Omukalo omwaanawa nomupe gwokuuvitha miilonga yepandaanda
1. Omagongalo ngoka ge na omahala moka hamu ende aantu oyendji oga ladhipikwa ga ninge shike?
1 Omagongalo ngoka ge na omahala moka hamu ende aantu oyendji, oga ladhipikwa gu unganeke omikalo dhokugandja uunzapo womepandaanda, taga longitha iitaafula nenge uutemba. Ngele okatemba otaka longithwa, omuuvithi ngaa ando gumwe oha thikama puko nenge a kuutumbe pooha nako. Ihe piitaafula, opu na okukala aauvithi yaali. Mboka taya longitha iitaafula nuutemba oye na okukala po ye na ohole, uukuume, notaya nana aantu. Ngele omuntu ota gandja eitulomo lye koshitaafula nenge kokatemba, omuuvithi gumwe ota vulu okutameka oonkundathana naye, tashi vulika a tye, “Mbela owi ipula ngaa nale shoka Ombiimbeli tayi ti kombinga yoshikundathanwa shoka?” Omuuvithi gumwe nenge yaali otaya vulu okugandja uunzapo wontukuluka kaaye li kokule noshitaafula nenge nokatemba.
2. Hokolola oshimoniwa shoka tashi ulike nkene okugandja uunzapo womepandaanda taku longithwa iitaafula nuutemba wiileshomwa kwa simana.
2 Omukalo nguka ogwa ningitha pu tamekwe omakonakonombiimbeli ogendji omape. Omwiilongi gumwe gwokokolidji okwa li a hogolola okunyola uuyelele mokuninga omapekapeko kombinga yOonzapo dhaJehova, ihe ka li ta vulu okumona Oshinyanga shUukwaniilwa. Oshiwike sha landula ko okwa li a mono oshitaafula sha yalwa mokolidji moka. Ekonakonombiimbeli olya li lya tamekwa, nongashingeyi omulongwa ngoka oku li omuuvithi a ninginithwa noha kutha ombinga mokugandja uunzapo momukalo nguka.
3. Yamwe oyu uvitile ngiini omukalo nguka gwokugandja uunzapo womepandaanda?
3 Omumwameme gumwe ngoka ha nyanyukilwa omukalo nguka gwokugandja uunzapo womepandaanda okwa ti: “Yamwe ohaya thikama puutemba nopiitaafula ya kuthe iifo mbyoka opo ya piti. Yalwe inaya uva nando onale kombinga yOonzapo dhaJehova. Ondi wete kutya pamukalo nguka, aantu oyendji otaya vulu okuuva onkundana ombwanawa.” Omumwameme gumwe okwa ti kutya, “nguka omukalo omwaanawa, nomupe gwokuuvitha molwaashoka aantu ohaye ya kungoye, nonando kaye na naanaa ohokwe, ohaya kala ya halelela okutala.”
4. Omolwashike shi na uuwanawa okutula uutemba niitaafula yiileshomwa pethimbo limwe nopehala limwe oshiwike kehe?
4 Oshi na uuwanawa okutula uutemba niitaafula pehala limwe, mesiku lya faathana, nopethimbo lya faathana oshiwike kehe. Shoka ohashi ningitha aantu yi igilile okumona uutemba niitaafula nokukala aluhe ya manguluka okuya po nokupula omapulo nenge ya kuthe iileshomwa. Mbela egongalo lyeni olya longekidha okugandja uunzapo womepandaanda? Ngele osho, oto vulu wu kuthe ombinga momukalo nguka omwaanawa nohagu e ta iizemo iiwanawa ‘gwokuuvitha Uukwaniilwa waKalunga.’ — Luk. 9:60, yelekanitha NW.