Ehiyo li ikalekelwa
1. Oshikonga shokuhiya aantu koshigongi shoka tashi ka kala ko mo-2014 otashi ka tameka uunake?
1 Andola owa li to longekidhile ookuume koye nenge aakwanegumbo iikulya yi ikalekelwa, mbyoka tayi pula oonkambadhala odhindji okulongekidha nosho wo oshimaliwa oshindji, owu na okukala to ke ya hiya wa mana mo. Sha faathana, okulongekidha oshituthi shopambepo shiigongi yoshitopolwa noyopaigwana shoka tashi ka kala ko mo-2014 okwa pula oshindji. Manga ku na iiwike itatu oshigongi shi tameke, otatu ka kala tu na uuthembahenda wokuhiya yalwe ye ye. Oshike tashi ke tu kwathela tu hiye aantu twa mana mo?
2. Oshike tashi ke tu inyengitha tu kuthe ombinga pakuudha moshikonga?
2 Otashi ke tu inyengitha tu kuthe ombinga pakuudha moshikonga ngele otwa dhiladhila nolupandu kuuwanawa mboka tatu ka mona paumwene miikulya yopambepo mbyoka Jehova he tu pe piigongi yetu. (Jes. 65:13, 14) Otu na wo okudhimbulukwa kutya iikonga yetu yokomumvo ohayi eta iizemo iiwanawa. Aantu yamwe mboka tatu hiya otaya ka kala po natse poshigongi. Kutya nduno yangapi taya ka kala po, oonkambadhala dhetu dha mana mo ndhoka tatu ka ninga pethimbo lyoshikonga otadhi ka simanekitha Jehova notadhi ka ulika kutya oha gandja. — Eps. 145:3, 7; Eh. 22:17.
3. Okafo kehiyo otaka ka gandjwa ngiini?
3 Olutu lwaakuluntugongalo kehe olu na okutala kutya egongalo otali ka gandja ngiini okafo kehiyo, nokutala ngele otaye ke ka thiga momagumbo moka kaamu na aantu nenge ngele otaye ke ka gandja moshitopolwa shawo mepandaanda. Momahuliloshiwike iifo oyi na okugandjwa pamwe nokafo kehiyo uuna tashi opalele. Ngele Olyomakaya yotango yokomwedhi oyi ipumu mumwe nesiku lyoshikonga, omagongalo naga gandje unene okafo kehiyo pehala lyokutameka omakonakonombiimbeli. Ngele oshikonga sha hulu, itashi ke tu nyanyudha tuu noonkondo okutseya kutya otwa kutha ombinga nuulaadhi moshikonga nosho wo kutya otwa hiya aantu oyendji ngaashi tashi vulika ye tu waimine moshituthi shoka Jehova e tu longekidhila!