ONTOPOLWA 6
Kwatheleni aanona yeni yoomvula omulongo nasha ya pondole
1, 2. Omashongo nenyanyu lini aagundjuka yoomvula omulongo nasha haya tsakaneke?
OKUKALA nomugundjuka gwoomvula omulongo nasha osha yooloka ko nokukala nokanona koomvula ntano nenge koomvula omulongo nokuli. Ethimbo lyokamukondapweyu ohali eta omashongo nomaupyakadhi, ihe otali vulu wo okukala ethimbo lyenyanyu nokumona uuwanawa. Pashiholelwa, Josef, David, Josia naTimoteus oyu ulika kutya aagundjuka otaya vulu okukatuka pandunge nokukala ye na ekwatathano ewanawa naJehova. (Genesis 37:2-11; 1 Samuel 16:11-13; 2 Aakwaniilwa 22:3-7; Iilonga 16:1, 2) Aagundjuka oyendji kunena oye shi pondola. Otashi vulika nokuli wu shi po yamwe.
2 Ihe kuyamwe ethimbo lyokamukondapweyu ohali kala edhigu noonkondo, molwaashoka omaiyuvo gawo ohaga lunduluka unene. Aamati naakadhona yoomvula omulongo nasha ohaya kala ya hala emanguluko nohashi vulika nokuli ya tinde omangambeko ngoka taya tulilwa po kaavali yawo. Ihe aagundjuka kaye na ontseyo ya gwana noya pumbwa ekwatho lyopahole okuza kaavali yawo. Eeno, ethimbo lyokamukondapweyu otali vulu okukala lituntula, ihe otali vulu wo okungwangwaneka aavali nosho wo aagundjuka yo yene. Ongiini aagundjuka taya vulu okukwathelwa uuna ye li pethimbo ndyoka?
3. Omomukalo guni aavali taya vulu okukwathela aanona yawo aagundjuka ye shi pondole monkalamwenyo?
3 Aavali mboka haya landula omayele gOmbiimbeli ohaya kwathele oyana ya sinde omamakelo pethimbo lyokamukondapweyu opo ya ka kale aakuluntu aawanawa. Mondjokonona ayihe nomiilongo ayihe aavali naagundjuka mboka ya tula miilonga omakotampango gOmbiimbeli oye shi enditha nawa.—Episalomi 119:1.
POPYENI OSHILI MWA MANGULUKILATHANA
4. Omolwashike oonkundathana dha pumbiwa unene uuna aanona ye li mepipi lyokamukondapweyu?
4 Ombiimbeli otayi ti: “Omadhiladhilo inaaga kundathanwa nawa otaga ponyo.” (Omayeletumbulo 15:22) Ngele osha li sha pumbiwa okukundathana naanona sho ya li aashona, osha simanenena wo pethimbo sho ye na oomvula omulongo nasha, unene tuu sho haya kala nookuume kawo yokosikola nosho wo yalwe shi vulithe megumbo. Ngele aavali naanona oya kala ihaaya kundathana nokupopya oshili ya mangulukilathana, pokati kawo itapu ka kala pu na ekwatathano ngele aanona ye li mepipi lyokamukondapweyu. Ihe ongiini aavali taya vulu okukaleka po emanguluko lyokupopya naanona yawo?
5. Ongiini aagundjuka ye na okutala ko oonkundathana naavali yawo?
5 Aavali naagundjuka oye na okudhana onkandangala moonkundathana ndhoka. Odhoshili kutya aagundjuka ohaye shi mono oshidhigu okupopya naavali yawo shi vulithe sho ya li aashona. Kakele kaashono, dhimbulukwa kutya “ngele kape na ewiliko, oshigwana otashi teka po, ihe maagandjimayele oyendji omu na ehupitho.” (Omayeletumbulo 11:14) Oohapu ndhika otadhi longo kaagundjuka nokaakuluntu wo. Aagundjuka mboka haye shi dhimbulula ohaya mono kutya oya pumbwa shili ewiliko, molwaashoka oya taalela omaupyakadhi ogendji shi vulithe nale. Aagundjuka oye na okutseya kutya aavali yawo aatilikalunga oye na owino. Nonando inaya longwa oye na ontseyo oyindji monkalamwenyo noye shi ulika kutya oye na ko nasha nayo uule womimvo odhindji. Onkee ano, aagundjuka mboka ye na oondunge itaya ka tinda omayele gaavali yawo monkalamwenyo yawo.
