuna Ombiimbeli tayi popi ‘evi epe,’ omathimbo gamwe otayi popi aantu mboka ya kala kombanda yevi, ihe itayi popi evi lyo lyene. (Genesis 11:1; Episalomi 66:4; 96:1) Onkee ano, aantu mboka ye li evi epe otaya ka kala huka kombanda yevi.
Uuyuni wongashingeyi waakolokoshi itawu ka kala po we. Dhimbulukwa kutya Eyelu lyopethimbo lyaNoowa olya li lya hanagula po uuyuni waantu aakolokoshi. Ngaashi twi ilonga, uuyuni mbuka wongashingeyi wa kolokosha otawu ka hanagulwa po puArmagedon. Ngashingeyi natu tale kutya onkalamwenyo otayi ka kala ya fa peni muuyuni uupe waKalunga konima yaArmagedon.
Mbela owa hala okukala nomwenyo sigo aluhe mOparadisa muuyuni uupe waKalunga wombili?— Kapu na ondohotola tayi vulu oku tu kaleka nomwenyo sigo aluhe. Kapu na omiti tadhi vulu okukeelela twaaha se. Otatu vulu owala okukala nomwenyo sigo aluhe ngele twa hedha popepi naKalunga. Omulongi Omunene okwe tu lombwela nkene tu na okuhedha popepi naKalunga.
Natu kuthe Oombiimbeli dhetu e tatu tala muJohannes ontopolwa 17, ovelise 3. Movelise ndjoka otatu adha mo oohapu dhOmulongi Omunene tadhi ti: “Mboka ye ku tseya, Kalunga awike kashili noya tseya wo Jesus Kristus, ngoka we mu tumu, oyo mboka ye na omwenyo gwaaluhe.”
Ano Jesus okwa ti kutya otwa pumbwa okuninga shike opo tu kale nomwenyo sigo aluhe?— Tango, otu na okumona ontseyo yokutseya Tate yetu gwomegulu, Jehova nosho wo Omwana, ngoka a gandja omwenyo gwe omolwetu. Shika otashi ti kutya otu na okukonakona Ombiimbeli. Embo ndika Ilonga kOmulongi Omunene, otali tu kwathele tu shi ninge.
Ihe ongiini okwiilonga kombinga yaJehova taku vulu oku tu kwathela tu kale nomwenyo sigo aluhe?— Ngaashi naanaa hatu kala twa pumbwa iikulya esiku kehe, otwa pumbwa okwiilonga kombinga yaJehova esiku kehe. Ombiimbeli otayi ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.”—Mateus 4:4.
Otwa pumbwa wo okumona ontseyo kombinga yaJesus Kristus molwaashoka Kalunga okwa li e mu tumu opo a dhime po oondjo dhetu. Ombiimbeli otayi ti: ‘Kapu na mugumwe tamu tu zile ehupitho.’ Ombiimbeli otayi popi wo tayi ti: ‘Ngoka i itaala Omwana, oku na omwenyo gwaaluhe.’ (Iilonga 4:12; Johannes 3:36) Mbela ‘okwiitaala’ Jesus otashi ti shike?— Otashi ti kutya otwi itaala lela Jesus notu shi shi kutya itatu vulu okukala nomwenyo sigo aluhe kaatu mu na. Mbela shika otwe shi itaala ngaa?— Ngele otwe mu itaala, otatu ka tsikila okwiilonga kombinga yOmulongi Omunene esiku kehe, notatu ka ninga shoka te tu lombwele.
Omukalo gumwe omwaanawa moka tatu vulu okwiilonga kombinga yOmulongi Omunene ogwo okulesha embo ndika lwiikando nokutala komathano agehe e tatu dhiladhila kombinga yago. Tala ngele oto vulu okuyamukula omapulo ngoka taga adhika pomathano. Lesha wo embo ndika pamwe nameme gwoye nenge natate gwoye. Ngele ino kala pamwe naavali yoye, li lesha naakuluntu yalwe nenge naanona yalwe. Mbela itashi ka kala oshiwanawa ngele to kwathele yalwe yi ilonge kOmulongi Omunene shoka ya pumbwa okuninga opo ya vule okukala nomwenyo sigo aluhe muuyuni uupe waKalunga?—
Ombiimbeli otayi tu lombwele tayi ti: ‘Uuyuni otau hulu po.’ Ihe otayi yelitha wo nkene tatu vulu okukala nomwenyo sigo aluhe muuyuni uupe waKalunga, sho tayi ti: “Ngoka ta longo shoka Kalunga e shi hala, ota kala e na omwenyo aluhe.” (1 Johannes 2:17) Ano ongiini tatu vulu okukala nomwenyo sigo aluhe muuyuni uupe waKalunga?— Eeno, otatu vulu okukala nomwenyo sigo aluhe muuyuni uupe waKalunga mokumona ontseyo yokutseya Jehova nOmwana omuholike, Jesus. Ihe otu na wo okulonga shoka twi ilonga. Okukonakona kwoye embo ndika naku ku kwathele okuninga iinima ayihe mbyoka.
[Oshimpungu/Ethano pepandja 251]
Sho to lesha muJesaja 11:6-9 nomuJesaja 65:25, oto ilongo kombinga yankene iinamwenyo tayi ka kala pamwe nombili. Tala komathano ngaka, omu na okanzigona, okakombwena, ongwe, okatana, onkoshi naanona ye li pamwe nayo. Mbela oto vulu okutumbula omadhina giinamwenyo yilwe mbyoka yi li methano moka, mbyoka ya popiwa mOmbiimbeli?— Tala kokamati hoka taka dhana nepili. Aantu mboka taya ka kala muuyuni uupe itaya ka kala ya tila. (Hosea 2:18) Mbela oto dhiladhila ngiini kombinga yaashoka?—
[Oshimpungu/Omathano pepandja 252, 253]
Tala nkene aantu yomaludhi agehe ye na ombili. Ayehe oye holathane, ngaashi Jesus a li a popi kutya aalanduli ye oye na okukala ye holathane. (Johannes 13:34, 35) Iikondjitho otayi ka hambulwa yi ninge iilongitho yokulonga evi. Ombiimbeli oya popya kutya aantu otaya ka kala nombili noye na egameno enene muuyuni uupe waKalunga. Shoka otatu vulu oku shi lesha mOmanyolo ngaashi Episalomi 72:7; Jesaja 2:4; 32:16-18 naHesekiel 34:25.
Tala kaantu mbaka ye li pepandja ndika. Otaya longo evi opo li kale tali monika nawa. Tala kegumbo ewanawa ndyoka taya tungu niiyimati nosho wo iikwamboga iiwanawa ayihe mbyoka tayi ulikwa methano ndika. Aantu oye li mombili kombanda yevi, nevi olya ninga oparadisa ngaashi oshikunino shaEden. Natu leshe kombinga yiinima mbika iiwanawa mOmapisalomi 67:6; 72:16; Jesaja 25:6; 65:21-24 naHesekiel 36:35.
[Oshimpungu/Ethano pepandja 254]
Aantu ayehe mbaka wu wete mpaka oye na uukolele noya nyanyukwa. Aantu otaya vulu okunuka ngaashi omenye. Kapu na oshilema, omuposi nenge ngoka te ehama. Tala wo kaantu mboka ya yumudhwa kuusi. Ombiimbeli otayi popi kombinga yiinima mbika muJesaja 25:8; 33:24; 35:5, 6; Iilonga 24:15 nEhololo 21:3, 4.