“Iikulya pethimbo lyayo”
1 Olundji konima shampa oshigongi shi ikalekelwa sha pu, ohatu ti: “Oshe tu kwathela.” Omutonatelishikandjo gumwe okwa ti kutya konima yokukala poshigongi sha zi ko yamwe yomoshikandjo she oya popi kutya oya hala okutamununa mo uukalele wawo. Omutonateli omweendi gumwe okwa ti: “Oshigongi oshe tu kwathela tu dhiladhile nawa kombinga yethimbo ndika tu li mulyo sho tatu konakona omahogololo ngoka hatu ningi monkalamwenyo yetu.” Omutonateli gulwe okwa ti wo: “Aauvithi oyendji oya ti kutya oshigongi osha li she ya dhimbulukitha kutya oye na okugandja eitulomo kuukalele mboka wu li oshilonga sha simanenena.” Oshigongi shesiku lyi ikalekelwa oshe ku kwathela ngiini?
2 Opolohalama yomumvo gwiilonga ngoka twa taalela otayi ke tu kwathela wo. Oshipalanyolo shayo otashi ti: ‘Inekela Jehova,’ sha za mEpisalomi 118:8, 9. Otapu ka kundathanwa wo iipopiwa tayi landula: “[Jehova] oha hupitha aayuuki note ya gamene momathimbo guudhigu,” ‘Kwathela yalwe ya mone egameno lyaJehova,’ “Holela Jehova mokugandja egameno,” “Aagundjuka kaleni mwi inekela muJehova” nosho wo “Oparadisa yopambepo oyi li esiloshimpwiyu lyaJehova oku tu gamena.”
3 Nkene tatu vulu okumona uuwanawa mopolohalama ndjoka: Ngele esiku lyoshigongi lya tseyithwa, ninga omalongekidho opo wu ka kale po nokuhiya aakonakonimbiimbeli yoye nayo ya ka kale po. Opo tu “imike iiyimati” otwa pumbwa okudhiginina oohapu ndhoka tatu uvu. (Luk. 8:15) Pulakena neitulomo kopolohalama nokuninga omaidhimbulukitho paufupi giitsa ya simana nosho wo omayele ngoka wa pumbwa okutula miilonga monkalamwenyo yoye nomuukalele. Konima yoshingongi kongeni ethimbo mu li uukwanegumbo opo mu kundathane shoka sha popiwa ko nokutala kutya ongiini tamu vulu okutula miilonga uuyelele mboka.
4 Ngaashi owala iikulya iitoye notayi tungu, oshigongi shokomumvo shesiku lyi ikalekelwa osha longekidhwa pahole nosha dhiladhilwa nawa komeho yethimbo. Jehova na yambeke oonkambadhala dhoye dhokukala poshigongi nokumona uuwanawa ‘miikulya pethimbo lyayo’ mbyoka tayi koleke pambepo aakalele Aakriste. — Mat. 24:45.
[Omapulo gokukonakonwa]
1. Opolohalama yoshigongi shi ikalekelwa sha zi ko oye ku kwathela ngiini nosho wo yalwe?
2. Oshike tashi ka kundathanwa mopohalama yomumvo gwiilonga ngoka twa taalela?
3. Opo tu mone uuwanawa poshigongi otu na okuninga shike?
4. Omolwashike twa halelela oku ka kala poshigongi shesiku lyi ikalekelwa shoka twa taalela?