Hedha popepi nOmuuvi gwomagalikano

OYENDJI mboka haya ti oyi itaala muKalunga ihaya vulu okuyelitha kutya omolwashike ye mu itaala. Yo ishewe ihaya vulu okuyelitha kutya omolwashike omalongelokalunga olundji haga ningi iinima iiwinayi nenge kutya omolwashike Kalunga e etha okumona iihuna ku kale po. Ohaya galikana owala kuKalunga ngoka inaaya tseya.

Ihe ngoye oto vulu okuhedha popepi naKalunga. Oto vulu okukala wu na eitaalo lya kankamena keuvoko lyomondjila kombinga yaKalunga ndyoka tali ke ku ningitha wu kale wu mu hole nowe mu lenga. Eitaalo lyashili ohali kala lya kankamena kuunzapo wontumba. (Aahebeli 11:1) Ngele owi ilongo oshili kombinga yaKalunga, oto ka kala wu mu shi noho popi naye onga kuume koye. Tala iimoniwa yayamwe mboka ya li haya galikana nonando oya li haya kala ya limbililwa ngele Kalunga oko ngaa e li.

◼ Patricia ngoka a tumbulwa moshitopolwa shopetameko okwa ti: “Esiku limwe onda li pamwe nookuume omulongo lwaampono, mboka ya li taya popi kombinga yelongelokalunga. Onda li nde ya lombwele kutya onda zi mo megumbo, molwaashoka kanda li nda hala okukala poonkundathana dhatate, ngoka ini itaala muKalunga, nagumwe gwomOonzapo dhaJehova ngoka e ya maandjetu. Gumwe gwomookuume kandje okwa ti: ‘Otashi vulika Oonzapo dhaJehova dhi li mondjila.’

Kuume gulwe okwa ti: “‘Omolwashike itaatu yeni kokugongala kwadho tu ka taleni ngele odhi li mondjila?’ Shoka osho naanaa twa ningi. Nonando otwa li tu na omalimbililo, yamwe yomutse oya tsikile okukala haya yi ko, ihe omolwaashoka owala Oonzapo dha li hadhi kala dhi na ombili natse.

“Ihe mOsoondaha yimwe onda li ndu uvu sha shoka sha li sha lundulula iikala yandje. Omupopi okwa li a yelitha kutya omolwashike aantu taya mono iihuna. Kanda li nando onale ndi shi kutya petameko aantu oya li ya gwanenena, nokonima uulunde neso oye ke etwa komuntu gumwe ngoka a yono e tayi taandele maantu ayehe. Omupopi okwa li wo a yelitha kutya omolwashike Jesus a li e na okusa, opo a galulile ishewe aantu shoka sha kanithwa komuntu gwotango.a (Aaroma 5:12, 18, 19) Mepathimo lyeho, iinima ayihe oya li ya yelela ndje nawa. Onda li ndi ipopile nda ti: ‘Kalunga ngoka e na ko nasha natse nani oko e li shili.’ Nziya sho nda tsikile okukonakona Ombiimbeli, onda mono kutya nani otandi vulu okugalikana kuKalunga gwolela.”

◼ Allan ngoka a tumbulwa moshitopolwa shopetameko okwa ti: “Esiku limwe Oonzapo dhaJehova odha li dhe ya paandjetu, omukulukadhi gwandje e te dhi taamba ko, molwaashoka okwa li a hokwa shoka tadhi popi kombinga yokukala nomwenyo sigo aluhe kombanda yevi. Shoka osha li sha geyitha ndje. Onde dhi thigi moseti e tandi ithana omukulukadhi gwandje e ye mokombitha e tandi mu lombwele te ti: ‘Ku shi tuu omuthethe, oto ki itaala oohapu dha tya ngawo ngiini?’

“Omukulukadhi gwandje okwa yamukula ndje ta ti: ‘Inda mo wu ke dhi ulukile kutya odha puka.’

“Kanda li nda vulu okugandja uumbangi washa kutya odha puka. Ihe odha li dhi na ombili nodha thigile ndje embo tali popi ngele aantu oya shitwa nenge oye ya po okupitila moevolusi. Embo olya li lya nyolwa momukalo gwa yela nogu shi okuuviwa ko, naashoka osha li sha kwathele ndje ndi tokole kutya onda hala okutseya oshindji kombinga yaKalunga. Onda li nda tameke okukonakona Ombiimbeli nOonzapo, nokonima yethimbo onda li nda mono kutya shoka tayi ti osha yooloka ko lela kwaashoka nda li handi dhiladhila kombinga yelongelokalunga. Sho ndi ilongo kombinga yaJehova, onda tameke okukala handi galikana te popi iinima yokondandalunde. Onda li ndi na iikala yontumba kaayi shi iiwanawa, onkee ano, onda li nda galikana kuKalunga a kwathele ndje ndi yi ethe. Ondi na uushili kutya Jehova okwa yamukula omagalikano gandje.”

◼ Andrew ngoka a kala moIngilanda okwa ti: “Nonando onda li nda dhama muunongononi nonda li ndi na ohokwe onene muwo, onda li owala ndi itaala melongo lyoevolusi molwaashoka aantu yalwe haya ti kutya opu na uumbangi tawu ulike kutya olyoshili. Kanda li ndi itaala muKalunga molwiinima iiwinayi mbyoka tayi ningwa.

