Ontopolwa 19
Konima yaHarmagedon, Eviparadisa
1. (a) Oshike shi li etaloko lyaapuhe kombinga yaHarmagedon? (b) Ombimbeli otayi ti ngiini kwaashono?
“HARMAGEDON” osho oshitya hashi tilitha oyendji. Aawiliki yuuyuni oye shi longitha olundji okuulika kIita Iititatu yUuyuni mbyoka tashi vulika yi ningwe. Ihe Ombimbeli otayi popi Harmagedon kutya ehala mpoka Kalunga ta ka kondja olugodhi oluyuki. (Ehololo 16:14, 16) Olugodhi nduka lwaKalunga otalu ka longekidha ondjila molwonkalelo ompe yuuyuki.
2. (a) Oolye taa ka hanagulwa po puHarmagedon? (b) Omalongitho geni po ano tu na okuyanda pandunge?
2 Shi ili komalugodhi gaantu, moka hamu dhipagelwa aantu aawanawa naawinayi, Harmagedon otayi ka hanagula po owala aantu aawinayi. (Epsalmi 92:8) Jehova Kalunga oye ta ka kala Omupanguli, nota ka yona po kehe gumwe ngoka ta tindi owina okuvulika koompango dhe dhuuyuki. Aantu oyendji nena kaye wete epuko lyasha koluhondelo, uunkolwe, iifundja nenge ekotokelo. Ihe kuKalunga, iinima mbika epuko. Ano puHarmagedon ye ita ka hupitha nando mboka ya dhiginina muyo. (1 Aakorinto 6:9, 10; Ehololo 21:8) Osha simana kaantu mboka haa longo iinima ya tya ngaaka yuuwinayi noya tseya shoka ompango yaKalunga tayi ti kwaashoka, ya lundulule omikalo dhawo.
3. (a) Onashike Jesus a yelekanitha ehulilo lyuuyuni? (b) Oshike tashi ka ningilwa Satana noompwidhuli dhe? (c) Pamanyolo gopomapandja taga landula, oonkalo dholudhi luni po tadhi ka nyanyukilwa meviparadisa?
3 Konima yaHarmagedon itapu ka hupa nando ombinga yuuyuni mbuka wuukolokoshi. Aantu owala mboka haa longele Kalunga taa ka kala po. (1 Johannes 2:17) Jesus Kristus okwa yelekanitha onkalo naandjoka yopethimbo lyaNoa. (Mateus 24:37-39; 2 Petrus 3:5-7, 13; 2:5) Konima yaHarmagedon, Uukwaniilwa waKalunga owo owala tau ka kala epangelo tali pangele kombanda yevi alihe. Satana noompwidhuli dhe itaa ka kala po we. (Ehololo 20:1-3) Tala komathano taga landula komalaleko nuuyamba gamwe po ngoka Ombimbeli tayi holola taga ka nyanyukilwa kaantu aavuliki.
OMBILI YUUNTU AUHE
“Otwa valelwa omunona! Otwa pewa omumati! Epangelo olye; oli li komapepe ge. Ota lukwa . . . [Omuwa] gwombili. Uukwaniilwa we kau na mpoka tau hulu po, noshilongo she otashi kala aluhe shi na ombili.”—Jesaja 9:6, 7, OB-1986.
“Omuyuuki ta tsama nawa pomasiku ge nombili oyindji sigo kaku na we omwedhi. Oye na pangele kefuta sigo kefuta ekwawo nokomulonga sigo kooha dhevi.”—Epsalmi 72:7, 8.
KAPU NA WE IITA
“Ileni, mu tale iilonga yOmuwa! Ha longo iikumitha kombanda yevi, ta hulitha [po] omalugodhi sigo kooha dhuuyuni.”—Epsalmi 46:9, 10.
OMAGUMBO OMAWANAWA NIILONGA YO OPALA KWAAYEHE
“Oyo taa kala nokudhika omagumbo nokukala mo . . . Ihaa kala nokutunga, yalwe ando ya kale mo, ihaa kunu, yalwe ando ya kale nokulya iiyimati yawo . . . Aahogololwa yandje oyo yene taa ku utha iilonga yiikaha yawo. Oyo itaa kala nokwiihepeka osima noluvalo lwawo itaaye lu valele we okusa kwohaluka, oshoka oyo oluvalo lwaamboka ya lalekwa nuuyamba kOmuwa, noluvalo lwawo otalu kala puyo.”—Jesaja 65:21-23.