6. Aavali aanawino naanahole ohaya tala ko ngiini ompumbwe yokukundathana noyana aagundjuka?
6 Opo aavali ya kale haya kundathana ya manguluka noyana aagundjuka, oye na okukala aluhe yi ilongekidha okupopya nayo uuna oyana ya hala oku ya lombwela sha. Ngele owu li omuvali, shilipaleka kutya owi ilongekidha aluhe okupopya naamwoye, nonando kashi li oshipu. Ombiimbeli otayi ti kutya opu na “ethimbo lyokumwena nethimbo lyokupopya.” (Omuuvithi 3:7) Otashi vulika omumwoye a kale a hala okupopya nangoye pethimbo ndyoka wi ikalekela wu konakone paumwene, wu vululukwe po nenge wu longe sha megumbo. Ihe nonando ongaaka, ngele omumwoye okwa hala okupopya nangoye, kambadhala wu ethe shoka to ningi e to pulakene kuye. Ngele ito shi ningi, otashi vulika ita ka ninga we oonkambadhala a popye nangoye. Dhimbulukwa oshiholelwa shaJesus sho a li a hala okufudha po. Ihe sho ongundu yaantu ya li ye ya kuye oku mu pulakena, okwa li a kaleke okufudha po nokwa tameke oku ya longa. (Markus 6:30-34) Aagundjuka oyendji oye shi shi kutya aavali yawo ohaya kala yi ipyakidhila, ihe oya pumbwa okushilipalekwa kutya aavali yawo otaye ke ya kwathela uuna ya pumbwa ekwatho. Onkee ano aavali, kaleni hamu pulakene kuyo nokukala mu na ko nasha nayo.
7. Aavali oya pumbwa okuyanda shike?
7 Aavali, dhimbulukweni nkene mwa li sho mwa li mu na oomvula omulongo nasha. Shika otashi ke mu kwathela mwaaha kenyanekwe unene konkalo yaagundjuka. Aavali oye na okunyanyukilwa pamwe noyana. Aavali, ongiini hamu longitha ethimbo ndyoka mwa manguluka? Aagundjuka otaye ke shi mona mo mbala ngele ethimbo ndyoka otamu li longitha aluhe miinima inaayi pamba uukwanegumbo. Ohashi kala uupyakadhi unene ngele aagundjuka oya kala ye wete kutya ookuume kawo yokosikola oye na ko nasha nayo shi vulithe aavali yawo.
SHOKA MU NA OKUKUNDATHANA
8. Ongiini aavali taya vulu okulonga oyana ya kale haya popi oshili, ye hole iilonga noye na eihumbato ewanawa?
8 Ngele aavali inaya longa natango oyana okukala aanashili nokukala ye hole iilonga manga ye li aashona, oye na oku shi ninga lela pethimbo sho ye na oomvula omulongo nasha. (1 Aatessalonika 4:11; 2 Aatessalonika 3:10) Osha simanenena wo ya shilipaleke kutya oyana oyi itaala nomutima aguhe kutya osha simana okukala ye na omikalo nosho wo onkalamwenyo ya yogoka. (Omayeletumbulo 20:11) Iinima mbyoka omuvali ota vulu oku yi longa oyana, unene tuu moku ya tulila po oshiholelwa. Ngaashi owala omusamane ngoka keehe shi omwiitaali ta vulu ‘okufalwa meitaalo komikalo dhomukulukadhi gwe,’ naagundjuka wo otaya vulu okwiilonga shoka shi li mondjila okupitila meihumbato lyaavali yawo. (1 Petrus 3:1) Ihe okutula po owala oshiholelwa inashi gwana nando, molwaashoka aanona ohaya mono wo iiholelwa oyindji iiwinayi nohayu uvu omitotolombo tadhi hokitha mokweendathana naantu yalwe. Onkee ano, aavali mboka ye na ko nasha noyana aagundjuka oya pumbwa okutseya omataloko gawo nkene ya tala ko iinima mbyoka haya mono naambyoka hayu uvu, naashika otashi pula oonkundathana tadhi ti sha.—Omayeletumbulo 20:5.
9, 10. Omolwashike aavali ye na okulonga oyana kombinga yomilalo, nongiini taya vulu oku shi ninga?
