Mona uuwanawa owundji mboka hawu zi mokulesha Ombiimbeli

Mbela opu na oshikando shimwe wa li wu wete ito vulu okutameka oshilonga shontumba oshinene nenge pamwe oshidhigu? Opo oshilonga shono wu shi longe nuupu, otashi vulika we shi longo to kutha ko kashona nakashona. Shoka osha faathana nokulesha Ombiimbeli. Otashi vulika wi ipule to ti: ‘Otandi yi tamekele peni?’ Moshileshwa shika, otatu ka tala kiinima yimwe mbyoka tayi ku kwathele wu kale wu hole okulesha Ombiimbeli noku yi konakona.

1. Omolwashike tu na okulesha Ombiimbeli pandjigilile?

Omuntu ngoka ha lesha Ombiimbeli nenge ‘ompango yOmuwa’ pandjigilile, oha kala a nyanyukwa noha pondola mwaashihe shoka ta longo. (Lesha Episalomi 1:1-3.) Sho to tameke okulesha Ombiimbeli, kambadhala tango okukala ho yi lesha uule wominute dhontumba esiku kehe. Sho to ende to tseya Oohapu dhaKalunga, Ombiimbeli, oto ka kala wa hokwa oku dhi lesha.

2. Oshike tashi ku kwathele wu mone mo uuwanawa mokulesha Ombiimbeli?

Opo tu mone mo uuwanawa owundji mokulesha Ombiimbeli, otwa pumbwa okukala hatu mwena po nokudhiladhila kwaashoka twa lesha. Otu na ‘oku yi lesha’ nokutedhatedha kuyo. (Josua 1:8) Sho to lesha ipula kutya ‘oovelise ndhika otadhi lombwele ndje shike kombinga yaJehova Kalunga? Ongiini tandi vulu oku dhi tula miilonga monkalamwenyo yandje? Ongiini tandi vulu oku dhi longitha ndi kwathele yalwe?’

3. Ethimbo lini tali opalele kungoye wu kale ho lesha Ombiimbeli?

Mbela oshidhigu kungoye okukonga ethimbo wu leshe Ombiimbeli? Oyendji yomutse ohatu nyengwa oku shi ninga. Ihe kambadhala ‘okulongitha nawa ethimbo’ lyoye. (Aaefeso 5:16) Oto vulu okwiitulila po ethimbo lyokondandalunde wu kale ho lesha Ombiimbeli esiku kehe. Aantu yamwe ohaya lesha Ombiimbeli ethimbo lyongula. Yalwe ohaye yi lesha omutenya, tashi vulika pethimbo lyomwiha. Omanga yalwe haye yi lesha kongulohi manga inaaya ka lala. Mbela ethimbo lini tali opalele kungoye?

ILONGA OSHINDJI

4. Ilonga okukala wu hole okulesha Ombiimbeli

Otashi vulika shi kale oshidhigu okutameka okulesha Ombiimbeli. Ihe otatu vulu okukala twa “sa enota” lyoku yi lesha, ngaashi owala omuntu ha kala a hala okulola iikulya mbyoka inaa lya nale. Lesha 1 Petrus 2:2, e tamu kundathana epulo tali landula:

• Mbela sho to tala, ngele owa kala ho lesha Ombiimbeli esiku kehe, oto ka kala ngaa wu hole oku yi lesha nokukala wa hala aluhe oku shi ninga?

Dhana OKAVIDIO, wu uve nkene aantu yamwe ya tameke okukala ye hole okulesha Ombiimbeli. Opo ihe kundathaneni omapulo taga landula.

OKAVIDIO: Aagundjuka oyi ilongo okukala ye hole Oohapu dhaKalunga (5:33)

• Aagundjuka mboka ya popiwa mokavidio, oya li ya sindi omashongo geni?

• Oshike she ya kwathele ya kale haya lesha Ombiimbeli pandjigilile?

• Oya ningi shike, opo okulesha kwawo Ombiimbeli ku kale taku ende po nawa?

Iinima mbyoka tayi ku kwathele wu tameke okulesha Ombiimbeli:

• Hogolola Ombiimbeli ndjoka ya tolokwa nawa nompu okulesha. Kambadhala okulesha o-New World Translation ngele omo yi li melaka lyoye.