IILONGA YOMUYONENA, EKUNI NUUKOLOKOSHI OYA VUDHWA MO
“Oshoka aadhudhu otaa ka vudhwa mo sheke . . . Oku na okathimbo kowala, omukeenakonashanakalunga nokee po we; nonge to tala eha lye, okwa yi nale.”—Epsalmi 37:9, 10.
“Ihe aakaanakonashanakalunga taa tudhwa moshilongo, naaniifundja oyo taa fulwa mo.”—Omayeletumbulo 2:22.
EVI ALIHE OPARADISA
Jesus okwa ti: “To [ka] kala pamwe nangame muParadisa.”—Lukas 23:43.
“Aayuuki otaa ka thigulula evi e taa kala mo sigo aluhe.”—Epsalmi 37:29, OB-1986.
EKUTA LYIIKULYA IIWANAWA KWAAYEHE
“Omuwa, Kalunga koongundu dhaakwiita, ota hangele aantu ayehe . . . oshituthi shomagadhi, oshituthi shomaviinu noshoontumba dhomagadhi, shomaviinu ga dhindolwa.”—Jesaja 25:6.
“Ekuta lyiilya tali kala moshilongo nosigo koondungu dhoondundu.” “Evi lye eta iimeno yalyo; Kalunga, Kalunga ketu, te tu laleke nuuyamba.”—Epsalmi 72:16; 67:7.
4, 5. (a) Oonkalo dhini po itaadhi ka kala po we meviparadisa? (b) Oshike ano aantu taa ka vula okuninga shoka yo itaa vulu okuninga nena pomahala ogendji?
4 Kapu na omalimbililo, ngoye owa hala okukala meviparadisa lya fa oshikunino moka mwa shitilwe omuntu gwotango Adam. (Genesis 2:8; Lukas 23:43) Dhiladhila owala kwaashono—kapu na we iita, iilonga yomuyonena nenge ekuni. Ngoye oto ka vula okweenda ethimbo kehe lyomutenya nenge lyuusiku pehala kehe nopwaa na uumbanda weehameko lyasha. Paushili, itaku ka kala we aantu aakolokoshi.—Epsalmi 37:35-38.
5 Otashi ti kutya itaku ka kala we aakwapolitika aakaanuuyuki naawiliki aanalwiho yoongeshefa okuthiminika aantu. Aantu itaa ka kala we nomutenge gwefendelo ndyoka lya londo molwokufuta iikondjitho. Itaku ka kala we nando gumwe ta ka kala kee na iikulya iiwanawa nenge ehala lyokukala ewanawa molwashoka ando itee shi vulu. Uukwaaniilonga, engushuluko lyiimaliwa noondando dha londa, otayi ka kala iinima yomepitathimbo. Omaupyakadhi ngoka hage etele omaukwanegumbo omeehamo nena, itaga ka kala po we. Ayehe otaa ka kala ye na iilonga iiwanawa, notaa ka nyanyukilwa iiyimati yiilonga yawo.
6. (a) Oshilonga shini po tashi ka longwa koonakuhupa puHarmagedon? (b) Ongiini Kalunga ta ka laleka nuuyamba iilonga yawo?
6 Mboka taa hupu puHarmagedon, otaa ka kala tango ye na iilonga yokwoopaleka evi nokukutha po oondoya dhonkalelo ndjika onkulu. Opo nduno yo taa ka mona uuthembahenda kohi yepangelo lyUukwaniilwa okulonga evi noku li ninga ehala ewanawa lyokukala. Alikana otashi ka kala iilonga iiwanawa ngiini! Kalunga ota ka laleka nuuyamba ashihe shoka tashi ka longwa. Ye ota ka gandja onkalo yombepo yu uka ku menekwe iilya noku tekulwe iimuna, nota ka sa oshimpwiyu kutya yi gamenwe komikithi nokiiponga.