9 Osha simana unene aavali ya tseye etaloko lyoyana kombinga yiinima yopamilalo. Aavali, mbela ohamu kala mwa sa ohoni okupopya naanona yeni iinima yopamilalo? Nonando oho kala wa sa ohoni, kambadhala wu shi ninge molwaashoka ngele ito ya longo, gumwe i ili ote ke shi ninga. Ngele ito ya longo, oto ka tseya ngiini kutya shoka gumwe te ya longo oshi li mondjila? MOmbiimbeli, Jehova ina sa ohoni okupopya kombinga yomilalo, onkene aavali nayo oye na oku shi ninga.—Omayeletumbulo 4:1-4; 5:1-21.
10 Shoka shi shi okupandulwa osho kutya Ombiimbeli otayi gandja uuyelele wa yela shi na ko nasha nomilalo, nEhangano lyOonzapo dhaJehova olya nyanyangidha iileshomwa oyindji mbyoka yi na uuyelele tawu tu kwathele kunena moshinima shika. Omolwashike itoo longitha iileshomwa mbyoka? Pashiholelwa, omolwashike itoo lesha naamwoye aamati nenge aakadhona iitopolwa ngaashi “Omilalo nosho wo omikalo” (“Sex and Morals”) membo lyotango lyo-Questions Young People Ask—Answers That Work? Otashi vulika wu ka kumwe kiizemo iiwanawa mbyoka to ka mona.
11. Omukalo gwa dhenga mbanda oguni aavali taya vulu okulongitha mokulonga aanona yawo nkene ye na okulongela Jehova?
11 Oshike sha simanenena shoka aavali naanona ye na okukundathana? Omuyapostoli Paulus okwe shi popi sho a nyola a ti: “Aakuluntu, inamu hinda aana yeni noku ya geyitha, aawe, ya putudhileni mevuliko nomekumagidho lyOmuwa.” (Aaefeso 6:4, OB-1954) Aanona oye na okukala taya longwa kombinga yaJehova. Oye na unene tuu okwiilonga okukala ye mu hole noye na okukala ya hala oku mu longela. Moshinima shika wo aavali otaya vulu oku ya tulila po oshiholelwa. Ngele aagundjuka oya mono kutya aavali yawo oye hole Kalunga ‘komutima gwawo aguhe nokomwenyo gwawo aguhe nokomadhiladhilo gawo agehe’ noye wete kutya aavali yawo otayi imike iiyimati iiwanawa, otashi vulika wo ya ka ninge sha faathana. (Mateus 22:37) Sha faathana, ngele aagundjuka oya mono kutya aavali yawo itaya lalakanene omaliko notaya pititha komeho Uukwaniilwa waKalunga, otashi ke ya kwathela ya kokeke iikala ya fa mbyoka.—Omuuvithi 7:12; Mateus 6:31-33.
12, 13. Iitsa yini yi na okukalekwa momadhiladhilo opo ekonakono lyuukwanegumbo li kale tali ti sha?
12 Okukala nekonakonombiimbeli lyuukwanegumbo lyokoshiwike otaku kwathele okulonga aagundjuka iinima yopambepo. (Episalomi 119:33, 34; Omayeletumbulo 4:20-23) Osha simanenena okukala nekonakono ndyoka pandjigilile. (Episalomi 1:1-3) Aavali noyana oye na okukala ya lenga ekonakono ndyoka shi vulithe iinima yilwe. Natango, iikala yu uka oya pumbiwa muukwanegumbo opo ekonakono li kale tali ti sha. Omusamane gumwe omuvali okwa ti: “Oshi li nawa ngoka ta kwatele komeho ekonakono lyuukwanegumbo e shi ninge momukalo tagu hokitha nogwesimaneko, ihe kali na okukala lya fa uudhano. Kashi li oshipu okukala wu na ondjele moshinima shika, naagundjuka oya pumbwa olundji okupukululwa. Ngele oshikando shimwe inashi enda nawa, ino sa uunye, ihe ninga oonkambadhala mwaashoka tashi landula ko.” Omusamane nguka okwa ti kutya manga inaaya tameka ekonakono, oha pula ekwatho kuJehova megalikano opo kehe ngoka ta ka kutha ombinga mekonakono e shi ninge niikala yu uka.—Episalomi 119:66.