• Tango tameka okulesha iitopolwa mbyoka wu wete iihokithi lela kungoye. Opo wu mone nkene wu na oku shi ninga, tala oshimpungu “Tameka okulesha Ombiimbeli.”

• Kala ho ndhindhilike shoka wa lesha. Longitha oshimpungu “Ndhindhilika shoka wa lesha mOmbiimbeli,” shi li membo ndika.

• Longitha opoloholama JW Library^®. Oto vulu okupulakena kelesho lyOmbiimbeli nenge oku yi lesha kehe mpoka wu li, to longitha ongodhi nenge oshikwaelektronika shilwe hashi yi kointaneta.

• Longitha okambo, Ekwatho kungoye wu ilonge Oohapu dhaKalunga. Oke na uualita nuumpungu mboka tawu ningitha elesho lyoye lyOmbiimbeli li kale tali hokitha noonkondo.

5. Kala ho ilongekidhile ekonakonombiimbeli lyoye

Lesha Episalomi 119:34, e tamu kundathana epulo tali landula:

• Omolwashike shi li nawa okugalikana manga inoo tameka okulesha Ombiimbeli nenge okwiilongekidhila ekonakonombiimbeli lyoye?

Ongiini to vulu okumona uuwanawa owundji oshikando kehe to konakona Ombiimbeli? Sho to ilongekidhile oshileshwa kehe membo ndika, kambadhala okuninga iinima tayi landula:

1. Lesha uutendo mboka wu li petameko lyoshileshwa.

2. Lesha omanyolo ngoka ge etwa mo, e to kambadhala wu uve ko nkene ga pambathana noshileshwa shoka.

3. Ndhindhilika iitya nenge omautumbulilo ga simana ngoka ga yamukula epulo kehe; shika otashi ke ku kwathela sho tamu kundathana oshileshwa shoka naangoka hamu konakona naye.

Owe shi tseya ngaa?

Oonzapo dhaJehova ohadhi longitha omatoloko gOombiimbeli gi ili nogi ili. Ihe odhi hole unene okulongitha o-New World Translation of the Holy Scriptures, oshoka oya tolokwa paushili, oya yela, yo oyi na edhina lyaKalunga. — Tala oshitopolwa shika kepa- ndja lyetu lyokointaneta “Mbela Oonzapo dhaJehova odhi na Ombiimbeli yadho dhene?”

OWI ILONGO SHIKE?

Opo wi ilonge oshindji mOmbiimbeli, itulila po ethimbo lyoku yi lesha, galikana wu yi uve ko nokukala ho ilongekidhile ekonakonombiimbeli lyoye.

Omapulo geendululo

• Oshike tashi ku kwathele wu ilonge mo oshindji mOmbiimbeli?

• Oto ki itulila po uunake ethimbo wu leshe Ombiimbeli noku yi konakona?

• Omolwashike sha simana okwiilongekidhila ekonakonombiimbeli lyoye?

UUYELELE WA GWEDHWA PO

Endulula omaetopo ngoka taga vulu oku ku kwathela wu ilonge oshindji sho to lesha Ombiimbeli.

“Mona uuwanawa owundji mokulesha Ombiimbeli” (Oshungolangelo No. 1 2017)

Tala omikalo ndatu nkene wu na okulesha Ombiimbeli.

“Ombiimbeli otayi vulu okukwathela ndje ngiini? — Oshitopolwa 1: Okulesha Ombiimbeli yoye” (Oshitopolwa shi li kepandja lyetu lyokointaneta)

Shoka tashi vulu oku ku kwathela wu kale wu hole okulesha Ombiimbeli.

“Ombiimbeli otayi vulu okukwathela ndje ngiini? — Oshitopolwa 2: Shoka wu na okuninga, opo wu nyanyukilwe okulesha Ombiimbeli” (Oshitopolwa shi li kepandja lyetu lyokointaneta)

Pula mboka ya lesha Ombii- mbeli omimvo odhindji nkene ya kala noku she enda sho taye yi konakona.

Ekonakonombiimbeli lyopaumwene tali ti sha (2:06)