7. (a) Euvaneko lyaKalunga lini po tali ka gwanithwa? (b) Pauvaneko lyaKalunga, Aakriste otaa tegelele shike?
7 Euvaneko tali landula lyOmushiti omunahole, ndyoka lya gandjwa komupsalmi gwOmbimbeli, otali ka gwanithwa: “To matula oshikaha shoye, to kutitha iinamwenyo ayihe kesilohenda.” (Epsalmi 145:16) Eeno, omahalo agehe gu uka gaantu aatilikalunga otaga ka gwanithwa thiluthilu. Nokuli tse itatu vulu okuyeleka nkene omwenyo tagu ka kala omukumithi moparadisa kombanda yevi. Okupopya kombinga yelongekidho lyaKalunga okulaleka nuuyamba oshigwana she, omuyapostoli Petrus okwa nyola: “Opauvaneko [lyaKalunga] otse otatu tegelele omagulu omape nevi epe, moka tamu ka kala uuyuuki.”—2 Petrus 3:13; Jesaja 65:17; 66:22.
8. (a) Omolwashike inaatu pumbwa omagulu omape gopanshitwe? (b) “Omagulu omape” oshike?
8 “Omagulu omape” ngano oshike? Kage shi omagulu omape gopanshitwe. Kalunga okwa shiti omagulu getu gopanshitwe ga gwanenena, notage mu simanekitha. (Epsalmi 8:4; 19:2, 3) “Omagulu omape” ogo epangelo epe kevi alihe. “Omagulu” gongashingeyi oga thikama momapangelo ngoka ga dhikwa po kaantu. Go otaga ka hula po puHarmagedon. (2 Petrus 3:7) “Omagulu omape” ngoka tage ke ya pehala lyago, otaga ka kala epangelo lyaKalunga lyomegulu. Jesus Kristus oye ta ka kala omukwaniilwa gwalyo. Ihe 144 000 yomaalanduli ye aadhiginini, otaa ka pangela pamwe naye ye li ombinga ‘yomagulu omape.’—Ehololo 5:9, 10; 14:1, 3.
9. (a) “Evi epe” oshike? (b) Evi ndyoka tali ka hanagulwa po oshike?
9 “Evi epe” oshike ano? Kali shi opulanete ompe. Kalunga oku umbu opulanete ndjika Evi lyo opalelela okukalwa kaantu, nosho ehalo lye kutya li kale sigo aluhe. (Epsalmi 104:5) “Evi epe” olyo ongundu ompe nenge uulipamwe uupe waantu. Olundji Ombimbeli otayi longitha oshitya “evi” momukalo tuu ngoka. Pashiholelwa, yo otayi ti: “Evi alihe [kwa dhiladhilwa aantu] li na okudhimbulula, Israel oku na Kalunga.” (1 Samuel 17:46) “Evi” ndyoka tali ka hanagulwa po, olyo aantu mboka yi iningi ombinga yonkalelo ndjika yuukolokoshi. (2 Petrus 3:7) “Evi epe” ndyoka tali ke ya pehala lyawo, otali ka thikama maapiya yashili yaKalunga mboka yi iyoolola ko yo yene kuuyuni mbuka waantu aakolokoshi.—Johannes 17:14; 1 Johannes 2:17.
10. (a) Oolye taa gongelwa ngashingeyi, nomushike? (b) Pamanyolo gopomapandja taga landula, oshike tashi ka ningwa po meviparadisa shoka omapangelo gaantu inaga pondola oku shi ninga?
10 Pethimbo ndika aantu yomaludhi noyomihoko adhihe mboka taa ka ninga “evi epe” otaa gongelwa megongalo lyopakriste. Uukumwe nombili ndjoka yi li po muyo, oyo owala okumona komeho kashona iinima mbyoka tayi ka hokitha onkalamwenyo meviparadisa konima yaHarmagedon. Dhoshili, Uukwaniilwa waKalunga otau ke eta po sha shoka kaapu na nando epangelo lyomuntu ndyoka tali vulu oku shi ninga. Dhiladhila owala komalaleko nuuyamba gamwe po pomapandja taga landula.