13 Okukwatela komeho ekonakono lyuukwanegumbo oshi li oshinakugwanithwa shaavali aatilikalunga. Odhoshili kutya aavali yamwe otashi vulika ya kale kaaye shi okulesha nawa notashi vulika shi kale oshidhigu kuyo okuninga ekonakono lyuukwanegumbo li kale tali hokitha. Nonando ongaaka, ngele owu hole aagundjuka yoye ‘miilonga nomoshili’ oto ka kala wa halelela oku ya kwathela neifupipiko nonomutima aguhe ya koke pambepo. (1 Johannes 3:18, OB-1954) Otashi vulika omathimbo gamwe ya kale nokungungutula, ihe otaya ka mona nkene wu na ko nasha nonkalonawa yawo.
14. Ongiini to vulu okutula miilonga Deuteronomium 11:18, 19 uuna to kundathana iinima yopambepo naagundjuka?
14 Pekonakono lyuukwanegumbo hapo owala pu na okupopiwa iinima mbyoka ya simana pambepo. Mbela oto dhimbulukwa oshipango shoka Jehova a li a pe aavali? Okwa ti: “Thindileni ano oohapu ndhika dhandje moomwenyo, ne mu dhi dhiladhile. Nadhi kale edhimbulutho lya mangelwa kiikaha yeni nenge li li miipala yeni. Dhi nongekeni aana yeni. Dhi hokololeni, uuna mu li moyaandjeni nuuna tamu ende mepola, uuna tamu vululukwa nuuna tamu longo.” (Deuteronomium 11:18, 19; tala wo Deuteronomium 6:6, 7.) Shika inashi hala okutya aavali oye na okukala aluhe tayu uvithile oyana. Ihe omutse ngoka gu hole uukwanegumbo wagwo ogu na okukala hagu kongo oompito tadhi opalele oku wu tunga pambepo.
EGEELOPUTUDHO NESIMANEKO
15, 16. (a) Egeeloputudho oshike? (b) Olye e na oshinakugwanithwa shokugandja egeeloputudho, nolye e na oshinakugwanithwa shoku li pulakena?
15 Oshitya egeeloputudho otashi ti okuukitha nokupukulula omuntu nosha kwatela mo wo oonkundathana. Okugandja egeeloputudho okwa kwatela mo unene okupukulula omuntu pehala lyoku mu geela, nonando otashi vulika egeelo lya pumbiwa. Aanona oya pumbwa okupewa egeeloputudho manga ye li aashona, ihe naashono ye na oomvula omulongo nasha oya pumbwa eputudho lyontumba, shi vulithe nale nokuli. Aagundjuka mboka ye na oondunge oye shi shi kutya shika oshoshili.
16 Ombiimbeli otayi ti: “Egoya ohali dhini omaputudho gahe, ihe ngoka ta pulakene omapukululo, ota ningi omunawino.” (Omayeletumbulo 15:5) Menyolo ndika otatu ilongo mo oshindji. Otali ulike kutya egeeloputudho oli na okugandjwa. Omugundjuka ita vulu ‘okupulakena epukululo’ ngele inali gandjwa. Oshinakugwanithwa shokugandja egeeleputudho Jehova okwe shi pa aavali, unene tuu tate. Ihe oshinakugwanithwa shomugundjuka okupulakena kepukululo ndyoka. Ote ki ilonga oshindji nota ka ninga omapuko omashona ngele okwa pulakene kepukululo li li pandunge lyahe nayina. (Omayeletumbulo 1:8) Ombiimbeli otayi ti: “Ngoka ta sasana eputudho, oti ilikolelele oluhepo nohoni, ihe ngoka ta simaneke omakumagidho, okwa yela.”—Omayeletumbulo 13:18.
17. Ongiini aavali taya vulu okukala ye na ondjele uuna taya gandja egeeloputudho?
17 Aavali oye na okukala ye na ondjele uuna taya pe aagundjuka egeeloputudho. Kaye na okukala ya kwata miiti unene, shoka tashi vulu okuyemateka oyana nokukala yi isa uunye nokuli. (Aakolossa 3:21) Ihe natango, aavali kaye na okulela oyana ondembula. Okuputudha kwa tya ngaaka oku li oshiponga. Omayeletumbulo 29:17 otaga ti: “Putudha omumwoyemati, nena ote ke ku vululukitha, e ta ka nyanyudha omwenyo gwoye.” Ihe ovelise 21 otayi ti: “Omuntu ngele ta lele omupiya gwe ondembula okuza kuunona, komeho ke shi okupandula.” Nonando ovelise ndjika otayi popi omupiya, otayi longo wo sha faathana nokanona megumbo.
