Oshileshwa 5

Ookuume kaKalunga otaya ka kala moparadisa

Oparadisa itayi ka kala ya fa uuyuni moka tu li ngashingeyi. Kalunga ka li nando a hala evi li kale lyu udha omaupyakadhi noluhodhi, uuwehame nokumona iihuna. Monakuyiwa, Kalunga ota ka ninga evi oparadisa. Oparadisa mbela otayi ka kala ya tya ngiini? Natu tale shoka Ombimbeli tayi ti:

Aantu ye li nawa. Oparadisa otayi ka kala egumbo lyookuume kaKalunga. Otaya ka ningilathana iinima iiwanawa. Otaya ka kala mo taya tsu kumwe noondjila dhaKalunga dhuuyuuki.—Omayeletumbulo 2:21.

Eloolo lyiikulya. MOparadisa, itamu ka kala ondjala. Ombimbeli otayi ti: “Ekuta lyiilya [nenge lyiikulya] tali kala moshilongo.”—Epsalmi 72:16.

Omagumbo omawanawa niilonga yinyanyudha. MOparadisa kombanda yevi, uukwanegumbo kehe otau ka kala u na egumbo lyawo. Kehe gumwe ota ka longa iilonga mbyoka tayi mu etele elago lyashili.—Jesaja 65:21-23.

Ombili muuyuni auhe. Aantu itaya ka kondja we nokusila miita. Oohapu dhaKalunga otadhi ti: “[Kalunga] ota hulitha po omalugodhi.”—Epsalmi 46:8, 9, OB-1986.

Uukolele uuwanawa. Ombimbeli otayi uvaneke: “Kape na nando ogumwe [mOparadisa] ta ka tya: ‘Otandi ehama.’” (Jesaja 33:24, OB-1986) Niishewe, kapu na gumwe ta ka kala oshilema nenge omuposi nenge omuthitamatsi nenge ihaa vulu okupopya.—Jesaja 35:5, 6.

Ehulilo lyuuwehame, oluhodhi neso. Oohapu dhaKalunga otadhi ti: “Neso kali kala [po] we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:4.

Aantu aawinayi itaya ka kala po we. Jehova otu uvaneke: “Aakaanakonashanakalunga taa tudhwa moshilongo, naaniifundja oyo taa fulwa mo.”—Omayeletumbulo 2:22.

Aantu otaya ka kala ye holathane nohaya simanekathana. Itapu ka kala we okwaahenuuyuuki, ethininiko, olwiho nuutondwe. Aantu otaya ka kala ya hangana notaya ka kala taya tsu kumwe noondjila dhaKalunga dhuuyuuki.—Jesaja 26:9.