Uuwanawa mboka hawu zi melongo ndyoka li li mOohapu dhaKalunga

1. Oshipalanyolo shoshigongi shomumvo gwiilonga 2014 oshini, nepulo lini tali ka yamukulwa poshigongi shoka?

¹ Jehova Kalunga oye ‘Omulongi’ Omunene a shigililila ko meshito alihe. (Jes. 30:20, 21) Mbela Jehova ohe tu longo okupitila moshike? Okwe tu pa embo ewanawa kaaku na we. Embo ndyoka olyo Ombiimbeli, Oohapu dhe dha nwethwa mo. Elongo lyopakalunga otali vulu ngiini oku tu etela uuwanawa palutu, pamadhiladhilo, pamaiyuvo nosho wo pambepo? Epulo ndika otali ka yamukulwa poshigongi shopashikandjo shomumvo gwiilonga 2014. Oshipalanyolo shasho osho: “Uuwanawa mboka hawu zi melongo ndyoka li li mOohapu dhaKalunga,” sha kankamena kOohapu dhaTimoteus omutiyali 3:16.

2. Enenedhiladhilo lyoshigongi otali ka kala lya kankamena komayamukulo gomapulo geni?

² Enenedhiladhilo lyoshigongi: Omayamukulo gomapulo taga landula ogo taga ka kala enenedhiladhilo lyoshigongi:

• Elongo lyopakalunga ohali tu etele uuwanawa wuni monkalamwenyo yetu? (Jes. 48:17, 18)

• Uushili wuni tu na okukaleka momadhiladhilo uuna tatu ningi omalunduluko monkalamwanyo yetu, opo tu longele Jehova tu li miilonga yethimbo lyu udha? (Mal. 3:10)

• Otu na okwiinyenga ngiini uuna pu na gumwe te tu etele ‘omalongo galwe ngoka twaa shi?’ (Heb. 13:9)

• Ongiini tatu vulu okuholela omukalo gwaJesus ‘gwokulonga?’ (Mat. 7:28, 29)

• Omolwashike mboka ye na oshinakugwanithwa shokulonga aantu megongalo, ye na okukala hayi ilongo yo yene? (Rom. 2:21)

• Uuwanawa wuni hatu mono mOohapu dhaKalunga? (2 Tim. 3:16)

• Aantu otaya ka gumwa ngiini sho Kalunga te ki “inyengitha” iigwana? (Hag. 2:6, 7)

• Jehova oku na einekelo lini mutse? (Ef. 5:1)

• Omolwashike tu na okulonga nuudhiginini, opo tu kale metsokumwe nelongo ndyoka Jehova he tu pe? (Luk. 13:24)

3. Omolwashike sha simana tu ka kale poshigongi shomumvo gwiilonga 2014, noku ka pulakena nawa kelongo ndyoka li li pethimbo?

³ Paulus okwa nyola tango shi na ko nasha nomathimbo omadhigu ngoka taga ka kala gi iwetikile momasiku gahugunina, montopolwa 3 yaTimoteus omutiyali. Konima yaashono, okwa nyola oohapu ndhoka kwa kankamena oshipalanyolo shoshigongi shomumvo gwiilonga 2014. Okwa nyola a ti: “Aakolokoshi naafudhime otaa tsikile okuza muuwanawa yu uka muuwinayi, okupukitha yalwe nokwiipukitha wo yo yene.” (2 Tim. 3:13) Opo kaatu pukithwe, osha simana tu pulakene notu tule miilonga elongo ndyoka Kalunga he tu pe. Onkee ano, natu kale twa tokola twa mana mo tu ka kale po poshigongi shoka nokupulakena nawa kelongo ndyoka li li pethimbo.