18. Okugandja egeeloputudho oku li euliko lyashike, naavali otaya ka henuka shike uuna taye li gandja pethimbo mpoka sha pumbiwa?
18 Oshili oyo kutya okugandja egeeloputudho kokanona pamukalo gu uka oshi li euliko kutya omuvali oku ka hole. (Aahebeli 12:6, 11) Aavali oye shi shi nawa kutya haaluhe shi li oshipu okugandja egeeloputudho pethimbo mpoka lya pumbiwa noli li pandjele kokanona. Aavali yamwe ohashi vulika ye ethe omugundjuka ngoka e na oshityani a ninge ngaashi a hala opo ya kaleke po aniwa ombili. Ihe konima yethimbo omuvali ngoka ha ningi ngaaka ote ke shi mona owala kutya osha puka uuna egumbo lye li li mehalakano.—Omayeletumbulo 29:15; Aagalati 6:9.
IILONGA NOMAINYANYUDHO
19, 20. Ongiini aavali taya vulu okuungaunga pandunge nomainyanyudho ngoka aagundjuka yawo taya hogolola?
19 Aagundjuka oya pumbwa ethimbo lyokwiinyanyudha, noongeshefa odhindji kunena muuyuni ohadhi landitha iinima yomainyanyudho. Ihe uuyuni kawu na ko nasha nomakotampango gOmbiimbeli gopamikalo, onkene omainyanyudho ngoka hawu gandja otaga vulu okukala ga nika oshiponga kaanona.
20 Aavali mboka ye na ko nasha ohaya ningi etokolo lyahugunina kombinga yomainyanyudho goyana. Ihe aavali kaye na okudhimbwa kutya aagundjuka kaye shi we aanona aashona. Onkene omumvo kehe ohaya kala ya hala okutalika ko ye li aakuluntu. Onkee ano, sho taya koko oshi li pandunge aavali ye ya pitike ya hogolole omainyanyudho gamwe, shampa owala omahogololo gawo tagu ulike kutya otaya humu komeho pambepo. Ethimbo limwe, otashi vulika omugundjuka a ninge ehogololo kaali li pandunge shi na ko nasha nomusika, nomainyanyudho nomiinima yilwe. Uuna sha ningwa, owu na oku shi kundathana naye opo a ninge omahogololo gopandunge monakuyiwa.
21. Ongiini okulongitha ethimbo pandjele momainyanyudho taku vulu okugamena omugundjuka?
21 Ethimbo li thike peni aagundjuka ye na okulongitha momainyanyudho? Miilongo yimwe aagundjuka oyi itaala kutya oya manguluka okwiinyanyudha sigo nake mu faalele. Onkee ano, mboka ye li methimbo lyokamukondapweyu otashi vulika ya kale nelandulathano lyomainyanyudho ngoka kaage na oluthuwo. Aavali oye na okulombwela aagundjuka ya longithe ethimbo miinima ngaashi okukala pamwe nuukwanegumbo, ekonakono lyopaumwene, okweendathana naantu mboka ya pyokoka pambepo, okukala pokugongala nosho wo okulonga iilonga yomegumbo. Iinima mbyoka otayi ke ya kwathela opo ‘uuhalu wopauyuni’ kaawu theteke mo Oohapu dhaKalunga muyo.—Lukas 8:11-15.
