Elalakano lyaKalunga li na ko nasha nevi olini?

1. Kalunga okwa li a shiti evi nelalakano lyashike?

Jehova evi okwe li pa aalumentu naakiintu. Evi olyo ehala lyetu lyokukala. Onkee ano, aaihokani yotango, Adam naEva, kaya li ya shitwa yu udhithe egulu noluvalo lwawo molwaashoka megulu Kalunga okwa adhika a shitila mo nale aayengeli mboka ye na okukala mo. (Job 38:4, 7) Nomolwaashono a shiti omuntu gwotango e te mu tula moshikunino oshiwanawa shoka hashi ithanwa oshikunino shaEden. (Genesis 2:15-17) Jehova okwa li e mu pe pamwe noluvalo lwe etegameno lyokunyanyukilwa omwenyo sigo aluhe kombanda yevi. — Lesha Episalomi 37:29; 115:16.

Petameko, oshikunino shaEden osho owala sha li oparadisa. Aaihokani yotango oya li ye na okuudhitha evi noluvalo lwawo. Oya li ye na okuudhitha evi alihe noku li ninga oparadisa. (Genesis 1:28) Evi kali na esiku li hanagulwe po. Otali kala aluhe ehala lyokukala aantu. — Lesha Episalomi 104:5.

Tala okavidio Kalunga okwa li a shiti evi nelalakano lyashike?

2. Omolwashike ngashingeyi evi kaali shi oparadisa?

Adam naEva kaya li ya vulika kuJehova Kalunga, nomolwaashoka a li e ya tidha mo moshikunino. Aantu oya li ya kanitha Oparadisa, nokapu na nando omuntu a vulu okweeta ko ishewe oparadisa. Ombiimbeli otayi ti: ‘Uuyuni owa yi mepangelo lyaakaanakalunga.’ — Job 9:24. — Lesha Genesis 3:23, 24.

Mbela Jehova ota kala ngaa inaa gwanitha po elalakano lye lyotango li na ko nasha naantu? Aawe! Ye Omunankondoadhihe. Ita kala inee li gwanitha po nando. (Jesaja 45:18) Ota ka galulila aantu monkalo ndjoka a li a lalakanena ya kale petameko. — Lesha Episalomi 37:11, 34.

3. Ongiini Kalunga te ke eta ishewe Oparadisa kombanda yevi?

Oparadisa otayi ka etwa ishewe huka kombanda yevi pethimbo lyelelo lyaJesus e li Omukwaniilwa a langekwa po kuKalunga. Piita mbyoka hayi ithanwa Armagedon, Jesus ota ka wilika aayengeli yaKalunga ya hanagule po ayehe mboka ye li ompinge naKalunga. Konima yaashono, Jesus ota ka tula Satana mondholongo uule woomvula 1 000. Oshigwana shaKalunga otashi ka hupa molwaashoka Jesus ote ke shi wilika noku shi gamena. Otashi ka nyanyukilwa omwenyo sigo aluhe mOparadisa kombanda yevi. — Lesha Ehololo 20:1-3; 21:3, 4.

4. Okumona iihuna otaku ka hula po uunake?

Uunake Kalunga ta ka hulitha po uukolokoshi kombanda yevi? Jesus okwa li a gandja “endhindhiliko” ndyoka lya li ta li ka ulika kutya ehulilo oli li popepi. Oonkalo dhuuyuni dhongashingeyi odha tula onkalamwenyo yaantu moshiponga notadhi ulike kutya otu li ‘pehulilo lyonkalelo ndjika.’ — Lesha Mateus 24:3, yelekanitha NW, 7-14, 21, 22.

Pethimbo lyoomvula 1 000, Jesus ota ka pangela ombanda yevi okuza megulu nota ka hulitha po uupyakadhi awuhe. (Jesaja 9:6, 7; 11:9) Kakele kokukala Omukwaniilwa, Jesus ota ka longa e li Omusaaseri Omukuluntu nota ka dhima po oondjo dhaamboka ye hole Kalunga. Kungawo, Kalunga ota ka longitha Jesus a hulithe po uuwehame, uukulupe nosho wo eso. — Lesha Jesaja 25:8; 33:24.

5. Oolye taya ka kala mOparadisa ndjoka twa tegelela?

Aantu mboka haya vulika kuKalunga otaya ka kala mOparadisa. (1 Johannes 2:17) Jesus okwa tuma aalanduli ye ya ka konge aantu mboka aaifupipiki noku ya longa kutya oye na okukala ngiini opo Kalunga a kale e ya hokwa. Kunena, Jehova ota longekidha aantu omamiliyona ya ka kale nomwenyo kombanda yevi mOparadisa ndjoka twa tegelela. (Sefanja 2:3) PIinyanga yUukwaniilwa yOonzapo dhaJehova, aantu ohayi ilongo nkene ye na okukala aasamane, ootate, aakulukadhi nosho wo oomeme ye shi okugwanitha po iinakugwanithwa yawo. Aanona nosho wo aavali ohaya longele Kalunga pamwe nohayi ilongo kombinga yankene taya vulu okumona mo uuwanawa monkundana ombwanawa. — Lesha Mika 4:1-4.