Iinima ayihe mbyono otayi ti shike?

JESUS KRISTUS okwa ti: ‘Ehulilo lyonkalelo yiinima’ otali ka ndhindhilikilwa kiita, kompumbwe yiikulya, komalega golukayu nokomakakamo gevi.—Mateus 24:1-8, NW; Lukas 21:10, 11.

Okuza mo 1914 onkalamwenyo oya kala tayi yonwa kiita pokati kiigwana nopokati koongundu dhopamihoko, mbyoka olundji hayi etithwa kokwiidhopa moopolotika kwaawiliki yomalongelokalunga noyi li wo tayi etithwa ngashingeyi ketaandelo lyokuponokela kwuukulo.

Nonando opu na omahumokomeho gopaunongononi, aantu omamiliyona omathele oye na ompumbwe onenenene yiikulya muuyuni auhe. Omvula kehe aantu omamiliyona otaya si omolwompumbwe yiikulya.

Omalega golukwau oge li wo oshitopolwa shendhindhiliko ndyoka lya gandjwa kuJesus. Konima yIita yoTango yUuuyuni, omukithi gwegwililila ogwa li gwa dhipaga aantu ye vulithe po 21 000 000. Mepingathano nomikithi ndhoka dha li dha guma iitopolwa yilwe methimbo lyonale, go ogwa guma iigwana muuyuni auhe nosho wo oontuntu dhokokule. Ngashingeyi oAIDS otayi kwata aantu oyendji muuyuni auhe, nomikithi ngaashi oTB, omalaria, oshimela nosho wo omulendu otadhi taandele miilongo mbyoka tayi putuka.

Osha kundanwa kutya omvula kehe ohapu ningwa omakakamo gevi omayovi omilongo ga yoolokathana moonkondo. Nonando opu na iilongitho nosho wo ehwepopalo momikalo dhokuyeleka omakakamo gevi nosho wo oonkondo dhago, iiponga iinene momahala gu udha aantu mbyoka ye etithwa komakakamo gevi olundji oya ninga iikundanekwa moonkundana.

Ombimbeli oya hunganeke wo tayi ti: “Kala u shi shi, omasiku omahugunina otaku ya omathimbo omadhigu. Oshoka aantu taa ka kala nokwiihola noye na uuhalu weliko, oonakwiitanga, aaholuuntsa, aasheki, ihaa vulika kaakuluntu, [ihaa pandula, OB-1986], aakaanuuyuuki, aakaanohole, aayoni yeuvaneno, aanakatsila, aakaaneidhiliko, omaligi, aatondi yuuwanawa, aagwaaleki, aadhudhu, aatuwalali, aaholiihulo komeho gaKalunga; oyo ye na emoniko lyowala lyetilokalunga, ihe oonkondo dhalyo ye dhi idhimbike. Yanda mboka.”—2 Timoteus 3:1-5.

Mbela ito zimine kutya otu li ‘momathimbo omadhigu’?

Mbela owe shi ndhindhilika ngaa kutya aantu oyi ihole unene yo yene, oye hole unene iimaliwa noye na unene uuntsa?

Mbela olye ta vulu okupatana kutya uuyuni owu udha aantu mboka hayi indile owala ihe ihaa pandula, aayoni yeuvaneno naakaanuuyuki?

Owa tseya mbela kutya okwaavulika kaakuluntu nosho wo okwaanohole okutilithi oyi indjipala noonkondo, ihe hamomahala owala gamwe, ihe omuuyuni auhe?

Kapu na omalimbililo kutya otu li muuyuni mboka u hole unene omainyanyudho ihe kau na ohole yokuhola uuwanawa. Ombimbeli osho tayi hokolola ngawo iikala mbyoka tayi ka kala apuhe ‘momasiku gahugunina.’

Mbela opu na oshindji shoka sha pumbiwa opo ku ndhindhilikwe ethimbo ndyoka tu li mulyo? Jesus okwa hunganeke wo kutya pethimbo olyo tuu ndyoka, onkundana ombwanawa yUukwaniilwa waKalunga otayi ku uvithilwa uuyuni auhe. (Mateus 24:14) Mbela shoka osho tashi ningwa?

Oshungonangelo, oshifo sha kankamena kOmbimbeli shoka hashi nyolwa nelalakano lyokutseyitha onkundana ombwanawa yUukwaniilwa waJehova, ohashi nyanyangidhwa aluhe momalaka ogendji shi vulithe piifo yilwe.

Omvula kehe, Oonzapo dhaJehova ohadhi longitha oowili dhi vulithe pomamiliyona eyuvi okugandja uunzapo pauhandimwe kaantu kombinga yUukwaniilwa waKalunga.

