“Gongalekeni oshigwana”
1. Ongiini iigongi yiitopolwa noyopaigwana ya faathana nokugongala kaaku shi okudhimbiwa hoka kwa li kwa ningwa nziya konima sho Aaisraeli ya thigi po Egipiti?
1 Nziya konima sho sha thigi po Egipiti, Jehova okwa lombwele Moses ‘a gongaleke oshigwana’ pondundu yaSinai opo shi vulike Kuye noshi nongeke oyana oondjila Dhe. (Deut. 4:10-13) Shoka kasha li tuu oshiningwanima kaashi shi okudhimbiwa notashi koleke eitaalo! Pethimbo lyoomwedhi dhontumba dhi li komeho, oshigwana shaJehova otashi ka gongala piigongi yoshitopolwa noyopaigwana shi longwe kuJehova. Oshike tu na okuninga opo tu mone uuwanawa pakuudha?
2. Otu na okuninga shike opo tu kale twi ‘ilongekidhila’ oshigongi shetu?
2 ‘Ilongekidheni’: Jehova okwa li a lombwele Aaisraeli yi “ilongekidhile” oshiningwanima shoka shopandjokonona shopondundu Sinai. (Eks. 19:10, 11) Sha faathana, okwiilongekidha nawa okwa pumbiwa kwaayehe mboka taya ka kala piigongi, ihe hakwaamboka owala taya ka kala ye na po iitopolwa. Pashiholelwa, oyendji otaya ka pumbwa okukutha efudho kiilonga yawo yokwiikongela omboloto. Otashi vulika onkalo yoye ya fa ndjoka yaNehemia. Okwa li a hala a thige po iilonga ye e li omupindili gwomukwaniilwa Artakserkses opo a ye kuJerusalem a ka kwathele nokutungulula omadhingililokuma gasho, ihe okwa li e shi shi kutya omukwaniilwa otashi vulika kee shi zimine. Nehemia okwa li a galikana ye ta pula nduno nuulaadhi nonombili omukwaniilwa. Omukwaniilwa okwa li e mu pitike a ye nokwa li nokuli a gandja omayambidhidho giilonga yokutunga! (Neh. 2:1-9) Kakele kokukutha efudho kiilonga yoye, mbela owa ninga ngaa omalongekidho golweendo nosho wo gomulalo? Aakuluntugongalo otaya ka kala ya nyanyukwa okukwathela kehe ngoka a pumbwa ekwatho. Unganeka wu thike kuyele pomutumba kehe, nokukala wi ilongekidha “okugandja eitulomo li vule lyoshito.” — Heb. 2:1, NW.
3. Oshike tashi ke tu kwathela tu longekidhile omitima dhetu oshigongi?
3 Oshinima shilwe sha simana shokukala twi ilongekidha osha kwatela mo okulongekidha omitima dhetu opo tu pulakene notwi ilonge. (Esra 7:10) Opolohalama yoshigongi otayi ka tulwa ko-jw.org kOintaneta notamu ka kala mu na iipalanyolo ayihe pamwe nenyolo limwe nenge gaali goshipopiwa kehe. Shika otashi ka pa uukwanegumbo ompito wu yi kundathane pElongelokalunga lyUukwanegumbo kongulohi miiwike mbyoka tayi tetekele oshigongi shegongalo lyawo. Aauvithi yamwe ohaya pilinta opolohalama yo taye yi longitha ya ninge iidhimbulukiwanyolwa poshigongi.
4. Ongiini aavali taya vulu okulongitha oshigongi ya longe oyana?
4 ‘Nongekeni oyana yeni’: Limwe lyomomalalakano ngoka ga popiwa goshigongi shoka sha li sha ningwa pondundu Sinai olyo kutya aavali Aaisraeli “ya nongeke oyana.” (Deut. 4:10) Oshigongi ohashi pe aavali ompito ya dhenga mbanda ya ninge sha faathana. Aavali oye na okukuutumba noyana pethimbo lyomutumba noku ya kwathela ya gandje eitulomo. Pehulilo lyesiku kehe nokonima pelongelokalunga lyuukwanegumbo, omaukwanegumbo otaga vulu okukundathana kombinga yoshigongi.
5. Ongiini tatu ka mona uuwanawa mokukala poshigongi shoka tashi ya?
5 Oshigongi kaashi shi okudhimbiwa shopondundu Sinai osha li sha kwathele Aaisraeli ya kale ye na olupandu lwuuthembahenda wi ikalekelwa wokukala oshigwana shaKalunga. (Deut. 4:7, 8) Oshigongi shetu shoshitopolwa shoka tashi ya osha longekidhwa shi tu etele uuwanawa momukalo gwa faathana. Muule womasiku gatatu otatu ka vula okukala twa za mo mombuga yopathaneko ndjoka ya nika oshiponga yuuyuni waSatana nokunyanyukilwa eendathano tali talaleke notali tungu moparadisa yetu yopambepo. (Jes. 35:7-9) Tu na momadhiladhilo esiku lyaJehova ndyoka tali hedha popepi, inatu hunutha ompito ndjika yokugongala pamwe tu tungathane notu tsaathane omukumo. — Heb. 10:24, 25.