Oshileshwa 2

Kalunga oye kuume omwaanawa ngoka to vulu okukala u na

Okuninga kuume kaKalunga osho oshinima oshiwanawa shoka tashi vulu oku ku ningilwa. Kalunga ote ke ku longa nkene to vulu okukala wa nyanyukwa nowa gamenwa; ote ke ku mangulula komalongo ogendji ga puka nokiilonga ya nika oshiponga. Ota ka pulakena komagalikano goye. Ote ke ku kwatha u kale nombili yopamutima neinekelo. (Epsalmi 71:5; 73:28) Kalunga ote ke ku yambidhidha pomathimbo guudhigu. (Epsalmi 18:19) Kalunga note ku pe omagano ge gomwenyo gwaaluhe.—Aaroma 6:23.

Manga to hedha popepi naKalunga, oto hedha wo popepi nookuume kaKalunga. Yo otaya ka ninga ookuume koye wo. Dhoshili, yo otaya ka kala ya fa aamwanyoko aalumentu naakiintu. Yo otaya ka kala ya nyanyukwa oku ku longa kombinga yaKalunga notaye ke ku kwatha noku ku ladhipika.

Tse katu thike pamwe naKalunga. Manga to lalakanene uukuume naKalunga, ou na okuuva ko oshinima sha simana. Uukuume naKalunga kau shi uukuume pokati kaantu ye thike pamwe. Ye oku tu vule muukuluntu nomuunongo noku na oonkondo odhindji e tu vule. Ye oku na uuthemba wokukala e li Omupangeli gwetu. Onkee ano ngele otwa hala okukala ookuume ke, otu na okupulakena kuye nokuninga shoka te tu lombwele tu ninge. Shika otashi ke tu etela aluhe uuwanawa.—Jesaja 48:18.