Oohapu dhaKalunga odhi na oonkondo

1. Oshigongi shesiku li ikalekelwa shomumvo gwiilonga 2014 oshi na oshipalanyolo shini?

¹ Ombiimbeli inayi fa iinima mbyoka ya totwa po kaantu inaaya gwanenena. Yo oyi na oonkondo ndhoka tadhi vulu okulundulula omadhiladhilo getu nomikalo dhetu dhi kale metsokumwe nehalo lyaJehova. Oohapu dhaKalunga odhi na oonkondo dhi thike peni? Ongiini tatu vulu okulongitha oonkondo ndhoka dhi tu kwathele lela monkalamwenyo yetu? Ongiini tatu vulu okulongitha Ombiimbeli momukalo omwaanawa tu kwathele yalwe? Otu na einekelo kutya atuheni otatu ka tungwa pambepo sho omapulo ngoka taga ka yamukulwa poshigongi shesiku li ikalekelwa, shomumvo gwiilonga 2014. Oshipalanyolo shasho osho: “Oohapu dhaKalunga odhi na oonkondo,” dha za mAahebeli 4:12.

2. Omapulo geni taga ka yamukulwa?

² Omapulo taga landula otaga ka yamukulwa: Pulakena nawa sho iipopiwa tayi gandjwa, opo wu mone omayamukulo komapulo taga landula.

• Omolwashike tu na okukala twi inekela mOohapu dhaKalunga? (Eps. 29:4)

• Ongiini tatu vulu okuulika kutya Oohapu dhaKalunga odhi na oonkondo monkalamwenyo yetu? (Eps. 34:8)

• Ongiini tatu vulu okweetha oonkondo dhOohapu dhaKalunga dhi tu kwathele muukalele? (2 Tim. 3:16, 17)

• Ongiini tatu vulu okuyanda oku ya momwigo gwuuyuni waSatana? (1 Joh. 5:19)

• Wu li omugundjuka, oshike tashi vulu oku ku kwathela wu pondole miinima yopambepo? (Jer. 17:7)

• Ongiini Jehova te tu nkondopaleke uuna twa nkundipala? (2 Kor. 12:10)

• Opo tu tsikile okuninga omalunduluko, otwa pumbwa okuninga shike, nonando otu na iikala nosho wo eihumbato ewinayi ndyoka lya mena omidhi mutse? (Ef. 4:23)

3. Kakele kokupulakena nawa, omauwanawa geni ishewe tatu ka mona poshigongi shesiku li ikalekelwa?

³ Otatu ka mona uuwanawa owundji sho tatu ka pulakena kuuyelele mbuka wa simana. Shimwe ishewe, oshigongi shesiku li ikalekelwa otashi ke tu pa ompito yokumbwalangandja nokweendathana nooitaali ooyakwetu ya za komagongalo gi ili nogi ili, ngaashi owala hatu shi ningi piigongi yoshikandjo nosho wo yoshitopolwa. (Eps. 133:1-3; 2 Kor. 6:11-13) Onkee ano, unganeka ethimbo lyoye nawa, opo wu ka endathane nookuume koye nokupanga uukuume nayalwe. Otashi vulika poshigongi sheni pu kale omupopi omutalelipo, tashi vulika omutonateli gwoshitopolwa nenge omumwatate a za koBetel. Omolwashike ito kongo okampito wu ka popithe omumwatate ngoka nomukulukadhi gwe? Onkee ano, natu kaleni twa tegelela nondjuulukwe oshigongi shi ikalekelwa shesiku limwe!