UUNTU AUHE OTAU KA NINGA UUMWAYINATHANA WOPAHOLE
“Kalunga iha tala omuntu kombanda. Ihe moshilongo kehe oongoka he mu tila e ta dhiginine uuyuki, ote mu opalele.”—Iilonga 10:34, 35.
“Tala ihe, ongundu onene, ya nyenge okuyalulwa, oyomaapagani ayehe noyomiilongo ayihe noyomiigwana ayihe noyomomalaka agehe . . . Oyo itaa si we ondjala nenge enota.”—Ehololo 7:9, 16.
OMBILI POKATI KAANTU NIINAMWENYO
“Embungu otali kala poonzi, nongwe otayi kala ya lala puukombwena; ontana nonime ongundjuka nondumetana tadhi napele mumwe, nokamati okashona take dhi litha.”—Jesaja 11:6; 65:25.
KAPU NA WE OMIKITHI, UUKULUPE NENGE ESO
“Nena omeho gaaposi otaga tonata, nomakutsi goombolo otaga thituluka. Esiku ndyoka oshitiningili ta nuka ngomenye, nelaka lyoshikokoma tali imbi pombanda.”—Jesaja 35:5, 6.
“Kalunga mwene ota kala pamwe nayo, Kalunga kawo; nota theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:3, 4.
OONAKUSA OTAA YUMUDHWA
“Ethimbo tali ya, nena ayehe mboka ya kala moombila, otaa uvu ewi lye, e [taa] holoka mo.”—Johannes 5:28, 29.
“Efuta olya gandja mo oonakusa yalyo, eso noshaasi oya gandja mo oonakusa yayo.”—Ehololo 20:13.
11. Oshike tashi nyateke olundji oparadisa yoludhi ndoka aantu taa longo ngashingeyi?
11 Oparadisa kohi yUukwaniilwa waKalunga otayi ka kala ombwanawa unene ngiini yi vulithe shaa shoka onkalelo ndjika onkulu tayi vulu okuninga po! Dhoshili, aantu yamwe oya longo po nena ehala lyawo lyokukala lya fa oparadisa. Ihe aantu mboka ye li momahala ngano, otashi vulika ya kalathane nonyanya nokwiihola mwene nokuli nokutondathana. Nokonima yethimbo yo taa alukwa notaa kulupa nokusa. Ihe konima yaHarmagedon, oparadisa kombanda yevi otayi ka kwatela mo oshindji shi vulithe owala omagumbo omawanawa, iikunino nooparka.
12, 13. (a) Oonkalo dhombili dhini po tadhi ka kala po konima yaHarmagedon? (b) Oshike sha pumbiwa okweeta po oonkalo ndhino?
12 Dhiladhila owala. Aantu yomaludhi yomihoko adhihe otaa ki ilonga okukala pamwe ngaashi uukwanegumbo wumwe wuumwayinathana aalumentu naakiintu. Yo otaa ka kala ye holathane shili. Kapu na gumwe ta ka kala nakwiiholamwene nenge omukeenombili. Kapu na gumwe ta ka tonda omuntu omukwawo owala molwoludhi, olwaala nenge molwehala lye mpoka a valelwa. Okayoya otaka ka kala oshinima shomepitathimbo. Kehe omuntu kombanda yevi ota ka kala kuume kashili nomushiinda gwaantu ayehe ooyakwawo. Otashi ka kala shili oparadisa yopambepo. Owa halelela okukala moparadisa ndjika kohi ‘yomagulu omape’?
13 Aantu nena otaa popi oshindji kombinga yombili, noya dhika po nokuli ehangano “Iigwanahangano.” Ihe aantu niigwana oya topauka inaashi kala ko nale. Oshike sha pumbiwa? Omitima dhaantu odhi na okulunduluka. Omapangelo guuyuni mbuka oga nyengwa lela okugwanitha oshikumithalonga sha tya ngeyi. Ihe etumwalaka lyOmbimbeli kombinga yohole yaKalunga otali shi ningi shili.
