Hiya aantu itoo ongaonga

1. Oshikonga shokuhiya aantu koshigongi shoshitopolwa otashi ka tameka uunake?

¹ Natu tye nduno oto longekidhile ookuume koye nenge aanegumbo iikulya yi ikalekelwa. Iikulya mbyoka otayi pula oonkambadhala shili noshimaliwa oshindji. Mbela ito ka ninga oonkambadhala wa mana mo, opo wu ya hiye ye ye? Sha faathana, okulongekidha iikulya yopambepo yoshigongi shoshitopolwa shoka tashi ya osha pula oshindji. Manga ku na iiwike itatu oshigongi shi tameke, Jehova okwe tu pa uuthembahenda wokuhiya yalwe ye ye ya kale po. Oshike tashi ke tu kwathela tu hiye aantu oyendji?

2. Oshike tashi ke tu inyengitha tu ka kuthe ombinga pakuudha moshikonga?

² Otashi ke tu inyengitha tu kuthe ombinga pakuudha moshikonga ngele otwa dhiladhila nolupandu kuuwanawa mboka tatu ka mona paumwene miikulya yopambepo mbyoka Jehova he tu pe piigongi yetu. (Jes. 65:13, 14) Otu na wo okudhimbulukwa kutya iikonga yetu yokomumvo ohayi eta iizemo iiwanawa. (Tala okampungu: “Ohashi eta iizemo.”) Aantu yamwe mboka tatu hiya otaye ke ya koshigongi, nayalwe itaye ke ya. Kutya nduno yangapi taye ke ya, oonkambadhala dhetu dha mana mo ndhoka tatu ka ninga pethimbo lyoshikonga otadhi simanekitha Jehova, notadhi ulike kutya ye oha gandja. — Eps. 145:3, 7; Eh. 22:17.

3. Okafo kehiyo otaka ka gandjwa ngiini?

³ Olutu lwaakuluntugongalo kehe olu na okutala nkene okafo kehiyo taka ka gandjwa, mokutala ngele otaka ka thigwa pomagumbo mpoka kaapu na aantu, nenge ngele otaka ka gandjwa miilonga yepandaanda. Momahuliloshiwike iifo oyi na okugandjwa pamwe nokafo kehiyo uuna tashi opalele. Ngele oshikonga sha hulu, itashi ke tu nyanyudha tuu noonkondo okutseya kutya otwa kutha ombinga nuulaadhi musho! Onkee ano, natu hiye aantu oyendji ngaashi tashi vulika ye ye koshituthi shopambepo shoka Jehova e tu longekidhila.

Ohashi eta iizemo

Omimvo odhindji dha ka pita sho omumwameme gumwe a li ta kutha ombinga moshikonga shokuhiya aantu, okwa li ti ipula ngele oonkambadhala dhe otadhi ti sha ngaa. Okwa li ta dhiladhila kutya, ‘mbela aantu otaye ke ya ngaa koshigongi?’ Ethimbo lyongula mOlyomakaya poshigongi, okwa dhimbulula omulumentu gwelongelokalunga lyontumba ngoka a li a kuutumba popepi naye. Okwe mu popitha. Okwe shi mono kutya okwe ya koshigongi, molwaashoka a pewa okafo kehiyo. Okwa li e na omapulo ogendji ngoka omumwameme a li a vulu okuyamukula. Okwa popi nkene a li a nyanyukilwa opolohalama nosho wo nkene a kuminwa eholokopo neihumbato lyaakalipo. Konima yethimbo mesiku ndyoka, omumwameme okwa tameke oonkundathana naayihokani mboka ya li ya kuutumba popepi naye. Nayo wo oya li ya pewa okafo kehiyo noya li ye ya koshigongi nombesa. Oya li ya nyanyukilwa oshigongi noya li ya tokola okukala po ishewe mOsoondaha. Lwanima, omumwameme okwe ke shi mona mo nkene oshikonga shokomumvo sha simana.
Poshigongi opo sha zi ko, aaihokani aakokolindjila oya li ya popitha omusamane nomukadhi mboka aakokele. Oya popi kutya oshi li oshikando shawo shotango okukala po. Aakokolindjila oye ya pula ya ti: “Olye e mu hiya?” Oya yamukula ya ti: “Esiku limwe sho twe ya megumbo, otwa mono okafo kehiyo kohi yomweelo.” Oya lesha okafo kehiyo noyu udhitha okafooloma hoka ke li konima ya ko. Aamwatate ya za koshilongo shilwe oya li omwiha pamwe naaihokani mboka. Aaihokani oyo tuu mboka, oya li ya nyanyukilwa opolohalama unene noya li ya hala okugaluka mesiku tali landula. Omalongekidho oga li ga ningwa okukala haya talelwa po.