Iileshomwa tayi yelitha Ombimbeli ohayi nyanyangidhwa ngashingeyi kudho momalaka 400 lwaampono, nokuli nomomalaka ngoka haga leshwa kaantu aashona mboka ye li komahala gokokule. Oonzapo dhaJehova odha thika kiigwana ayihe nonkundana ombwanawa; odhu uvitha wo muuntuntu oundji nomiitopolwa mbyoka iishona noya talika ko kaayi na oshilonga papolotika. Miilongo oyindji, ohadhi longo aluhe noprograma yelongo lyOmbimbeli.

Dhoshili, onkundana ombwanawa yUukwaniilwa waKalunga otayi uvithilwa uuyuni auhe, haku itedhululitha uuyuni, ihe okugandja uunzapo. Aantu shaa mpono otaya pewa ompito okuulika kutya oye na ko nasha naangoka a shita egulu nevi nokuulika ngele otaya ka simaneka ngaa oompango dhe nokukala ye na ohole yokuhola aantu ooyakwawo.—Lukas 10:25-27; Ehololo 4:11.

Masiku Uukwaniilwa waKalunga otau ka komba po uukolokoshi auhe kombanda yevi noku li ninga alihe oparadisa.—Lukas 23:43.

[Oshimpungu pepandja 6]

Omasiku gahugunina gashike?

Kage shi omasiku gahugunina gaantu ayehe. Ombimbeli otayi gandja etegameno li na ko nasha nokukala sigo aluhe kwaamboka taya longo ehalo lyaKalunga.—Johannes 3:16, 36; 1 Johannes 2:17.

Kage shi omasiku gahugunina gevi. Oohapu dhaKalunga otadhi uvaneke kutya evi ekaliwa otali ka kala po sigo aluhe.—Epsalmi 37:29, OB-1986; 104:5; Jesaja 45:18.

Pehala lyaashono, ngaka ogo omasiku gahugunina gonkalelo ndjika yiinima yu udha elongithonkondo nokwaahe na ohole nosho wo gaamboka ya kakatela omikalo dhayo.—Omayeletumbulo 2:21, 22.

[oshimpungu/Ethano pepandja 7]

Ombimbeli oyi li tuu shili Oohapu dhaKalunga?

Aaprofeti yOmbimbeli oya nyola iikando niikando ya ti: ‘Omuwa osho ta ti.’ (Jesaja 43:14; Jeremia 2:2) Nokuli naJesus Kristus, Omwana gwaKalunga, okwa tsu omuthindo kutya ye ‘ina popya muye mwene.’ (Johannes 14:10) Ombimbeli otayi popi sha yela tayi ti: “Enyolo kehe lya nyolwa koonkondo dhOmbepo yaKalunga.”—2 Timoteus 3:16.

Kapu na we embo lilwe lya nyanyangidhwa momalaka ogendji, ge vulithe po 2 200, ngaashi sha kundanekwa koUnited Bible Societies. Kapu na embo lilwe hali taandelithwa unene ngawo—ngashingeyi ookopi dhi vulithe pomamiliyona omayuvi gane. Mbela shoka hasho wa tegelela shi kale ngawo shi na ko nasha netumwalaka lya za kuKalunga e li tumina aantu ayehe?

Opo u mone oonkundathana dhi ihwa po dhi na ko nasha nomauliko kutya Ombimbeli oya nwethwa mo kuKalunga, tala embo The Bible—God’s Word or Man’s?, lya nyanyangidhwa kOonzapo dhaJehova.

Ngele wa lesha Ombimbeli e to zimine kutya oyi li shili Oohapu dhaKalunga, oto ka mona mo uuwanawa oundji.

[oshimpungu/Omathano pepandja 8]

Uukwaniilwa waKalunga owo shike?

Owo epangelo lyi ikalekelwa ndyoka lya dhikwa po kuKalunga kashili, Jehova, Omushiti gwegulu nevi.—Jeremia 10:10, 12.

Ombimbeli otayi popi Jesus Kristus e li ngoka a pewa oonkondopangelo dhokupangela kuKalunga. (Ehololo 11:15) Sho Jesus a li kombanda yevi, oku ulikile kutya ye okwa li e na nale oonkondopangelo oonkumithi e dhi pewa kuKalunga—oonkondopangelo ndhoka dha li dhe mu vulitha okupangela ombepo nefuta, a aludhe omikithi dhomaludhi gi ili nogi ili nokuyumudha nokuli aasi. (Mateus 9:2-8; Markus 4:37-41; Johannes 11:11-44) Omahunganeko gOmbimbeli ga nwethwa mo oga hunganeke kutya Kalunga ote ke mu pa wo “oonkondo, esimano noshilongo, niigwana ayihe, omazimo nomalaka oye mu yakula.” (Daniel 7:13, 14) Epangelo ndyoka ohali ithanwa Uukwaniilwa womegulu moka Jesus Kristus ta pangele ngashingeyi.

[Omathano pepandja 7]

Euvitho lyonkundana ombwanawa muuyuni auhe