14. Oshike tashi ningwa ngashingeyi shoka tashi ulike kutya oonkalo ndhino dhoparadisa otadhi ke ya shili?
14 Uuna aantu taa uvu kombinga yonkalelo ompe yuuyuki, oyendji yomuyo otayi inyengithwa kohole yokuhola Kalunga. Nopo nduno yo taa tameke okukalathana wo mohole onene nooyakwawo, ngaashi Kalunga e shi ningi. (1 Johannes 4:9-11, 20) Shika otashi ti elunduluko enene monkalamwenyo yawo. Oyendji mboka ya li aakwanyanya naatondi ngaashi iinamwenyo iihahu, ano oya ningi aaifupipiki naanambili. Yo otaa gongelwa moshigunda shopakriste ngaashi oonzi oomvuliki.
15. (a) Oongundu mbali dhAakriste dhini po dhi li po? (b) Tango “evi epe” otali ka thikama moolye?
15 Uule woomvula dhi vulithe 1 900 opwa gongelwa “oshigunda oshishona” shAakriste 144 000 mboka taa ka pangela pamwe naKristus. Opwa hupu owala aashona yomuyo kombanda yevi; oyendji yomuyo otaa pangele nale megulu pamwe naKristus. (Lukas 12:32; Ehololo 20:6) Ihe sho Jesus a popi kombinga yAakriste yamwe, ye okwa ti: “Ondi na oonzi dhilwe wo, dhaa shi dhomoshigunda shino [‘dhomoshigunda oshishona’]. Ondi na oku dhi enditha wo, notadhi uvu ewi lyandje, [e taa ningi uusita wumwe] nomusita gumwe.” (Johannes 10:16, faathanitha NW.) Ngashingeyi “ongundu onene” ‘yoonzi dhilwe’ ndhika otayi gongelwa. Yo otaa ka kala iilyo yotango ‘yevi epe.’ Jehova ote ke ya gamena okupita “muuwehame uunene” kehulilo lyonkalelo ndjika yuukolokoshi opo ya vule okuthigulula oparadisa yokevi.—Ehololo 7:9, 10, 13-15.
16. Oshikumithalonga shini po tashi ka ninga okukala pamwe niinamwenyo ku kale enyanyu?
16 Konima yaHarmagedon, oshikumithalonga shimwe natango otashi ka fala sigo onkalelo yoparadisa. Iinamwenyo ngaashi oonime, oongwe nomamwanka, mbyoka ngashingeyi tashi vulika yi kale oshiponga, otayi ka kala pamwe mombili. Otashi ka kala ngiini ano oshinyanyudhi oku ke enda moshiheke nokukala ethimbo efupi nonime polwaambati lwoye, e tashi vulika konima onemwanka! Hagumwe ta ka pumbwa we okutila oshishitwa oshinamwenyo oshikwawo.
17, 18. (a) Iiyetipo yoluhodhi yini po itaayi ka kala po we meviparadisa? (b) Omolwashike tatu vulu okwiinekela shili kutya ayehe otaa ka nyanyukilwa muukolele wa gwanenena?
17 Ihe nonando omagumbo niikunino yo opala, aantu aanambili niinamwenyo yi na uukuume, otaku ka kala natango oluhodhi ngele tatu alukwa, tatu kulupa notatu si. Ihe olye ta vulu okupa ayehe uukolele wa gwanenena? Omapangelo gaantu inage shi pondola okukandula po okanker, uuvu womutima nomikithi omikwawo dhi ili. Ando ya vule nokuli oku shi ninga, oondohotola odha zimina kutya shika hasho sha li tashi ka kala ehulilo lyuukulupe. Natango tse otwa li ando tatu ka kulupa. Konima yethimbo omeho getu oga li ando taga ka kala gaa na oonkondo, oontumba dhetu odha li tadhi ka loloka, oshipa shetu osha li tashi ka ninga oongandji niilyo meni lyomalutu getu oya li tayi ka mbemba. Eso olya li ando tali ka landula ko. Oluhodhi olunene ngiini!
