Opolohalama yoshigongi shesiku lyi ikalekelwa sho 2010
1. (a) Iipalanyolo yiigongi yesiku limwe mbyoka ya pita oya li kankamena komadhiladhilo gopamanyolo geni? (b) Iigongi yesiku limwe mbyoka ya pita nale oye ku kwathela ngiini muukalele woye?
1 ‘Natu kaleni tu shi iinima mbyoka ya simanenena,’ ‘Natu kaleni twa kola tu li oshigunda shimwe,’ ‘Natu popyeni oshili’ nosho wo ‘Tse eloya, Jehova omuhongi gwetu.’ (Fil. 1:9, 10, 27, NW; Joh. 18:37; Jes. 64:8, NW.) Iipalanyolo mbika yimwe owala yomwaambyoka ya kundathanwa nale piigongi yesiku lyi ikalekelwa. Mbela otu na ehalo okukala poshigongi shesiku lyi ikalekelwa shomomumvo gwiilonga 2010? Otashi ka kala noshipalanyolo: ‘Ethimbo ndyoka lya hupa ko efupi,’ sha za mAakorinto yotango 7:29. (NW)
2. Ongiini tatu vulu okukokeka ohokwe yoku ka pulakena poshigongi?
2 Ilongekidhila oshigongi shesiku limwe nziya konima shampa esiku moka tashi ka ningwa lya tseyithwa megongalo lyeni. Aavali yamwe ohaya kwathele oyana ya kale ya tegelela oshigongi mokunyola esiku kondjalulamasiku yuukwanegumbo niinima yilwe mbyoka ya pumbwa okufaalela nokuyalula omasiku sigo oshigongi sha thiki. Pethimbo lyEkonakono lyuukwanegumbo lyokongulohi, otashi vulika wu kale wa hala okweendulula iidhimbulukwanyolwa yiigongi yesiku limwe mbyoka ya pita. Oto vulu wo okwiilongekidhila oshigongi shoka mokweendulula uuyelele mboka wu li membo Ministry School, epandja 13-16, opo shi ku kwathele nosho wo uukwanegumbo woye ‘nkene mu na oku ka pulakene.’ — Luk. 8:18.
3. Ongiini tatu vulu oku mona uuwanawa mwaashoka tashi ka kundathanwa?
3 Tula miilonga shoka to ilongo po: Konima yoshigongi kehe olundji ohatu uvu aantu taya ti: “Oshigongi osha li oshiwanawa ngiini!” Oye li mondjila molwaashoka oshi li shimwe shomomasiloshimpwiyu ogendji okuza kuJehova. (Omayel. 10:22) Opo uuyelele mboka wu ku kwathele owu na okutedhatedha nokudhiladhila kombinga yawo. (Luk. 8:15) Sho to shuna kegumbo kundathaneni opolohalama mu li uukwanegumbo nenge naamboka mu li mosheenditho pamwe nayo. Kundathaneni kombinga yomalalakano geni niitsa mbyoka tayi ke mu kwathela muukalele. Oku shi ninga, oto ka mona uuwanawa muuyelele mboka, nonando opu pite ethimbo ele konima yoshigongi. — Jak. 1:25.
4. Omolwashike oshigongi shika tashi ka kala shi ikalekelwa kutse?
4 Ohatu kala tu uvite nawa aluhe ngele twa pewa omagano ngoka twa li twa pumbwa unene. Mbela ka tu na okutegelela nehalo ewanawa shoka Jehova e tu nunina poshigongi tashi landula shesiku lyi ikalekelwa? Otu na uushili kutya ota shi ke tu tunga momikalo odhindji. Otatu vulu okukala twa tegelela Tate gwomegulu, Jehova e tu pe omagano omawanawa moku tu tsa omukumo noku tu dheula opo tu tsikile niilonga mbyoka e tu pa. — 2 Tim. 4:2; Jak. 1:17.