Okugandja uunzapo tatu longitha iitaafula yiileshomwa

Okugandja uunzapo tatu longitha okatemba nenge oshitaafula shiileshomwa otashi ulike kutya otu na lela ehwamo okunanena aanamitima omiwanawa moshili. (Joh. 6:44) Onkee ano, aakuluntugongalo otaya ladhipikwa yu unganeke omahala gokugandja uunzapo womepandaanda miitopolwa yomagongalo gawo moka hamu ende aantu oyendjiyendji. Ngele iitaafula yiileshomwa ohayi kala pehala lyontumba itashi ti kutya, opo owala yi na okukala sigo osigo. Onkee ano, inashi pumbiwa aluhe okupula epitikilo kaatonateli yehala ndyoka. Oolye ya gwana okukutha ombinga? Aauvithi mboka ye na etaloko ewanawa, hayi ihumbata momukalo gwesimaneko noye na owino yokukundathana naantu. Iinima tayi landula mbyoka yi na okuningwa naambyoka kaa yi na okuningwa otayi ka kwathela aauvithi ya pondole.

Shoka wu na okuninga:

Kala omunambili, wa manguluka noho kwathele lela aayendi po. Aauvithi yamwe ohaya ulike ohole, hayi imemeha nohaya popitha aantu nombili. Ngele gumwe ota tala koshitaafula sho ta piti po, mu lombwela to ti: “Oto vulu okukutha po sha shoka wa hala.”
Pokati koye noshitaafula napu kale oshinano tashi opalele. Pomahala gamwe aauvithi ohaya pondola uuna ya thikama popepi noshitaafula. Yalwe ohaya mono kutya omukalo nguka ohagu ningitha aantu ya pitilile po. Ohaya thikama kokule kashona e taya tegelele omuntu a thikame pusho. Ngele omuntu a thiki poshitaafula, kambadhala okukundathana naye. Oto vulu oku mu pula to ti: “Mbela owa dhiladhila ngaa nale kombinga yepulo ndino?”
Kala to longitha Ombiimbeli iikando oyindji ngaashi tashi vulika.
Popya kombinga yEkonakonombiimbeli ku kehe gumwe ngoka ta kutha shimwe shomiileshomwa yetu yokukonakonwa, ngaashi embo Omalongo gashili. Mu ulukila okavidio Mbela Ombiimbeli ohayi konakonwa ngiini? koshikwaelektronika shoye.
Ngele otashi vulika pula omuntu ngoka u ulika ohokwe nkene to vulu okukwatathana naye.