Elongelokalunga ndyoka li li mondjila ohali humitha komeho ohole yuumwayinathana

OMBIIMBELI otayi ti: “Oongoka kee na ohole, oye ina tseya Kalunga, oshoka Kalunga oye ohole.” (1 Johannes 4:8) Onkee ano, elongelokalunga ndyoka li li mondjila oli na okuhumitha komeho ohole yuumwayinathana.

Omalongelokalunga ogendji ohaga longo iilonga yi shi okupandulwa ngaashi okusila oshimpwiyu aavu, aakulupe noohepele. Ohaga ladhipike iilyo yago yi tule omayele gomuyapostoli Johannes miilonga, ngoka a nyola ta ti: “Ngele ku na ngoka e na uuyamba wiinima yomuuyuni mbuka, oye nota mono mukwawo a hepa e ta kala inee mu pa sha, omuntu a tya ngaaka ota vulu ngiini okutya, ye oku na ohole yaKalunga momwenyo gwe? Aamwandje! Ohole yetu inayi kala ashike moohapu nomokupopya, aawe, nayi kale ohole yashili, ndjoka tayi iholola yo yene miilonga wo.”—1 Johannes 3:17, 18.

Oshike hashi ningwa po ngele iigwana tayi kondjithathana? Mbela oshipango shaKalunga shoka tashi ti kutya “hola mukweni ngaashi ngoye wi ihole mwene,” oshi na owala okutulwa miilonga ngele pu na ombili, ihe ngele omunapolotika nenge omukwaniilwa a tokola okukondjitha oshilongo shilwe sho tashi ethiwa?—Mateus 22:39.

Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:35) Sho to yamukula omapulo ngaka taga landula, ipula to ti: ‘Mbela iilyo yelongelokalunga ndika ohayi ulukile ngaa aantu ayehe ohole moohapu nomiilonga?’

OSHIKUNDATHANWA: Iita.

SHOKA OMBIIMBELI TAYI LONGO: Jesus okwa gandja elombwelo kaalongwa ye ta ti: “Ngame otandi mu lombwele holeni aatondi yeni, galikaneneni aahepeki yeni.”—Mateus 5:44.

Sho aakwiita ya li ye ya okukwata po Jesus, omuyapostoli Petrus okwa li a kutha mo oshikondjitho opo a gamene Jesus. Ihe Jesus okwe mu lombwele ta ti: “Shuna mo egongamwele lyoye molumpangwa, oshoka ayehe mboka taya longitha egongamwele, oyo otaa ka sa kegongamwele.”—Mateus 26:52.

Omuyapostoli Johannes okwa nyola ta ti: “Eyooloko pokati kaana yaKalunga naana yomuhindadhi opo li li mpa: Shaa ngoka itaa longo shoka shu uka nenge kee hole mukwawo, oye ke shi omuna gwaKalunga. Oshoka elaka ndyoka twe li uvu okuza ketameko olyo ndika: Otse otu na okuholathana. Inatu kaleni twa fa Kain, ngoka a li ta longithwa komuhindadhi nokwa dhipaga po omumwayina.”—1 Johannes 3:10-12.

EPULO: Mbela elongelokalunga ndika ohali ladhipike iilyo yalyo yi kuthe ombinga miita?

OSHIKUNDATHANWA: Opolotika.

SHOKA OMBIIMBELI TAYI LONGO: Sho aantu ya mono nkene Jesus a li a longo iikumithalonga, yamwe oya li ya hala a kuthe ombinga mopolotika. Mbela okwa li i inyenge ngiini? “Jesus okwa li e shi shi kutya aantu oya hala okuya, ye mu kwate noye mu ninge omukwaniilwa koonkondo; onkee okwa shuna kondundu oye awike.”—Johannes 6:15.

Sho Jesus a li a kwatwa po nokulundilwa kutya ota tsu ondumbo nepangelo okwa yamukula ta ti: “Uukwaniilwa wandje kau shi womuuyuni mbuka. Ando uukwaniilwa wandje owa li womuuyuni mbuka, ando aantu yandje ya kondjele ndje ndaa gandjwe miikaha yAajuda. Ihe ngaashingeyi, uukwaniilwa wandje kau shi waampaka.”—Johannes 18:36.

Sho Jesus a li ta galikana kuKalunga kombinga yaalongwa ye, okwa ti: “Ngame onde ya pe oohapu dhoye, onkee uuyuni ota wu ya tondo, oshoka oyo kaye shi yomuuyuni, ngaashika nangame kandi shi gwomuuyuni.”—Johannes 17:14.

EPULO: Mbela elongelokalunga ndika ohali landula ngaa oshiholelwa shaJesus noihali kutha ombinga mopolotika, nonando shika otashi ningitha iilyo yalyo yi kale yi tondike kaanapolotika yamwe?

OSHIKUNDATHANWA: Okatongotongo.

SHOKA OMBIIMBELI TAYI LONGO: Sho aantu mboka inaaya pita etanda nokaaye shi Aajuda ya ningi Aakriste, omuyapostoli Petrus okwa popi ta ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.”—Iilonga 10:34, 35.

Jakob okwa li a nyolele Aakriste yomethelemumvo lyotango a ti: “Aamwameme, eitaalo lyeni mokwiitaala Omuwa gwetu gweadhimo, Jesus Kristus, inali kala ndyoka tali tongola aantu pandjelo yokombanda. Natu tye, ngele mwa gongala, otamu ya omuyamba a zala okalinga koshingoli noonguwo dhuulenga, nosho wo ohepele a zala iinyanyu. Ngele tamu simaneke ngoka a zala nawa e tamu mu lombwele tamu ti: ‘Kuutumba koshipundi shika oshiwanawa,’ ihe ohepele otamu mu lombwele tamu ti: ‘Kala wa thikama, nenge kuutumba pevi poompadhi dhandje,’ nena omu na oondjo, sho tamu itongola ne yene nokuninga omapangulo taga pangelwa komatompelo omawiinayi.”—Jakob 2:1-4.

EPULO: Mbela elongelokalunga ndika ohali longo kutya aantu ayehe oye thike pamwe momeho gaKalunga nosho wo kutya iilyo yalyo kayi na okukala yi na okatongotongo omolwolwaala nenge omolwiiniwe yopamaliko?

[Oohapu dha simana pepandja 7]

Elongelokalunga lini hali longo iilyo yalyo kaayi kuthe ombinga mopolotika, kaayi kale yi na okatongotongo nosho wo onkalo yokudhina yalwe omolwondondo yawo yopamaliko?