22. Kakele komainyanyudho, aagundjuka oya pumbwa shike opo ya kale nonkalamwenyo yinyanyudha?
22 Omukwaniilwa Salomo okwa ti: “Onde shi dhimbulula kutya omuntu mokukalamwenyo kwe ke na elago lilwe lyaa shi okunyanyukwa nokulonga uuwanawa. Naashika wo omuntu a lye ye a nwe noku nyanyukilwe [iilonga ye ayihe yuudhiginini. Oyo omagano gaKalunga].” (Omuuvithi 3:12, 13, yelekanitha NW.) Omainyanyudho oge li lela oshitopolwa shonkalamwenyo yi na ondjele, ihe okulonga nuudhiginini nako oku li wo oshitopolwa shayo. Aagundjuka oyendji kunena kaye shi shi ngele okulonga nuudhiginini ohaku eta enyanyu nenge ya kale yi ipanda ngele yu ungaunga nuupyakadhi noku wu kandula po. Aagundjuka oye na okulongwa ya kale haya longo nuudhiginini, pashiholelwa, okulonga mepya, okukala ye shi okutunga niilonga iikwawo yokomake. Aavali oye na oshinakugwanithwa shokulonga oyana ya kale haya longo nuudhiginini. Ngele itaye ya longo, otaya ka kala aanyenge noitaya ka vula okwiisila oshimpwiyu yo yene. Ngele owa longo aamwoye okukala ye hole iilonga otaya ka kala ye na etaloko li li nawa ndyoka tali ke ya kwathela monkalamwenyo yawo ayihe.
KWATHELA AAGUNDJUKA SIGO YA KOKO
23. Ongiini aavali taya vulu okutsa aagundjuka yawo omukumo?
23 Aavali, nonando omu na uupyakadhi naagundjuka yeni, enyolo otali popi natango oshili tali ti: “Ohole itayi hulu po.” (1 Aakorinto 13:8) Inamu etha nando okuulukila oyana yeni ohole ndjoka mu ya nine. Ipula kutya: ‘Mbela ohandi pandula ngaa okanona kehe ngele ka pondola mokuungaunga nuupyakadhi nenge nemakelo lyontumba? Mbela ohandi kongo oompito okuulukila aamwandje ohole noku ya pandula manga pu na ompito?’ Nonando omathimbo gamwe ohapu kala okwaahauvathana, ngele aagundjuka oye wete kutya owu ya hole, nayo otaya ka kala ye ku hole.
24. Ekotampango lyOmbiimbeli lini tali longo mokuputudha aanona, ihe aavali oye na okudhimbulukwa shike?
24 Osha yela kutya sho aanona taye ende taya koko otaya ka ninga omatokolo ga kwata miiti. Poompito dhimwe, aavali otashi vulika ya kale inaaye ga hokwa. Ongiini ngele okanona kawo oka tokola kutya inaka hala we okulongela Jehova Kalunga? Otashi vulu okuningwa. Nokuli nayamwe yomoyanamati yaJehova yopambepo oya li ye ekelehi ewiliko lye noya ningi aanashipotha. (Genesis 6:2; Judas 6) Aanona kaye shi nando omashina ngoka omuntu ha sitele ga ninge shoka a hala. Oye li iishitwa yi na emanguluko okuninga omatokolo noye na okwiihokolola kuJehova omolwomatokolo ngoka taya ningi. Ihe oohapu dhOmayeletumbulo 22:6 otadhi ti: “Putudha omumati pandjila ndjoka e na okweenda nayo, nena nomuukulupe ita gamuka mo muyo.”
25. Omukalo omwaanawa gwokupandula Jehova omolwuuthembahenda wokukala aavali oguni?
25 Onkee ano, ulukila aamwoye ohole ya gwana. Ninga ngaashi to vulu wu landule omakotampango gOmbiimbeli moku ya putudha. Ya tulila po oshiholelwa oshiwanawa sheihumbato lyometilokalunga. Kungawo, otamu ka kwathela oyana yeni ya ninge aakuluntu aanandunge naatilikalunga. Shoka oshi li omukalo omwaanawa okupandula Jehova omolwuuthembahenda wokukala mu li aavali.
ONGIINI OMAKOTAMPANGO GOMBIIMBELI NGAKA TAGA VULU OKUKWATHELA AAVALI YA PUTUDHE AANONA YAWO YOOMVULA OMULONGO NASHA?
Oonkundathana odha pumbiwa.—Omayeletumbulo 15:22.
Otu na okulesha Oohapu dhaKalunga pandjigilile.—Episalomi 1:1, 2.
Omuntu omunawino oha pulakene egeeloputudho.—Omayeletumbulo 15:5.
Iilonga nosho wo omainyanyudho oyi na ethimbo lyayo.—Omuuvithi 3:12, 13.
[Ethano pepandja 67]
Kala wi ilongekidha okupopya uuna omumwoye omugundjuka a hala oku ku lombwela sha
[Ethano pepandja 69]
Ekonakonombiimbeli lyondjigilile lyuukwanegumbo olya simanenena
[Ethano pepandja 70]
Ulukila aamwoye ohole noku ya pandula