18 Konima yaHarmagedon, meviparadisa, oshikumithalonga oshinene shaKalunga otashi ka lundulula thiluthilu onkalo ndjoka, oshoka Ombimbeli otayi uvaneke: “Kaku kala nando omuntu, ta ti: Ongame nda ala.” (Jesaja 33:24) Sho Jesus Kristus a li kombanda yevi, oku ulike oonkondo dhe okwaaludha omikithi nomavu agehe gi ili nogi ili, iinima mbyoka ya za muulunde mboka twa thigulula kuAdam. (Markus 2:1-12; Mateus 15:30, 31) Uukulupe otau ka hulithwa po wo kohi yepangelo lyUukwaniilwa. Nokuli aakulupe otaa ka ninga ishewe aagundjuka. Eeno, ‘olutu lwomuntu otalu ka fulithwa koonkondo dhuugundjuka.’ (Job 33:25) Otashi ka kala ngiini ano oshinyanyudhi okupenduka ongula kehe nokutseya kutya ou na oonkondo shi vulithe esiku lyohela!
19. Omutondi gwahugunina ngoka ta ka hanagulwa po oshike, nongiini?
19 Paushili, kapu na gumwe meviparadisa e li muukolele wuugundjuka wa gwanenena ta ka hala okusa. Nahagumwe ta ka pumbwa okusa! Uuna yo ya taamba uuwanawa wekuliloyambo, otashi ka tya hugunina kutya yo otaa ka nyanyukilwa omaganohenda omakumithi gaKalunga ‘gomwenyo gwaaluhe omuKristus Jesus, Omuwa gwetu.’ (Aaroma 6:23) PaMbimbeli, Kristus e na “okupangela sigo [Kalunga] a tula aatondi ayehe kohi yoompadhi dhe. Nomutondi ngoka ta tewa po ohugunina [oye] eso.”—1 Aakorinto 15:25, 26; Jesaja 25:8.
20. Kakele kaantu mboka ye li po ngashingeyi, oolye ishewe taa ka kala meviparadisa, nongiini shika tashi ka vulika?
20 Nokuli naantu mboka wo ye li po ngashingeyi ya sa, otaa ka nyanyukilwa meviparadisa. Otaa ka yumudhwa! Opo nduno pehala lyoonkundana dheso, otapu ka kala oonkundana dhenyanyu kwaamboka taa ka yumudhwa. Otashi ka kala ngiini oshikumithi oku ka hambelela oonakusa ootate, oomeme, aanona nayamwe aaholike okuza mombila! Itaku ka kala oongeshefa dhiiketha yomidhimba, omawendo nenge omamanya gokoombila mbyoka tayi nyateke eopalo lyeviparadisa.
21. (a) Oolye taa ka kwatha okutonatela opo ku vulikwe koompango nokomalongo ‘gomagulu omape’? (b) Ongiini tatu vulu okuholola kutya otatu tegelele shili “omagulu omape nevi epe”?
21 Oolye taa ka pangela nenge taa ka ukitha iilonga meviparadisa? Oompango nomalongo agehe otaga ka za pombanda ‘momagulu omape.’ Ihe kombanda yevi otaku ka kala aalumentu aadhiginini mboka ya langekwa okutonatela ku vulikwe koompango nokomalongo ngaka. Molwashoka aalumentu mbaka oye lile po Uukwaniilwa womegulu komukalo gwi ili, Ombimbeli otayi ya ithana “omalenga.” (Jesaja 32:1, 2; Epsalmi 45:17) Nokuli nena megongalo lyopakriste otamu langekwa aalumentu kombepo ondjapuki yaKalunga okutonatela nokuwilika iilonga ayihe yegongalo. (Iilonga 20:28) Otatu vulu okukala nuushili mwaashoka kutya konima yaHarmagedon, Kristus ota ka tonatela pu langekwe aalumentu aayuki okukalela po epangelo lyUukwaniilwa, oshoka pethimbo ndyono ye ota ka longa shu ukilila miinima yokombanda yevi. Ongiini ngoye to vulu okuholola kutya owa tegelela nenyanyu “omagulu omape nevi epe” gaKalunga? Omokukondja shili u gwanithe iitegelelwa molwomwenyo monkalelo ndjoka ompe yuuyuki.—2 Petrus 3:14.