“Ihe omathimbo gamwe onda li handi ipula kutya ‘ngele oku na Kalunga e li pombanda mpono, onda hala okutseya kutya omolwashike onkalo yi li ngeyi. Omolwashike ku na omiyonena niita?’ Uuna ndi li muupyakadhi, omathimbo gamwe onda li handi galikana ndi pule ekwatho, ihe kanda li ndi shi kutya otandi popi nalye.

“Opo nduno omukulukadhi gwandje okwa pewa okatraktate, ka nyanyangidhwa kOonzapo dhaJehova, ke na oshipalanyolo: Ounyuni Ou Otau Ka Xupa Ngoo? Nangame onda li handi ipula olundji epulo naanaa ndyoka. Okatraktate hoka oka li ka ningitha ndje ndi dhiladhile kombinga yOmbiimbeli tandi ti: ‘Pamwe omayamukulo gayo oge li ngaa mondjila.’ Konima yethimbo, manga nda li mefudho, onda pewa embo The Bible—God’s Word or Man’s?b Sho nda mono kutya nani Ombiimbeli otayi tsu kumwe nuunongononi woshili, onda li ndi uvite kutya onda pumbwa okwiilonga oshindji kombinga yOmbiimbeli. Nomolwaashono sho Onzapo yaJehova ya pula yi konakone nangame Ombiimbeli, onda zimine. Sho ndu uvu ko elalakano lyaJehova, onda tseya kutya ye omuntu gwolela ngoka tandi vulu okupopya naye megalikano nda manguluka.”

◼ Jan ngoka a putukile moLondon e li Omuprotestande, okwa ti: “Iihelele yomalongelokalunga neindjipalo lyokumona iihuna oya ningitha ndje ndi thige po elongelokalunga. Onda thigi po wo okolidji nonda tameke okwiimba nokuhika oshiketala, opo ndi mone oshimaliwa. Pethimbo mpoka otwa tseyathana naPat. Pat okwa putuka e li Omukatoolika, ihe ngaashi ngame, kali we i itaala muKalunga.

“Otwa li hatu zi megumbo ihaa li longithwa we pamwe nooyakwetu yamwe mboka nayo ya li ye etha po osikola, noya li ye hole omalongelokalunga gokuAsia. Otwa li hatu kundathana sigo omokati kuusiku kombinga yeityo lyonkalamwenyo. Nonando atuhe naPat katwa li twi itaala muKalunga, otwa li tu uvite kutya opu na okukala oonkondo dhontumba ndhoka hadhi gandja omwenyo.

“Onda mono okanona okamati konima sho twa tembukile kuumbangalantu waIngilanda tu ka konge iilonga tu li aaimbi yoongalo. Ongulohi yimwe oke ehama nondi iyadha te galikana Kalunga ngoka inaandi itaala muye. Nziya konima yaashoka, onda thigi po Pat e tandi yi nokanona ketu, molwaashoka katwa li we tu uvitathane. Onda li nda pula ishewe ekwatho megalikano, te ti pamwe opu na ngaa gumwe ngoka tu uvu ndje. Pethimbo mpoka kanda li ndi shi shi, ihe nani naPat okwa li ta galikana.

“Mesiku olyo tuu ndyoka, pegumbo lyaPat opwe ya Oonzapo dhaJehova mbali nodhe mu ulukile omayele gOmbiimbeli ngoka ge mu kwathele. Pat okwa dhengele ndje e ta pula ngele otatu vulu okukala hatu konakona pamwe Ombiimbeli nOonzapo. Nziya otwa mono kutya, opo tu nyanyudhe Kalunga otu na okuhokana paveta. Osha li tashi monika sha fa oshidhigu noonkondo mokutala kekwatathano lyetu ndyoka kaalya li nawa.

“Otwa li twa hala okutseya oshindji kombinga yegwanitho lyomahunganeko gOmbiimbeli, etompelo kutya omolwashike pu na okumona iihuna nosho wo kutya Uukwaniilwa waKalunga oshike. Mokweendela ko kwethimbo, otwa tseya kutya Kalunga oku na ko nasha natse notwa li twa hala okuninga shoka ta ti. Otwa hokana. Uunongo wOohapu dhaKalunga owe tu kwathele mokuputudha aanona yetu yatatu. Otu na uushili kutya Jehova oku uva omagalikano getu.”

Konakona uumbangi ngoye mwene

Ngaashi mboka ya popiwa moshileshwa shika, aantu omamiliyona nayo inaya etha ya pukithwe komalongelokalunga giifundja, pehala lyaashono, oya yelelwa kutya omolwashike Kalunga e etha okumona iihuna ku kale po. Mbela owa ndhindhilika kutya moshinima kehe euvoko lyashili lyOmbiimbeli olyo lya li lya tompo oohandimwe mboka kutya Jehova ohu uvu shili omagalikano?

Mbela owa hala okumona uumbangi kutya Kalunga oko e li? Oonzapo dhaJehova otadhi ka kala dha nyanyukwa oku ku kwathela wi ilonge oshili kombinga yaJehova nosho wo nkene wu na okuhedha popepi ‘nOmuuvi gwomagalikano.’—Episalomi 65:2.

[Omanyolo gopevi]

[Oohapu dha simana pepandja 10]

“Sho ndu uvu ko elalakano lyaJehova, onda tseya kutya ye omuntu gwolela ngoka tandi vulu okupopya naye megalikano nda manguluka”

[Ethano pepandja 9]

Eitaalo lyashili ohali kala lya kankamena kuunzapo wontumba nokokukala wa hala okutseya oshili kombinga yaKalunga