Elongelokalunga ndyoka li li mondjila ohali humitha komeho omithikampango dhopamikalo dha dhenga mbanda

ELONGELOKALUNGA ndyoka li li mondjila ohali humitha komeho okudhiladhila kwetu nohali tu ulukile nkene tu na okuhwepopaleka eihumbato lyetu. Ohali tu ambidhidha opo tu vule okulonga shoka shi li mondjila noku tu kwathela tu kale tu li nawa. Otu shi shi ngiini kutya elongelokalunga ndyoka li li mondjila ohali ningi ngaaka?

Ndhindhilika shoka omuyapostoli Paulus a li a nyolele Aakriste yomethelemumvo lyotango mboka ya li ya kala muKorinto, shaGreka. Oshilando shoka shonale osha li sha tseyika nawa omolwiilonga yasho ya nyata. Paulus okwa li e ya londodha ta ti: “Aaholume, aasimaneki yiimenka, aahondeli, omashenge naakali nomashenge, aafuthi, aanalwiho, oonkolwi, aasheki naayugi, kaku na nando ogumwe gwomaantu ya tya ngeyi ta ka ya [muukwaniilwa waKalunga, KB].” Opo nduno okwa gwedha ko ta ti: “Yamwe yomune osho mwa li mwa tya ngaaka. Ihe omwa yogwa oondjo, omwa yoololelwa Kalunga, omwa ningwa aayuuki koshipala shaKalunga omolwOmuwa Jesus Kristus okOmbepo Ondjapuki yaKalunga.” (1 Aakorinto 6:9-11) Dhiladhila owala kwaashika, elongelokalunga ndyoka li li mondjila olya kwathela yamwe mboka ya li nale kaaye na omithikampango dhopamikalo opo ya kale ya yela noye li aapiya yaKalunga.

Mekondjithathano naashoka, Ombiimbeli otayi londodha tayi ti: “Ethimbo otali ke ya, uuna aantu taa ka kala inaa hala okupulakena elongo lyu uka. Ihe otaa ka landula uuhalu wawo yene notaa ki ikongela aalongi mboka taye ya lombwele oohapu tadhi nywitha omakutsi gawo.”—2 Timoteus 4:3.

Mbela omalongelokalunga ngoka wu shi ohaga ningi shike moshinima shika? Mbela ohaga landula omithikampango dhOmbiimbeli dhaashoka shi li mondjila naashoka sha puka? Nenge mbela ohaga haula omayele ga yela ngono taga adhika mOohapu dhaKalunga mokulombwela owala aantu shoka tashi “nywitha omakutsi gawo”?

Opo wu kwathelwe wu mone kutya elongelokalunga lyontumba otali imike iiyimati iiwanawa, omolwashike ito kutha ethimbo opo wu yamukule omapulo taga landula mpaka?

OSHIKUNDATHANWA: Ondjokana.

SHOKA OMBIIMBELI TAYI LONGO: “Oondjokana nadhi simanekwe kaantu ayehe, naanandjokana naa kale yi inekelathana. Kalunga ota ka pangula mboka ye hole oluhondelo nuuholume.”—Aahebeli 13:4.

EPULO: Mbela elongelokalunga ndika ohali ladhipike ngaa iilyo yalyo mbyoka yi li pamwe inaayi hokana yi hokane paveta?

OSHIKUNDATHANWA: Ehengathano.

SHOKA OMBIIMBELI TAYI LONGO: Sho Jesus a li a pulwa ngele opu na etompelo lyokuhengathana okwa yamukula a ti: “Oongoka ta henge po omukiintu gwe omolwoshinima shilwe shaa shi oluhondelo e ta hokana gulwe, oye ota hondele.”—Mateus 19:9.

EPULO: Mbela elongelokalunga ndika olya simaneka ewiliko lyaJesus mokupitika owala aaihokani ya hengane nokuhokanununa ngele owala pwa holoka oluhondelo?

OSHIKUNDATHANWA: Uuyogoki wopamilalo.

SHOKA OMBIIMBELI TAYI LONGO: “Yandeni oluhondelo. Uulunde kehe ulwe omuntu te u ningi, itau mu kwata kolutu; ihe omuntu ngoka ta hondele, ota yono kolutu lwe mwene.”—1 Aakorinto 6:18.

“Aakiintu yawo oya lundulula omukalo gwopanshitwe gwokukalathana nomulumentu. Osho wo aalumentu oye etha omukalo gwopanshitwe gwokukalathana nomukiintu noya longo iihuna. Oyo oya mono egeelo lye ya yeleka omolwepwidhuko lyawo.”—Aaroma 1:26, 27.

EPULO: Mbela elongelokalunga ndika ohali longo ngaa kutya onyata yiipala pokati komulumentu nomukiintu nenge pokati kaantu yuukashike ko okantu wa faathana oshi li uulunde?

OSHIKUNDATHANWA: Iilyo yalyo ohayi dhiginine omithikampango dhOmbiimbeli.

SHOKA OMBIIMBELI TAYI LONGO: “[Inamu] kwatathana nomuntu ngoka ti i ningi a fa omukriste, nonando oye omuhondeli, omunalwiho, omusimaneki gwiimenka, omusheki, onkolwi nomuyugi. Nokuli inamu lya pamwe nomuntu a tya ngaaka.” (1 Aakorinto 5:11) Oshike shi na okuningilwa mboka hayi iti Aakriste, ihe inayi iyela ombedhi komayono gawo? Oohapu dhaKalunga otadhi ti: “Umbii mo omuyoni mokati keni.”—1 Aakorinto 5:13.

EPULO: Mbela elongelokalunga ndika ohali kondo ngaa oshilyo shoka inaashi iyela ombedhi nosha dhina omithikampango dhOmbiimbeli?

[Oohapu dha simana pepandja 6]

Elongelokalunga lini lya tseyika hali dhiginine omithikampango dhopamikalo dhOmbiimbeli dha dhenga mbanda?